Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 126

Bhūmija Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe, atha kho āyasmā bhūmijo pubbaṇha-samayaɱ nivāsetvā pattacivaramādāya yena jayasenassa rājakuMārassa nivesanaɱ, ten'upasaŋkami. Upasaŋkamitvā paññattena āsane nisīdi.|| ||

Atha kho jayaseno rājakumāro yen'āyasmā bhūmijo ten'upasaŋkami. Upasaŋkamitvā āyasmatā bhūmijena saddhiɱ sammodi. Sammodanīyaɱ kathaɱ sārāṇīyaɱ vitisāretvā eka-m-antaɱ nisīdī. Eka-m-antaɱ nisinno kho jayaseno rājakumāro āyasmantaɱ bhūmijaɱ etad avoca: santi bo bhūmija. Eke samaṇa-brāhmaṇā evaɱvādino evaɱ-diṭṭhino: āsañ ce pi karitvā brahamcariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāyāti. Idha bhoto bhūmijassa satthā kiɱvādī kimakkhāyī' ti?|| ||

Na kho me taɱ rājakumāra, Bhagavato sammukhā sutaɱ, sammukhā paṭiggahitaɱ. Ṭhānañca kho etaɱ vijjati yaɱ Bhagavā evaɱ vyākareyya: āsañ ce pi karitvā ayoniso brahmacariyaɱ caranti, abhabbā phalassa adhigamāya anāsañ ce pi karitvā ayoniso brahmacariyaɱ caranti, abhabbā phalassa adhigamāya. Āsañca anāsañ ce pi karitvā ayoniso brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā ayoniso brahmacariyaɱ caranti, abhabbā phalassa adhigamāya. Āsañ ce pi karitvā yoniso brahmacariyaɱ caranti, bhabbā phalassa [139] adhigamāya. Anāsañ ce pi karitvā yoniyo brahmacariyaɱ caranti, bhabbā phalassa adhigamāya. Āsañca anāsañ ce pi karitvā yoniso brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā yoniso brahmacariyaɱ caranti, bhabbā phalassa adhigamāyāti. Na kho me taɱ rājakumāra, Bhagavato sammukhā sutaɱ, sammukhā paṭiggahitaɱ, ṭhānañca kho etaɱ vijjati, yaɱ Bhagavā evaɱ vyākareyyāti.|| ||

Sace kho bhoto bhūmijassa satthā evaɱ-vādī evamakkhāyī, addhā bhoto bhūmijassa satthā sabbesaɱyeva puthusamaṇa-brāhmaṇānaɱ muddhānaɱ maññe āhacca tiṭṭhatīti. Atha kho jayaseno rājakumāro āyasmantaɱ bhūmijaɱ saken'eva thālipākena parivisi.|| ||

Atha kho āyasmā bhūmijo pacchābhattaɱ piṇḍapātapaṭikkanto yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi. Eka-m-antaɱ nisinno kho āyasmā bhūmijo Bhagavantaɱ etad avoca: 'idhāhaɱ bhante pubbaṇha-samayaɱ nivāsetvā pattacīvaramādāya yena jayasenassa rājakuMārassa nivesanaɱ, ten'upasaŋkamiɱ. Upasaŋkamitvā paññatte āsane nisīdiɱ. Atha kho bhante jayaseno rājakumāro yenāhaɱ, ten'upasaŋkami. Upasaŋkamitvā mama saddhiɱ1 sammodi. Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi. Eka-m-antaɱ nisinno kho bhante, jayaseno rājakumāro maɱ etad avoca: 'santi bho bhūmija, eke samaṇa-brāhmaṇā evaɱvādino evaɱ-diṭṭhino āsañ ce pi karitvā buhmacariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāyāti. Idha bhoto bhūmijassa satthā kiɱvādī kimakkhāyīti?|| ||

