Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
4. Vibhaŋga Vagga

Sutta 140

Dhātu-Vibhaŋga Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][ntbb][upal] Evaɱ me sutaɱ:

Ekaɱ samayaɱ Bhagavā magadhesu cārikaɱ caramāno yena Rājagahaɱ tadavasari.|| ||

Yena bhaggavo kumbhakāro ten'upasaŋkami.|| ||

Upasaŋkamitvā bhaggavaɱ kumbhakāraɱ etad avoca: 'sace te bhaggava agaru,||
viharema āvesane1 ekarattinti.|| ||

Na kho me bhante garu,||
atthi c'ettha pabbajito paṭhamaɱ vāsūpagato.|| ||

Sace so anujānāti viharatha bhante,||
yathāsukhanti.|| ||

[238] Tena kho pana samayena pukkusāti nāma kulaputto Bhagavantaɱ uddissa saddhā agārasmā anagāriyaɱ pabbajito.|| ||

So tasmiɱ kumbhakārāvesane paṭhamaɱ vāsūpagato hoti.|| ||

Atha kho Bhagavā yen'āyasmā pukkusāti ten'upasaŋkami.|| ||

Upasaŋkamitvā āyasmantaɱ pukkusātiɱ etad avoca: 'sace te bhikkhū agaru,||
viharema āvesane ekarattinti.|| ||

Ūrundaɱ āvuso,||
kumbhakārāvesanaɱ.|| ||

Viharat'āyasmā yathāsukhanti.|| ||

Atha kho Bhagavā kumbhakārāvesanaɱ pavisitvā eka-m-antaɱ tiṇasanthā rakaɱ paññāpetvā nisīdi pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā.|| ||

Atha kho Bhagavā bahudeva rattiɱ nisajjāya vītināmesi.|| ||

Āyasmāpi kho pukkusāti bahudeva rattiɱ nisajjāya vītināmesi.|| ||

Atha kho Bhagavato etad ahosi: 'pāsādikaɱ nu kho ayaɱ kulaputto irīyati,||
yan nūnāhaɱ puccheyyanti.|| ||

Atha kho Bhagavā āyasmantaɱ pukkusātiɱ etad avoca: 'kaɱsi tvaɱ bhikkhu uddissa pabbajito,||
ko vā te satthā,||
kassa vā tvaɱ dhammaɱ rocesī' ti.|| ||

Atthāvuso, Samaṇo Gotamo Sakyaputto Sakyakulā pabbajito.|| ||

Taɱ kho pana Bhagavantaɱ Gotamaɱ evaɱ kalyāṇo kittisaddo abbhuggato: 'Iti pi so Bhagavā arahaɱ Sammā-sambuddho vijjā-caraṇa-sampanno sugato lokavidu anuttaro purisa-damma-sārathī satthā deva-manussānaɱ buddho Bhagavā' ti.|| ||

Tā'haɱ Bhagavantaɱ uddissa pabbajito.|| ||

So ca me Bhagavā satthā,||
tassāhaɱ4 Bhagavato dhammaɱ rocemī' ti.|| ||

Kahaɱ pana bhikkhu etarahi so Bhagavā viharati arahaɱ Sammā-sambuddho'ti:|| ||

Atthāvuso uttaresu janapadesu Sāvatthī nāma nagaraɱ,||
tattha so Bhagavā etarahi viharati arahaɱ Sammā-sambuddho' ti.|| ||

Diṭṭhapubbo pana te bhikkhu,||
so Bhagavā.|| ||

Disvā ca pana jāneyyāsī' ti.|| ||

[239] Na kho me āvuso,||
diṭṭhapubbo so Bhagavā.|| ||

Disvā cāhaɱ na jāneyyan' ti.|| ||

Atha kho Bhagavato etad ahosi: 'mamaɱ khvāyaɱ1 kulaputto uddissa pabbajito.|| ||

Yannūnassāhaɱ dhammaɱ deseyyan' ti.|| ||

Atha kho Bhagavā āyasmantaɱ pukkusātiɱ āmantesi: 'dhammaɱ te bhikkhu,||
desissāmi.|| ||

