Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
4. Vibhaŋga Vagga

Sutta 132

Ānanda Bhaddekaratta Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme. Tena kho pana samayena āyasmā Ānando upaṭṭhānasālayaɱ bhikkhū1 dhammiyā kathāya sandasseti. Samādapeti samuttejeti [190] samp'ahaɱseti bhaddekarattassa uddesañca vibhaŋgañca bhāsati.|| ||

Atha kho Bhagavā sāyaṇhasamayaɱ patisallānaɱ vuṭṭhito yena upaṭṭhānasālā, ten'upasaŋkami. Upasaŋkamitvā paññatte āsane nisīdi. Nisajja kho Bhagavā bhikkhū āmantesi 'ko nu kho bhikkhave upaṭṭhānasālāyaɱ bhikkhū1 dhammiyā kathāya sandassesi samādapesi samuttejesi samp'ahaɱsesi bhaddekarattassa uddesañca vibhaŋgañca abhāsī' ti.|| ||

Āyasmā bhante, Ānando upāṭṭhānasālāyaɱ bhikkhū dhammiyā kathāya sandassesi samādapesi samuttejesi samp'ahaɱsesi bhaddekarattassa uddesañca vibhaŋgañca abhāsī' ti.|| ||

Atha kho Bhagavā āyasmantaɱ Ānandaɱ āmantesi 'yathā kathaɱ pana tvaɱ Ānanda, bhikkhū dhammiyā kathāya sandassesi samādapesi samuttejesi samp'ahaɱsesi bhaddekarattassa uddesañca vibhaŋgañca abhāsī' ti?|| ||

Evaɱ kho ahaɱ bhante, bhikkhū dhammiyā kathāya sandassesiɱ samādapesiɱ samuttejesiɱ samp'ahaɱsesiɱ bhaddekarattassa uddesañca vibhaŋgañca abhāsiɱ:|| ||

Atītaɱ nānvāgameyya nappaṭikaŋkhe anāgataɱ,||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

Kathañcāvuso atītaɱ anvāgameti: evarūpo ahosiɱ atītam addhānanti tattha nandiɱ samanvāneti. Evaɱvedano ahosiɱ atītam addhānanti tattha nandiɱ samanvāneti. Evaɱsañño ahosiɱ atītam addhānanti tattha nandiɱ samanvāneti. Evaɱsankhāro ahosiɱ atītam addhānanti tattha nandiɱ samanvāneti. Evaɱviññāṇo ahosiɱ atītam addhānanti tattha nandiɱ samanvāneti. Evaɱ kho āvuso atītaɱ anvāgameti.|| ||

Kathañcāvuso atītaɱ nānvāgameti: evaɱrūpo ahosiɱ atītam addhānanti tattha nandiɱ na samanvāneti. Evaɱvedano ahosiɱ atītam addhānanti tattha nandiɱ na samanvāneti. Evaɱsañño ahosiɱ atītam addhānanti tattha nandiɱ na samanvāneti. Evaɱsankhāro ahosiɱ atītam addhānanti tattha nandiɱ na samanvāneti. Evaɱviññāṇo ahosiɱ atītam addhānanti tattha nandiɱ na samanvāneti. Evaɱ kho āvuso atītaɱ nānvāgameti.|| ||

Kathañcāvuso anāgataɱ paṭikaŋkhati: evarūpo siyaɱ anāgatam addhānanti tattha nandiɱ samanvāneti. Evaɱvedano siyaɱ anāgatam addhānanti tattha nandiɱ samanvāneti.|| ||

Evaɱsañño siyaɱ anāgatam addhānanti tattha nandiɱ samanvāneti. Evaɱsankhāro siyaɱ anāgatam addhānanti tattha nandiɱ samanvāneti. Evaɱviññāṇo siyaɱ anāgatam addhānanti tattha nandiɱ samanvāneti. Evaɱ kho āvuso anāgataɱ paṭikaŋkhati.|| ||

Kathañcāvuso anāgataɱ nappaṭikaŋkhati: evaɱrūpo siyaɱ anāgatam addhānanti tattha nandiɱ na samanvāneti. Evaɱvedano siyaɱ anāgatam addhānanti tattha nandiɱ na samanvāneti. Evaɱsañño siyaɱ anāgatam addhānanti tattha nandiɱ na samanvāneti. Evaɱsankhāro siyaɱ anāgatam addhānanti tattha nandiɱ na samanvāneti. Evaɱviññāṇo siyaɱ anāgatam addhānanti tattha nandiɱ na samanvāneti. Evaɱ kho āvuso anāgataɱ nappaṭikaŋkhati1.|| ||