Evaɱ vutte ahaɱ bhante, jayasenaɱ rājakuMāraɱ etad avocaɱ: 'na kho me taɱ rājakumāra, Bhagavato sammukhā sutaɱ sammukhā paṭiggahitaɱ. Ṭhānaɱ ca kho etaɱ vijjati, yaɱ Bhagavā evaɱ vyākareyya: 'āsañ ce pi karitvā ayoniso brahmacariyaɱ caranti, abhabbā phalassa adhigamāya. Āsañca anāsañ ce pi karitvā ayoniso brahmacariyaɱ caranti, abhabbā phalassa adhigamāya. Sañ ce pi karitvā ayoniso brahmacariyaɱ caranti, abhabbā phalassa adhigamāya. Āsañ ce pi karitvā yoniso brahmacariyaɱ caranti, bhabbā phalassa adhigamāya, anāsañ ce pi karitvā yoniyo brahmacariyaɱ caranti, bhabbā phalassa adhigamāya. Āsañca anāsañ ce pi karitvā yoniyo brahmacariyaɱ caranti, bhabbā phalassa adhigamāya. Āsañca anāsañ ce pi karitvā yoniso brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā yoniso brahmacariyaɱ caranti, bhabbā phalassa adhigamāyā' ti. Na kho me taɱ rājakumāra, Bhagavato sammukhā sutaɱ sammukhā paṭiggahitaɱ. Ṭhānañca kho etaɱ vijjati: yaɱ Bhagavā evaɱ vyākareyyāti. Sace bhoto bhūmijassa satthā evaɱ-vādī evaɱ-diṭṭhi addhā bhoto bhūmijassa satthā sabbesaɱ yeva puthusamaṇa-brāhmaṇānaɱ muddhānaɱ maññe āhacca tiṭṭhatī ti.|| ||

Kacci bhante, evaɱ puṭṭho evaɱ vyākaramāno vuttavādī c'eva Bhagavato homi, na ca Bhagavantaɱ abhūtena abbhācikkhāmī. Dhammassa cānudhammaɱ vyākaromi. Na ca koci sahadhammiko vādānuvādo gārayhaɱ ṭhānaɱ āgacchatī ti.|| ||

[140] Taggha tvaɱ bhūmija, evaɱ puṭṭho evaɱ vyākaramāno vuttavādī c'eva me hoyi, na ca maɱ abhūtena abbhācikkhasi, Dhammassa cānudhammaɱ vyākarosi. Na ca koci sahadhammiko vādānuvādo gārayhaɱ ṭhānaɱ āgacchati.|| ||

Ye hi keci bhūmija, samaṇā vā brāhmaṇā vā micchādiṭṭhino micchāsaŋkappā micchāvācā micchākammantā micchāājīvā micchāvāyāmā micchāsatī micchāsamādhino, te āsañ ce pi karitvā brahmacariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāya. Taɱ kissa hetu? ayoni hesā bhūmija, phalassa adhigamāya.|| ||

Seyyathā pi bhūmija, puriso telatthiko telagavesī telapariyesanaɱ caramāno vālikaɱ doṇiyā ākiritvā udakena paripphosakaɱ paripphosakaɱ pī'eyya, āsañ ce pi karitvā vālikaɱ doṇiyā ākiritvā udakena paripphosakaɱ pī'eyya, abhabbo telassa adhigamāya. Anāsañ ce pi karitvā vālikaɱ doṇiyā ākaritvā udakena paripphosakaɱ paripphosakaɱ pī'eyya, abhabbo telassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo telassa adhigamāya. Nevāsaɱ nānāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo telassa adhigamāya. Taɱ kissa hetu? ayoni hesā1 bhūmija, telassa adhigamāya. Evam eva kho bhūmija, ye hi keci samaṇā vā brāhmaṇā vā micchādiṭṭhino micchāsaŋkappā micchāvācā micchākammantā micchāājīvā micchāvāyāmā micchāsatī micchāsamādhino, te āsañ ce pi karitvā brahmacariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāya. [141] taɱ kissa hetu: ayoni hesā1 bhūmija, phalassa adhigamāya.|| ||

