Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
4. Vibhaŋga Vagga

Sutta 136

Mahā Kamma-Vibhaŋga Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][than.2][nymo][upal][olds] Evaɱ me sutaɱ:

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Tena kho pana samayena āyasmā Samiddhi araññakuṭikāyaɱ viharati.|| ||

Atha kho potaliputto paribbājako jaŋghāvihāraɱ anucaŋkamamāno anuvicaramāno yen'āyasmā Samiddhi ten'upasaŋkami.|| ||

Upasaŋkamitvā āyasmatā Samiddhinā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho potaliputto paribbājako āyasmantaɱ Samiddhiɱ etad avoca:||
'sammukhā me taɱ āvuso Samiddhi,||
samaṇassa Gotamassa sutaɱ,||
sammukhā paṭiggahitaɱ:||
moghaɱ kāya-kammaɱ,||
moghaɱ vacī-kammaɱ,||
mano-kammameva saccan' ti.|| ||

Atthi ca sā samāpatti yaɱ samāpattiɱ samāpanno na kiñci vediyatī ti.|| ||

Mā evaɱ āvuso potaliputta avaca,||
mā evaɱ āvuso potaliputta avaca,||
mā Bhagavantaɱ abbhācikkhi,||
na hi sādhu Bhagavato abbhakkhānaɱ,||
na hi Bhagavā evaɱ vadeyya:||
'moghaɱ kāya-kammaɱ,||
moghaɱ vacī-kammaɱ,||
mano-kammameva saccan' ti.|| ||

Atthi ca kho sā āvuso,||
samāpatti yaɱ samāpattiɱ samāpanno na kiñci vediyatī ti.|| ||

Kiva ciraɱ pabbajitosi āvuso,||
Samiddhī ti.|| ||

Na ciraɱ āvuso,||
tīṇi vassāniti.|| ||

Etthadāni mayaɱ there bhikkhu kiɱ vakkhāma,||
yatra hi nāmevaɱ navo bhikkhu satthāraɱ parirakkhitabbaɱ maññissati.|| ||

Sañcetanikaɱ āvuso Samiddhi,||
kammaɱ katvā kāyena vācāya manasā,||
kiɱ so vediyatī ti.|| ||

Sañcetanikaɱ āvuso potaliputta,||
kammaɱ katvā kāyena vācāya manasā,||
dukkhaɱ so vediyatī ti.|| ||

Atha kho potaliputto paribbājako āyasmato Samiddhi'ssa bhāsitaɱ n'eva abhinandi na paṭikkosi.|| ||

Anabhinanditvā appaṭikkositvā uṭṭhāy āsanā pakkāmi.|| ||

Atha kho āyasmā Samiddhi acirapakkante potaliputte paribbājake yen'āyasmā Ānando ten'upasaŋkami.|| ||

Upasaŋkamitvā [208] āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Samiddhi yāvatako ahosi potaliputtena paribbājakena saddhiɱ kathāsallāpo,||
taɱ sabbaɱ āyasmato Ānandassa ārocesi.|| ||

Evaɱ vutte āyasmā Ānando āyasmantaɱ Samiddhiɱ etad avoca:||
'atthi kho idaɱ āvuso Samiddhi,||
kathāpābhataɱ Bhagavantaɱ dassanāya.|| ||

Āyāmāvuso Samiddhi.|| ||

Yena Bhagavā ten'upasaŋkameyyāma,||
upasaŋkamitvā etam atthaɱ Bhagavato āroceyyāma.|| ||

Yathā no Bhagavā vyākarissati,||
tathā naɱ dhāreyyāmāti.|| ||

Evam āvuso ti kho āyasmā Samiddhi āyasmato Ānandassa paccassosi.|| ||

Atha kho āyasmā ca Ānando āyasmā ca Samiddhi yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho āyasmā Ānando yāvatako ahosi āyasmato Samiddhi'ssa potaliputtena paribbājakena saddhiɱ kathā sallāpo,||
taɱ sabbaɱ Bhagavato ārocesi.|| ||