Taɱ suṇāhi,||
sādhukaɱ manasi karohi,||
bhāsissāmī' ti.|| ||

Evam āvuso ti kho āyasmā pukkusāti Bhagavato paccassosi.|| ||

Bhagavā etad avoca:|| ||

'Chaddhāturo ayaɱ bhikkhu,||
puriso chaphassāyatano aṭṭhārasamanopavicāro caturādhiṭṭhāno,||
yattha ṭhitaɱ maññussavā nappavattanti,||
maññussave kho pana nappavattamāne muni santoti vuccati.|| ||

Paññaɱ nappamajjeyya.|| ||

Saccamanurakkheyya.|| ||

Cāgamanubrūheyya.|| ||

Santimeva so sikkheyyā' ti.|| ||

Ayamuddeso chadhātu vibhaŋgassa.|| ||

'Chaddhāturo ayaɱ bhikkhu,||
puriso'ti iti kho pan'etaɱ vuttaɱ.|| ||

Kiñc'etaɱ paṭicca vuttaɱ.|| ||

Paṭhavīdhātu āpodhātu tejodhātu vāyodhātu ākāsadhātu viññāṇadhātu.|| ||

'Chaddhāturo.|| ||

Ayaɱ bhikkhu,||
puriso'ti iti yaɱ taɱ vuttaɱ,||
idame taɱ paṭicca vuttaɱ.|| ||

'Chaphassāyatano ayaɱ bhikkhu,||
puriso'ti iti kho pan'etaɱ vuttaɱ,||
kiñc'etaɱ paṭicca vuttaɱ: cakkhusamphassāyatanaɱ sotasamphassāyatanaɱ ghānasamphassāyatanaɱ jivhāsamphassāyatanaɱ kāyasamphassāyatanaɱ manosamphassāyatanaɱ.|| ||

'Chaphassāyatano ayaɱ bhikkhu,||
puriso'ti iti yaɱ taɱ vuttaɱ,||
idame taɱ paṭicca vuttaɱ.|| ||

'Aṭṭhārasamanopavicāro ayaɱ bhikkhu,||
puriso'ti iti kho pan'etaɱ vuttaɱ,||
kiñc'etaɱ paṭicca vuttaɱ:|| ||

cakkhunā rūpaɱ disvā somanassaṭṭhāniyaɱ rūpaɱ upavicarati.|| ||

Domanassaṭṭhāniyaɱ rūpaɱ upavicarati.|| ||

Upekkhaṭṭhāniyaɱ rūpaɱ upavicarati.|| ||

Sotena saddaɱ sutvā somanassaṭṭhāniyaɱ saddaɱ upavicarati.|| ||

Domanassaṭṭhāniyaɱ saddaɱ upavicarati.|| ||

Upekkhaṭṭhāniyaɱ saddaɱ upavicarati.|| ||

Ghānena [240] gandhaɱ ghāyitvā somanassaṭṭhāniyaɱ gandhaɱ upavicarati.|| ||

Domanassaṭṭhāniyaɱ gandhaɱ upavicarati.|| ||

Upekkhaṭṭhāniyaɱ gandhaɱ upavicarati.|| ||

Jivhāya rasaɱ sāyitvā somanassaṭṭhāniyaɱ rasaɱ upavicarati.|| ||

Domanassaṭṭhāniyaɱ rasaɱ upavicarati.|| ||

Upekkhaṭṭhāniyaɱ rasaɱ upavicarati.|| ||

Kāyena phoṭṭhabbaɱ phusitvā

Somanassaṭṭhāniyaɱ phoṭṭhabbaɱ upavicarati.|| ||

Domanassaṭṭhāniyaɱ phoṭṭhabbaɱ upavicarati.|| ||

Upekkhaṭṭhāniyaɱ phoṭṭhabbaɱ upavicarati.|| ||

Manasā dhammaɱ viññāya somanassaṭṭhāniyaɱ dhammaɱ upavicarati.|| ||

Domanassaṭṭhāniyaɱ dhammaɱ upavicarati.|| ||

Upekkhaṭṭhāniyaɱ dhammaɱ upavicarati.|| ||

Iti cha somanassūpavicārā cha domanassūpavicārā cha upekkhūpavicārā.|| ||

'Aṭṭhārasamanopavicāro ayaɱ bhikkhu,||
puriso'ti iti yaɱ taɱ vuttaɱ,||
idame taɱ paṭicca vuttaɱ.|| ||

