Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 128

Upakkilesa Suttaɱ

Based on the 'Sri Lanka Buddha Jayanti Tripitaka Series.'

 


[152]

[1][chlm][upal][pts] Evaɱ me sutaɱ:|| ||

Ekaɱ samayaɱ Bhagavā Kosambiyaɱ viharati Ghositārāme.|| ||

Tena kho pana samayena Kosambiyaɱ bhikkhū bhaṇḍanajātā kalaha-jātā vivādāpannā aññamaññaɱ mukha-sattīhi vitudantā viharanti.|| ||

Atha kho aññataro bhikkhu yena Bhagavā ten'upasaŋkami.|| ||

Upasaŋ- [153] kamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho so bhikkhu Bhagavantaɱ etad avoca:|| ||

"Idha bhante, Kosambiyaɱ bhikkhū bhaṇḍanajātā kalaha-jātā vivādāpannā aññamaññaɱ mukha-sattīhi vitudantā viharanti.|| ||

Sādhu bhante, Bhagavā yena te bhikkhū ten'upasaŋkamatu anukampaɱ upādāyā" ti.|| ||

Adhivāsesi Bhagavā tuṇhī-bhāvena.|| ||

Atha kho Bhagavā yena te bhikkhū ten'upasaŋkami.|| ||

Upasaŋkamitvā te bhikkhū etad avoca:|| ||

"Alaɱ bhikkhave, mā bhaṇḍanaɱ, mā kalahaɱ, mā viggahaɱ, mā vivādan" ti.|| ||

Evaɱ vutte aññataro bhikkhu Bhagavantaɱ etad avoca.|| ||

"Āgametu bhante, Bhagavā dhammassāmi.|| ||

Appossukko bhante, Bhagavā diṭṭha-dhamma-sukha-vihāraɱ anuyutto viharatu.|| ||

Mayam etena bhaṇḍanena kalahena viggahena vivādena paññāyissāmā" ti.|| ||

Dutiyam pi kho Bhagavā te bhikkhū etad avoca:|| ||

"Alaɱ bhikkhave, mā bhaṇḍanaɱ, mā kalahaɱ, mā viggahaɱ, mā vivādan" ti.|| ||

Dutiyam pi kho so bhikkhu Bhagavantaɱ etad avoca:|| ||

"Āgametu bhante, Bhagavā dhammassāmi.|| ||

Appossukko bhante, Bhagavā diṭṭha-dhamma-sukha-vihāraɱ anuyutto viharatu.|| ||

Mayam etena bhaṇḍanena kalahena viggahena vivādena paññāyissāmā" ti.|| ||

Tatiyam pi kho Bhagavā te bhikkhū etad avoca:|| ||

"Alaɱ bhikkhave, mā bhaṇḍanaɱ, mā kalahaɱ, mā viggahaɱ, mā vivādan" ti.|| ||

Tatiyam pi kho so bhikkhu Bhagavantaɱ etad avoca:|| ||

"Āgametu bhante, Bhagavā dhammassāmi.|| ||

Appossukko bhante, Bhagavā diṭṭha-dhamma-sukha-vihāraɱ anuyutto viharatu.|| ||

Mayam etena bhaṇḍanena kalahena viggahena vivādena paññāyissāmā" ti.|| ||

Atha kho Bhagavā pubbaṇha-samayaɱ nivāsetvā pattacīvaram ādāya Kosambiɱ piṇḍāya pāvisi.|| ||

Kosambiyaɱ piṇḍāya caritvā pacchābhattaɱ piṇḍapātapaṭikkanto senāsanaɱ saɱsāmetvā pattacīvaram ādāya ṭhitako va imā gāthā abhāsi:|| ||

[154] Puthu saddo samajano||
na bālo koci maññatha,||
Saŋghasmiɱ bhijjamānasmiɱ||
nāññaɱ bhiyyo amaññatha.|| ||

Parimuṭṭhā paṇḍitā bhāsā||
vācā gocarabhāṇino,||
Yāv'icchanti mukhāyāmaɱ||
yena nītā na taɱ vidū.|| ||

Akkocchi maɱ avadhi maɱ||
ajini maɱ ahāsi me,||
Ye taɱ upanayhanti||
veraɱ tesaɱ na sammati.|| ||

Akkocchi maɱ avadhi maɱ||
ajini maɱ āhāsi me,||
Ye taɱ na upanayhanti||
veraɱ tesūpasammati.|| ||

