Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
4. Vibhaŋga Vagga

Sutta 139

Araṇa-Vibhaŋga Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][ntbb][olds][upal] Evaɱ me sutaɱ:

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi:|| ||

Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Araṇavibhaŋgaɱ vo bhikkhave, desissāmi. Taɱ suṇātha sādhukaɱ manasi karotha. Bhāsissāmīti.|| ||

Evaɱ bhante' ti kho te bhikkhū Bhagavato paccassosuɱ.|| ||

Bhagavā etad avoca:|| ||

2. Na kāma-sukham-anuyuñjeyya hīnaɱ gammaɱ pothujjanikaɱ anariyaɱ ananthasaɱhitaɱ. Na ca attakila-mathānuyogaɱ anuyuñjeyya dukkhaɱ anariyaɱ anatthasaɱhitaɱ.|| ||

3. Ete te ubho ante anupagamma majjhimā paṭipadā Tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saɱvattati.|| ||

4. Ussādanañ ca jaññā, apasādanañ ca jaññā. Ussādanañ ca ñatvā apasādanañ ca ñatvā nevussādeyya nāpasādeyya dhammameva deseyya.|| ||

5. Sukhavinicchayaɱ jaññā, sukhavinicchayaɱ ñatvā ajjhattaɱ sukhamanuyuñjeyya.|| ||

6. Rah'ovādaɱ na bhāseyya, sammukhā na khīṇaɱ bhaṇe.|| ||

7. Ataramāno ca bhāseyya, no taramāno.|| ||

8. Janapadaniruttiɱ nābhiniveseyya, samaññaɱ nāti dhāveyyāti.|| ||

9. Ayamuddeso araṇavibhaŋgassa.|| ||

10. 'Na kāmasukhamanuyuñjeyya hīnaɱ gammaɱ pothujjanikaɱ anariyaɱ anatthasaɱhitaɱ, na ca attakilamathānuyogaɱ anuyuñjeyya dukkhaɱ anariyaɱ anatthasaɱhita'nti iti kho pan'etaɱ vuttaɱ. Kiñc'etaɱ paṭicca vuttaɱ: yo kāmapaṭisandhisukhino somanassānuyogo hīno gammo pothujjaniko anariyo anatthasaɱhito, sadukkho eso dhammo saupaghāto3 saupāyāso sapariḷāho micchāpaṭipadā. Yo kāmapaṭisandhisukhino somanassānuyogaɱ [231] ananuyogo hīnaɱ gammaɱ pothujjanikaɱ anariyaɱ anatthasaɱhitaɱ, adukkho eso dhammo anupaghāto anupāyāso apariḷāho sammāpaṭipadā. Yo attakilamathānuyogo dukkho anariyo anatthasaɱhito, dukkho eso dhammo saupaghāto saupāyāso sapariḷāho micchāpaṭipadā yo attakilamathānuyogaɱ ananuyogo dukkhaɱ anariyaɱ anatthasaɱhitaɱ, adukkho eso dhammo anupaghāto dukkhaɱ anariyaɱ anatthasaɱhitaɱ, adukkho eso dhammo anupaghāto anupāyāso apariḷāho sammāpaṭipadā 'na kāmasukhamanuyuñjeyya hīnaɱ gammaɱ pothujjanikaɱ anariyaɱ anatthasaɱhitaɱ, na ca attakilamathānuyogaɱ anuyuñjeyya dukkhaɱ anariyaɱ anatthasaɱhita'nti iti yaɱ taɱ vuttaɱ idame taɱ paṭicca vuttaɱ.|| ||

11. 'Ete te ubho ante anupagamma majjhimā paṭipadā Tathāgatena abhisambuddhā cakkhukaraṇi ñāṇakaraṇī upasamāya abhiññāya sambodhāya nibbānāya saɱvattatī'ti iti ko pan'etaɱ vuttaɱ. Kiñc'etaɱ paṭicca vuttaɱ: ayameva ariyo aṭṭhaŋgiko maggo. Seyyathīdaɱ: sammādiṭṭhi sammāsaŋkappo sammāvācā sammākammanto sammāājīvo sammāvāyāmo sammāsati sammāsamādhi. Ete te ubho ante anupagamma majjhimā paṭipadā Tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saɱvattatī'ti iti1 yaɱ taɱ vuttaɱ, idame taɱ paṭicca vuttaɱ.|| ||