'Caturādhiṭṭhāno ayaɱ bhikkhu,||
puriso'ti iti kho pan'etaɱ vuttaɱ,||
kiñc'etaɱ paṭicca vuttaɱ: paññādhiṭṭhāno cāgādhiṭṭhāno upasamādhiṭṭhāno.|| ||

'Caturādhiṭṭhāno ayaɱ bhikkhu,||
puriso'ti iti yaɱ taɱ vuttaɱ,||
idame taɱ paṭicca vuttaɱ.|| ||

'Paññaɱ nappamajjeyya saccamanurakkheyya cāgamanubrūheyya santimeva so sikkheyyā'ti iti kho pan'etaɱ vuttaɱ: kathañca bhikkhu.|| ||

Paññaɱ nappamajjati: cha imā bhikkhu,||
dhātuyo: paṭhavidhātu āpodhātu tejodhātu vāyodhāto ākāsadhātu viññāṇadhātu.|| ||

Katamā ca bhikkhu,||
paṭhavidhātu: paṭhavidhātu siyā ajjhattikā siyā bāhirā.|| ||

Katamā ca bhikkhu,||
ajjhattikā paṭhavidhātu: yaɱ ajjhattaɱ paccattaɱ kakkhaḷaɱ kharigataɱ upādinnaɱ.|| ||

Seyyathīdaɱ: kesā lomā nakhā dattā taco maɱsaɱ nahārū aṭṭhi aṭṭhamiñjā1 vakkaɱ hadayaɱ,||
yakanaɱ kilomakaɱ pihakaɱ pappāsaɱ antaɱ antaguṇaɱ udariyaɱ karīsaɱ yaɱ vā panaññampi kiñci ajjhattaɱ paccattaɱ kakkhaḷaɱ kharigataɱ upādinnaɱ.|| ||

Ayaɱ vuccati bhikkhu,||
ajjhattikā paṭhavīdhātu.|| ||

Yā c'eva kho pana ajjhattikā paṭhavīdhātu yā ca bāhirā paṭhavīdhātu,||
paṭhavīdhāturevesā.|| ||

Taɱ n'etaɱ mama,||
neso'ham asmi,||
na m'eso attā'ti evam etaɱ yathābhūtaɱ sammappaññāya daṭṭhabbaɱ.|| ||

evam etaɱ yathābhūtaɱ sammappaññāya disvā paṭhavīdhātuyā nibbindati,||
paṭhavīdhātuyā cittaɱ virājeti.|| ||

Katamā ca bhikkhu,||
āpodhātu: āpodhātu siyā ajjhattikā [241] siyā bāhirā.|| ||

Katamā ca bhikkhu,||
ajjhattikā āpodhātu: yaɱ ajjhattaɱ paccattaɱ āpo āpogataɱ upādinnaɱ.|| ||

Seyyathīdaɱ: pittaɱ semhaɱ pubbo lohitaɱ sedo medo assu vasā khe'o siŋghānikā lasikāmuttaɱ.|| ||

Yaɱ vā panaññampi kiñci ajjhattaɱ paccattaɱ āpo āpogataɱ upādinnaɱ.|| ||

Ayaɱ vuccati bhikkhu,||
ajjhattikā āpodhātu.|| ||

Yā c'eva kho pana ajjhattikā āpodhātu yā ca bāhirā āpodhātu,||
āpodhāturevesā.|| ||

Taɱ n'etaɱ mama,||
neso'ham asmi,||
na m'eso attā'ti evam etaɱ yathābhūtaɱ sammappaññāya daṭṭhabbaɱ.|| ||

evam etaɱ yathābhūtaɱ sammappaññāya disvā āpodhātuyā nibbindati,||
āpodhātuyā cittaɱ virājeti.|| ||

Katamā ca bhikkhu,||
tejodhātu: tejodhātu siyā ajjhattikā siyā bāhirā.|| ||

Katamā ca bhikkhu,||
ajjhattikā tejodhātu: yaɱ ajjhattaɱ paccattaɱ tejo tejogataɱ upādinnaɱ.|| ||

Seyyathīdaɱ: yena ca santappati2 yena ca jīrīyati3,||
yena ca pariḍayhati,||
yena ca asitapītakhāyitasāyitaɱ sammā pariṇāmaɱ gacchati,||
yaɱ vā panaññampi kiñci ajjhattaɱ paccattaɱ tejo tejogataɱ upādinnaɱ.|| ||