Na hi verena verāni||
sammantīdha kudācanaɱ,||
Averena ca sammanti||
esa dhammo sanantano.|| ||

Pare ca na vijānanti||
mayam ettha yamāmase,||
Ye ca tattha vijānanti tato sammanti medhagā.|| ||

Aṭṭhicchidā pāṇaharā||
gavāssadhanahārino,||
Raṭṭhaɱ vilumpamānānaɱ||
tesam pi hoti saŋgati||
kasmā tumhāka no siyā?|| ||

Sace labhetha nipakaɱ sahāyaɱ||
saddhiɱ caraɱ sādhuvihāri dhīraɱ,||
Abhibhuyya sabbāni parissayāni||
careyya ten'attamano satīmā.|| ||

No ce labhetha nipakaɱ sahāyaɱ||
saddhiɱ caraɱ sādhuvihāri dhīraɱ,||
Rājā va raṭṭhaɱ vijitaɱ pahāya||
eko care mātaŋg'araɱ yeva nāgo.|| ||

Ekassa caritaɱ seyyo||
n'atthi bāle sahāyatā,||
Eko care na ca pāpāni kayirā||
appossukko mātaŋg'araɱ yeva nāgo ti.|| ||

Atha kho Bhagavā ṭhitako va imā gāthā bhāsitvā yena Bālakaloṇakāragāmo ten'upasaŋkami.|| ||

Tena kho pana [155] samayena āyasmā Bhagu Bālakaloṇakāragāme viharati.|| ||

Addasā kho āyasmā Bhagu Bhagavantaɱ dūrato va āgacchantaɱ.|| ||

Disvāna āsanaɱ paññāpesi udakañ ca pādānaɱ.|| ||

Nisīdi Bhagavā paññatte āsane.|| ||

Nisajja pāde pakkhālesi.|| ||

Āyasmā pi kho bhagu Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ bhaguɱ Bhagavā etad avoca:|| ||

"Kacci bhikkhu, khamanīyaɱ, kacci yāpanīyaɱ, kacci piṇḍakena na kilamasī" ti?|| ||

"Khamanīyaɱ Bhagavā, yāpanīyaɱ Bhagavā, na cāhaɱ bhante piṇḍakena kilamāmī" ti.|| ||

Atha kho Bhagavā āyasmantaɱ bhaguɱ dhammiyā kathāya sandassetvā samādapetvā samuttejetvā samp'ahaɱsetvā uṭṭhāy'āsanā yena Pācīnavaɱsadāyo ten'upasaŋkami.|| ||

Tena kho pana samayena āyasmā ca Anuruddho āyasmā ca Nandiyo āyasmā ca Kimbilo Pācīnavaɱsadāye viharanti.|| ||

Addasā kho dāyapālo Bhagavantaɱ dūrato va āgacchantaɱ.|| ||

Disvāna Bhagavantaɱ etad avoca:|| ||

"Mā samaṇa etaɱ dāyaɱ pāvisi, sant'ettha tayo kulaputtā attakāmarūpā viharanti,||
mā tesaɱ aphāsuɱ akāsī' ti.|| ||

Assosi kho āyasmā Anuruddho dāyapālassa Bhagavatā saddhiɱ mantayamānassa.|| ||

Sutvāna dāyapālaɱ etad avoca:|| ||

"Mā āvuso dāyapāla, Bhagavantaɱ vāresi.|| ||

Satthā no Bhagavā anuppatto" ti.|| ||

Atha kho āyasmā Anuruddho yen'āyasmā ca Nandiyo yen'āyasmā ca Kimbilo ten'upasaŋkami.|| ||

Upasaŋkamitvā āyasmantaɱ ca Nandiyaɱ āyasmantaɱ ca Kimbilaɱ etad avoca:|| ||

"Abhikkamath'āyasmanto, abhikkamath'āyasmanto; satthā no Bhagavā anuppatto" ti.|| ||

Atha kho āyasmā ca Anuruddho āyasmā ca Nandiyo āyasmā ca Kimbilo Bhagavantaɱ paccuggantvā eko Bhagavato pattacivaraɱ paṭiggahesi, eko āsanaɱ paññāpesi, eko pādodakaɱ upaṭṭhapesi.|| ||

