Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
4. Vibhaŋga Vagga

Sutta 134

Lomasakaŋgiya Bhadd'Eka-ratta Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tena kho pana samayena āyasmā lomasakaŋgiyo Sakkesu viharati Kapilavatthusmiɱ Nigrodhārāme.|| ||

Atha kho candano devaputto abhikkantāya rattiyā abhikkantavaṇṇo kevalakappaɱ nigrodhārāmaɱ obhāsetvā yen'āyasmā lomasakaŋgiyo ten'upasaŋkami.|| ||

Upasaŋkamitvā eka-m-antaɱ aṭṭhāsi. Eka-m-antaɱ ṭhito kho candano devaputto āyasmantaɱ lomasakaŋgiyaɱ etad avoca:|| ||

Dhāresi tvaɱ bhikkhu, bhaddekarattassa uddesañca vibhaŋgañcāti.|| ||

[200] Na kho ahaɱ āvuso, dhāremi bhaddekarattassa uddesañca vibhaŋgañca.|| ||

Tvaɱ pan'āvuso, dhāresi bhaddekarattassa uddesañca vibhaŋgañcāti.|| ||

Ahampi kho bhikkhu, na dhāremi bhaddekarattassa uddesañca vibhaŋgañca.|| ||

Dhāresi pana tvaɱ bhikkhu, bhaddekarattiyo gāthāti.|| ||

Na kho ahaɱ āvuso, dhāremi bhaddekarattiyo gāthā.|| ||

Tvaɱ pan'āvuso, dhāresi bhaddekarattiyo gāthāti.|| ||

Dhāremi khohaɱ bhikkhu, bhaddekarattiyo gāthāti.|| ||

Yathā kathaɱ pana tvaɱ āvuso, dhāresi bhaddekarattiyo gāthāti.|| ||

Ekam'idāhaɱ bhikkhu samayaɱ Bhagavā devesu Tāvatiɱsesu viharati pāricchattakamūle paṇḍukambalasilāyaɱ.|| ||

Tatra Bhagavā devānaɱ Tāvatiɱsānaɱ bhaddekarattassa uddesañ ca vibhaŋgañ ca ābhāsi:|| ||

Atītaɱ nānvāgameyya||
nappaṭikaŋkhe anāgataɱ|| ||

Yadatītaɱ pahīnaɱ taɱ||
appattañ ca anāgataɱ|| ||

Paccuppannañca yo dhammaɱ||
tattha tattha vipassatī|| ||

Asaŋhīraɱ asankuppaɱ||
taɱ viditvā manubrūhaye|| ||

Ajj'eva kiccaɱ ātappaɱ||
ko jaññā maraṇaɱ suve?|| ||

Na hi no sangaraɱ tena||
mahāsenena maccunā|| ||

Evaɱ vihāriɱ ātāpiɱ||
ahorattam atanditaɱ|| ||

Taɱ ve bhaddekaratto ti||
santo ācikkhate munī ti|| ||

Evaɱ kho ahaɱ bhikkhu, dhāremi bhaddekarattiyo gāthā.|| ||

Uggaṇhāhi tvaɱ bhikkhu, bhaddekarattassa uddesañca vibhaŋgañca. Pariyāpuṇāhi tvaɱ bhikkhu, bhaddekarattassa uddesañca vibhaŋgañca. Dhārehi tvaɱ bhikkhu, bhaddekarattassa uddesañca vibhaŋgañca. Atthasaɱhito bhikkhu, bhaddekarattassa uddeso ca vibhaŋgo ca ādibrahmacariyakoti. Idam avoca candano devaputto. Idaɱ vatvā tatth'evantaradhāyi.|| ||

Atha kho āyasmā lomasakaŋgiyo tassā rattiyā accayena senāsanaɱ saɱsāmetvā pattacivaraɱ ādāya yena Sāvatthī [201] tena cārikaɱ pakkāmi. Anupubbena cārikaɱ caramāno yena Sāvatthī Jetavanaɱ Anāthapiṇḍikassa ārāmo, yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi. Eka-m-antaɱ nisinno kho āyasmā lomasakaŋgiyo Bhagavantaɱ etad avoca:|| ||

