Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 125

Dantabhūmi Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe|| ||

Tena kho pana samayena aciravato samaṇuddeso araññakuṭikāyaɱ viharati|| ||

Atha kho jayaseno rājakumāro jaŋghāvihāraɱ anucaŋkamamāno anuvicaramāno yena aciravato samaṇuddeso ten'upasaŋkami|| ||

Upasaŋkamitvā aciravatena samaṇuddesena saddhiɱ sammodi|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi|| ||

Eka-m-antaɱ nisinno kho jayaseno rājakumāro aciravataɱ samaṇuddesaɱ etad avoca: sutaɱ me taɱ bho Aggivessana, idha bhikkhu appamatto ātāpī pahitatto viharanto phuseyya cittassa ekaggatan' ti.|| ||

Evam etaɱ rājakumāra, evam etaɱ rājakumāra,||
idha bhikkhu appamatto ātāpī pahitatto viharanto phuseyya cittassa ekaggatanti.|| ||

Sādhu me bhavaɱ aggivessano yathāsutaɱ yathāpariyattaɱ dhammaɱ desetūti.|| ||

Na kho te ahaɱ rājakumāra,||
Sakkomi yathāsutaɱ yathāpariyattaɱ dhammaɱ desetuɱ|| ||

Ahaɱ carahi1 te rāja kumāra,||
yathāsutaɱ yathāpariyattaɱ Dhammaɱ deseyyaɱ,||
tvañca me bhāsitassa atthaɱ na ājāneyyāsi|| ||

So mam'assa kilamatho,||
sā mam'assa vihesāti.|| ||

[129] Desetu me bhavaɱ aggivessano yathāsutaɱ yathāpariyattaɱ dhammaɱ,||
app'evanāmāhaɱ bhoto Aggivessanassa bhāsitassa atthaɱ ājāneyyanti.|| ||

Deseyyaɱ kho te ahaɱ rājakumāra,||
yathāsutaɱ yathāpariyattaɱ dhammaɱ,||
sace me tvaɱ bhāsitassa atthaɱ ājāneyyāsi icc'etaɱ kusalaɱ|| ||

No ce me tvaɱ bhāsitassa atthaɱ ājāneyyāsi|| ||

Yathā sake tiṭṭheyyāsi na maɱ tattha uttariɱ paṭipuccheyyāsīti.|| ||

Desetu me bhavaɱ aggivessano yathāsutaɱ yathāpariyattaɱ dhammaɱ|| ||

Sace ahaɱ bhoto Aggivessanassa bhāsitassa atthaɱ ājānissāmi|| ||

Icc'etaɱ kusalaɱ,||
no ce ahaɱ bhoto Aggivessanassa bhāsitassa atthaɱ ājānissāmi|| ||

Yathā sake tiṭṭhissāmi|| ||

Nāhaɱ tattha bhavantaɱ Aggivessanaɱ uttariɱ paṭipucchissāmīti.|| ||

Atha kho aciravato samaṇuddeso jayasenassa rājakuMārassa yathāsutaɱ yathāpariyattaɱ dhammaɱ desesi|| ||

Evaɱ vutte jayaseno rājakumāro aciravataɱ samaṇuddesaɱ etad avoca: 'aṭṭhāname taɱ bho Aggivessana,||
anavakāso yaɱ bhikkhu appamatto ātāpī pahitatto viharanto phuseyya cittassa ekaggata'nti|| ||

Atha kho jayaseno rājakumāro aciravatassa samaṇuddesassa aṭṭhānatañ ca anavakāsatañ ca pavedetvā uṭṭhāy āsanā pakkāmi.|| ||

Atha kho aciravato samaṇuddeso acirapakkante jayasene rājakumāre yena Bhagavā ten'upasaŋkami|| ||

Upasaŋkamitvā Bhagavantaɱ abhivādetvā eka-m-antaɱ nisīdi|| ||

Eka-m-antaɱ nisinno kho aciravato samaṇuddeso yāvatako ahosi jayasenena rājakumārena saddhiɱ kathāsallāpo,||
taɱ sabbaɱ Bhagavato ārocesi.|| ||