Nisīdi Bhagavā paññatte āsane.|| ||

Nisajja pāde pakkhālesi.|| ||

Te pi kho āyasmanto Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnaɱ kho āyasmantaɱ Anuruddhaɱ Bhagavā etad avoca:|| ||

"Kacci vo Anurudhā, khamanīyaɱ, kacci yāpanīyaɱ, kacci piṇḍakena na kilamathā" ti?|| ||

[156] "Khamanīyaɱ Bhagavā, yāpanīyaɱ Bhagavā.|| ||

Na ca mayaɱ bhante, piṇḍakena kilamāmā" ti.|| ||

"Kacci pana vo Anuruddhā, samaggā sammodamānā avivadamānā khīrodakībhūtā aññamaññaɱ piyacakkhūhi sampassantā viharathā" ti?|| ||

"Taggha mayaɱ bhante, samaggā sammodamānā avivadamānā khīrodakībhūtā aññamaññaɱ piyacakkhūhi sampassantā viharāmā" ti.|| ||

"Yathā kathaɱ pana tumhe Anuruddhā, samaggā sammodamānā avivadamānā khīrodakībhūtā aññamaññaɱ piyacakkhūhi sampassantā viharathā" ti?|| ||

"Idha mayhaɱ bhante, evaɱ hoti:|| ||

'Lābhā vata me, suladdhaɱ vata me, yo'haɱ evarūpehi sabrahmacārīhi saddhiɱ viharāmī' ti.|| ||

Tassa mayhaɱ bhante, imesu āyasmantesu mettaɱ kāya-kammaɱ paccupaṭṭhitaɱ āvī c'eva raho ca.|| ||

Mettaɱ vacī-kammaɱ paccupaṭṭhitaɱ āvī c'eva raho ca.|| ||

Mettaɱ mano-kammaɱ paccupaṭṭhitaɱ āvī c'eva raho ca.|| ||

Tassa mayhaɱ bhante, evaɱ hoti:|| ||

'Yan'nūnāhaɱ sakaɱ cittaɱ nikkhipitvā imesaɱ yeva āyasmantānaɱ cittassa vasena vatteyyan' ti.|| ||

So kho ahaɱ bhante, sakaɱ cittaɱ nikkhapitvā imesaɱ yeva āyasmantānaɱ cittassa vasena vattāmi.|| ||

Nānā hi kho no bhante, kāyā, ekaɱ ca pana maññe cittan" ti.|| ||

Āyasmā pi kho Nandiyo etad avoca:|| ||

"Mayam pi kho, bhante, evam hoti:|| ||

"Idha mayhaɱ bhante, evaɱ hoti:|| ||

'Lābhā vata me, suladdhaɱ vata me, yo'haɱ evarūpehi sabrahmacārīhi saddhiɱ viharāmī' ti.|| ||

Tassa mayhaɱ bhante, imesu āyasmantesu mettaɱ kāya-kammaɱ paccupaṭṭhitaɱ āvī c'eva raho ca.|| ||

Mettaɱ vacī-kammaɱ paccupaṭṭhitaɱ āvī c'eva raho ca.|| ||

Mettaɱ mano-kammaɱ paccupaṭṭhitaɱ āvī c'eva raho ca.|| ||

Tassa mayhaɱ bhante, evaɱ hoti:|| ||

'Yan'nūnāhaɱ sakaɱ cittaɱ nikkhipitvā imesaɱ yeva āyasmantānaɱ cittassa vasena vatteyyan' ti.|| ||

So kho ahaɱ bhante, sakaɱ cittaɱ nikkhapitvā imesaɱ yeva āyasmantānaɱ cittassa vasena vattāmi.|| ||

Nānā hi kho no bhante, kāyā, ekaɱ ca pana maññe cittan" ti.|| ||

Āyasmā pi kho Kimbilo etad avoca:|| ||

"Mayam pi kho, bhante, evam hoti:|| ||

"Idha mayhaɱ bhante, evaɱ hoti:|| ||

'Lābhā vata me, suladdhaɱ vata me, yo'haɱ evarūpehi sabrahmacārīhi saddhiɱ viharāmī' ti.|| ||

Tassa mayhaɱ bhante, imesu āyasmantesu mettaɱ kāya-kammaɱ paccupaṭṭhitaɱ āvī c'eva raho ca.|| ||