Kathañcāvuso paccuppannesu dhammesu saɱhīrati: idh'āvuso assutavā puthujjano ariyānaɱ adassāvī ariya-Dhammassa akovido ariya-Dhamme avinīto sappurisānaɱ adassāvī sappurisa-Dhammassa akovido sappurisa-Dhamme avinīto rūpaɱ attato samanupassati, rūpavantaɱ vā attānaɱ, attani vā rūpaɱ, rūpasmiɱ vā attānaɱ. Vedanaɱ attato samanupassati, vedanāvantaɱ vā attānaɱ, attani vā vedanaɱ, vedanāya vā attānaɱ. Saññaɱ attato samanupassati, saññāvantaɱ vā attānaɱ, attani vā saññaɱ, saññāya vā attānaɱ. Sankhāre attato samanupassati, saŋkāravantaɱ vā attānaɱ, attani vā sankhāre, sankhāresu vā attānaɱ. Viññāṇaɱ attato samanupassati, viññāṇavantaɱ vā attānaɱ, attani vā viññāṇaɱ, viññāṇasmiɱ vā attānaɱ. Evaɱ kho āvuso paccuppannesu dhammesu saɱhīrati.|| ||

Kathañcāvuso, paccuppannesu dhammesu na saɱhīrati: idh'āvuso, Sutavā ariyasāvako ariyānaɱ dassāvi ariya-Dhammassa kovido ariya-Dhamme suvinīto2 sappurisānaɱ dassāvī sappurisa-Dhammassa kovido sappurisa-Dhamme suvinīto2 na rūpaɱ attato samanupassati. Na rūpavantaɱ vā attānaɱ, nāttani vā rūpaɱ na rūpasmiɱ vā attānaɱ. Na vedanaɱ attato samanupassati, vedanāvantaɱ vā attānaɱ, na attani vā vedanaɱ, na vedanāya vā attānaɱ. Na saññaɱ attato samanupassati, na saññāvantaɱ vā attānaɱ, na attani vā saññaɱ, na saññāya vā attānaɱ. Na sankhāre attato samanupassati, na saŋkāravantaɱ vā attānaɱ, na attani vā sankhāre, na sankhāresu vā attānaɱ. Na viññāṇaɱ attato samanupassati, na viññāṇavantaɱ vā attānaɱ, na attani vā na viññāṇaɱ, na viññāṇasmiɱ vā attānaɱ. Evaɱ kho āvuso paccuppannesu dhammesu na saɱhīrati. [191] atītaɱ nānvāgameyya nappaṭikaŋkhe anāgataɱ, yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

Evaɱ kho ahaɱ bhante, bhikkhū dhammiyā kathāya sandassesiɱ samādapesiɱ samuttejesiɱ samp'ahaɱsesiɱ, bhaddekarattassa uddesañca vibhaŋgañca abhāsinti.|| ||

Sādhu sādhu Ānanda sādhu kho tvaɱ Ānanda bhikkhū dhammiyā kathāya sandassesi samādapesi samuttejesi samp'ahaɱsesi. Bhaddekarattassa uddesañca vibhaŋgañca abhāsi.|| ||

Atītaɱ nānvāgameyya nappaṭikaŋkhe anāgataɱ,||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

KathañcĀnanda, atītaɱ anvāgameti?|| ||

Evaɱ rūpo ahosiɱ atītam addhānanti tattha nandiɱ samanvāneti. Evaɱvedano ahosiɱ atītam addhānanti tattha nandiɱ samanvāneti. Evaɱsañño ahosiɱ atītam addhānanti tattha nandiɱ samanvāneti. Evaɱsankhāro ahosiɱ atitamaddhānanti tattha nandiɱ samanvāneti. Evaɱviññāṇo ahosiɱ atītāmaddhānanti tattha nandiɱ samanvāneti. Evaɱ kho Ānanda atītaɱ anvāgameti.|| ||

KathañcĀnanda, atītā nānvāgameti?|| ||

Evaɱrūpo ahosiɱ atītam addhānanti tattha nandiɱ na samanvāneti. Evaɱvedano ahosiɱ atitamaddhānanti tattha nandiɱ na samanvāneti. Evaɱsañño ahosiɱ atītam addhānanti tattha nandiɱ na samanvāneti. Evaɱsankhāro ahosiɱ atītam addhānanti tattha nandiɱ na samanvāneti. Evaɱviññāṇo ahosiɱ atītam addhānanti tattha nandiɱ na samanvāneti. Evaɱ kho Ānanda, atitaɱ nānvāgameti.|| ||