Ayaɱ vuccati bhikkhu,||
ajjhattikā tejodhātu.|| ||

Yā c'eva kho pana ajjhattikā tejodhātu yā ca bāhirā tejodhātu,||
tejodhāturevesā.|| ||

Taɱ n'etaɱ mama,||
neso'ham asmi,||
na m'eso attāti evam etaɱ yathābhūtaɱ sammappaññāya daṭṭhabbaɱ.|| ||

evam etaɱ yathābhūtaɱ sammappaññāya disvā tejodhātuyā nibbindati,||
tejodhātuyā cittaɱ virājeti.|| ||

Katamā ca bhikkhu,||
vāyodhātu: vāyodhātu siyā ajjhattikā siyā bāhirā katamā ca bhikkhu,||
ajjhattikā vāyodhātu: yaɱ ajjhattaɱ paccattaɱ vāyo vāyogataɱ upādinnaɱ.|| ||

Seyyathīdaɱ: uddhaŋgamā vātā adhogamā vātā kucchisayā vātā koṭṭhasayā1 vātā aŋgamaŋgānusārino vātā assāso,||
passāso,||
iti yaɱ vā panaññampi kiñci ajjhattaɱ paccattaɱ vāyo vāyogataɱ upādinnaɱ.|| ||

Ayaɱ vuccati bhikkhu,||
ajjhattikā vāyodhātu.|| ||

Yā c'eva kho pana ajjhattikā vāyodhātu yā ca bāhirā vāyodhātu,||
vāyodhāturevesā.|| ||

Taɱ n'etaɱ mama,||
neso'ham asmi,||
na m'eso attāti evam etaɱ yathābhūtaɱ sammappaññāya daṭṭhabbaɱ.|| ||

evam etaɱ yathābhūtaɱ sammappaññāya disvā vāyodhātuyā nibbindati,||
vāyodhātuyā cittaɱ virājeti.|| ||

Katamā ca bhikkhu,||
ākāsadhātu: ākāsadhātu siyā ajjhattikā siyā bāhirā.|| ||

Katamā ca bhikkhu,||
ajjhattikā [242] ākāsadhātu: yaɱ ajjhattaɱ paccattaɱ ākāsaɱ ākāsagataɱ upādinnaɱ.|| ||

Seyyathīdaɱ: kaṇṇacchiddaɱ nāsacchiddaɱ mukhadvāraɱ yena ca asitapītakhāyitasāyitaɱ ajjhoharati,||
yattha ca asitapītakhāyitasāyitaɱ santiṭṭhati,||
yena ca asitapītakhāyitasāyitaɱ adhobhāgā2 nikkhamati,||
yaɱ vā panaññampi kiñci ajjhattaɱ paccattaɱ ākāsaɱ ākāsagataɱ aghaɱ aghagataɱ vivaraɱ vivaragataɱ asamphuṭṭhaɱ maɱsalohitehi upādinnaɱ.|| ||

Ayaɱ vuccati bhikkhu,||
ajjhattikā ākāsadhātu.|| ||

Yā c'eva kho pana ajjhattikā ākāsadhātu,||
yā ca bāhirā ākāsadhātu,||
ākāsadhāturevesā.|| ||

Taɱ n'etaɱ mama,||
neso'ham asmi,||
na m'eso attāti evam etaɱ yathābhūtaɱ sammappaññāya daṭṭhabbaɱ.|| ||

evam etaɱ yathābhūtaɱ sammappaññāya disvā ākāsadhātuyā nibbindati,||
ākāsadhātuyā cittaɱ virājeti.|| ||

Athāparaɱ viññāṇaɱ yeva avasissati parisuddhaɱ pariyodātaɱ.|| ||

Tena va viññāṇena kiɱ jānāni: sukhantipi vijānāti,||
dukkhan tipi vijānāti,||
adukkhamasukhantipi vijānāti.|| ||

Sukhavedaniyaɱ bhikkhu,||
phassaɱ paṭicca upapajjati sukhā vedanā,||
so sukhaɱ vedanaɱ vediyamāno sukhaɱ vedanaɱ vediyāmīti pajānāti.|| ||

Tass'eva sukhavedanissa phassassa nirodhā yaɱ tajjaɱ vedayitaɱ sukhavedaniyaɱ phassaɱ paṭicca uppannā sukhā vedanā sā nirujjhanti,||
sā vūpasammatīti pajānāti.|| ||