Mettaɱ vacī-kammaɱ paccupaṭṭhitaɱ āvī c'eva raho ca.|| ||

Mettaɱ mano-kammaɱ paccupaṭṭhitaɱ āvī c'eva raho ca.|| ||

Tassa mayhaɱ bhante, evaɱ hoti:|| ||

'Yan'nūnāhaɱ sakaɱ cittaɱ nikkhipitvā imesaɱ yeva āyasmantānaɱ cittassa vasena vatteyyan' ti.|| ||

So kho ahaɱ bhante, sakaɱ cittaɱ nikkhapitvā imesaɱ yeva āyasmantānaɱ cittassa vasena vattāmi.|| ||

Nānā hi kho no bhante, kāyā, ekaɱ ca pana maññe cittan" ti.|| ||

"Evaɱ kho mayaɱ bhante, samaggā sammodamānā avivadamānā khīrodakībhūtā aññamaññaɱ piyacakkhūhi sampassantā viharāmā" ti.|| ||

"Sādhu sādhu Anuruddhā.|| ||

Kacci pana vo Anuruddhā, appamattā ātāpino pahitattā viharathā" ti?|| ||

[157] "Taggha mayaɱ bhante, appamattā ātāpino pahitattā viharāmā" ti.|| ||

"Yathā kathaɱ pana tumhe Anuruddhā,||
appamattā ātāpino pahitattā viharathā" ti?|| ||

"Idha bhante, amhākaɱ yo paṭhamaɱ gāmato piṇḍāya paṭikkamati,||
so āsanāni paññāpeti,||
pānīyaɱ paribhojanīyaɱ upaṭṭhapeti,||
avakkārapātiɱ upaṭṭhapeti.|| ||

Yo pacchā gāmato piṇḍāya paṭikkamati,||
sace hoti bhuttāvaseso,||
sace ākaŋkhati,||
bhuñjati.|| ||

No ce ākaŋkhati,||
appaharite vā chaḍḍeti,||
appāṇake vā udake opilāpeti,||
so āsanāni paṭisāmeti,||
pānīyaɱ paribhojanīyaɱ paṭisāmeti.|| ||

Avakkārapātiɱ dhovitvā paṭisāmeti,||
bhattaggaɱ sammajjati.|| ||

Yo passati pānīyaghaṭaɱ vā||
paribhojanīyaghaṭaɱ vā||
vaccaghaṭaɱ vā rittaɱ tucchaɱ,||
so upaṭṭhapeti.|| ||

Sac'assa hoti avisayhaɱ,||
hatthavikārena dutiyaɱ āmantetvā hatthavilaŋghakena upaṭṭhapema.|| ||

Na tv'eva mayaɱ bhante,||
tappaccayā vācaɱ bhindāma.|| ||

Pañvāhikaɱ kho pana mayaɱ bhante,||
sabbarattiyaɱ dhammiyā kathāya sannisīdāma.|| ||

Evaɱ kho mayaɱ bhante,||
appamattā ātāpino pahitattā viharāmā" ti.|| ||

"Sādhu sādhu Anuruddhā.|| ||

Atthi pana vo Anuruddhā,||
evaɱ appamattānaɱ ātāpīnaɱ pahitattānaɱ viharantānaɱ uttariɱ manussa-dhammā alam ariya-ñāṇa-dassana-viseso adhigato phāsuviharo" ti?|| ||

"Idha mayaɱ bhante, appamattā ātāpino pahitattā viharantā||
obhāsañ c'eva sañjānāma dassanañ ca rūpānaɱ.|| ||

So kho pana no obhāso na cirass'eva antaradhāyati dassanañ ca rūpānaɱ,||
tañ ca nimittaɱ na paṭivijjhamā" ti.|| ||

Taɱ kho pana vo Anuruddhā, nimittaɱ paṭivijjhitabbaɱ.|| ||

Aham pi sudaɱ Anuruddhā,||
pubbe va sambodhā anabhisambuddho Bodhisatto va samāno obhāsañ c'eva sañjānāmi dassanañ ca rūpānaɱ.|| ||

So kho pana me obhāso [158] na cirass'eva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Vicikicchā kho me udapādi.|| ||

Vicikicchādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissatī' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Amanasikāro kho me udapādi.|| ||

Amanasikārādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissatī||
na amanasikaroti' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Thīnamiddhaɱ kho me udapādi.|| ||

Thinamiddhādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissatī||
na amanasikaro,||
na thīnamiddhan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Chamhitattaɱ kho me udapādi.|| ||

Chambhitattādhi karaṇaɱ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.'|| ||

PTS here (and below), noting that the simile is an interruption of the thought, puts it in brackets. Woodward has solved the resulting problem by turning the "'ti" into, "So I thought:".

p.p. explains it all — p.p.