Evaɱ vutte Bhagavā aciravataɱ samaṇuddesaɱ etad avoca: 'taɱ kutettha Aggivessana,||
labbhā yaɱ taɱ nekkhammena ñātabbaɱ,||
nekkhammena daṭṭhabbaɱ,||
nekkhammena pattabbaɱ,||
nekkhammena sacchikātabbaɱ,||
taɱ vata jayaseno rājakumāro kāmamajjhe vasanto kāme paribhuñjanto kāma-vitakkehi khajjamāno kāmapari'āhena pariḍayhamāno [130] kāmapariyesanāya ussukko1 ñassati vā dakkhiti vā sacchī vā karissatī'ti n'etaɱ ṭhānaɱ vijjati|| ||

Seyyathā pissu Aggivessana,||
dve hatth'idammā vā assadammā vā godammā vā sudantā suvinītā,||
dve hatth'idammā vā assadammā vā godammā vā adantā avinītā|| ||

Taɱ kiɱ maññasi Aggivessana,||
ye te dve hatth'idammā vā assadammā vā godammā vā sudantā suvinītā,||
api nu te dantāva dantakāraṇaɱ gaccheyyuɱ,||
dantāva dantabhūmiɱ sampāpuṇeyyunti.|| ||

Evaɱ bhante.|| ||

Ye pana te dve hatth'idammā vā assadammā vā godammā vā adantā avinītā,||
api nu te adantāva dantakāraṇaɱ gaccheyyuɱ|| ||

Adantāva dantabhūmiɱ sampāpuṇeyyuɱ|| ||

Syethāpi te dve hatth'idammā vā assadammā vā godammā vā sudantā suvinītāti:|| ||

No h'etaɱ bhante.|| ||

Evam eva kho Aggivessana,||
yaɱ taɱ nekkhammena ñātabbaɱ nekkhammena daṭṭhabbaɱ nekkhammena pattabbaɱ nekkhammena sacchikātabbaɱ,||
taɱ vata jayaseno rājakumāro kāmamajjhe vasanto kāme paribhuñjanto kāma-vitakkehi khajjamāno kāmapari'āhena pariḍayhamāno kāmapariyesanāya ussukko ñassati vā dakkhiti vā sacchī vā karissatīti n'etaɱ ṭhānaɱ vijjati.|| ||

Syethāpi Aggivessana,||
gāmassa vā nigamassa vā avidūre mahāpabbato,||
tam enaɱ dve sahāyakā tamhā gāmā vā nigamā vā nikkhamitvā hatthavilaŋghakena yena so pabbato,||
ten'upasaŋkameyyuɱ|| ||

Upasaŋkamitvā eko sahāyako heṭṭhā pabbatapāde tiṭṭheyya|| ||

Eko sahāyako uparipabbataɱ āroheyya|| ||

Tam enaɱ heṭṭhā pabbatapāde ṭhito sahāyako uparipabbate ṭhitaɱ sahāyakaɱ evaɱ vadeyya: 'yaɱ samma kiɱ tvaɱ passasi uparipabbate ṭhito'ti: so evaɱ vadeyya: 'passāmi|| ||

Kho ahaɱ samma,||
upari pabbate ṭhito ārāmarāmaṇeyyakaɱ vanarāmaṇeyyakaɱ bhūmirāmaṇeyyakaɱ pokkharaṇīrāmaṇeyyanti|| ||

So evaɱ vadeyya: aṭṭhānaɱ kho etaɱ [131] samma,||
anavakāso yaɱ tvaɱ uparipabbate ṭhito pasesayyāsi ārāmarāmaṇeyyakaɱ vanarāmaṇeyyakaɱ bhūmirāmaṇeyyakaɱ pokkharaṇī rāmaṇeyyakanti|| ||

Tam enaɱ uparipabbate ṭhito sahāyako heṭṭhimapabbatapādaɱ orohitvā taɱ sahāyakaɱ bāhāyaɱ gahetvā uparipabbataɱ āropetvā muhuttaɱ assāsetvā evaɱ vadeyya: 'yaɱ samma kiɱ tvaɱ passasi uparipabbate ṭhitoti|| ||

So evaɱ vadeya: 'passāmi kho ahaɱ samma,||
uparipabbate ṭhito ārāmarāmaṇeyyakaɱ vanarāmaṇeyyakaɱ bhūmirāmaṇeyyakaɱ pokkharaṇīrāmaṇeyyakanti|| ||

So evaɱ vadeyya: 'idān'eva kho te samma,||
bhāsitaɱ: 'mayaɱ evaɱ ājānāma: aṭṭhānaɱ kho etaɱ samma,||
anavakāso yaɱ tvaɱ uparipabbate ṭhito passeyyāsi ārāmarāmaṇeyyakaɱ vanarāmaṇeyyakaɱ bhūmirāmaṇeyyakaɱ pokkharaṇīrāmaṇeyyakanti|| ||

