Majjhima Nikāya
III. Upari Paṇṇāsa
3. Suññata Vagga

Sutta 127

Anuruddha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[144]

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Atha kho pañcakaŋgo thapati aññataraɱ purisaɱ āmantesi:
'ehi tvaɱ ambho purisa, yen'āyasmā Anuruddho ten'upasankama.|| ||

Upasaŋkamitvā mama vacanena āyasmato [145] Anuruddhassa pāde sirasā vandāhi.|| ||

Pañcakaŋgo bhante, thapati āyasmanto Anuruddhassa pāde sirasā vandatī' ti.|| ||

Evañ ca vadehi:
adhivāsetu kira bhante, āyasmā Anuruddho pañcakaŋgassa thapatissa svātanāya attacatuttho bhattaɱ, yena ca kira bhante, āyasmā Anuruddho pag-evataraɱ āgaccheyya, pañcaŋgo bhante, thapati bahu-kicco bahu-karaṇīyo rājakaraṇīyenā' ti.|| ||

"Evaɱ bhante" ti kho so puriso pañc'aŋgassa thapatissa paṭissutvā yen'āyasmā Anuruddho ten'upasankami.|| ||

Upasaŋkamitvā āyasmantaɱ Anuruddhaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so puriso āyasmantaɱ Anuruddhaɱ etad avoca:
'pañcaŋgo bhante, thapati āyasmato Anuruddhassa pāde sirasā vandati.|| ||

Evaɱ ca vadeti:
'adhivāsetu kira bhante, āyasmā Anuruddho pañcakaŋgassa thapatissa svātanāya attacatuttho bhattaɱ.|| ||

Yena ca kira bhante, āyasmā Anuruddho pag-evataraɱ āgaccheyya.|| ||

Pañcakaŋgo bhante, thapati bahu-kicco bahu-karaṇīyo rājakaraṇīyenā' ti.|| ||

Adhivāsesi kho āyasmā Anuruddho tuṇhī-bhāvena.|| ||

Atha kho āyasmā Anuruddho tassā rattiyā accayena pubbaṇha-samayaɱ nivāsetvā patta-cīvaraɱ ādāya yena pañcakaŋgassa thapatissa nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

Atha kho pañcakaŋgo thapati āyasmantaɱ Anuruddhaɱ paṇītena bhojanīyena sahatthā santappesi sampavāresi.|| ||

Atha kho pañcakaŋgo thapati āyasmantaɱ Anuruddhaɱ bhuttāviɱ onita-patta-pāṇīɱ aññataraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinno kho pañcakaŋgo thapati āyasmantaɱ Anuruddhaɱ etad avoca:|| ||

Idha maɱ bhante1 therā bhikkhū upasankamitvā evam āhaɱsu:
'appamāṇaɱ gahapati, ceto-vimuttiɱ bhāvehī' ti.|| ||

Ekacce therā evam āhaɱsu:
'mahaggataɱ gahapati, ceto-vimuttiɱ bhāvehī' ti.|| ||

Yā cāyaɱ bhante, appamāṇā ceto-vimutti, yā ca mahaggatā ceto-vimutti, ime dhammā nānatthā c'eva [146] nānābyañjanā ca?|| ||

Udāhu ekatthā byañjanameva nānanti?|| ||

Tena hi gahapati, taɱ yeva ettha paṭibhātu apannakaɱ te ito bhavissatī ti.|| ||

Mayhaɱ kho bhante, evaɱ hoti.|| ||

Yā cāyaɱ appamāṇā ceto vimutti, yā ca mahaggatā ceto-vimutti, ime dhammā ekatthā byañjanameva nānanti.|| ||

Yā cāyaɱ gahapati, appamāṇā ceto-vimutti, yā ca mahaggatā ceto-vimutti, ime dhammā nānatthā c'eva nānābyañjanā ca.|| ||

Tadamināpetaɱ gahapati, pariyāyena veditabbaɱ, yathā ime dhammā nānatthā c'eva nānābyañjanā ca.|| ||