12. 'Ussādanañca jaññā apasādanañca jaññā, ussādanañca ñatvā apasādanañca ñatvā nevussādeyya na apasādeyya dhammameva deseyyā'ti iti kho pan'etaɱ vuttaɱ. Kiñc'etaɱ paṭicca vuttaɱ: kathaɱ ca bhikkhave, ussādanā ca hoti apasādanā ca, no ca dhammadesanā:|| ||

13. Ye kāmapaṭisandhisukhino somanassānuyogaɱ anuyuttā hinaɱ gammaɱ pothujjanikaɱ anariyaɱ anatthasaɱhitaɱ, sabbe te sadukkhā saupaghātā saupāyāsā sapari'āhā micchāpaṭipannāti iti vadaɱ itth'eke apasādeti. Ye kāmapaṭisandhisukhino somanassānuyogaɱ ananuyuttā hīnaɱ gammaɱ pothujjanikaɱ anariyaɱ anatthasaɱhitaɱ, sabbe te adukkhā anupaghātā anupāyāsā apari'āhā sammāpaṭipannāti iti vadaɱ itth'eke ussādeti.|| ||

14. 'Ye attakilamathānuyogaɱ anuyuttā dukkhaɱ anariyaɱ anatthasaɱhitaɱ, sabbe te sadukkhā [232] saupaghātā saupāyāsā sapari'āhā micchāpaṭipannā'ti iti vadaɱ itth'eke apasādeti. 'Ye attakilamathānuyogaɱ ananuyuttā dukkhaɱ anariyaɱ anatthasaɱhitaɱ, sabbe te adukkhā anupaghātā anupāyāsā apari'āhā sammāpaṭipannā'ti iti vadaɱ itth'eke ussādeti.|| ||

15. 'Yesaɱ kesañci bhavasaɱyojanaɱ appahīnaɱ, sabbe te sadukkhā saupaghātā saupāyāsā sapari'āhā micchāpaṭipannā'ti iti vadaɱ itth'eke apasādeti. 'Yesaɱ kesañci vibhavasaɱyojanaɱ pahīnaɱ, sabbe te adukkhā anupaghātā anupāyāsā apari'āhā sammāpaṭipannā'ti iti vadaɱ itth'eke ussādeti. Evaɱ kho bhikkhave, ussādanā ca hoti apasādanā ca, no ca dhammadesanā.|| ||

16. Kathañ ca bhikkhave, n'eva ussādanā hoti na apasādanā, dhamma desanā ca: ye kāmapaṭisandhisukhino somanassānuyogaɱ ananuyuttā hīnaɱ gammaɱ pothujjanikaɱ anariyaɱ anatthasaɱhitaɱ, sabbe te sadukkhā saupaghātā saupāyāsā saparilāhā micchāpaṭipannā'ti na evam āha: anuyogo ca kho sadukkho eso dhammo saupaghāto saupāyāso sapariḷāho micchāpaṭipadā'ti iti vadaɱ dhammameva deseti.|| ||

17. 'Ye kāmapaṭisandhisukhino somanassānuyogaɱ anuyuttā hīnaɱ gammaɱ pothujjanikaɱ anariyaɱ anatthasaɱhitaɱ, sabbe te adukkhā anupaghātā anupāyāsā apari'āhā sammāpaṭipannā'ti na evam āha. Ananuyogo ca kho adukkho eso dhammo anupaghāto anupāyāso apariḷāho sammāpaṭipadā'ti iti vadaɱ dhammameva deseti.|| ||

18. Ye attakilamathānuyogaɱ anuyuttā dukkhaɱ anariyaɱ anatthasaɱhitaɱ, sabbe te sadukkhā saupaghātā saupāyāsā sapari'āhā micchāpaṭipannā'ti na evam āha: anuyogo ca kho sadukkho eso dhammo saupaghāto saupāyāso sapariḷāho micchāpaṭipadā ti iti vadaɱ dhammameva deseti.|| ||

19. Ye attakilamathānuyogaɱ anuyuttā dukkhaɱ anariyaɱ anatthasaɱhitaɱ, sabbe te adukkhā anupaghātā anupāyāsā apari'āhā sammāpaṭipannāti na evam āha: ananuyogo ca kho adukkho eso dhammo anupaghāto anupāyāso apariḷāho sammāpaṭipadā'ti iti vadaɱ dhammameva deseti.|| ||