Evaɱ vutte Bhagavā āyasmantaɱ Ānandaɱ etad avoca:||
'dassanampi kho ahaɱ Ānanda,||
potaliputtassa paribbājakassa nābhijānāmi.|| ||

Kuto pan'evarūpaɱ kathāsallāpaɱ.|| ||

Iminā ca Ānanda,||
Samiddhinā moghapurisena potaliputtassa paribbājakassa vibhajja vayākaraṇīyo pañho ekaɱsena vyākato' ti.|| ||

Evaɱ vutte āyasmā Udāyī Bhagavantaɱ etad avoca:||
'sace pana bhante,||
āyasmatā Samiddhinā idaɱ sandhāya bhāsitaɱ,yaɱ kiñci vedayitaɱ taɱ dukkhasmin' ti.|| ||

Atha kho Bhagavā āyasmantaɱ Ānandaɱ āmantesi:||
'passa kho tvaɱ Ānanda,||
imassa udāyissa mogha-purisassa ummaggaɱ.|| ||

Aññāsiɱ kho ahaɱ Ānanda,||
idān'evāyaɱ Udāyī moghapuriso ummujjamāno ayoniso ummujjissatī' ti.|| ||

Ādiɱyeva Ānanda,||
potaliputtena paribbājakena tisso vedanā pucchitā.|| ||

Sacāyaɱ Ānanda,||
Samiddhi moghapuriso [209] potaliputtassa paribbājakassa evaɱ puṭṭho evaɱ vyākareyya:||
'sañcetanikaɱ āvuso potaliputta,||
kammaɱ katvā kāyena vācāya manasā sukhavedaniyaɱ,||
sukhaɱ so vediyati.|| ||

Sañcetanikaɱ āvuso potaliputta,||
kammaɱ katvā kāyena vācāya manasā dukkhavedaniyaɱ,||
dukkhaɱ so vediyati sañcetanikaɱ āvuso potaliputta,||
kammaɱ katvā kāyena vācāya manasā adukkhamasukhavedaniyaɱ,||
adukkha-m-asukhaɱ so vediyatiti.|| ||

Evaɱ vyākaramāno kho Ānanda,||
Samiddhi moghapuriso potaliputtassa paribbājakassa sammā vyākareyya.|| ||

Apic'Ānanda,||
ke ca aññatitthiyā paribbājakā bālā avyattā,||
ke ca Tathāgatassa mahākammavibhaŋgaɱ jānissanti.|| ||

Sace tumhe Ānanda,||
suṇeyyātha Tathāgatassa mahākammavibhaŋgaɱ vibhajantassāti.|| ||

Etassa Bhagavā kālo,||
etassa sugata kālo,||
yaɱ Bhagavā mahākammavibhaŋgaɱ vibhajeyya.|| ||

Bhagavato sutvā bhikkhu dhāressantī ti.|| ||

Tena h'Ānanda,||
suṇāhi,||
sādhukaɱ manasi karohi,||
bhāsissāmīti.|| ||

Evaɱ bhante' ti kho āyasmā Ānando Bhagavato paccassosi.|| ||

Bhagavā etad avoca:||

Cattāro me Ānanda,||
puggalā santo saɱvijjamānā lokasmiɱ.|| ||

Katame cattāro?

Idh'Ānanda,||
ekacco puggalo idha pāṇātipātī hoti,||
adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusāvāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhi hoti,||
so kāyassa bedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Idha pana Ānanda,||
ekacco puggalo idha pāṇātipātī hoti adinnādāyī hoti,||
kāmesu micchācārī hoti,||
musāvādī hoti,||
pisunāvāco hoti,||
pharusāvāco hoti,||
samphappalāpī hoti,||
abhijjhālū hoti,||
vyāpannacitto hoti,||
micchādiṭṭhī hoti.|| ||

So kāyassa bhedā param maraṇā sugatiɱ saggaɱ lokaɱ upapajjati.|| ||

Idh'Ānanda ekacco puggalo idha pāṇātipātā paṭivirato hoti,||
adinnādānā paṭivirato hoti, kāmesu micchācārā paṭivirato hoti,||
musā-vādā paṭivirato hoti,||
pisunā vācā paṭivirato hoti,||
[210] pharusā vācā paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhi hoti,||
so kāyassa bhedā param maraṇā sugatiɱ saggaɱ lokaɱ upapajjati.|| ||

