Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
3. Suññata Vagga

Sutta 130

Devadūta Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][ntbb][than][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

2. Seyyathā pi, bhikkhave, dve agārā sadvārā,||
tattha cakkhumā puriso majjhe ṭhito passeyya manusse gehaɱ pavisante pi nikkhamante pi,||
anusañcarante pi anuvicarante pi.|| ||

Evam eva kho ahaɱ bhikkhave,||
dibbena cakkhunā visuddhena atikkantamānusakena satte passāmi cavamāne upapajjamāne hīne paṇīte suvaṇṇe dubbaṇṇe sugate duggate yathā kammūpage satte pajānāmi.|| ||

Ime vata bhonto sattā kāyasucaritena samannāgato vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassa bhedā param maraṇā sugatiɱ saggaɱ lokaɱ upapannā.|| ||

Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā,||
te kāyassa bhedā param maraṇā manussesu upapannā.|| ||

Ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā,||
te kāyassa bhedā param maraṇā pettivisayaɱ upapannā.|| ||

Ime vā pana bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā,||
te kāyassa bhedā param maraṇā tiracchānayoniɱ upapannā.|| ||

Ime vā pana bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaɱ upavādakā micchādiṭṭhikā micchādiṭṭhikammasamādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannāti.|| ||

3. Tam enaɱ bhikkhave, nirayapālā nānā bāhāsu gahetvā Yamassa rañño dassen' ti.|| ||

Yaɱ deva, puriso ametteyyo apetteyyo asāmañño abrahmañño na kule jeṭṭhāpacāyī,||
imassa devo daṇḍaɱ paṇetūti.|| ||

4. Tam enaɱ bhikkhave, Yamo rājā paṭhamaɱ devadūtaɱ samanuyuñjati samanugāhati samanubhāsati:||
'Amho purisa, na tvaɱ addasa manussesu paṭhamaɱ devadūtaɱ pātubhūta'nti?|| ||

So evam āha:||
'nāddasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, na tvaɱ addasa manussesu daharaɱ kuMāraɱ mandaɱ uttānaseyyakaɱ sake muttakarīse palipannaɱ semāna'nti?|| ||

So evam āha:||
'addasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, tassa te viññūssa sato mahallakassa na etad ahosi:||
'Aham pi kho'mhi jātidhammo jātiɱ anatīto,||
handāhaɱ kalyāṇaɱ karomi kāyena vācāya manasā' ti?|| ||

So evam āha:||
'Nāham sakkhissaɱ bhante, pamādassaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa pamādavatāya na kalyāṇam akāsi kāyena vācāya manasā.|| ||

Taggha tvaɱ amho purisa,||
tathā karissanti yathā taɱ pamattaɱ.|| ||

Taɱ kho pana te etaɱ pāpakammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mittāmaccehi kataɱ,||
na ñātisālohitehi kataɱ,||
na samaṇabrāhmaṇehi kataɱ,||
na devatāhi kataɱ.|| ||

Tayāvetaɱ pāpakammaɱ kataɱ,||
tvaɱ yeva tassa vipākaɱ paṭisaŋvediyasī' ti.|| ||

5. Tam enaɱ bhikkhave, Yamo rājā paṭhamaɱ devadūtaɱ samanuyuñjitvā samanugāhitvā samanubhāsitvā dutiyaɱ devadūtaɱ samanuyuñjati samanugāhati samanubhāsati:||
'amho purisa, na tvaɱ addasa manussesu dutiyaɱ devadūtaɱ pātubhūtanti?|| ||

So evam āha:||
'nāddasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, na tvaɱ addasa manussesu itthiɱ vā purisaɱ vā āsītikaɱ vā nāvutikaɱ vā vassasatikaɱ vā jātīyā jiṇṇaɱ gopānasivaŋkaɱ bhoggaɱ daṇḍaparāyaṇaɱ pavedhamānaɱ gacchantaɱ āturaɱ gatayobbanaɱ khaṇḍadantaɱ palitakesaɱ vilūnaɱ khalitasiraɱ valitaɱ tilakāhatagatta'nti?|| ||