Dukkhavedaniyaɱ bhikkhu.|| ||

Phassaɱ paṭicca uppajjati dukkhā vedanā so dukkhā vedanaɱ vediyamāno dukkhaɱ vedanaɱ vediyāmīti pajānāti.|| ||

Tass'eva dukkhavedaniyassa phassassa nirodhā yaɱ tajjaɱ vedayitaɱ dukkhavedaniyaɱ phassaɱ paṭicca uppannā dukkhā vedanā sā nirujjhati.|| ||

Sā vūpasammatīti pajānāti.|| ||

Adukkhamasukhavedaniyaɱ bhikkhu,||
phassaɱ paṭicca uppajjati adukkhamasukhā vedanā.|| ||

So adukkha-m-asukhaɱ vedanaɱ vediyamāno adukkha-m-asukhaɱ vediyāmīti pajānāti.|| ||

Tass'eva adukkhamasukhavedaniyassa phassassa nirodhā yaɱ tajjaɱ vedayitaɱ adukkhamasukhavedaniyaɱ phassaɱ paṭicca uppannā adukkhamasukhā vedanā sā nirujjhati,||
sā vūpasammatīti pajānāti.|| ||

Seyyathā pi bhikkhu dvinnaɱ kaṭṭhānaɱ samphassasamodhānā1 usmā jāyati,||
tejo abhinibbattati.|| ||

Tesaɱ yeva dvinnaɱ kaṭṭhānaɱ nānābhāvā vīnikkhepā yā tajjā usmā,||
sā nirujjhati sā vūpasammati.|| ||

Evam eva kho bhikkhu,||
sukhavedanīyaɱ [243] phassaɱ paṭicca uppajjati sukhā vedanā.|| ||

So sukhaɱ vedanaɱ vediyamāno sukhaɱ vedanaɱ vediyāmītipajānāti.|| ||

Tass'eva sukhavedaniyassa phassassa nirodhā yaɱ tajjaɱ vedayitaɱ sukhavedaniyaɱ phassaɱ paṭicca uppannā sukhā vedanā sā nirujjhati,||
sā vūpasammatīti pajānāti.|| ||

Dukkhavedaniyaɱ bhikkhu,||
phassaɱ paṭicca uppajjati dukkhā vedanā.|| ||

So dukkhaɱ vedanaɱ vediyamāno dukkhaɱ vedanaɱ vediyāmīti pajānāti.|| ||

Tass'eva dukkhavedaniyassa phassassa nirodhā yaɱ tajjaɱ vedayitaɱ dukkhavedaniyaɱ phassaɱ paṭicca uppannā dukkhā vedanā sā nirujjhati sā vūpasammatīti pajānāti.|| ||

Adukkhamasukhavedaniyaɱ bhikkhu,||
phassaɱ paṭicca uppajjati adukkhamasukhā vedanā.|| ||

So adukkhasukhaɱ vedanaɱ vediyamāno adukkha-m-asukhaɱ vedanaɱ vediyāmīti pajānāti.|| ||

Tass'eva adukkhamasukhavedaniyassa phassassa nirodhā yaɱ tajjaɱ vedayitaɱ adukkhamasukhavedaniyaɱ phassaɱ paṭicca uppannā adukkhamasukhā vedanā sā nirujjhati sā vūpasammatīti pajānāti.|| ||

Athāparaɱ upekkhāyeva avasissati parisuddhā pariyodātā mudu ca kammaññā ca pabhassarā ca.|| ||

Seyyathā pi bhikkhu,||
dakkho suvaṇṇakāro vā suvaṇṇakārantevāsī vā ukkaɱ bandheyya,||
ukkaɱ bandhitvā ukkāmukhaɱ ālimpeyya,||
ukkāmukhaɱ ālimpetvā saṇḍāsena jātarūpaɱ gahetvā ukkāmukhe pakkhipeyya.|| ||

Tam enaɱ kālena kālaɱ abhidhameyya.|| ||

Kālena kālaɱ udakena paripphoseyya.|| ||

Kālena kālaɱ ajjhupekkheyya.|| ||

Taɱ hoti jātarūpaɱ dhantaɱ2 sudhantaɱ niddhantaɱ nīhaṭaɱ3 nīhaṭakasāvaɱ4 mudu ca kammaññaɱ ca pabhassarañca.|| ||