Idha pan'Ānanda,||
ekacco puggalo idha pāṇātipātā paṭivirato hoti,||
adinnādānā paṭivirato hoti,||
kāmesu micchācārā paṭivirato hoti,||
musā-vādā paṭivirato hoti,||
pisunā vācā paṭivirato hoti,||
pharusā vācā paṭivirato hoti,||
samphappalāpā paṭivirato hoti,||
anabhijjhālū hoti,||
avyāpannacitto hoti,||
sammādiṭṭhi hoti,||
so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Idh'Ānanda,||
ekacco samaṇo vā brāhmaṇo vā ātappam anvāya padhānam anvāya anuyogam anvāya appamādam anvāya sammā manasi-kāramanvāya tathārūpaɱ ceto-samādhiɱ phusati.|| ||

Yathā samāhite citte dibbena cakkhunā visuddhena atikkantamānusakena amuɱ puggalaɱ passati:||
'idha pāṇātipātiɱ adinnādāyiɱ kāmesu micchācāriɱ musāvādiɱ pisunā vācaɱ pharusāvācaɱ samphappalāpiɱ anabhijjhāluɱ vyāpannacittaɱ micchādiṭṭhiɱ.|| ||

Kāyassa bhedā param maraṇā passati apāyaɱ duggatiɱ vinipātaɱ Nirayaɱ uppannaɱ.|| ||

So evam āha:||
'atthi kira bho,||
pāpakāni kammāni,||
atthi duccaritassa vipāko,||
apāhaɱ puggalaɱ addasaɱ idha pāṇātipātiɱ adinnādāyiɱ kāmesu micchācāriɱ musāvādiɱ pisunāvācaɱ pharusāvācaɱ samphappalāpiɱ anabhijjhāluɱ vyāpannacittaɱ micchādiṭṭhiɱ kāyassa bhedā param maraṇā passāmi apāyaɱ duggatiɱ vinipātaɱ Nirayaɱ uppannanti.|| ||

So evam āha:||
'yo kira bho pāṇātipātī adinnādāyī kāmesu micchācārī musāvādī pisunāvācī pharusāvācī samphappalāpī anabhijjhālū hoti,||
avyāpannacitto hoti,||
micchādiṭṭhi,||
sabbo so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇanti.|| ||

Iti so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa3 abhinivissa voharati:||
idam eva saccaɱ moghamaññan' ti.|| ||

Idha pan'Ānanda,||
ekacco samaṇo vā brāhmaṇo vā ātappam anvāya padhānam anvāya anuyogam anvāya appamādam anvāya sammā manasi-kāramanvāya tathārūpaɱ ceto-samādhiɱ phusati yathā samāhite citte dibbena cakkhunā visuddhena atikkantamānusakena amuɱ puggalaɱ passati.|| ||

Idha pāṇātipātiɱ adinnādāyiɱ kāmesu micchācāriɱ musāvādiɱ pisunā vācaɱ pharusāvācaɱ samphappalāpiɱ anabhijjhāluɱ vyāpannacittaɱ micchādiṭṭhiɱ,||
kāyassa bhedā param maraṇā passati sugatiɱ saggaɱ lokaɱ uppannaɱ.|| ||

So evam āha:||
'n'atthi kira bho,||
pāpakāni kammāni,||
n'atthi duccaritassa vipāko,||
apāhaɱ puggalaɱ addasaɱ idha pāṇātipātiɱ adinnādāyiɱ kāmesu micchācāriɱ musāvādiɱ pisunāvācaɱ pharusāvācaɱ samphappalāpiɱ anabhijjhāluɱ vyāpannacittaɱ micchādiṭṭhiɱ kāyassa bhedā param maraṇā passāmi sugatiɱ saggaɱ lokaɱ uppannanti.|| ||

So evam āha:||
'yo kira bho pāṇātipātī adinnādāyī kāmesu micchācārī musāvādī pisunāvācī pharusāvācī samphappalāpī anabhijjhālū hoti,||
avyāpannacitto hoti,||
micchādiṭṭhi,||
sabbo so kāyassa bhedā param maraṇā sugatiɱ saggaɱ lokaɱ upapajjati.|| ||

Ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇanti.|| ||

Iti so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa1 abhinivissa voharati:||
idam eva saccaɱ Moghamaññan' ti.|| ||

Idh'Ānanda,||
ekacco samaṇo vā brāhmaṇo [211] vā ātappam anvāya padhānam anvāya anuyogamanvāya appamādam anvāya sammā manasi-kāramanvāya tathārūpaɱ ceto-samādhiɱ phusati.|| ||

Yathā samāhite citte dibbena cakkhunā visuddhena atikkantamānusakena amuɱ puggalaɱ passati 'idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musā-vādā paṭivirataɱ pisunā vācā paṭivirataɱ pharusā vācā paṭivirataɱ samphappalāpā paṭivirataɱ anabhijjhāluɱ avyāpannacittaɱ sammādiṭṭhiɱ kāyassa bhedā param maraṇā passati sugatiɱ saggaɱ lokaɱ upapannaɱ.|| ||

So evam āha:||
'atthi kira bho kalyāṇāni kammāni,||
atthi sucaritassa vipāko.|| ||

Apāhaɱ puggalaɱ addasaɱ idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musāvādā paṭivirataɱ pisunāvācā paṭivirataɱ pharusāvācā paṭivirataɱ samphappalāpā paṭivirataɱ anabhijjhāluɱ vyāpannacittaɱ sammādiṭṭhiɱ kāyassa bhedā param maraṇā passāmi sugatiɱ saggaɱ lokaɱ upapannan' ti.|| ||

So evam āha:||
'yo kira bho pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālū hoti,||
avyāpannacitto hoti,||
sammādiṭṭhi sabbo so kāyassa bhedā param maraṇā sugatiɱ saggaɱ lokaɱ upapajjati ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇanti.|| ||

Iti so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa1 abhinivissa voharati:||
'idam eva saccaɱ moghamaññan' ti.|| ||

Idha pan'Ānanda,||
ekacco samaṇo vā brāhmaṇo vā ātappam anvāya padhānam anvāya anuyogam anvāya appamādam anvāya sammā manasi-kāramanvāya tathārūpaɱ ceto-samādhiɱ phusati,||
yathā samāhite citte dibbena cakkhunā visuddhena atikkantamānusakena amuɱ puggalaɱ [212] passati.|| ||

Idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musā-vādā paṭivirataɱ pisunā vācā paṭivirataɱ pharusā vācā paṭivirataɱ samphappalāpā paṭivirataɱ anabhijjhāluɱ avyāpannacittaɱ sammādiṭṭhiɱ kāyassa bhedā param maraṇā apāyaɱ duggatiɱ vinipātaɱ Nirayaɱ upapannaɱ.|| ||

So evam āha:||
'n'atthi kira bho kalyāṇāni kammāni,|| ||

N'atthi sucaritassa vipāko.|| ||

Apāhaɱ puggalaɱ addasaɱ idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musā-vādā paṭivirataɱ pisunā vācā paṭivirataɱ pharusāvācā paṭivirataɱ samphappalāpā paṭivirataɱ anabhijjhāluɱ vyāpannacittaɱ sammādiṭṭhiɱ,||
kāyassa bhedā param maraṇā passāmi apāyaɱ duggatiɱ vinipātaɱ Nirayaɱ upapannan' ti.|| ||

So evam āha:||
'yo kira bho pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato samphappalāpā paṭivirato anabhijjhālu hoti,||
avyāpannacitto hoti sammādiṭṭhi.|| ||

Sabbo so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati,||
ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇan' ti.|| ||

Iti so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa abhinivissa voharati:||
'idam eva saccaɱ moghamaññan' ti.|| ||

Tatr'Ānanda,||
yvāyaɱ samaṇo vā brāhmaṇo vā evam āha:||
atthi kira bho,||
pāpakāni kammāni,||
atthi duccaritassa vipākoti.|| ||