Seyyathā pi Anuruddhā puriso addhānamagga-paṭipanno,||
tassa ubhatopasse vadhakā uppateyyuɱ,||
tassa ubhatato nidānaɱ chambhitattaɱ uppajjeyya.|| ||

Evam eva kho me Anuruddhā,||
chambhitattaɱ udapādi,||
chambhitattādhikaraṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

'So haɱ tathā karis- [159] sāmi,||
yathā me puna na vicikicchā uppajjissati||
na amanasikāro||
na thīnamiddhaɱ||
na chambhitattan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Ubbillaɱ kho me udapādi.|| ||

Ubbillādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.'|| ||

Seyyathā pi Anuruddhā puriso ekaɱ nidhimukhaɱ gavesanto sakideva pañca nidhimukhāni adhigaccheyya.|| ||

Tassa tato nidānaɱ ubbillaɱ uppajjeyya.|| ||

Evam eva kho Anuruddhā ubbillaɱ kho me udapādi.|| ||

Ubbillādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Duṭṭhullaɱ kho me udapādi.|| ||

Duṭṭhullādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Accāraddha-viriyaɱ kho me udapādi.|| ||

Accāraddha-viriyādhi karaṇañca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

Seyyathā pi Anuruddhā puriso ubhogi hatthehi vaṭṭakaɱ gāḷhaɱ gaṇheyya.|| ||

So tatth'eva matameyya.|| ||

Evam eva kho Anuruddhā, accāraddha-viriyaɱ kho me udapādi.|| ||

Accāraddha-viriyādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullaɱ,||
na accāraddhaviriyan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Atilīna-viriyaɱ kho me [160] udapādi.|| ||

Atilīna-viriyādhikaraṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

Seyyathā pi Anuruddhā puriso vaṭṭakaɱ sithilaɱ gaṇheyya.|| ||

So tattha hatthato uppateyya.|| ||

Evam eva kho me Anuruddhā, atilīnaviriyaɱ udapādi.|| ||

Atilīna-viriyādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullaɱ,||
na accāraddha-viriyaɱ||
na atilīna-viriyan' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Abhijappā kho me udapādi.|| ||

Abhijappādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullaɱ,||
na accāraddha-viriyaɱ||
na atilīna-viriyaɱ,||
na abhijappā' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Nānatta-saññā kho me udapādi.|| ||

Nānatta-saññādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullaɱ,||
na accāraddha-viriyaɱ||
na atilīna-viriyaɱ,||
na abhijappā,||
na nānattasaññā' ti.|| ||

So kho ahaɱ Anuruddhā, appamatto ātāpī pahitatto viharanto obhāsañ c'eva sañjānāmi dassanañ ca rūpānaɱ.|| ||

So kho pana me obhāso na cirasseva antaradhāyati dassanañ ca rūpānaɱ.|| ||

Tassa mayhaɱ Anuruddhā etad ahosi:|| ||

'Ko nu kho hetu||
ko paccayo,||
yena me obhāso antaradhāyati dassanañ ca rūpānan' ti?|| ||

Tassa mayhaɱ Anuruddhā etad ahosi:|| ||

'Atinijjhāyitattaɱ kho me rūpānaɱ udapādi.|| ||

Atinijjhāyitattādhi karaṇañ ca pana me samādhi cavi.|| ||

Samādhimhi cute obhāso antaradhāyati dassanañ ca rūpānaɱ.|| ||

So haɱ tathā karissāmi,||
yathā me puna na vicikicchā uppajjissati||
na amanasikāro||
na thīmiddhaɱ||
na chambhitattaɱ||
na ubbillaɱ||
na duṭṭhullaɱ,||
na accāraddha-viriyaɱ||
na atilīna-viriyaɱ,||
na abhijappā,||
na nānattasaññā,||
na atinijjhāyitattaɱ rūpānan' ti.|| ||

So kho ahaɱ Anuruddhā,||
'Vicikicchā cittassa upakkileso' ti||
iti viditvā vicikicchaɱ cittassa upakkilesaɱ pajahiɱ.|| ||

'Amanasikāro cittassa upakkileso ti iti viditvā amanasikāraɱ cittassa upakkilesaɱ pajahiɱ.|| ||