Seyyathā pi bhūmija, puriso khīratthiko khīragavesī khīrapariyesanaɱ caramāno gāviɱ taruṇavacchaɱ visāṇato āviñjeyya, āsañ ce pi karitvā gāviɱ taruṇavacchaɱ visāṇato āviñjeyya, abhabbo khīrassa adhigamāya. Anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo khīrassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo khīrassa adhigamāya. Nevāsaɱ nānāsañ ce pi karitvā gāviɱ taruṇavacchaɱ visāṇato āviñjeyaya, abhabbo khīrassa adhigamāya. Taɱ kissa hetu? ayoni hesā bhūmija, khīrassa adhigamāya. Evam eva kho bhūmija, ye hi keci samaṇā vā brāhmaṇā vā micchādiṭṭhino micchāsaŋkappā micchāvācā micchākammantā micchāājīvā micchāvāyāmā micchāsatī micchāsamādhino te āsañ ce pi karitvā brahmacariyaɱ caranti. Abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāya. Taɱ kissa hetu? ayoni hesā1 bhūmija, phalassa adhigamāya.|| ||

Seyyathā pi bhūmija, puriso nonītatthiko nonīta2gavesī nonītapariyesanaɱ caramāno udakaɱ kalase āsiñcitvā manthena3 āviñjeyya, āsañ ce pi karitvā udakaɱ kalase āsiñcitvā matthena3 āviñjeyya, abhabbo nonītassa adhigamāya. Anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo nonītassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo nonītassa adhigamāya. Nevāsaɱ nānāsañ ce pi karitvā udakaɱ kalase āsiñcitvā manthena āviñjeyya, abhabbo nonītassa adhigamāya. Taɱ kissa hetu? ayoni hesā1 bhūmija, nonītassa adhigamāya. Evam eva kho bhūmija, ye hi keci samaṇā vā brāhmaṇā vā micchādiṭṭhino micchāsaŋkappā micchāvācā micchākammantā micchāājīvā micchāvāyāmā micchāsatī micchāsamādhino. Te āsañ ce pi karitvā brahmacariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya. Āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāya, taɱ kissa hetu: ayoni hesā bhūmija, phalassa adhigamāya.|| ||

Seyyathā pi bhūmija, puriso aggatthiko aggigavesī aggipariyesanaɱ caramāno allaɱ kaṭṭhaɱ sasnehaɱ uttarāraṇiɱ [142] ādāya abhimantheyya, āsañ ce pi karitvā allaɱ kaṭṭhaɱ sasnehaɱ uttarāraṇiɱ ādāya abhimantheyya, abhabbo aggissa adhigamāya. Anāsañ ce pi karitvā vālikaɱ doṇiyā ākaritvā udakena paripphosakaɱ paripphosakaɱ pī'eyya, abhabbo aggissa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, abhabbo aggissa adhigamāya. Nevāsaɱ nānāsañ ce pi karitvā allaɱ kaṭṭhaɱ sasnehaɱ uttarāraṇiɱ ādāya abhimantheyya, abhabbo aggissa adhigamāya. Taɱ kissa hetu? ayoni hesā bhūmija, aggissa adhigamāya. Evam eva kho bhūmija, ye hi keci samaṇā vā brahmaṇā vā micchādiṭṭhino micchāsaŋkappā micchāvācā micchākammantā micchāājīvā micchāvāyāmā micchāsatī micchāsamādhino, te āsañ ce pi karitvā brahmacariyaɱ caranti, abhabbā phalassa adhigamāya. Anāsañ ce pi karitvā brahmacariyaɱ caranti, abhabbā phalassa adhigamāya, āsañca anāsañ ce pi karitvā brahmacariyaɱ caranti, abhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, abhabbā phalassa adhigamāya. Taɱ kissa hetu? ayoni hesā bhūmija, phalassa adhigamāya.|| ||