So evam āha:||
'addasaɱ bhante' ti.|| ||

Tam enaɱ bhikkhave, Yamo rājā evam āha:||
'amho puriso, tassa te viññūssa.|| ||

Sato mahallakassa na etad ahosi:||
'Aham pi kho'mhi jarā dhammo jaraɱ anatīto,||
handāhaɱ kalyāṇaɱ karomi kāyena vācāya manasā' ti?|| ||

So evam āha:||
'Nāham sakkhissaɱ bhante, pamādassaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, pamādavatāya na kalyāṇam akāsi kāyena vācāya manasā.|| ||

Taggha tvaɱ ambho purisa,||
tathā karissanti yathā taɱ pamattaɱ.|| ||

Taɱ kho pana te etaɱ pāpakammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mittāmaccehi kataɱ,||
na ñātisālohitehi kataɱ,||
na samaṇabrāhmaṇehi kataɱ,||
na devatāhi kataɱ.|| ||

Tayā vetaɱ pāpakammaɱ kataɱ,||
tvaɱ yeva etassa vipākaɱ paṭisaŋvediyasī' ti.|| ||

6. Tam enaɱ bhikkhave, Yamo rājā dutiyaɱ devadūtaɱ samanuyuñjitvā samanugāhitvā samanubhāsitvā tatiyaɱ devadūtaɱ samanuyuñjati,||
samanugāhati.|| ||

Samanubhāsati:||
amho purisa, na tvaɱ addasa,||
manussesu tatiyaɱ devadūtaɱ pātubhūtan' ti.|| ||

So evam āha:||
'nāddasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, na tvaɱ addasa manussesu itthiɱ vā purisaɱ vā ābādhikaɱ dukkhitaɱ bāḷhagilānaɱ sake muttakarīse palipannaɱ semānaɱ aññehi vuṭṭhāpiyamānaɱ aññehi saɱvesiyamānan' ti.|| ||

So evam āha:||
'addasaɱ bhante' ti.|| ||

Tam enaɱ bhikkhave Yamo rājā evam āha:||
'amho purisa, tassa te viññūssa.|| ||

Sato mahallakassa na etad ahosi:||
'Aham pi kho'mhi vyādhidhammo vyādhiɱ anatīto,||
handāhaɱ kalyāṇaɱ karomi kāyena vācāya manasā' ti.|| ||

So evam āha:||
'Nāham sakkhissaɱ bhante, pamādassaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, pamādavatāya na kalyāṇam akāsi kāyena vācāya manasā.|| ||

Taggha tvaɱ amho purisa, tathā karissanti yathā taɱ pamattaɱ.|| ||

Taɱ kho pana te etaɱ pāpakammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mittāmaccehi kataɱ,||
na ñātisālohitehi kathaɱ,||
na samaṇabrāhmaṇehi kathaɱ,||
na devatāhi kataɱ.|| ||

Tayā vetaɱ pāpakammaɱ kataɱ.|| ||

Tvaɱññevetassa vipākaɱ paṭisaŋvediyasī' ti.|| ||

7. Tam enaɱ bhikkhave, Yamo rājā tatiyaɱ devadūtaɱ samanuyuñjitvā samanugāhitvā samanubhāsitvā catutthaɱ devadūtaɱ samanuyuñjati,||
samanugāhati,||
samanubhāsati:||
'amho purisa, na tvaɱ addasa manussesu catutthaɱ devadūtaɱ pātubhūtan' ti.|| ||