Idamassa anujānāmi.|| ||

Yam pi so evam āha:||
apāhaɱ puggalaɱ addasaɱ idha pāṇātipātiɱ adinnādāyiɱ kāmesu micchācāriɱ musāvādiɱ pisunāvāciɱ pharusāvāciɱ samphappalāpiɱ anabhijjhāluɱ avyāpannacittaɱ sammādiṭṭhiɱ kāyassa bhedā param maraṇā passāmi apāyaɱ duggatiɱ vinipātaɱ Nirayaɱ upapannan' ti.|| ||

Idam pissa anujānāmi.|| ||

Yañ ca kho so evam āha:||
'yo kira bho pāṇātipātī adinnādāyī kāmesu micchācārī musāvādī pisunāvācī pharusāvācī samphappalāpī anabhijjhālu hoti,||
avyāpannacitto hoti,||
sammādiṭṭhi,||
sabbo so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjatī' ti.|| ||

Idamassa nānujānāmi.|| ||

Yam pi so evam āha:||
ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇanti.|| ||

Idam pissa nānujānāmi.|| ||

Yam pi so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa abhinivissa voharati,||
'idam eva saccaɱ moghamaññan' ti.|| ||

Idam pissa nānujānāmi.|| ||

Taɱ kissa hetu?|| ||

Aññathā hi Ānanda,||
Tathāgatassa mahākammavibhaŋge ñāṇaɱ hoti.|| ||

Tatr'Ānanda,||
yvāyaɱ samaṇo vā brāhmaṇo vā evam āha:||
n'atthi kira bho,||
pāpakāni kammāni n'atthi duccaritassa vipākoti.|| ||

Idamassa nānujānāmi.|| ||

Yam pi kho so evam āha:||
apāhaɱ puggalaɱ addasaɱ idha pāṇātipātiɱ adinnādāyiɱ kāmesu micchācāriɱ musāvādiɱ pisunāvāciɱ pharusāvāciɱ samphappalāpiɱ anabhijjhāluɱ avyāpannacittaɱ sammādiṭṭhiɱ kāyassa bhedā param maraṇā passāmi sugatiɱ saggaɱ lokaɱ upapanna'nti,||
idamassa anujānāmi.|| ||

Yañ ca kho so evam āha:||
'yo kira bho pāṇātipātī adinnādāyī kāmesu micchācārī musāvādī pisunāvācī pharusāvācī samphappalāpī anabhijjhālu hoti,||
avyāpannacitto hoti sammādiṭṭhi,||
sabbo so kāyassa bhedā param maraṇā sugatiɱ saggaɱ lokaɱ upapajjatī' ti.|| ||

[213] Idamassa nānujānāmi.|| ||

Yam pi so evam āha:||
ye evaɱ jānanti,||
te sammā jānanti ye aññathā jānanti,||
micchā tesaɱ ñāṇanti.|| ||

Idam pissa nānujānāmi.|| ||

Yam pi so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa abhinivissa voharati:||
'idam eva saccaɱ moghamaññan' ti.|| ||

Idam pissa nānujānāmi.|| ||

Taɱ kissa hetu? aññathā hi Ānanda,||
Tathāgatassa mahākammavibhaŋge ñāṇaɱ hoti.|| ||

Tatr'Ānanda,||
yvāyaɱ samaṇo vā brāhmaṇo vā evam āha:||
atthi kira bho kalyāṇāni kammāni,||
atthi sucaritassa vipākoti.|| ||

Idamassa anujānāmi.|| ||

Yam pi kho so evam āha:||
apāhaɱ puggalaɱ addasaɱ idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musā-vādā paṭivirataɱ pisunā vācā paṭivirataɱ pharusā vācā paṭivirataɱ samphappalāpā paṭivirataɱ anabhijjhāluɱ avyāpannacittaɱ sammādiṭṭhiɱ.|| ||

Kāyassa bhedā param maraṇā passāmi sugatiɱ saggaɱ lokaɱ upapannan' ti.|| ||

Idam pissa anujānāmi.|| ||

Yañ ca kho so evam āha:||
yo kira bho pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato anabhijjhāluɱ avyapannacittaɱ sammādiṭṭhi,||
sabbo so kāyassa bhedā param maraṇā sugatiɱ saggaɱ lokaɱ upapajjatī' ti.|| ||