Idān'eva ca pana te bhāsitaɱ: 'mayaɱ evaɱ ājānāma: passāmi kho ahaɱ samma,||
uparipabbate ṭhito ārāmarāmaṇeyyakaɱ vanarāmaṇeyyakaɱ bhūmirāmaṇeyyakaɱ pokkharaṇīrāmaṇeyyakanti|| ||

So evaɱ vadeyya: tathā hi panāhaɱ samma,||
iminā mahatā pabbatena āvuto daṭṭheyyaɱ nāddasanti.|| ||

Evam eva kho ato mahantatarena kho Aggivessana,||
avijjā khandhena jayaseno rājakumaro āvuto nivuto ovuto,||
pariyonaddho|| ||

So vata yaɱ taɱ nekkhammena ñātabbaɱ,||
nekkhammena daṭṭhabbaɱ,||
nekkhammena pattabbaɱ,||
nekkhammena sacchikātabbaɱ,||
taɱ vata jayaseno rājakumāro kāmamajjhe vasanto kāme paribhuñjanto kāma-vitakkehi khajjamāno kāmapari'āhena pariḍayhamāno kāmapariyesanāya ussuko ñassati vā dakkhiti vā sacchi vā karissatīti n'etaɱ ṭhānaɱ vijjati|| ||

Sace kho taɱ Aggivessana,||
jayasenassa rājakuMārassa imā dve upamā paṭibhāseyyuɱ anacchariyaɱ te jayaseno rājakumāro pasīdeyya: pasanno ca te pasannākāraɱ kareyyāti|| ||

|| ||

Kuto pana maɱ bhante,||
jayasenassa rājakuMārassa imā dve upamā paṭibhāsissanti anacchariyā pubbe assutapubbā|| ||

Seyyathā pi Bhagavantanti.|| ||

[132] seyyathā pi Aggivessana,||
rājā khattiyo muddhāvasitto nāgavanikaɱ āmanteti: tvaɱ samma nāgavanika,||
rañño nāgaɱ abhiruhitvā nāgavanaɱ pavisitvā āraññakaɱ nāgaɱ atipassitvā rañño nāgassa gīvāya upanibandhāhīti|| ||

Evaɱ devā ti kho Aggivessana,||
nāgavaniko rañño khattiyassa muddhāvasittassa paṭissutvā rañño nāgaɱ abhiruhitvā nāgavanaɱ pavisitvā āraññakaɱ nāgaɱ atipassitvā rañño nāgassa gīvāya upanibandhati|| ||

Tam enaɱ rañño nāgo abbhokāsaɱ nīharati|| ||

Ettāvatā ca kho Aggivessana,||
āraññako nāgo abbhokāsaɱ gato hoti|| ||

Ettha gedhā hi Aggivessana,||
āraññakā nāgā yad idaɱ nāgavanaɱ,||
tam enaɱ nāgavaniko rañño khattiyassa muddhāvasittassa āroceti; abbhokāsagato kho deva,||
āraññako nāgoti.|| ||

Atha kho Aggivessana tam enaɱ rājā khattiyo muddhāvasitto hatth'idamakaɱ āmantesi: ehi tvaɱ samma hatth'idamaka,||
āraññakaɱ nāgaɱ damayāhi āraññakānañc'eva sīlānaɱ abhinimmadanāya,||
āraññakānañc'eva sarasaŋkappānaɱ abhinimmadanāya,||
āraññakānañc'eva darathakilamathapari'āhānaɱ abhinimmadanāya,||
gāmante abhiramāpanāya,||
manussakantesu sīlesu samādapanāyāti|| ||

Evaɱ devā ti kho Aggivessana,||
hatth'idamako rañño khattiyassa muddhāvasittassa paṭissutvā mahantaɱ thamhaɱ paṭhaviyaɱ nikhaṇitvā āraññakassa nāgassa gīvāyaɱ uparibandhati|| ||

Āraññakānañc'eva sīlānaɱ abhinimmadanāya,||
āraññakānañc'eva sarasaŋkappānaɱ abhinimmadanāya,||
āraññakānañc'eva darathakilamathapari'āhānaɱ abhinimmadanāya,||
gāmante abhiramāpanāya manussa kantesu sīlesu samādapanāya|| ||