20. Yesaɱ kesañci bhavasaɱyojanaɱ appahīnaɱ, sabbe te sadukkhā saupaghātā saupāyāsā sapari'āhā micchāpaṭipannāti na [233] evam āha. Bhavasaɱyojane ca kho appahīne bhavopi appahīno hotī'ti iti vadaɱ dhammameva deseti.|| ||

21. Yesaɱ kesañci bhavasaɱyojanaɱ pahīnaɱ sabbe te adukkhā anupaghātā anupāyāsā|| ||

22. Apari'āhā sammāpaṭipannāti na evam āha bhavasaɱyojane ca kho pahīne bhavopi|| ||

23. Pahīno hotīti iti vadaɱ dhammameva deseti. Evaɱ kho bhikkhave, nevussādanā hoti na apasādanā dhammadesanā ca.|| ||

24. 'Ussādanañca jaññā, apasādanañca jaññā, ussādanañca ñatvā apasādanañca ñatvā nevussādeyya, na apasādeyya. Dhammameva deseyyā'ti iti yaɱ taɱ vuttaɱ, idame taɱ paṭicca vuttaɱ.|| ||

25. Sukhavinicchayaɱ jaññā, sukhavinicchayaɱ ñatvā ajjhattaɱ sukhamanuyuñjeyyā'ti iti kho pan'etaɱ vuttaɱ kiñc'etaɱ paṭicca vuttaɱ: pañcime bhikkhave, kāmaguṇā. Katame pañca? cakkhuviññeyyā rūpā iṭṭhā kantā manāpā piyarūpā kamūpasaɱhitā rajanīyā sotaviññeyyā saddā iṭṭhā kantā manāpā piyarūpā kamūpasaɱhitā rajanīyā|| ||

26. Ghānaviññeyyā gandhā iṭṭhā kantā manāpā piyarūpā kamūpasaɱhitā rajanīyā jivhāviññeyyā rasā iṭṭhā kantā manāpā piyarūpā kamūpasaɱhitā rajanīyā kāyaviññeyyā poṭṭhabbā iṭṭhā kantā manāpā piyarūpā kāmūpasaɱhitā rajanīyā. Ime kho bhikkhave, pañcakāmaguṇā. Yaɱ kho bhikkhave ime pañca kāmaguṇe paṭicca uppajjati sukhaɱ somanassaɱ idaɱ vuccati kāmasukhaɱ mī'hasukhaɱ puthujjanasukhaɱ anariyasukhaɱ. Na āsevitabbaɱ na bhāvetabbaɱ na bahulīkātabbaɱ, bhāyitabbaɱ etassa sukhassāti vadāmi.|| ||

27. Idha, bhikkhave,, bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pitisukhaɱ paṭhamaɱ-jhānaɱ upaspajja viharati. Vitakkavicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati. Vitakkavicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pitisukhaɱ cakutthaɱ jhānaɱ upasampajja viharati. Idaɱ vuccati nekkhammasukhaɱ pavivekasukhaɱ upasamasukhaɱ sambodhisukhaɱ āsevitabbaɱ bhāvetabbaɱ bahulīkātabbaɱ. Na bhāyitabbaɱ etassa sukhassāti [234] vadāmi. 'Sukhavinicchayaɱ jaññā, sukhavinicchayaɱ ñatvā ajjhattaɱ sukhamanuyuñjeyyā'ti iti yaɱ taɱ vuttaɱ, idame taɱ paṭicca vuttaɱ.|| ||