Katamā ca gahapati, appamāṇā ceto-vimutti?|| ||

Idha gahapati bhikkhū mettā-saha-gatena cetasā ekaɱ disaɱ pharitvā viharati.|| ||

Tathā dutiyaɱ tathā tatiyaɱ tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ mettā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Karuṇā-saha-gatena cetasā ekaɱ disaɱ pharitvā viharati.|| ||

Tathā dutiyaɱ tathā tatiyaɱ tathā catutthiɱ.|| ||

Iti uddhamadho tiriyaɱ sabbadhi sabbattatāya sabbā-vantaɱ lokaɱ karuṇā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Muditā-saha-gatena cetasā ekaɱ disaɱ pharitvā viharati.|| ||

Tathā dutiyaɱ tathā tatiyaɱ tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ muditā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Upekkhā-saha-gatena cetasā ekaɱ disaɱ pharitvā viharati.|| ||

Tathā dutiyaɱ tathā tatiyaɱ tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ upekkhā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Tathā dutiyaɱ tathā tatiyaɱ tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ upekkhā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Ayaɱ vuccati gahapati appamāṇā ceto-vimutti.|| ||

Katamā ca gahapati mahaggatā ceto-vimutti?|| ||

Idha gahapati bhikkhu yāvatā ekaɱ rukkha-mūlaɱ mahaggatanti pharitvā adhimuccitvā viharati.|| ||

Ayaɱ vuccati gahapati, mahaggatā ceto-vimutti.|| ||

Idha pana gahapati bhikkhu yāvatā dve vā tīṇi vā rukkha-mūlāni mahaggatanti pharitvā adhimuccitvā viharati ayam pi vuccati gahapati mahaggatā ceto-vimutti.|| ||

Idha pana gahapati, bhikkhu yāvatā ekaɱ gāmakkhettaɱ mahaggatanti pharitvā adhimuccitvā viharati.|| ||

Ayam pi vuccati gahapati, mahaggatā ceto vimutti.|| ||

Idha pana gahapati, bhikkhu yāvatā dve vā tīṇi vā gāmakkhettāni pharitvā adhimuccitvā viharati.|| ||

Ayam pi vuccati gahapati, mahaggatā ceto vimutti.|| ||

Idha pana gahapati, bhikkhu yāvatā ekaɱ mahārajjaɱ mahaggatanti pharitvā adhimuccitvā viharati.|| ||

Ayam pi vuccati gahapati, mahaggatā ceto-vimutti.|| ||

Idha [147] pana gahapati, bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati, ayam pi vuccati gahapati, mahaggatā ceto-vimutti.|| ||

Idha pana gahapati bhikkhu yāvatā samuddapariyan taɱ paṭhaviɱ mahaggatanti pharitvā adhimuccitvā viharati.|| ||

Ayam pi vuccati gahapati, mahaggatā ceto-vimutti.|| ||

Iminā kho etaɱ gahapati pariyāyena veditabbaɱ yathā ime dhammā nānatthā c'eva nānābyañjenā ca.|| ||

Catasso kho imā gahapati, bhavūpapattiyo, katamā catasso?|| ||

Idha gahapati ekacco parittābhāti pharitvā adhimuccitvā viharati.|| ||

So kāyassa bhedā param maraṇā parittābhānaɱ devānaɱ saha-vyataɱ uppajjati.|| ||

Idha pana gahapati, ekacco appamāṇābhāti pharitvā adhimuccitvā viharati.|| ||

So kāyassa bhedā param maraṇā appamāṇā bhānaɱ devānaɱ saha-vyataɱ uppajjati.|| ||

Idha pana gahapati, ekacco saŋkiliṭṭhābhāti pharitvā adhimuccitvā viharati.|| ||

So kāyassa bhedā param maraṇā saŋkiliṭṭhābhānaɱ devānaɱ saha-vyataɱ uppajjati.|| ||