Tam enaɱ hatth'idamako yā sā vācā ne'ā kaṇṇa-sukhā pemanīyā hadayaŋ-gamā pori bahujana-kantā bahujana-manāpā,||
tathārūpāhi vācāhi samudācarati|| ||

Yato kho Aggivessana,||
āraññako nāgo hatth'idamakassa yā sā vācā ne'ā kaṇṇa-sukhā pemanīyā hadayaŋ-gamā porī bahujana-kantā [133] bahujana-manāpā,||
tathārūpāhi vācāhi samudācariyamāno sussūsati|| ||

Sotaɱ odahati|| ||

Aññā cittaɱ upaṭṭhapeti|| ||

Tam enaɱ hatth'idamako uttariɱ tiṇaghāsodakaɱ anuppavecchati.|| ||

Yato kho Aggivessana āraññako nāgo hatth'idamakassa tiṇaghāsodakaɱ patigaṇhāti.|| ||

Tatra hatth'idamakassa evaɱ hoti: jivissati khodāni āraññako nāgo' ti|| ||

Tam enaɱ hatth'idamako uttariɱ kāraṇaɱ kāreti|| ||

Ādiya bho, nikkhipa bhoti|| ||

Yato kho Aggivessana,||
āraññako nāgo hatth'idamakassa ādānanikkhepe vacanakaro hoti 'ovādapatikaro.|| ||

Tam enaɱ hatth'idamako uttariɱ kāraṇaɱ kāreti|| ||

Abhikkama bho,||
paṭikkama bhoti|| ||

Yato kho Aggivessana,||
āraññako nāgo hatth'idamakassa abhikkamapaṭikkame vacanakaro hoti,||
'ovāda patikaro|| ||

Tam enaɱ hatth'idamako uttariɱ kāraṇaɱ kāreti|| ||

Uṭṭhaha bho, nisīda bhoti.|| ||

Yato kho Aggivessana,||
āraññako nāgo hatth'idamakassa uṭṭhānanisajjāya7 vacanakaro hoti,||
'ovādapatikaro|| ||

Tam enaɱ hatth'idamako uttariɱ āneñjaɱ nāma kāraṇaɱ kāreti|| ||

Mahanta'ssa phalakaɱ soṇḍāya upanibandhati|| ||

Tomārahattho ca puriso upari gīvāya nisinno hoti|| ||

Samantato ca tomarahatthā purisā parivāretvā ṭhitā honti|| ||

Hatth'idamako ca dīgha tomarayaṭṭhiɱ gahetvā purato ṭhito hoti|| ||

So āneñjakaraṇaɱ kāriyamāno n'eva purime pāde copeti,||
na pacchime pāde copeti,||
na purimaɱ kāyaɱ copeti,||
na pacchimaɱ kāyaɱ copeti|| ||

Na sīsaɱ copeti|| ||

Na kaṇṇe copeti|| ||

Na dante copeti|| ||

Na naŋguṭṭhaɱ copeti|| ||

Na soṇḍaɱ copeti|| ||

So hoti āraññako nāgo khamo sattippahārānaɱ asippahārānaɱ usuppahārānaɱ parasatthappahārānaɱ1 bheripaṇava2 vaɱsasaŋkhadeṇḍima3ninnādasaddānaɱ sabbavaŋkadosanihitaninnītakasāvo rājaraho rājabhoggo rañño aŋganteva saŋkhaɱ gacchati.|| ||

[134] Evam eva kho Aggivessana,||
idha Tathāgato loke upapajjati arahaɱ Sammā-sambuddho vijjā-caraṇa-sampanno sugato lokavidu anuttaro purisa-damma-sārathī satthā deva-manussānaɱ buddho Bhagavā|| ||

So imaɱ lokaɱ sadevakaɱ samārakaɱ sabrahmakaɱ sassamaṇabrahmaṇiɱ pajaɱ sadeva-manussaɱ sayaɱ abhiññā sacchikatvā pavedeti|| ||

So dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Taɱ dhammaɱ suṇāti gahapati vā gahapatiputto vā aññatarasmiɱ vā kule paccājāto|| ||

So taɱ dhammaɱ sutvā Tathāgate saddhaɱ paṭilabhati|| ||

So tena saddhāpaṭilābhena samannāgato iti paṭisañcikkhati: "sambādho gharāvāso rajāpatho,||
abbhākāso pabbajjā|| ||

Na-y-idaɱ sukaraɱ agāraɱ ajjhāvasatā ekanta-paripuṇṇaɱ ekanta-parisuddhaɱ saŋkhalikhitaɱ brahmacariyaɱ carituɱ|| ||