'Thīnamiddhaɱ cittassa upakkileso' ti||
iti viditvā thīnamiddhaɱ cittassa upakkilesaɱ pajahiɱ.|| ||

'Chambhitattaɱ cittassa upakkileso' ti||
iti viditvā chambhitattaɱ cittassa upakkilesaɱ pajahiɱ.|| ||

'Ubbillaɱ1 cittassa upakkileso' ti||
iti viditvā ubbillaɱ1 cittassa upakkilesaɱ pajahiɱ.|| ||

'Duṭṭhullaɱ cittassa upakkileso' ti||
iti viditvā duṭṭhullaɱ cittassa upakkilesaɱ pajahiɱ.|| ||

'Accāraddhaviriyaɱ cittassa upakkileso' ti||
iti viditvā accāraddhaviriyaɱ cittassa upakkilesaɱ pajahiɱ.|| ||

'Atilīnaviriyaɱ cittassa upakkileso' ti||
iti viditvā atilīnaviriyaɱ cittassa upakkilesaɱ pajahiɱ.|| ||

'Abhijappā cittassa upakkileso' ti||
iti viditvā abhijappaɱ cittassa upakkilesaɱ pajahiɱ.|| ||

'Nānattasaññaɱ cittassa upakkiloso' ti||
iti viditvā nānattasaññaɱ cittassa upakkilesaɱ pajahiɱ.|| ||

'Atinijjhāyitattaɱ rūpānaɱ cittassa [161] upakkileso' ti||
iti viditvā atinijjhāyitattaɱ rūpānaɱ cittassa upakkilesaɱ pajahiɱ.|| ||

So kho ahaɱ Anuruddhā, appamatto ātāpī pahitatto viharanto||
obhāsam pi hi kho sañjānāmi,||
na ca rūpāni passāmi.|| ||

Rūpāni hi kho passāmi,||
na ca obhāsaɱ sañjānāmi.|| ||

Kevalam pi rattiɱ||
kevalam pi divasaɱ||
kevalam pi rattindivaɱ.|| ||

Tassa mayhaɱ Anuruddhā, etad ahosi:|| ||

'Ko nu kho hetu,||
ko paccayo,||
yo'haɱ obhāsam hi kho sañjānāmi||
na ca rūpāni passāmi,||
rūpāni hi kho passāmi||
na ca obhāsaɱ sañjānāmi||
kevalam pi rattiɱ||
kevalam pi divasaɱ||
kevalam pi rattindivan' ti?|| ||

Tassa mayhaɱ Anuruddhā, etad ahosi:|| ||

'Yasmiɱ kho ahaɱ samaye||
rūpanimittaɱ amanasikaritvā||
obhāsa-nimittaɱ manasikaromi;||
obhāsaɱ hi kho tasmiɱ samaye sañjānāmi||
na ca rūpāni passāmi.|| ||

Yasmiɱ panāhaɱ samaye||
obhāsa-nimittaɱ amanasi karitvā||
rūpa-nimittaɱ manasi karomi,||
rūpāni hi kho tam hi samaye passāmi||
na ca obhāsaɱ sañjānāmi||
kevalam pi rattiɱ||
kevalam pi divasaɱ||
kevalam pi rattindivan' ti.|| ||

So kho ahaɱ Anuruddhā appamatto ātāpī pahitatto viharanto||
parittaɱ c'eva obhāsaɱ sañjānāmi||
parittāni ca rūpāni passāmi||
appamānañ c'eva obhāsaɱ sañjānāmi||
appamāṇāni ca rūpāni passāmi,||
kevalam pi rattiɱ||
kevalam pi divasaɱ,||
kevalam pi rattindivan' ti.|| ||

Tassa mayhaɱ Anuruddhā, etad ahosi:|| ||

'Ko nu kho hetu,||
ko paccayo,||
yo'haɱ parittaɱ c'eva obhāsaɱ sañjānāmi,||
parittāni ca rūpāni passāmi||
appamāṇañ c'eva obhāsaɱ sañjānāmi,||
appamāṇi ca rūpāni passāmi||
kevalam pi rattiɱ||
kevalam pi divasaɱ||
kevalam pi rattindivan' ti?|| ||

Tassa mayhaɱ Anuruddhā, etad ahosi:|| ||

yasmiɱ kho me samaye paritto samādhi hoti,||
parittaɱ me tasmiɱ samaye cakkhu hoti.|| ||