Idha pana gahapati, ekacco parisuddhābhāti pharitvā adhimuccitvā viharati.|| ||

So kāyassa bhedā param maraṇā parisuddhābhānaɱ devānaɱ saha-vyataɱ uppajjati.|| ||

Imā kho gahapati, catasso bhavūpapattiyo.|| ||

Hoti khe so gahapati, samayo, yā tā devatā ekajjhaɱ sannipatanti.|| ||

Tāsaɱ ekajjhaɱ sanni-patitānaɱ vaṇṇanānattaɱ hi kho paññāyati.|| ||

No ca ābhānānattaɱ.|| ||

Seyyathā pi gahapati, puriso sambahulāni tela-p-padīpāni ekaɱ gharaɱ paveseyya, tesaɱ ekaɱ gharaɱ pavesitānaɱ accinānattaɱ hi kho paññāyetha no ca ābhānānattaɱ.|| ||

Evam eva kho gahapati, hoti kho so samayo, yā tā devatā ekajjhaɱ sannipatanti, [148] tāsaɱ ekajjhaɱ sanni-patitānaɱ vaṇṇanānattaɱ hi kho paññāyati.|| ||

No ca ābhānānattaɱ.|| ||

Hoti kho so gahapati samayo, yā tā devatā tato vipakkamanti, tāsaɱ tato vipakkamantīnaɱ vaṇṇanānattaɱ c'eva paññāyati, ābhānānantañ ca.|| ||

Seyyathā pi gahapati, puriso tāni sambahulāni telappadipāni tamhā gharā nīhareyya tesaɱ tato niharantānaɱ accinānattaɱ c'eva paññāyetha ābhānānattañ ca.|| ||

Evam eva kho gahapati, hoti kho so samayo, yā tā devatā tato vipakkamanti.|| ||

Tāsaɱ tato vipakkamantīnaɱ vaṇṇanānattaɱ c'eva paññāyati ābhānānattañ ca.|| ||

Na kho gahapati, tāsaɱ devatānaɱ evaɱ hoti:
idaɱ amhākaɱ niccanti vā dhuvanti vā sassatanti vā.|| ||

Api ca yattha yattheva tā devatā adhivasanti1 tattha tatth'eva tā devatā abhiramanti.|| ||

Seyyathā pi gahapati, makkhikānaɱ kājena vā piṭakena vā harīyamānānaɱ na evaɱ hoti:
idaɱ amhākaɱ niccanti vā dhuvanti vā sassatanti vā, api ca yattha yattheva tā makkhikā abhinivisanti, tattha tatth'eva tā makkhikā abhiramanti.|| ||

Evam eva kho gahapati tāsaɱ devatāɱ na evaɱ hoti:
idaɱ amhākaɱ niccanti vā dhuvanti vā sassatanti vā, api ca yattha yattheva tā devatā adhivasanti, tattha tatth'eva tā devatā abhiramantī ti.|| ||

Evaɱ vutte āyasmā sabhiyo kaccāno āyasmantaɱ Anuruddhaɱ etad avoca:
sādhu bhante Anuruddha, atthi ca me phattha uttariɱ paṭipucchitabbaɱ.|| ||

Yā tā bhante devatā ābhā, sabbā tā parittābhā?|| ||

Udāhu santettha ekaccā devatā appamāṇābhāti?|| ||

Tadaŋgena kho āvuso Kaccāna, santi pana ettha2 ekaccā devatā parittābhā, santi panetthekaccā devatā appamāṇābhāti.|| ||

Ko nu kho bhante Anuruddha, hetu, ko paccayo.|| ||

Yena tāsaɱ devatānaɱ ekaɱ deva-nikāyaɱ upapannānaɱ santetthekaccā [149] devatā parittābhā?|| ||

Santi panetthekaccā devatā appamāṇābhāti?|| ||

Tena h'āvuso Kaccāna, taɱyev'ettha paṭipucchissāmi yathā te khameyya, tathā naɱ vyākareyyāsi.|| ||