Yaknūnāhaɱ kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajeyyan" ti|| ||

so aparena samayena appaɱ vā bhogakkhandhaɱ pahāya mahantaɱ vā bhogakkhandhaɱ pahāya appaɱ vā ñātiparivaṭṭaɱ pahāya mahantaɱ vā ñāti parivaṭṭaɱ pahāya kesamassuɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

Ettāvatā kho Aggivessana,||
ariyasāvako abbhokāsagato hoti|| ||

Ettha gedhā hi Aggivessana,||
deva-manussā,||
yad idaɱ pañcakāmaguṇā|| ||

Tam enaɱ Tathāgato uttariɱ vineti: 'ehi tvaɱ bhikkhū sīlavā hohi|| ||

Pātimokkhasaɱvarasaɱvuto viharāhi,||
ācāra-gocara-sampanno,||
aṇumattesu vajjesu bhaya-dassāvī samādāya sikkhassu sikkhāpadesū' ti.|| ||

Yato kho Aggivessana,||
ariyasāvako sīlavā hoti|| ||

Pātimokkhasaɱvarasaɱvuto viharati|| ||

Ācāragocarasampanno,||
aṇumattesu vajjesu bhaya-dassāvī,||
samādāya sikkhati sikkhāpadesu|| ||

Tam enaɱ Tathāgato uttariɱ vineti|| ||

'Ehi tvaɱ bhikkhu indriyesu guttadvāro hohi|| ||

Cakkhunā rūpaɱ disvā mā nimittaggāhī|| ||

Mānubyañjanaggāhī|| ||

Yatvādhikaraṇamenaɱ cakkhu'ndriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha cakkhu'ndriyaɱ|| ||

Cakkhundriye saɱvaraɱ āpajja|| ||

Sotena saddaɱ sutvā mā nimittaggāhī|| ||

Mānubyañjanaggāhī|| ||

Yatvādhikaraṇamenaɱ sot'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha sotindiyaɱ|| ||

Sotindriye saɱvaraɱ āpajja|| ||

Ghānena gandhaɱ ghāyitvā mā nimittaggāhī|| ||

Mānubyañjanaggāhī|| ||

Yatvādhikaraṇamenaɱ ghān'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha ghān'indriyaɱ|| ||

Ghānindriye saɱvaraɱ āpajja|| ||

Jivhāya rasaɱ sāyitvā mā nimittaggāhī|| ||

Mānubyañjanaggāhī|| ||

Yatvādhikaraṇamenaɱ jivh'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha jivh'indriyaɱ|| ||

Jivhindriye saɱvaraɱ āpajja|| ||

Kāyena phoṭṭhabbaɱ phusitvā mā nimittaggāhī|| ||

Mānubyañjanaggāhī|| ||

Yatvādhikaraṇamenaɱ kāy'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha kāy'indriyaɱ|| ||

Kāyindriye saɱvaraɱ āpajja|| ||

Manasā dhammaɱ viññāya mā nimittaggāhī|| ||

Mānubyañjanaggāhī,||
yatvādhikaraṇamenaɱ man'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajja|| ||

Rakkha man'indriyaɱ|| ||

Manindriye saɱvaraɱ āpajjā' ti.|| ||

Yato kho Aggivessana,||
ariyasāvako indriyesu guttadvāro hoti|| ||

Tam enaɱ Tathāgato uttariɱ vineti|| ||

Ehi tvaɱ bhikkhu,||
bhojane mattaññu hohi|| ||

Paṭisaŋkhāyoniso āhāraɱ āhāreyyāsi|| ||

N'eva davāya na madāya na maṇḍanāya na vibhusanāya,||
yāvad eva imassa kāyassa ṭhitiyā yāpanāya,||
vihiɱsūparatiyā brahmacariyānuggahāya|| ||

Iti purāṇañ ca vedanaɱ paṭihaŋkhāmi|| ||

Navañca vedanaɱ na uppādessāmi|| ||

Yātrā ca me bhavissati anavajjatā ca phāsuvihāro cā ti.|| ||

Yato [135] kho Aggivessana,||
ariyasāvako bhojane mattaññū hoti|| ||

Tam enaɱ Tathāgato uttariɱ vineti: ehi tvaɱ bhikkhu jāgariyaɱ anuyutto viharāhi|| ||