Ye ca kho keci bhūmija, samaṇā vā brāhmaṇā vā sammādiṭṭhikā sammāsaŋkappā sammāvācā sammākammantā sammāājīvā sammāvāyāmā sammāsati sammāsamādhino, te āsañ ce pi karitvā brahmacariyaɱ caranti, bhabbā phalassa adhigamāya. Anāsañ ce pi karitvā brahmacariyaɱ caranti, bhabbā phalassa adhigamāya. Āsañca anāsañ ce pi karitvā brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, bhabbā phalassa adhigamāya. Taɱ kissa hetu? yoni hesā bhūmija, phalassa adhigamāya.|| ||

Seyyathā pi bhūmija, puriso telatthiko telagavesī telapariyesanaɱ caramāno tilapiṭṭhiɱ doṇiyā ākiritvā udakena paripphosakaɱ paripphosakaɱ pī'eyya, āsañ ce pi karitvā tilapiṭṭhīɱ doṇiyā ākiritvā udakena paripphosakaɱ paripphosakaɱ pī'eyya, bhabbo telassa adhigamāya. Anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, bhabbo telassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pi'eyya, bhabbo telassa adhigamāya. Nevāsaɱ nānāsañ ce pi karitvā tilapiṭṭhiɱ doṇiyā ākiritvā udakena paripphosakaɱ paripphosakaɱ pī'eyya, bhabbo telassa adhigamāya. Taɱ kissa hetu? yoni hesā bhūmija, telassa adhigamāya. Evam eva kho bhūmija, ye hi keci samaṇā vā brāhmaṇā vā sammādiṭṭhino sammāsaŋkappā sammāvācā sammākammantā sammāājīvā sammāvāyāmā sammāsati sammāsamādhino, te āsañ ce pi karitvā brahmacariyaɱ caranti, [143] bhabbā phalassa adhigamāya. Anāsañ ce pi karitvā brahmacariyaɱ caranti, bhabbā phalassa adhigamāya. Āsañca anāsañ ce pi karitvā brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, bhabbā phalassa adhigamāya. Taɱ kissa hetu? yoni hesā bhūmija, phalassa adhigamāya.|| ||

Seyyathā pi bhūmija, puriso khīratthiko khīragavesī khīrapariyesanaɱ caramāno gāviɱ taruṇavacchaɱ thanato āviñjeyya, āsañ ce pi karitvā gāviɱ taruṇavacchaɱ thanato āviñjeyya, bhabbo khīrassa adhigamāya. Anāsañ ce pi karitvā vālikaɱ doṇiyā

Ākiritvā udakena paripphosakaɱ paripphosakaɱ pī'eyya, bhabbo khīrassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pi'eyya, bhabbo khīrassa adhigamāya. Nevāsaɱ nānāsañ ce pi karitvā gāviɱ taruṇavacchaɱ thanato āviñjeyya, bhabbo khīrassa adhigamāya. Taɱ kissa hetu? yoni hesā bhūmija, khīrassa adhigamāya. Evam eva kho bhūmija, ye hi keci samaṇā vā brāhmaṇā vā sammādiṭṭhino sammāsaŋkappā sammāvācā sammākammantā sammāājīvā sammāvāyāmā sammāsati sammāsamādhino, te āsañ ce pi karitvā brahmacariyaɱ caranti, bhabbā phalassa adhigamāya. Anāsañ ce pi karitvā brahmacariyaɱ caranti, bhabbā phalassa adhigamāya. Āsañca anāsañ ce pi karitvā brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, bhabbā phalassa adhigamāya. Taɱ kissa hetu? yoni hesā bhūmija, phalassa adhigamāya.|| ||