28. 'Rah'ovādaɱ na bhāseyya, sammukhā na khīṇaɱ bhaṇe'ti iti kho pan'etaɱ vuttaɱ. Kiñc'etaɱ paṭicca vuttaɱ: tatra bhikkhave, yaɱ jaññā rah'ovādaɱ abhūtaɱ atacchaɱ anatthasaɱhitaɱ, sasakkaɱ taɱ rah'ovādaɱ na bhāseyya. Yampi jaññā rah'ovādaɱ bhūtaɱ tacchaɱ anatthasaɱhitaɱ, tassapi sikkheyya avacanāya. Yañ ca kho jaññā rah'ovādaɱ bhūtaɱ tacchaɱ atthasaɱhitaɱ, tatra kālaññū assa tassa rah'ovādassa vacanāya. Yatra bhikkhave, yaɱjaññā sammukhā khīṇavādaɱ abhūtaɱ atacchaɱ anatthasaɱhitaɱ. Sasakkaɱ taɱ sammukhā khīṇavādaɱ na bhāseyya. Yampi jaññā sammukhā khīṇavādaɱ bhūtaɱ tacchaɱ anatthasaɱhitaɱ, tassapi sikkheyya avacanāya. Yañ ca kho jaññā sammukhā khīṇavādaɱ bhūtaɱ tacchaɱ atthasaɱhitaɱ, tatra kālaññū assa tassa sammukhā khīṇavādassa vacanāya. 'Rah'ovādaɱ na bhāseyya, sammukhā na khīṇaɱ bhaṇe'ti iti yaɱ taɱ vuttaɱ, idame taɱ paṭicca vuttaɱ.|| ||

29. 'Ataramānova bhāseyya, no taramāno'ti iti kho pan'etaɱ vuttaɱ kiñc'etaɱ paṭicca vuttaɱ: tatra bhikkhave, taramānassa bhāsato kāyopi kilamati. Cittampi upahaññati. Saropi upahaññati. Kaṇṭhopi āturīyati. Avissaṭṭhampi hoti aviññeyyaɱ taramānassa bhāsitaɱ, tatra bhikkhave, ataramānassa bhāsato kāyopi na kilamati. Cittampi na upahaññati. Saropi na upahaññati. Kaṇṭhopi na āturīyati. Vissaṭṭhampi hoti viññeyyaɱ ataramānassa bhāsitaɱ. 'Ataramāno va bhāseyya, no taramāno'ti iti yaɱ taɱ vuttaɱ idame taɱ paṭicca vuttaɱ.|| ||

30. 'Janapadaniruttiɱ nābhiniveseyya, samaññaɱ nātidhāveyyā'ti iti kho pan'etaɱ vuttaɱ kiñc'etaɱ paṭicca vuttaɱ: kathañca bhikkhave, janapadaniruttiyā ca abhiniveso hoti samaññāya ca atisāro: idha bhikkhave, tadavekaccesu janapadesu pātīti sañjānanti, [235] pattanti sañjānanti, vitthanti1 sañjānanti. Sarāvanti sañjānanti, dhāropanti sañjānanti,poṇanti sañjānanti. Pisīlavanti2 sañjānanti. Iti yathā yathā naɱ tesu tesu janapadesu sañjānanti. Tathā tathā thāmasā parāmassa3 abhinivissa voharati: idam eva saccaɱ mogham aññan ti. Evaɱ kho bhikkhave,|| ||

31. Janapada niruttiyā ca abhiniveso hoti samaññāya ca atisāro. Katañ ca bhikkhave,|| ||

32. Janapadaniruttiyā ca anabhiniveso hoti, samaññāya ca atisāro: idha bhikkhave, tad eva ekaccesu janapadesu pātīti sañjānanti. Pattanti sañjānanti, vitthanti sañjānanti. Sarāvanti sañjānanti. Dhāropanti sañjānanti. Poṇanti sañjānanti. Pisīlavanti sañjānanti. Iti yathā yathā naɱ tesu tesu janapadesu sañjānanti: idaɱ kira me āyasmanto sandhāya voharantīti. Tathā tathā voharati aparāmasati1. Evaɱ kho bhikkhave janapadaniruttiyā ca anabhiniveso hoti. Samaññāya ca anatisāro yaɱ taɱ vuttaɱ, idame taɱ paṭicca vuttaɱ.|| ||

33. Tatra, bhikkhave,, yo kāmapaṭisandhisukhino somanassānuyogo hīno gammo pothujjaniko anariyo anatthasaɱhito, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

34. Tatra, bhikkhave,, yo kāmapaṭisandhisukhino somanassānuyogaɱ ananuyogo hīnaɱ gammaɱ pothujjanikaɱ anariyaɱ anatthasaɱhitaɱ, adukkho eso dhammo anupaghāto|| ||