Divasaɱ caŋkamena nisajjāya avaraṇīyehi dhammehi cittaɱ parisodhehi|| ||

Rattiyā paṭhamaɱ yāmaɱ caŋkamena nisajjāya āvaraṇīyehi dhammehi cittaɱ parisodhehi|| ||

Rattiyā majjhimaɱ yāmaɱ dakkhiṇena passena sīhaseyyaɱ kappeyyāsi pāde pādaɱ accādhāya sato sampajāno uṭṭhānasaññaɱ manasi karitvā rattiyā pacchimaɱ yāmaɱ paccuṭṭhāya caŋkamena nisassāya āvaraṇīyehi dhammehi cittaɱ parisodhehī' ti.|| ||

Yato kho Aggivessana,||
ariyasāvako jāgariyaɱ anuyutto hoti|| ||

Tam enaɱ Tathāgato uttariɱ vineti: 'ehi tvaɱ bhikkhu satisampajaññena samannāgato hohi|| ||

Abhikkante paṭikkante sampajānakārī ālokite vilokite sampajānakārī sammiñjite pasārite sampajānakārī sanghāṭipattacīvaradhāraṇe sampajānakārī asite pīte khāyite sāyite sampajānakārī uccārapassāvakamme sampajānakārī gate ṭhite nisinne sutte jāgarite bhāsite tuṇhībhāve sampajānakārī hohī' ti.|| ||

Yato kho Aggivessana,||
ariyasāvako satisampajaññena samannāgato hoti,||
tam enaɱ Tathāgato uttariɱ vineti: ehi tvaɱ bhikkhu vivittaɱ senāsanaɱ bhaja,||
araññaɱ rukkhamūlaɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjanti|| ||

So vivittaɱ senāsanaɱ bhajati araññaɱ rukkhamūlaɱ pabbataɱ kandaraɱ giriguhaɱ susānaɱ vanapatthaɱ abbhokāsaɱ palālapuñjaɱ|| ||

So pacchābhattaɱ piṇḍapātapaṭikkanto nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā|| ||

So abhijjhaɱ loke pahāya vigatābhijjhena cetasā viharati|| ||

Abhijjhāya cittaɱ parisodheti|| ||

vyāpādapadosaɱ pahāya avyāpannacitto viharati sabba-pāṇa-bhūta-hitānukampī|| ||

vyāpādapadosā cittaɱ parisodheti|| ||

Thīnamiddhaɱ pahāya vigatathīnamiddho viharati ālokasaññī sato sampajāno,||
thīnamiddhā cittaɱ parisodheti|| ||

Uddhaccakukkuccaɱ pahāya anuddhato viharati ajjhattaɱ vupasantacitto|| ||

Uddhaccakukkuccā cittaɱ parisodheti|| ||

Vicikicchaɱ [136] pahāya tiṇṇavicikiccho viharati akathaŋkathī kusalesu dhammesu|| ||

Vicikicchāya cittaɱ parisodheti.|| ||

So ime pañca nīvaraṇe pahāya cetaso upakkilese paññāya dubbalikaraṇe kāye kāyānupassī viharati ātāpī sampajāno satimā vineyya loke abhijjhā-domanassaɱ|| ||

Vedanāsu vedanānupassī viharati ātāpī sampajāno satimā vineyya loke abhijjhā-domanassaɱ|| ||

Citte cittānupassī viharati ātāpī sampajāno satimā vineyya loke abhijjhā-domanassaɱ|| ||

Dhammesu dhammānupassī viharati ātāpī sampajāno satimā vineyya loke abhijjhā-domanassaɱ|| ||

Seyyathā pi Aggivessana,||
hatth'idamako mahantaɱ thambhaɱ paṭhaviyaɱ nikhaṇitvā āraññakassa nāgassa gīvāyaɱ upanibandhati|| ||

Āraññakānañc'eva sīlānaɱ abhinimmadanāya,||
āraññakānañc'eva sarasaŋkappānaɱ abhinimmadanāya,||
āraññakānañc'eva darathakilamathapari'āhānaɱ abhinimmadanāya,||
gāmante abhiramāpanāya,||
manussakantesu sīlesu sampādanāya1 evam eva kho Aggivessana,||
ariyasāvakassa ime cattāro satipaṭṭhānā cetaso upanibandhanā honti|| ||