Taɱ kim maññasi āvuso Kaccāna, yvāyaɱ bhikkhu yāvatā ekaɱ rukkha-mūlaɱ mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā dve vā tīṇi vā rukkha-mūlāni mahaggatanti pharitvā adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante bhikkhū yāvatā dve vā tīṇi vā rukkha-mūlāni mahaggatanti pharitvā adhimuccitvā viharati ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Taɱ kim maññasi āvuso Kaccāna, yvāyaɱ bhikkhu yāvatā dve vā tiṇi vā rukkha-mūlāni mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā ekaɱ gāmakkhettaɱ mahaggatanti pharitvā adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante bhikkhu yāvatā ekaɱ gāmakkhettaɱ mahaggatanti pharitvā adhimuccitvā viharati ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Taɱ kim maññasi āvuso Kaccāna, yvāyaɱ bhikkhu yāvatā ekaɱ gāmakkhettaɱ mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā dve vā tīṇi vā gāmakkhettāni mahaggatanti pharitvā [150] adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante bhikkhu yāvatā dve vā tīṇi vā gāmakkhettāni mahaggatanti pharitvā adhimuccitvā viharati ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Taɱ kim maññasi āvuso Kaccāna, yvāyaɱ bhikkhu yāvatā dve vā tiṇi vā gāmakkhettāni mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā ekaɱ mahārajjaɱ mahaggatanti pharitvā adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante bhikkhu yāvatā ekaɱ mahārajjaɱ mahaggatanti pharitvā adhimuccitvā viharati.|| ||

Ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Taɱ kim maññasi āvuso Kaccāna, yvāyaɱ bhikkhu yāvatā ekaɱ mahārajjaɱ mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati.|| ||

Ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Taɱ kim maññasi āvuso Kaccāna, yvāyaɱ bhikkhu yāvatā dve vā tīṇi vā mahārajjāni mahaggatanti pharitvā adhimuccitvā viharati.|| ||

Yo cāyaɱ bhikkhu yāvatā samaddapariyan taɱ paṭhaviɱ mahaggatanti pharitvā adhimuccitvā viharati.|| ||

Imāsaɱ ubhinnaɱ cittabhāvanānaɱ katamā cittabhāvanā mahaggatatarāti?|| ||

Yvāyaɱ bhante, bhikkhu yāvatā samaddapariyan taɱ paṭhaviɱ mahaggatanti pharitvā adhimuccitvā viharati.|| ||

Ayaɱ imāsaɱ ubhinnaɱ cittabhāvanānaɱ mahaggatatarāti.|| ||

Ayaɱ kho āvuso Kaccāna, hetu ayaɱ paccayo, yena tāsaɱ devatānaɱ ekaɱ deva-nikāyaɱ upapannānaɱ santetthekaccā devatā parittābhā, santi panetthekaccā devatā appamāṇābhāti.|| ||

Sādhu bhante Anuruddha, atthi ca me ettha uttariɱ paṭipucchitabbaɱ.|| ||

Yāvatā bhante, devatā ābhā, sabbā tā saŋkiliṭṭhābhā?|| ||

Udāhu santetthekaccā devatā parisuddhābhāti?|| ||

[151] Tadaŋgena kho āvuso Kaccāna, santetthekaccā devatā saŋkaliṭṭhābhā santi panetthekaccā devatā parisuddhābhāti.|| ||

Ko nu kho bhante Anuruddha, hetu ko paccayo, yena tāsaɱ devatānaɱ ekaɱ deva-nikāyaɱ upapannānaɱ santetthekaccā devatā saŋkaliṭṭhābhā santi panetthekaccā devatā parisuddhabhāti.|| ||

Tena h'āvuso Kaccāna, upamaɱ te karissāmi.|| ||

Upamāyapidh'ekacce viññū purisā bhāsitassa atthaɱ ājānanti.|| ||

Seyyathā pi āvuso Kaccāna, tela-p-padīpassa jhāyato telampi a-parisuddhaɱ, vaṭṭipi a-parisuddhā, so telassapi a-parisuddhattā vaṭṭiyāpi a-parisuddhattā andhandhaɱ viya jhāyāti.|| ||