So evam āha:||
'nāddasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, na tvaɱ addasa manussesu rājāno coraɱ āgucariɱ gahetvā vividhā kammakāraṇā kārente,||
kasāhi pi tā'ente vettehi pi tā'ente addhadaṇḍakehi pi ta'ente hattham pi chindante pādam pi chindante hatthapādam pi chindante kaṇṇam pi chindante nāsam pi chindante kaṇṇanāsam pi chindante bilaŋgathālikam pi karonte saŋkhamuṇḍikam pi karonte rāhumukham pi karonte jotimālikam pi karonte hatthapajjotikam pi karonte erakavattikam pi karonte cīrakavāsikam pi karonte eṇeyyakam pi karonte balisamaɱsikam pi karonte kahāpaṇakam pi karonte kārāpatacchikam pi karonte palighaparivattikam pi karonte palālapīṭhakam pi karonte tattena pi telena osiñcante sunakhehi pi khādāpente jīvantam pi sūle uttāsente asinā pi sīsaɱ chindante' ti.|| ||

So evam āha:||
'addasaɱ bhante' ti.|| ||

Tam enaɱ bhikkhave Yamo rājā evam āha:||
'amho purisa, tassa te viññūssa.|| ||

Sato mahallakassa na etad ahosi:||
'ye kira bho pāpakāni kammāni karonti.|| ||

Te diṭṭhe va dhamme evarūpā vividhā kammakāraṇā karīyanti.|| ||

Kimaŋga pana parattha handāhaɱ kalyāṇaɱ karomi kāyena vācāya manasā' ti.|| ||

So evam āha:||
'Nāham sakkhissaɱ bhante, pamādassaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa pamādavatāya na kalyāṇam akāsi.|| ||

Kāyena vācāya manasā, taggha tvaɱ amho purisa,||
tathā karissanti yathā taɱ pamattaɱ.|| ||

Taɱ kho pana te etaɱ pāpakammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mittāmaccehi kataɱ,||
na ñātisālohitehi kataɱ,||
na samaṇabrāhmaṇehi kataɱ,||
na devatāhi kataɱ.|| ||

Tayā vetaɱ pāpakammaɱ kataɱ.|| ||

Tvaññevetassa vipākaɱ paṭisaŋvediyasī' ti.|| ||

8. Tam enaɱ bhikkhave, Yamo rājā catutthaɱ devadūtaɱ samanuyuñjitvā samanugāhitvā samanubhāsitvā pañcamaɱ devadūtaɱ samanuyuñjati samanugāhati samanubhāsati:||
'amho purisa, na tvaɱ addasa manussesu pañcamaɱ devadūtaɱ pātubhūtan' ti.|| ||

So evam āha:||
'nāddasaɱ bhante' ti.|| ||

Tam enaɱ bhikkhave Yamo rājā evam āha:||
'amho purisa na tvaɱ addasa manussesu itthiɱ vā purisaɱ vā ekāhamataɱ vā dvīhamataɱ vā tīhamataɱ vā uddhumātakaɱ vinīlakaɱ vipubbakajātan' ti.|| ||

So evam āha:||
'addasaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, tassa te viññussa sato mahallakassa na etad ahosi:||
'Aham pi kho'mhi maraṇadhammo maraṇaɱ anatīto,||
handāhaɱ kalyāṇaɱ karomi kāyena vācāya manasā' ti.|| ||

So evam āha:||
'Nāham sakkhissaɱ bhante, pamādassaɱ bhante' ti.|| ||

Tam enaɱ bhikkhave, Yamo rājā evam āha:||
'amho purisa, pamādavatāya na kalyāṇam akāsi kāyena vācāya manasā.|| ||

Taggha tvaɱ amho purisa,||
tathā karissanti yathā taɱ pamattaɱ.|| ||

Taɱ kho na te etaɱ pāpakammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mittāmaccehi kataɱ,||
na ñātisālohitehi kataɱ,||
na samaṇabrāhmaṇehi kataɱ,||
na devatāhi kataɱ,||
tayā ve taɱ pāpakammaɱ kataɱ.|| ||