So'haɱ parittena cakkhunā parittañ 'c'eva obhāsaɱ sañjānāmi,||
parittāni ca rūpāni passāmi.|| ||

Yasmiɱ pana samaye apparitto me samādhi hoti,||
appamāṇaɱ me tasmiɱ samaye cakkhu hoti,||
so'haɱ appamāṇena cakkhunā appamāṇañ c'eva obhāsaɱ sañjānāmi,||
appamāṇāni ca rūpāni passāmi||
kevalam pi rattiɱ||
kevalam pi divasaɱ||
kevalam pi rattindivan' ti.|| ||

Yato kho [162] me Anuruddhā,||
'Vicikicchā cittassa upakkileso' ti||
iti viditvā vicikicchā cittassa upakkileso pahīno ahosi.|| ||

'Amanasikāro cittassa upakkileso'ti||
iti viditvā amanasikāro cittassa upakkileso pahīno ahosi.|| ||

'Thīnamiddhaɱ cittassa upakkileso' ti||
iti viditvā thīnamiddhaɱ cittassa upakkileso pahīno ahosi.|| ||

'Chambhitattaɱ cittassa upakkileso'ti||
iti viditvā chambhitattaɱ cittassa upakkileso pahīno ahosi.|| ||

'Ubbillaɱ cittassa upakkileso ti||
iti viditvā ubbillaɱ cittassa upakkileso pahīno ahosi.|| ||

'Duṭṭhullaɱ cittassa upakkileso' ti||
iti viditvā duṭṭhullaɱ cittassa upakkileso pahīno ahosi.|| ||

'Accāraddhaviriyaɱ cittassa upakkiloso ti||
iti viditvā accāraddhaviriyaɱ cittassa upakkileso pahīno ahosi.|| ||

'Atilīnaviriyaɱ cittassa upakkileso ti||
iti viditvā atilīnaviriyaɱ cittassa upakkileso pahīno ahosi.|| ||

'Abhijappā cittassa upakkileso ti||
iti viditvā abhijappā cittassa upakkileso pahīno ahosi.|| ||

'Nānattasaññā cittassa upakkileso ti||
iti viditvā nānattasaññā cittassa upakkileso pahīno ahosi.|| ||

'Atinijjhāyitattaɱ rūpānaɱ cittassa upakkileso ti||
iti viditvā atinijjhāyitattaɱ rūpānaɱ cittassa upakkileso pahīno ahosi.|| ||

Tassa mayhaɱ Anuruddhā etad ahosi:|| ||

'Ye kho me cittassa upakkilesā,||
te me pahīnā.|| ||

Handa dānāhaɱ tividhena samādhiɱ bhāvemī' ti.|| ||

So kho ahaɱ Anuruddhā savitakkam pi savicāraɱ samādhiɱ bhāvesiɱ.|| ||

Avitakkam pi vicāramattaɱ samādhiɱ bhāvesiɱ.|| ||

Avitakkam pi avicāraɱ samādhiɱ bhāvesiɱ.|| ||

Sappītikam pi samādhiɱ bhāvesiɱ.|| ||

Nippītikam pi samādhiɱ bhāvesiɱ.|| ||

Sāta-sahagatam pi samādhiɱ bhāvesiɱ.|| ||

Upekkhā-sahagatam pi samādhiɱ bhāvesiɱ.|| ||

Yato kho me Anuruddhā,||
savitakko pi savicāro samādhi bhāvito ahosi,||
avitakko pi vicāramanto samādhi bhāvito ahosi,||
avitakko pi avicāro samādhi bhāvito ahosi,||
sappītiko pi samādhi bhāvito ahosi,||
nippītiko pi samādhi bhāvito ahosi,||
sātasahagato pi samādhi bhāvito ahosi,||
upekkhāsahagato pi samādhi bhāvito ahosi||
ñāṇañ ca pana me dassanaɱ udapādi:|| ||

'Akuppā me ceto vimutti,||
ayamantimā jāti,||
n'atthidāni punabbhavo' ti.|| ||

Idam avoca Bhagavā, attamano āyasmā Anuruddho Bhagavato bhāsitaɱ abhinandīti.|| ||

Upakkilesasuttaɱ aṭṭhamaɱ


Contact:
E-mail
Copyright Statement   Webmaster's Page