Idamassa nānujānāmi yampi so evam āha:||
ye evaɱ jānanti te sammā jānanti,||
ye aññathā jānanti micchā tesaɱ ñāṇanti.|| ||

Idam pissa nānujānāmi.|| ||

Yam pi so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa abhinivissa voharati:||
idam eva saccaɱ moghamaññan' ti.|| ||

Idam pissa nānujānāmi.|| ||

Taɱ kissa hetu? aññathā hi Ānanda,||
Tathāgatassa mahākammavibhaŋge ñāṇaɱ hoti.|| ||

Tatr'Ānanda,||
yvāyaɱ samaṇo vā brāhmaṇo vā evam āha:||
n'atthi kira bho kalyāṇāni kammāni,||
n'atthi sucaritassa vipākoti.|| ||

Idamassa nānujānāmi.|| ||

Yañ ca kho so evam āha:||
apāhaɱ puggalaɱ addasaɱ idha pāṇātipātā paṭivirataɱ adinnādānā paṭivirataɱ kāmesu micchācārā paṭivirataɱ musā-vādā paṭivirataɱ pisunā vācā paṭivirataɱ pharusā vācā paṭivirataɱ samphappalāpā paṭivirataɱ anabhijjhāluɱ avyāpannacittaɱ sammādiṭṭhiɱ.|| ||

Kāyassa bhedā param maraṇā passāmi apāyaɱ duggatiɱ vinipātaɱ Nirayaɱ upapannan' ti.|| ||

Idamassa anujānāmi.|| ||

Yañ ca kho so evam āha:||
yo kira bho pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato anabhijjhāluɱ avyapannacittaɱ sammādiṭṭhi,||
sabbo so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjatī' ti.|| ||

Idamassa nānujānāmi yañ ca so kho evam āha:||
[214] ye evaɱ jānanti,||
te sammā jānanti,||
ye aññathā jānanti,||
micchā tesaɱ ñāṇanti.|| ||

Idam pissa nānujānāmi.|| ||

Yam pi so yadeva tassa sāmaɱ ñātaɱ sāmaɱ diṭṭhaɱ sāmaɱ viditaɱ,||
tad eva tattha thāmasā parāmassa abhinivissa voharati:||
idam eva saccaɱ moghamaññan' ti.|| ||

Idam pissa nānujānāmi.|| ||

Taɱ kissa hetu? aññathā hi Ānanda,||
Tathāgatassa mahākammavibhaŋge ñāṇaɱ hoti.|| ||

Tatr'Ānanda,||
yvāyaɱ puggalo idha pāṇātipātī adinnādāyī kāmesu micchācārī musāvādī pisunāvācī pharusāvācī anabhijjhālū avyapannacittaɱ micchādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Pubbe vāssa taɱ kataɱ hoti pāpakammaɱ dukkhavedaniyaɱ.|| ||

Pacchā vāssataɱ kataɱ hoti pāpakammaɱ dukkhavedaniyaɱ.|| ||

Maraṇakāle vāssa hoti micchādiṭṭhi samattā samādinnā.|| ||

Tena so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Yañ ca kho so idha pāṇātipātī hoti adinnādāyī hoti kāmesu micchācārī hoti musāvādī hoti pisunāvācī hoti pharusāvācī hoti anabhijjhālū hoti avyapannacittaɱ micchādiṭṭhi hoti tassa diṭṭhe va dhamme vipākaɱ paṭisaŋvedeti,||
upapajje vā,||
apare vā pariyāye.|| ||

Tatr'Ānanda, yvāyaɱ puggalo idha pāṇātipātī adinnādāyī kāmesu micchācārī musāvādī pisunāvācī pharusāvācī anabhijjhāluɱ avyapannacittaɱ micchādiṭṭhi,||
kāyassa bhedā param maraṇāsugatiɱ saggaɱ lokaɱ upapajjati.|| ||