Tvaññevetassa vipākaɱ paṭisaŋvediyasī' ti.|| ||

9. Tam enaɱ bhikkhave, Yamo rājā pañcamaɱ devadūtaɱ samanuyuñjitvā samanugāhitvā samanubhāsitvā tuṇhi hoti.|| ||

10. Tam enaɱ bhikkhave nirayapālā pañcavidhabandhanaɱ nāma kāraṇaɱ karonti.|| ||

Tattaɱ ayokhīlaɱ hatthe gamenti,||
tattaɱ ayokhīlaɱ dutiye hatthe gamenti,||
tattaɱ ayokhīlaɱ pāde gamenti.|| ||

Tattaɱ ayokhīlaɱ dutiye pāde gamenti.|| ||

Tattaɱ ayokhīlaɱ majjhe urasmiɱ gamenti.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

11. Tam enaɱ bhikkhave, nirayapālā saɱvesetvā kuṭhārīhi tacchanti.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

12. Tam enaɱ bhikkhave, nirayapālā uddhaɱ pādaɱ adho siraɱ gahetvā vāsīhi tacchanti.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

13. Tam enaɱ bhikkhave, nirayapālā rathe yojetvā ādittāya paṭhaviyā sampajjalitāya sajotibhūtāya sārenti pi paccāsārenti pi.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

14. Tam enaɱ bhikkhave, nirayapālā mahantaɱ aŋgārapabbataɱ ādittaɱ sampajjalitaɱ sajotibhūtaɱ āropenti pi oropenti pi.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

15. Tam enaɱ bhikkhave, nirayapālā uddhaɱ pādaɱ adho siraɱ gahetvā tattāya lohakumbhiyā pakkhipanti ādttāya sampajjalitāya sajotibhūtāya.|| ||

So tattha pheṇuddehakaɱ paccati.|| ||

So tattha pheṇuddehakaɱ paccamāno sakim pi uddhaɱ gacchati,||
sakim pi adho gacchati,||
sakim pi tiriyaɱ gacchati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

16. Tam enaɱ bhikkhave, nirayapālā mahāniraye pakkhipanti.|| ||

So kho pana bhikkhave, mahānirayo:||
Catukkaṇṇo catudvāro vibhanto bhāgaso mito,||
ayopākārapariyanto ayasā paṭikujjito.|| ||

Tassa ayomayā bhūmi jalitā tejasā yutā,||
samantā yojanasataɱ pharitvā tiṭṭhati sabbadā.|| ||

17. Tassa kho pana bhikkhave, mahānirayassa puratthimāya bhittiyā acci uṭṭhahitvā pacchimāya bhittiyā, paṭihaññati.|| ||

Pacchimāya bhittiyā acci uṭṭhahitvā puratthimāya bhittiyā paṭihaññati.|| ||

Uttarāya bhittiyā acci uṭṭhahitvā dakkhiṇāya bhittiyā paṭihaññati.|| ||

Dakkhiṇāya bhittiyā acci uṭṭhahitvā uttarāya bhittiyā paṭihaññati.|| ||

Heṭṭhā acci uṭṭhahitvā upari paṭihaññati.|| ||

Uparito acci uṭṭhahitvā heṭṭhā paṭihaññati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti.|| ||

Yāva na taɱ pāpakammaɱ vyantī hoti.|| ||

18. Hoti kho so bhikkhave, samayo yaɱ kadāci karahaci dīghassa addhuno accayena tassa mahānirayassa puratthimaɱ dvāraɱ avāpurīyati.|| ||

So tattha sīghena javena dhāvati.|| ||

Tassa sīghena javena dhāvato chavim pi ḍayhati, cammam pi ḍayhati,||
maɱsam pi ḍayhati,||
nahārum pi ḍayhati.|| ||

Aṭṭhīni pi sampadhūpāyanti.|| ||

Ubbhataɱ tādisameva hoti.|| ||

Yato ca kho so bhikkhave, bahusampatto hoti,||
atha taɱ dvāraɱ pithīyati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti.|| ||