Seyyathā pi bhūmija, puriso nonītatthiko nonītagavesī nonītapariyesanaɱ caramāno dadhiɱ kalase āsiñcitvā manthena āviñjeyya, āsañ ce pi karitvā dadhiɱ kalase āsiñcitvā matthena āviñjeyya, bhabbo nonītassa adhigamāya. Anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, bhabbo nonītassa adhigamāya. Āsañca anāsañ ce pi karitvā vālikaɱ doṇiyā ākiritvā udakena paripphosakaɱ paripphosakaɱ pī'eyya, bhabbo nonītassa adhigamāya. Nevāsaɱ nānāsañ ce pi karitvā dadhiɱ kalase āsiñcitvā manthena āviñjeyya, bhabbo nonītassa adhigamāya. Taɱ kissa hetu? yoni hesā bhūmija, nonītassa adhigamāya. Evam eva kho bhūmija, ye hi keci samaṇā vā brahmaṇā vā sammādiṭṭhino sammāsaŋkappā sammāvācā sammākammantā sammāājīvā sammāvāyāmā sammāsati sammāsamādhino. Te āsañ ce pi karitvā brahmacariyaɱ caranti, bhabbā phalassa adhigamāya. Anāsañ ce pi karitvā brahmacariyaɱ caranti, bhabbā phalassa adhigamāya. Āsañca anāsañ ce pi karitvā brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, bhabbā phalassa adhigamāya, taɱ kissa hetu: yoni hesā bhūmija, phalassa adhigamāya.|| ||

Seyyathā pi bhūmija, puriso aggatthiko aggigavesī aggipariyesanaɱ caramāno sukkaɱ kaṭṭhaɱ koḷāpaɱ uttarāraṇiɱ ādāya abhimantheyya, bhabbo aggissa āsañ ce pi karitvā sukkaɱ kaṭṭhaɱ koḷāpaɱ uttarāraṇiɱ ādāya abhimantheyya, bhabbo aggissa adhigamāya. Anāsañ ce pi karitvā sukkaɱ kaṭṭhaɱ koḷāpaɱ [144] uttarāṇiɱ ādāya abhimatteyya, bhabbo aggissa adhigamāya. Āsañca anāsañ ce pi karitvā sukkaɱ kaṭṭhaɱ koḷāpaɱ uttarāraṇiɱ ādāya abhimantheyya, bhabbo aggissa adhigamāya. Taɱ kissa hetu? yoni hesā bhūmija, aggissa adhigamāya. Evam eva kho bhūmija, ye hi keci samaṇā vā brahmaṇā vā sammādiṭṭhino sammāsaŋkappā sammāvācā sammākammantā sammāājīvā sammāvāyāmā sammāsati sammāsamādhino, te āsañ ce pi karitvā brahmacariyaɱ caranti, bhabbā phalassa adhigamāya. Anāsañ ce pi karitvā brahmacariyaɱ caranti, bhabbā phalassa adhigamāya. Āsañca anāsañ ce pi karitvā brahmacariyaɱ caranti, bhabbā phalassa adhigamāya. Nevāsaɱ nānāsañ ce pi karitvā brahmacariyaɱ caranti, bhabbā phalassa adhigamāya. Taɱ kissa hetu? yoni hesā bhūmija, phalassa adhigamāya.|| ||

Sace kho taɱ bhūmija, jayasenassa rājakuMārassa imā catasso upamā paṭibhāseyyuɱ, anacchariyaɱ te jayaseno rājakumāro pasīdeyya. Pasanno ca te pasannākāraɱ kareyyāti.|| ||

Kuto pana maɱ bhante, jayasenassa rājakuMārassa imā catasso upamā paṭibhāsissanti. Anacchariyā pubbe assutapubbā, seyyathā pi Bhagavantanti.|| ||

Idam avoca Bhagavā. Attamano āyasmā bhūmijo Bhagavato bhāsitaɱ abhinandīti.|| ||

Bhūmijasuttaɱ jaṭṭhaɱ.


 

Contact:
E-mail
Copyright Statement   Webmaster's Page