Yassā yassā ca pi'andhanavikatiyā ākaŋkhati,||
yadi pavaddhikāya yadi kuṇḍalāya yadi gīveyyakāya yadi suvaṇṇamālāya,||
tañ c'assa atthaɱ anubhoti.|| ||

Evam eva kho bhikkhu,||
athāparaɱ upekkhāyeva avasissati parisuddhā pariyodhātā mudu ca kammaññā ca pabhassarā ca.|| ||

So evaɱ pajānāti: 'imaɱ ce ahaɱ upekkhaɱ evaɱparisuddhaɱ evaɱpariyodātaɱ ākāsānañcāyatanaɱ upasaŋhareyyaɱ,||
tadanudhammañca cittaɱ bhāveyyaɱ.|| ||

Evaɱ ayaɱ upekkhā tannissitā tadupādānā ciraɱ dīgham addhānaɱ tiṭṭheyya.|| ||

Imaɱ ce ahaɱ upekkhaɱ evaɱparisuddhaɱ evaɱpariyodātaɱ viññāṇañcāyatanaɱ upasaŋhareyyaɱ,||
tadanudhammañca cittaɱ bhāveyyaɱ.|| ||

Evaɱ me ayaɱ upekkhā tannissitā tadupādānā ciraɱ dīgham addhānaɱ tiṭṭheyya.|| ||

Imaɱ ce [244] ahaɱ upekkhaɱ evaɱparisuddhaɱ evaɱpariyodātaɱ ākiñcaññāyatanaɱ upasaŋhareyaɱ,||
tadanudhammañca cittaɱ bhāveyyaɱ.|| ||

Evaɱ me ayaɱ upekkhā tannissitā tadupādānā ciraɱ dīgham addhānaɱ tiṭṭheyya.|| ||

Imaɱ ce ahaɱ upekkhaɱ evaɱparisuddhaɱ evaɱpariyodātaɱ n'eva-saññā-nāsaññāyatanaɱ upasaŋhareyyaɱ.|| ||

Tadanudhammañca cittaɱ bhāveyyaɱ,||
evaɱ me ayaɱ upekkhā tannissitā tadūpādānā ciraɱ dīgham addhānaɱ tiṭṭheyyā' ti.|| ||

So evaɱ pajānāti: 'imaɱ ce ahaɱ upekkhaɱ evaɱparisuddhaɱ evaɱpariyodātaɱ ākāsānañcāyatanaɱ upasaŋhareyyaɱ,||
tadanudhammañca cittaɱ bhāveyyaɱ,||
saŋkhatame taɱ.|| ||

Imañce ahaɱ upekkhaɱ evaɱparisuddhaɱ evaɱpariyodātaɱ viññāṇañcāyatanaɱ upasaŋhareyyaɱ,||
kadanudhammañca cittaɱ bhāveyyaɱ,||
saŋkhatame taɱ.|| ||

Imaɱ ce ahaɱ upekkhaɱ evaɱparisuddhaɱ evaɱpariyodātaɱ ākiñcaññāyatanaɱ upasaŋhareyyaɱ,||
tadanudhammañca cittaɱ bhāveyyaɱ,||
saŋkhatame taɱ.|| ||

Imañce ahaɱ upekkhaɱ evaɱ parisuddhaɱ evaɱpariyodātaɱ n'evasaññānāsañcāyatanaɱ upasaŋhareyyaɱ,||
tadanudhammañca cittaɱ bhāveyyaɱ,||
saŋkhatametanti.|| ||

So n'eva taɱ abhisaŋkharoti,||
nābhisañcetayati bhavāya vā vibhavāya vā.|| ||

So anabhisaŋkharonto anabhisañcetayanto bhavāya vā vibhavāya vā na kiñci loke upādiyati.|| ||

Anupādiyaɱ na paritassati,||
aparitassaɱ paccattaɱ yeva parinibkhāyati.|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā'ti pajānāti.|| ||

So sukhaɱ ce vedanaɱ vedeti.|| ||

Sā aniccāti pajānāti,||
anajjhositāti pajānāti,||
anabhinanditāti pajānāti.|| ||

Dukkhaɱ ce vedanaɱ vedeti.|| ||

Sā aniccāti pajānāti.|| ||

Anajjhositāti pajānāti.|| ||

Abhinanditāti pajānāti,||
adukkhamasukhañce vedanaɱ vedeti,||
sā aniccāti pajānāti,||
anajjhositāni pajānāti,||
anabhinanditāti pajānāti.|| ||