'Ekamidāhaɱ bhante, samayaɱ Sakkesu viharāmi Kapilavatthusmiɱ Nigrodhārāme. Atha kho bhante, aññataro devaputto abhikkantāya rattiyā abhikkantavaṇṇo kevalakappaɱ nigrodhārāmaɱ obhāsetvā yenāhaɱ ten'upasaŋkami. Upasaŋkamitvā eka-m-antaɱ aṭṭhāsi. Eka-m-antaɱ ṭhito kho bhante, so devaputto maɱ etad avoca: 'dhāresi tvaɱ bhikkhu, bhaddekarattassa uddesañca vibhaŋgañcā' ti. Evaɱ vutte ahaɱ bhante taɱ devaputtaɱ etad avocaɱ: 'na kho ahaɱ āvuso, dhāremi bhaddekarattassa uddesañca vibhaŋgañca. Tvaɱ pan'āvuso dhāresi bhaddekarattassa uddesañca vibhaŋgañcā'ti aham pi kho bhikkhu, na dhāremi bhaddekarattassa uddesañca vibhaŋgañca. Dhāresi pana tvaɱ bhikkhu, bhaddekarattiyo gāthā' ti. Na kho ahaɱ āvuso, dhāremi bhaddekarattiyo gāthāti. Tvaɱ pan'āvuso dhāresi bhaddekarattiyo gāthāti. Dhāremi kho ahaɱ bhikkhu, bhaddekarattiyo gāthāti. Yathā kathaɱ pana tvaɱ āvuso, dhāresi bhaddekarattiyo gāthāti.|| ||

Ekamidāhaɱ bhikkhu, samayaɱ Bhagavā devesu Tāvatiɱsesu viharati pāricchattakamūle paṇḍukambalasilāyaɱ. Tatra Bhagavā devānaɱ Tāvatiɱsānaɱ bhaddekarattassa uddesañca vibhaŋgañca abhāsi:|| ||

Atītaɱ nānvāgameyya nappaṭikaŋkhe anāgataɱ.||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

'Evaɱ kho ahaɱ bhikkhu, dhāremi bhaddekarattiyo gāthā. Uggaṇhāhi tvaɱ bhikkhu, bhaddekarattassa uddesañca vibhaŋgañca, pariyāpuṇāhi tvaɱ bhikkhu, bhaddekarattassa uddesañca vibhaŋgañca. Dhārehi tvaɱ bhikkhu, bhaddekarattassa uddesañca vibhaŋgañca. Atthasaɱhito bhikkhu, bhaddekarattassa uddeso ca vibhaŋgo ca ādibrahmacariyakoti. Idam avoca so bhante, devaputto, idaɱ vatvā tatth'evantaradhāyi. Sādhu me bhante, Bhagavā bhaddekarattassa uddesañca vibhaŋgañca desetu' ti.|| ||

Jānāsi pana tvaɱ bhikkhu, taɱ devaputtan' ti.|| ||

Na kho ahaɱ bhante, jānāmi taɱ devaputtanti.|| ||

Candano nāma so bhikkhu, devaputto. Candano bhikkhu, devaputto aṭṭhikatvā manasikatvā sabbacetaso1 samannāharitvā ohitasoto dhammaɱ suṇāti. Tena hi bhikkhu, suṇāhi. Sādhukaɱ manasikarohi. Bhāsissāmīti. Evaɱ bhante' ti kho āyasmā lomasakaŋgiyo Bhagavato paccassosi. Bhagavā etad avoca:|| ||

Atītaɱ nānvāgameyya nappaṭikaŋkhe anāgataɱ.||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

Kathañ ca bhikkhu, atītaɱ anvāgameti: evaɱrūpo ahosiɱ atītam addhānanti tattha nandiɱ samanvāneti. Evaɱvedano ahosiɱ atītam addhānanti tattha nandiɱ samanvāneti. Evaɱ sañño ahosiɱ atītam addhānanti tattha nandiɱ samanvāneti. Evaɱ sankhāro ahosiɱ atītam addhānanti tattha nandiɱ samanvāneti. Evaɱviññāṇo ahosiɱ atītam addhānanti tattha nandiɱ samanvāneti. Evaɱ kho bhikkhu atītaɱ anvāgameti.|| ||

[202] Kathañ ca bhikkhu, atītaɱ nānvāgameti: evaɱrūpo ahosiɱ atītam addhānanti tattha nandiɱ na samanvāneti. Evaɱvedano ahosiɱ atītam addhānanti tattha nandiɱ na samanvāneti. Evaɱ sañño ahosiɱ atītam addhānanti tattha nandiɱ na samanvāneti. Evaɱ sankhāro ahosiɱ atītam addhānanti tattha nandiɱ na samanvāneti. Evaɱviññāṇo ahosiɱ atītam addhānanti tattha nandiɱ na samanvāneti. Evaɱ kho bhikkhu atītaɱ nānvāgameti.|| ||