Yāva na taɱ pāpakammaɱ vyantī hoti.|| ||

Hoti kho so bhikkhave,||
samayo yaɱ kadāci karahaci dīghassa addhuno accayena tassa mahānirayassa pacchīmaɱ dvāraɱ avāpurīyati.|| ||

Hoti kho so bhikkhave,||
sāmayo yaɱ kadāci karahaci dīghassa addhuno accayena tassa mahānirayassa uttaraɱ dvāraɱ avāpurīyati.|| ||

Hoti kho so bhikkhave,||
samayo yaɱ kadāci karahaci dīghassa addhuno accayena tassa mahānirayassa dakkhiṇaɱ dvāraɱ avāpurīyati.|| ||

So tattha sīghena javena dhāvati.|| ||

Tassa sīghena javena dhāvato chavim pi ḍayhati,||
cammam pi ḍayhati,||
maɱsam pi ḍayhati,||
nahārum pi ḍayhati.|| ||

Aṭṭhīnipi sampadhūpāyanti.|| ||

Ubbataɱ tādisameva hoti.|| ||

Yato ca kho so bhikkhave, bahusampatto hoti.|| ||

Atha naɱ dvāraɱ pithīyati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

19. Hoti kho so bhikkhave,||
samayo yaɱ kadāci karahaci dīghassa addhuno accayena tassa mahānirayassa puratthimaɱ dvāraɱ avāpurīyati.|| ||

So tattha sīghena javena dhāvati.|| ||

Tassa sīghena javena dhāvato chavim pi ḍayhati,||
cammam pi ḍayhati,||
maɱsam pi ḍayhati,||
nahārum pi ḍayhati.|| ||

Aṭṭhīni pi sampadhūpāyanti.|| ||

Ubbhataɱ tādisameva hoti.|| ||

So tena dvārena nikkhamati.|| ||

20. Tassa kho pana bhikkhave,||
mahānirayassa samanantarā sahitameva mahanto gūthanirayo.|| ||

So tattha papatati tasmiɱ kho pana bhikkhave,||
gūthaniraye sūcimukhā pāṇā chaciɱ chindanti.|| ||

Chaviɱ chetvā cammaɱ chindanti cammaɱ chetvā maɱsaɱ chindanti maɱsaɱ chetvā nahāruɱ chindanti.|| ||

Nahāruɱ chetvā aṭṭhiɱ chindanti.|| ||

Aṭṭhiɱ chetvā aṭṭhimiñjaɱ khādanti.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

21. Tassa kho pana bhikkhave,||
gūthanirayassa samanantarā sahitameva mahanto kukkulanirayo.|| ||

So tattha papatati so tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

22. Tassa kho pana bhikkhave,||
kukkulanirayassa samanantarā sahitameva mahantaɱ simbalīvanaɱ uddhaɱ yojanamuggataɱ so'asaŋgulakaṇṭakaɱ ādittaɱ sampajjalitaɱ sajotibhūtaɱ,||
tattha āropenti pi oropenti pi.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

23. Tassa kho pana bhikkhave,||
simbalīvanassa samanantarā sahitameva mahantaɱ asipattavanaɱ.|| ||

So tattha pavisati tassa vāteritāni pattāni patitāni hattham pi chindanti,||
pādam pi chindanti,||
hatthapādam pi chindanti.|| ||

Kaṇṇam pi chindanti,||
nāsam pi chindanti,||
kaṇṇanāsam pi chindanti.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

24. Tassa kho pana bhikkhave,||
asipattavanassa samanantarā sahitameva mahatī khārodikā nadī.|| ||

So tattha papatati.|| ||

So tattha anusotam pi vuyhati.|| ||

Paṭisotampi vuyhati.|| ||

Anusotapaṭisotam pi vuyhati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

25. Tam enaɱ bhikkhave,||
nirayapālā ba'isena uddharitvā thale patiṭṭhāpetvā evam āhaɱsu:||
'amho purisa, kiɱ icchasī' ti.|| ||