35. Anupāyāso apariḷāho sammāpaṭipadā. Tasmā eso dhammo araṇo.|| ||

36. Tatra, bhikkhave,, yo attakilamathānuyogo dukkho anariyo anatthasaɱhito, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

37. Tatra, bhikkhave,, yo attakilamathānuyogaɱ ananuyogo dukkhaɱ anariyaɱ anatthasaɱhitaɱ, adukkho eso dhammo anupaghāto anupāyāso apariḷāho sammāpaṭipadā. [236] Tasmā eso dhammo araṇo.|| ||

38. Tatra, bhikkhave,, yā'yaɱ majjhimā paṭipadā Tathāgatena abhisambuddhā cakkhukaraṇī ñāṇakaraṇī upasamāya abhiññāya sambodhāya nibbānāya saɱvattati. Adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

39. Tatra, bhikkhave,, yā'yaɱ ussādanā ca apasādanā ca no ca dhammadesanā, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

40. Tatra, bhikkhave,, yā'yaɱ nevussādanā na apasādanā dhammadesanā ca. Adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

41. Tatra, bhikkhave,, yam idaɱ kāmasukhaɱ mī'hasukhaɱ pothujjanasukhaɱ anariyasukhaɱ, sadukkho eso dhammo saupaghāto. Saupāyāso sapariḷāho micchāpaṭipadā. Tasmā eso dhammo saraṇo.|| ||

42. Tatra, bhikkhave,, yam idaɱ nekkhammasukhaɱ pavivekasukhaɱ upasamasukhaɱ sambodhisukhaɱ adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

43. Tatra, bhikkhave,, yvāyaɱ rahovādo abhūto ataccho anatthasaɱhito, sadukkho eso dhammo saupaghāto sapariḷāho micchāpaṭipadā. Tasmā eso dhammo saraṇo.|| ||

44. Tatra, bhikkhave,, yvāyaɱ rahovādo bhūto taccho anatthasaɱhito sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

45. Tatra, bhikkhave,, yvāyaɱ rahovādo bhūto taccho anatthasaɱhito, adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

46. Tatra, bhikkhave,, yvāyaɱ sammukhā khīṇavādo abhūto ataccho anatthasaɱhito, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

47. Tatra, bhikkhave,, yvāyaɱ sammukhā khīṇavādo bhūto taccho anatthasaɱhito, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

48. Tatra, bhikkhave,, yvāyaɱ sammukhā [237] khīṇavādo bhūto taccho anatthasaɱhito, adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

49. Tatra, bhikkhave,, yam idaɱ taramānassa bhāsitaɱ, sadukkho eso dhammo saupaghāto|| ||

50. Saupāyāso sapariḷāho micchāpaṭipadā. Tasmā eso dhammo saraṇo.|| ||

51. Tatra, bhikkhave,, yam idaɱ ataramānassa bhāsitaɱ, adukkho eso dhammo anupaghāto|| ||

52. Anupāyāso apariḷāho sammāpaṭipadā. Tasmā eso dhammo araṇo.|| ||

53. Tatra, bhikkhave,, yvāyaɱ janapadaniruttiyā ca abhiniveso samaññāya ca atisāro, sadukkho eso dhammo saupaghāto saupāyāso sapariḷāho micchāpaṭipadā. Tasmā eso dhammo saraṇo.|| ||

54. Tatra, bhikkhave,, yvāyaɱ janapadaniruttiyā ca anabhiniveso samaññāya ca anatisāro, adukkho eso dhammo anupaghāto anupāyāso apariḷāho sammāpaṭipadā. Tasmā eso dhammo araṇo.|| ||

55. Tasmāt iha bhikkhave, saraṇañ ca dhammaɱ jānissāma. Araṇañca dhammaɱ jānissāma saraṇañ ca dhammaɱ ñatvā araṇañca dhammaɱ ñatvā araṇapaṭipadaɱ paṭipajjissāmāti. Evaɱ hi vo bhikkhave, sikkhitabbaɱ. Subhūti ca pana bhikkhave, kulaputto araṇapaṭipadaɱ paṭipannoti.|| ||

Idam avoca Bhagavā, attamanā te bhikkhū Bhagavato bhāsitaɱ abhinandunti.|| ||

Araṇavibhaŋgasuttaɱ navamaɱ.


 

Contact:
E-mail
Copyright Statement   Webmaster's Page