Gehasitānañc'eva sīlānaɱ abhinimmadanāya,||
gehasitānañc'eva sarasaŋkappānaɱ abhinimmadanāya,||
gehasitānañc'eva darathakilamathapari'āhānaɱ abhinimmadanāya,||
ñāyassa adhigamāya nibbānassa sacchikiriyāya.|| ||

Tam enaɱ Tathāgato uttariɱ vineti: ehi tvaɱ bhikkhu,||
kāye kāyānupassī viharāhi|| ||

Mā ca kāmūpasaɱhitaɱ1 vitakkaɱ vitakkesi|| ||

Vedanāsu vedanānupassī viharāhi|| ||

Mā ca kāmūpasaɱhitaɱ1 vitakkaɱ vitakkesi|| ||

Citte cittānupassī viharāhi|| ||

Mā ca kāmūpasaɱhitaɱ1 vitakkaɱ vitakkesi|| ||

Dhammesu dhammānupassi viharāhi|| ||

Mā ca kāmūpasaɱhitaɱ vitakkaɱ vitakkesī' ti|| ||

So vitakkavicāranaɱ vupasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati|| ||

Pītiyā ca virāgā upekkhako ca viharati|| ||

Sato ca sampajāno sukhaɱ ca kāyena paṭisaŋvedeti|| ||

Yantaɱ riyā ācikkhanti 'Upekkhako satimā sukha-vihārī' ti tatiyaɱ-jhānaɱ upasampajja viharati|| ||

Sukhassa ca pahānā dukkhassa ca pahānā pubbe va somanassa domanassānaɱ atthaŋgamā adukkhaɱ-asukhaɱ upekkhā sati pārisuddhiɱ catutthaɱ-jhānaɱ upasmapajja viharati.|| ||

So evaɱ samāhite citte parisuddhe pariyodāte anaŋgaṇe vigatūpakkilese muhubhute kammaṇiye ṭhite ānejjappatte pubbenivāsānussatiñāṇāya cittaɱ abhininnāmeti|| ||

So aneka-vihitaɱ pubbenivāsaɱ anussarati|| ||

Seyyathīdaɱ: ekam pi jātiɱ dve pi jātiyo Tisso pi jātiyo pañca pi jātiyo dasa pi jātiyo vīsatim pi jātiyo tiɱsam pi jātiyo cattārīsam pi jātiyo paññāsam pi jātiyo jāti-satam pi jātiyo jāti-sahassam pi jāti-sata-sahassam pi,||
anekepi saɱvaṭṭakappe anekepi vivaṭṭakappe anekepi saɱvaṭṭa-vivaṭṭakappe; 'amutrāsiɱ evaɱnāmo evaɱgotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto,||
so tato vuto amutra upapādī,||
tatrāpāsiɱ evaɱnāmo evaɱgotto evaɱ-vaṇṇo evamahāro evaɱ-sukha-dukkha-paṭisaŋvedī evam-āyu-pariyanto,||
so tato cuto idhūpapanno' ti|| ||

Iti sākāraɱ sa-uddesaɱ aneka-vihitaɱ pubbenivāsaɱ anussarati.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhute kammaṇīye ṭhite ānejjappatte sattānaɱ cutūpapātañāṇāya cittaɱ abhininnāmeti|| ||

So dibbena cakkhunā visuddhena atikkantamānusakena satte passati vacamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti: ime vata bhonto sattā kāyaduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā; ime vata pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anūpavādakā sammādiṭṭhikā sammādiṭṭhikammasamādānā,||
te kāyassa bhedā param maraṇā sugatiɱ saggaɱ lokaɱ upapannā' ti|| ||

Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate,||
yathākammūpage satte pajānāti.|| ||

So evaɱ samāhite citte parisuddhe pariyodāte anaŋgaṇe vigatūpakkilese mudubhūte kammaṇīye ṭhite ānejjappatte āsavānaɱ khayañāṇāya cittaɱ abhininnāmeti|| ||