So evam āha:||
jighacchitosmī bhante' ti.|| ||

Tam enaɱ bhikkhave,||
nirayapālā tattena,||
ayosaŋkunā mukhaɱ vivaritvā ādittena samapajjalitena sajotibhūtena tattaɱ ohagu'aɱ mukhe pakkhipatanti ādittaɱ samapajjalitaɱ sajotibhūtaɱ.|| ||

So tassa oṭṭham pi ḍayhati,||
mukham pi ḍayhati,||
kaṇṭham pi ḍayhati,||
uram pi ḍayhati,||
antam pi antaguṇam pi ādāya adhobhāgā nikkhamati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

26. Tam enaɱ bhikkhave,||
nirayapālā evam āhaɱsu:||
'amho purisa, kiɱ icchasī' ti.|| ||

So evam āha:||
'pipāsitosmi bhante' ti.|| ||

Tam enaɱ bhikkhave,||
nirayapālā tattena ayosaŋkunā mukhaɱ vivaritvā ādittena sampajjalitena sajotibhūtena tattaɱ tambalohaɱ mukhe āsiñcanti ādittaɱ sampajjalitaɱ sajotibhūtaɱ.|| ||

Taɱ tassa oṭṭham pi ḍayhati,||
mukham pi ḍayhati,||
kaṇṭham pi ḍayhati,||
uram pi ḍayhati.|| ||

Antam pi antaguṇam pi ādāya adhobhāgā nikkhamati.|| ||

So tattha dukkhā tippā kaṭukā vedanā vedeti.|| ||

Na ca tāva kālaɱ karoti,||
yāva na taɱ pāpakammaɱ vyantī hoti.|| ||

27. Tam enaɱ bhikkhave,||
nirayapālā puna mahāniraye pakkhipanti.|| ||

28. Bhūtapubbaɱ bhikkhave,||
Yamassa rañño etad ahosi:||
'ye kira bho loke pāpakāni akusalāni kammāni karonti,||
te evarūpā vividhā kammakāraṇā karīyanti.|| ||

Ahovatāhaɱ manussattaɱ labheyyaɱ.|| ||

Tathāgato ca loke upapajjeyya arahaɱ Sammā-sambuddho.|| ||

Tañcāhaɱ Bhagavantaɱ payirupāseyyaɱ,||
so ca me Bhagavā dhammaɱ deseyya,||
tassa cāhaɱ Bhagavato dhammaɱ ājāneyyan' ti.|| ||

29. Taɱ kho pana ahaɱ bhikkhave,||
nāññassa samaṇassa vā brāhmaṇassa vā sutvā vadāmi.|| ||

Api ca yadeva me sāmaɱ ñātaɱ,||
sāmaɱ diṭṭhaɱ,||
sāmaɱ viditaɱ tamevāhaɱ vadāmīti.|| ||

30. Idam avoca Bhagavā,||
idaɱ vatvā sugato athāparaɱ etad avoca satthā:|| ||

Coditā devadūtehi ye pamajjanti mānavā,||
Te dīgha-rattaɱ socanti hinakāyūpagā narā.|| ||

Ye ca kho devadūtehi santo sappurisā idha,||
Coditā nappamajjanti ariya-Dhamme kudācanaɱ.|| ||

Upādāne bhayaɱ disvā jātimaraṇa sambhave, Anupādā vimuccanti jātimaraṇasaŋkhaye.|| ||

Te khemappattā sukhino diṭṭhadhammābhinibbutā,||
Sabbaverabhayātītā sabbadukkhaɱ upaccagunti.|| ||

Devadūtasuttaɱ dasamaɱ


 

Contact:
E-mail
Copyright Statement   Webmaster's Page