Kathañ ca bhikkhu, anāgataɱ paṭikaŋkhati: evaɱrūpo siyaɱ anāgatam addhānanti tattha nandiɱ samanvāneti. Evaɱvedano siyaɱ anāgatam addhānanti tattha nandiɱ samanvāneti. Evaɱsañño siyaɱ anāgatmaddhānanti tattha nandiɱ samanvāneti. Evaɱsankhāro siyaɱ anāgatam addhānanti tattha nandiɱ samanvāneti. Evaɱviññāṇo siyaɱ anāgatam addhānanti tattha nandiɱ samanvāneti. Evaɱ kho bhikkhu, anāgataɱ paṭikaŋkhati.|| ||

Kathañ ca bhikkhu, anāgataɱ na paṭikaŋkhati: evaɱrūpo siyaɱ anāgatam addhānanti tattha nandiɱ na samanvāneti. Evaɱvedano siyaɱ anāgatam addhānanti tattha nandiɱ na samanvāneti.|| ||

Evaɱsañño siyaɱ anāgatmaddhānanti tattha nandiɱ na samanvāneti. Evaɱsankhāro siyaɱ anāgatam addhānanti tattha nandiɱ na samanvāneti. Evaɱviññāṇo siyaɱ anāgatam addhānanti tattha nandiɱ na samanvāneti. Evaɱ kho bhikkhu, anāgataɱ na paṭikaŋkhati.|| ||

Kathañ ca bhikkhu, paccuppannesu dhammesu saɱhīrati: idha bhikkhu, assutavā puthujjano ariyānaɱ adassāvī ariya-Dhammassa akovido ariya-Dhamme avinīto sappurisānaɱ adassāvī sappurisa-Dhammassa akovido sappurisa-Dhamme avinīto rūpaɱ attato samanupassati, rūpavantaɱ vā attānaɱ, attani vā rūpaɱ, rūpasmiɱ vā attānaɱ. Vedanaɱ attato samanupassati, vedanāvantaɱ vā attānaɱ, attani vā vedanaɱ, vedanāya vā attānaɱ. Saññaɱ attato samanupassati, saññāvantaɱ vā attānaɱ. Attani vā saññaɱ, saññāya vā attānaɱ. Sankhāre attato samanupassati, sankhāravantaɱ vā attānaɱ, attani vā sankhāre, sankhāresu vā attānaɱ. Viññāṇaɱ attato samanupassati, viññāṇavantaɱ vā attānaɱ, attani vā viññāṇaɱ, viññāṇasmiɱ vā attānaɱ. Evaɱ kho bhikkhu, paccuppannesu dhammesu saɱhīrati.|| ||

Kathañ ca bhikkhu, paccuppannesu dhammesu na saɱhīrati: idha bhikkhu, Sutavā ariyasāvako. Ariyānaɱ dassāvī ariya-Dhammassa kovido ariya-Dhamme suvinīto sappurisānaɱ dassāvī sappurisa-Dhammassa kovido sappurisa-Dhamme suvinīto. Na rūpaɱ attato samanupassati, na rūpavantaɱ vā attānaɱ, na attani vā rūpaɱ, na rūpasmiɱ vā attānaɱ. Na vedanaɱ attato samanupassati, na vedanāvantaɱ vā attānaɱ, na attani vā vedanaɱ, na vedanāya vā attānaɱ. Na saññaɱ attato samanupassati, na saññāvantaɱ vā attānaɱ. Na attani vā saññaɱ, na saññāya vā attānaɱ. Na sankhāre attato samanupassati, na sankhāravantaɱ vā attānaɱ, na attani vā sankhāre, na sankhāresu vā attānaɱ. Na viññāṇaɱ attato samanupassati, na viññāṇavantaɱ vā attānaɱ, na attani vā viññāṇaɱ, na viññāṇasmiɱ vā attānaɱ. Evaɱ kho bhikkhu, paccuppannesu dhammesu na saɱhīrati.|| ||

Atītaɱ nānvāgameyya nappaṭikaŋkhe anāgataɱ.||
Yadatītaɱ pahīnaɱ taɱ appattañ ca anāgataɱ.|| ||

Paccuppannañca yo dhammaɱ tattha tattha vipassati,||
Asaɱhīraɱ asaŋkuppaɱ taɱ vidvā manubrūhaye.|| ||

Ajjeva kiccaɱ ātappaɱ ko jaññā maraṇaɱ suve,||
Na hi no saŋgaraɱ tena mahāsenena maccunā.|| ||

Evaɱ vihāriɱ ātāpiɱ ahorattamatanditaɱ,||
Taɱ ve bhaddekarattoti santo ācikkhate munīti.|| ||

Idam avoca Bhagavā. Attamano āyasmā lomasakaŋgiyo Bhagavato bhāsitaɱ abhinandīti.|| ||

Lomasakaŋgiya bhaddekaratta suttaɱ catutthaɱ


 

Contact:
E-mail
Copyright Statement   Webmaster's Page