Evam eva kho āvuso Kaccāna, idh'ekacco bhikkhu saɱkiliṭṭhābhāti pharitvā adhimuccitvā viharati.|| ||

Tassa kāyaduṭṭhullampi na suppaṭi-p-pa-s-saddhaɱ hoti.|| ||

Thīna-middhampi na susamūhataɱ hoti.|| ||

Uddhacca-kukkuccampi na suppaṭivinītaɱ hoti.|| ||

So kāyaduṭṭhullassapi na suppaṭi-p-pa-s-saddhattā thīna-middhassapi na susamūhattā uddhaccakkuccassapi na suppaṭivinītattā andhandhaɱ viya jhāyati.|| ||

So kāyassa bhedā param maraṇā saɱkiliṭṭhābhānaɱ devānaɱ saha-vyataɱ uppajjati.|| ||

Seyyathā pi āvuso Kaccāna, tela-p-padīpassa jhāyato telampi parisuddhaɱ, vaṭṭipi parisuddhā, so telassapi parisuddhattā vaṭṭiyāpi parisuddhattā na andhandhaɱ viya jhāyati.|| ||

Evam eva kho āvuso Kaccāna, idh'ekacco bhikkhu parisuddhābhāti pharitvā adhimuccitvā viharati.|| ||

Tassa kāyaduṭṭhullampi suppaṭi-p-pa-s-saddhaɱ hoti.|| ||

Thīna-middhampi susamūhataɱ hoti.|| ||

Uddhacca-kukkuccampi suppaṭivinītaɱ hoti.|| ||

So kāyaduṭṭhullassapi suppaṭi-p-pa-s-saddhattā thīna-middhassapi susamūhatattā uddhacca-kukkuccassapi suppaṭivinītattā na andhandhaɱ viya jhāyati.|| ||

So kāyassa bhedā param maraṇā parisuddhābhānaɱ devānaɱ saha-vyataɱ uppajjati.|| ||

[152] Ayaɱ kho avuso Kaccāna, hetu ayaɱ paccayo, yena tāsaɱ devatānaɱ ekaɱ deva-nikāyaɱ upapannānaɱ santetthekaccā devatā saŋkiliṭṭhābhā, santi panetthekaccā devatā parisuddhābhāti.|| ||

Evaɱ vutte āyasmā sabhiyo kaccāno āyasmantaɱ Anuruddhaɱ etad avoca:
'sādhu bhante Anuruddha, na bhante, āyasmā Anuruddho evam āha:
evaɱ me sutanti vā, evaɱ arahati bhavitunti vā.|| ||

Atha ca pana bhante, āyasmā Anuruddho 'evam pi tā devatā iti pi tā devatāttheva bhāsati.|| ||

Tassa mayhaɱ bhante, evaɱ hoti:
addhāyasmatā anuruddhena tāhi devatāhi saddhiɱ sannivutthapubbañ c'eva sallapita-pubbañca sākacchā ca samāpajjita-pubbāti.|| ||

Addhā kho te ayaɱ āvuso Kaccāna, āsajja upanīya vācā bhāsitā.|| ||

Api ca te ahaɱ vyākarissāmi.|| ||

Dīgha-rattaɱ kho āvuso Kaccāna, tāhi devatāhi saddhiɱ sannivutthapubbañ c'eva sallapita-pubbañca sākacchā ca samāpajjita-pubbāti.|| ||

Evaɱ vutte āyasmā sabhiyo kaccāno pañcakaŋgaɱ thapatiɱ etad avoca:
'lābhā te gahapati.|| ||

Suladdhaɱ te gahapati.|| ||

Yaɱ tvaɱ c'eva taɱ saŋkhādhammaɱ pahāsi.|| ||

Mayañci'maɱ dhamma-pariyā'yaɱ alatthamhā savaṇāyā' ti.|| ||

Anuruddha Suttaɱ