So idaɱ dukkhan ti yathābhūthaɱ pajānāti|| ||

Ayaɱ dukkhasamudayo ti yathābhūtaɱ pajānāti|| ||

Ayaɱ dukkhanirodho ti yathābhūtaɱ pajānāti|| ||

Ayaɱ dukkhanirodhagāminīpaṭipadā ti yathābhūtaɱ pajānāti|| ||

Ime āsavāti yathābhūtaɱ pajānāti|| ||

Ayaɱ āsavasamudayoti yathābhūtaɱ pajānāti|| ||

Ayaɱ āsavanirodhoti yathābhūtaɱ pajānāti|| ||

Ayaɱ āsavanirodhagāminīpaṭipadā ti yathābhūtaɱ pajānāti|| ||

Tassa evaɱ jānato evaɱ passato kāmāsavā pi cittaɱ vimuccati|| ||

Bhavāsavāpi cittaɱ vimuccati|| ||

Avijjāsavāpi cittaɱ vimuccati|| ||

Vimuttasmiɱ vimuttamiti ñāṇaɱ hoti|| ||

Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyāti pajānāti.|| ||

So hoti,||
bhikkhu khamo sītassa uṇhassa jīghacchāya pipāsāya ḍaɱsamakasavātātapasiriɱsapasamphassānaɱ duruttānaɱ durāgatānaɱ vacanapathānaɱ uppannānaɱ sārīrikānaɱ [137] vedanānaɱ dukkhānaɱ tippānaɱ kharānaɱ kaṭukānaɱ asātānaɱ amanāpānaɱ pāṇaharānaɱ adhivāsakajātiko hoti.|| ||

Sabbarāgadosamohanihataninnītakasāvo āhuṇeyyo pāhuṇeyyo dakkhiṇeyyo añjalikaraṇīyo anuttaraɱ puññakkhettaɱ lokassāti.|| ||

Mahallako ce pi Aggivessana,||
rañño nāgo adanto avinīto kālaɱkaroti|| ||

Adantamaraṇaɱ mahallako rañño nāgo kālaŋkatotv'eva saŋkhaɱ gacchati|| ||

Majjhimo ce pi Aggivessana,||
rañño nāgo adanto avinīto kālaɱkaroti|| ||

Adantamaraṇaɱ majjhimo rañño nāgo kālaŋkatotv'eva saŋkhaɱ gacchati|| ||

Daharo ce pi Aggivessana,||
rañño nāgo adanto avinīto kālaɱkaroti|| ||

Adantamaraṇaɱ daharo rañño nāgo kālaŋkakatotv'eva saŋkhaɱ gacchati|| ||

Evam eva kho Aggivessana thero ce pi bhikkhu akhīṇāsavo kālaɱkaroti|| ||

Adantamaraṇaɱ thero bhikkhu kālaŋkakatotv'eva saŋkhaɱ gacchati|| ||

Majjhimo ce pi Aggivessana bhikkhu akhīṇāsavo kālaɱkaroti|| ||

Adantamaraṇaɱ thero bhikkhu kālaŋkakatotv'eva saŋkhaɱ gacchati|| ||

Navo ce pi Aggivessana,||
bhikkhu akhīṇāsavo kālaɱ karoti|| ||

Adantamaraṇaɱ navo bhikkhu kālaŋkatotv'eva saŋkhaɱ gacchati.|| ||

Mahallako ce pi Aggivessana,||
rañño nāgo sudanto suvinīto kālaɱkaroti|| ||

Dantamaraṇaɱ mahallako rañño nāgo kālaŋkatotv'eva saŋkhaɱ gacchati|| ||

Majjhimo ce pi Aggivessana,||
rañño nāgo sudanto suvinīto kālaɱkaroti|| ||

Dantamaraṇaɱ majjhimo rañño nāgo kālaŋkatotv'eva saŋkhaɱ gacchati.Daharo ce pi Aggivessana,||
rañño nāgo sudatto suvinīto kālaɱkaroti|| ||

Dantamaraṇaɱ daharo rañño nāgo kālaŋkattotv'eva saŋkhaɱ gacchati|| ||

Evam eva kho Aggivessana thero ce pi bhikkhu khīṇāsavo kālaɱkaroti|| ||

Dantamaraṇaɱ thero bhikkhu kālakaŋkatotv'eva saŋkhaɱ gacchati|| ||

Majjhimo ce pi Aggivessana,||
bhikkhu khīṇāsavo kālaɱkaroti|| ||

Dantamaraṇaɱ thero bhikkhu kālaŋkakatotv'eva saŋkhaɱ gacchati|| ||

Navo ce pi Aggivessana bhikkhu khīṇāsavo kālaɱ karoti|| ||

Dantamaraṇaɱ navo bhikkhu kālaŋkatotv'eva saŋkhaɱ gacchati.|| ||

Idam avoca Bhagavā attamano aciravato samaṇuddeso Bhagavato bhāsitaɱ abhinandīti.|| ||

Dantabhūmi suttaɱ pañcamaɱ


 

Contact:
E-mail
Copyright Statement   Webmaster's Page