Pubbe vāssa taɱ kataɱ hoti kalyāṇakammaɱ sukhavedaniyaɱ.|| ||

Pacchā vāssa taɱ kataɱ hoti kalyāṇakammaɱ sukhavedaniyaɱ.|| ||

Maraṇakāle vāssa hoti sammādiṭṭhi samattā samādinnā,||
tena so kāyassa bhedā param maraṇā sugatiɱ saggaɱ lokaɱ upapajjati.|| ||

Yañ ca kho so idha pāṇātipātī hoti adinnādāyī hoti kāmesu micchācārī hoti musāvādī hoti pisunāvācī hoti pharusāvācī hoti anabhijjhāluɱ hoti avyapannacittaɱ micchādiṭṭhi hoti.|| ||

Tassa diṭṭhe va dhamme vipākaɱ paṭisaŋvedeti,||
upapajje vā,||
apare vā,||
pariyāye.|| ||

Tatr'Ānanda, yvāyaɱ puggalo idha pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato anabhijjhāluɱ avyapannacittaɱ sammādiṭṭhi,||
kāyassa bhedā param maraṇā sugatiɱ saggaɱ lokaɱ upapajjati.|| ||

Pubbe vāssa taɱ kataɱ hoti kalyāṇakammaɱ sukhavedaniyaɱ.|| ||

Pacchā vāssa taɱ kataɱ hoti kalyāṇakammaɱsukhavedaniyaɱ.|| ||

Maraṇakāle vāssa hoti sammādiṭṭhi samattā samādinnā.|| ||

Tena so kāyassa bhedā param maraṇā sugatiɱ saggaɱ lokaɱ upapajjati.|| ||

Yañ ca kho so idha pāṇātipātā paṭivirato [215] hoti adinnādānā paṭivirato hoti kāmesu micchācārā paṭivirato hoti musā-vādā paṭivirato hoti pisunāvācā paṭivirato hoti pharusāvācā paṭivirato hoti anabhijjhāluɱ hoti avyapannacittaɱ sammādiṭṭhi hoti.|| ||

Tassa diṭṭhe va dhamme vipākaɱ paṭisaŋvedeti,||
upapajje vā,||
apare vā pariyāye.|| ||

Tatr'Ānanda, yvāyaɱ puggalo idha pāṇātipātā paṭivirato adinnādānā paṭivirato kāmesu micchācārā paṭivirato musā-vādā paṭivirato pisunāvācā paṭivirato pharusāvācā paṭivirato anabhijjhāluɱ avyapannacittaɱ sammādiṭṭhi,||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Pubbe vāssa taɱ kataɱ hoti pāpakammaɱ dukkhavedanīyaɱ.|| ||

Pacchā vāssa taɱ kataɱ hoti pāpakammaɱ dukkhavedaniyaɱ.|| ||

Maraṇa kāle vāssa hoti micchādiṭṭhi samattā samādinnā.|| ||

Tena so kāyassa bhedā param maraṇā apāyaɱ duggatiɱ vinipātaɱ Nirayaɱ upapajjati.|| ||

Yañ ca kho so idha pāṇātipātā paṭivirato hoti adinnādānā paṭivirato hoti kāmesu micchācārā paṭivirato hoti musā-vādā paṭivirato hoti pisunāvācā paṭivirato hoti pharusāvācā paṭivirato hoti anabhijjhāluɱ hoti avyapannacittaɱ sammādiṭṭhi hoti,||
tassa diṭṭhe va dhamme vipākaɱ paṭisaŋvedeti,||
upapajje vā,||
apare vā,||
pariyāye.|| ||

Iti kho Ānanda,||
atthi kammaɱ abhabbaɱ abhabbābhāsaɱ,||
atthi kammaɱ abhabbaɱ bhabbābhāsaɱ||
atthi kammaɱ bhabbañ c'eva bhabbābhāsañ ca,||
atthi kammaɱ bhabbaɱ abhabbābhāsan" ti.|| ||

Idam avoca Bhagavā.|| ||

Attamano āyasmā Ānando Bhagavato bhāsitaɱ abhinandī ti.|| ||

Mahākammavibhaŋga suttaɱ jaṭṭhaɱ


 

Contact:
E-mail
Copyright Statement   Webmaster's Page