KatañcĀnanda, anāgataɱ paṭikaŋkhati?|| ||

Evaɱrūpo siyaɱ anāgatam addhānanti tattha nandiɱ samanvāneti. Evaɱvedano siyaɱ anāgatam addhānanti tattha nandiɱ samanvāneti. Evaɱsañño siyaɱ anāgatam addhānanti tattha nandiɱ samanvāneti. Evaɱsankhāro siyaɱ anāgatam addhānanti tattha nandiɱ samanvāneti. Evaɱviññāṇo siyaɱ anāgatam addhānanti tattha nandiɱ samanvāneti. Evaɱ kho Ānanda, anāgataɱ paṭikaŋkhati.|| ||

KathañcĀnanda, anāgataɱ nappaṭikaŋkhati?|| ||

Evaɱrūpo siyaɱ anāgatmaddhānanti tattha nandiɱ na samanvāneti. Evaɱvedano siyaɱ anāgatam addhānanti tattha nandiɱ na samanvāneti. Evaɱsañño siyaɱ anāgatmaddhānanti tattha nandiɱ na samanvāneti. Evaɱsankhāro siyaɱ anāgatam addhānanti tattha nandiɱ na samanvāneti. Evaɱviññāṇo siyaɱ anāgatmaddhānanti tattha nandiɱ na samanvāneti. Evaɱ kho Ānanda, anāgataɱ nappaṭikaŋkhati.|| ||

KathañcĀnanda, paccuppannesu dhammesu saɱhīrati: idha bhikkhave assutavā puthujjano ariyānaɱ adassāvī ariya-Dhammassa akovido ariya-Dhamme avinīto sappurisānaɱ adassāvī sappurisa-Dhammassa akovido sappurisa-Dhamme avinīto rūpaɱ attato samanupassati, rūpavantaɱ vā attānaɱ, attani vā rūpaɱ, rūpasmiɱ vā attānaɱ.Vedanaɱ attato samanupassati, vedanāvantaɱ vā attānaɱ, attani vā vedanaɱ. Vedanāya vā attānaɱ. Saññaɱ attato samanupassati, saññavantaɱ vā attānaɱ, attani vā saññaɱ, saññāya vā attānaɱ. Sankhāre attato samanupassati, sankhāravantaɱ vā attānaɱ, attani vā sankhāre, sankhāresu vā attānaɱ. Viññāṇaɱ attato samanupassati viññāṇavantaɱ vā attānaɱ, attani vā viññāṇaɱ, viññāṇasmiɱ vā attānaɱ. Evaɱ kho Ānanda, paccuppannesu dhammesu saɱhīrati.|| ||

KathañcĀnanda, paccuppannesu dhammesu na saɱhīrati: idha bhikkhave Sutavā ariyasāvako ariyānaɱ dassāvī ariya-Dhammassa kovido ariya-Dhamme suvinīto sappurisānaɱ dassāvī sappurisa-Dhammassa kovido sappurisa-Dhamme suvinīto na rūpaɱ attato samanupassati. Na rūpavantaɱ vā attānaɱ, na attanī vā rūpaɱ, na rūpasmiɱ vā attānaɱ, na vedanaɱ attato samanupassati. Na vedavantaɱ vā attānaɱ, na attani vā vedanaɱ, na vedanāya vā attānaɱ. Na saññaɱ attato samanupassati, na saññāvantaɱ vā attānaɱ, na attani vā saññaɱ, na saññāya vā attānaɱ. Na sankhāre attato samanupassati, na sankhāravantaɱ vā attānaɱ, na attani vā sankhāre, na sankhāresu vā attānaɱ. Na viññāṇaɱ attato samanupassati na viññāṇavantaɱ vā attānaɱ, na attani vā viññāṇaɱ, na viññāṇasmiɱ vā attānaɱ.Evaɱ kho Ānanda, paccuppannesu dhammesu na saɱhīrati.|| ||

Atītaɱ nānvāgameyya nappaṭikaŋkhe anāgataɱ,||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

Idam avoca Bhagavā, attamano āyasmā Ānando Bhagavato bhāsitaɱ abhinandīti.|| ||

Ānanda bhaddekaratta suttaɱ dutiyaɱ


 

Contact:
E-mail
Copyright Statement   Webmaster's Page