So sukhaɱ ce vedanaɱ vedeti,||
visaɱyutto taɱ na vedeti.|| ||

So dukkhaɱ ce vedanaɱ vedeti,||
visaɱyutto taɱ na vedeti.1 Adukkhamasukhaɱ ce vedanaɱ vedeti,||
visaɱyutto taɱ na vedeti.|| ||

So kāyapariyantikaɱ vedanaɱ vediyamāno kāyapariyantikaɱ vedanaɱ vediyāmīti pajānāti.|| ||

Jīvitapariyantikaɱ [245] vedanaɱ vediyamāno jīvitapariyantikaɱ vedanaɱ vediyāmīti pajānāti.|| ||

Kāyassa bhedā param maraṇā uddhaɱ jīvita-pariyādānā ideva sabbavedayitāni anabhinanditāni sītībhavissantī'ti pajānāti.|| ||

Seyyathā pi bhikkhu,||
telañca paṭicca vaṭṭiñca paṭicca telappadīpo jhāyati,||
tass'eva telassa ca vaṭṭiyā ca pariyādānā aññassa ca anupāhārā anāhāro nibkhāyati.|| ||

Evam eva kho bhikkhu.|| ||

Kāyapariyantikaɱ vedanaɱ vediyamāno kāyapariyantikaɱ vedanaɱ vediyāmīti pajānāti.|| ||

Jīvitapariyantikaɱ vedanaɱ vediyamāno jīvitapariyantikaɱ vedanaɱ vediyāmiti pajānāti.|| ||

Kāyassa bhedā param maraṇā uddhaɱ jīvita-pariyādānā idh'eva sabbavedayitāni anababhinanditāni sītībhavissatī'ti pajānāti.|| ||

Tasmā evaɱ samannāgato bhikkhu iminā paramena paññādhiṭṭhānena samannāgato hoti.|| ||

Esā hi bhikkhu,||
paramā ariyā paññā yad idaɱ sabbadukkhakkhaye ñāṇaɱ.|| ||

Tassa sā vimutti sacce ṭhitā akuppā hoti.|| ||

Taɱ hi bhikkhu musā,||
yaɱ mosadhammaɱ.|| ||

Taɱ saccaɱ,||
yaɱ amosadhammaɱ nibbānaɱ.|| ||

Tasmā evaɱ samannāgato bhikkhu iminā paramena saccādhiṭṭhānena samannāgato hoti.|| ||

Etaɱ hi bhikkhu,||
paramaɱ ariyasaccaɱ yad idaɱ amosadhammaɱ nibbānaɱ.|| ||

Tass'eva kho pana pubbe aviddasuno upadhī honti samattā samādinnā.|| ||

Tyāssa pahīnā honti ucchinnamūlā tālāvatthukatā anabhāvakatā1 āyatiɱ anuppādadhammā.|| ||

Tasmā evaɱ samannāgato bhikkhu iminā paramena cāgādhiṭṭhānena samannāgato hoti.|| ||

Eso hi bhikkhu,||
paramo ariyo cāgo yad idaɱ sabbūpadhipaṭinissaggo.|| ||

Tass'eva kho pana pubbe aviddasuno abhijjhā hoti chando sārāgo.|| ||

Svāssa pahīno hoti ucchinnamūlo tālāvatthukato anabhāvakato āyatiɱ anuppādadhammo.|| ||

Tass'eva kho pana pubbe aviddasuno āghāto hoti vyāpādo sampadoso,||
svāssa pahīno hoti ucchinnamūlo tālāvatthukato anabhāvakato āyatiɱ anuppādadhammo.|| ||

Tass'eva kho pana pubbe aviddasuno avijjā hoti sammoho sampadoso,||
svāssa pahīno hoti ucchinnamūlo [246] tālāvatthukato anabhāvakato āyatiɱ anuppādadhammo.|| ||

Tasmā evaɱ samannāgato bhikkhu iminā paramena upasamādhiṭṭhānena samannāgato hoti eso hi bhikkhu,||
paramo ariyo upasamo yad idaɱ rāgadosamohānaɱ upasamo.|| ||

'Paññaɱ nappamajjeyya.|| ||

Saccamanurakkheyya,||
cāgamanubrūheyya,||
santimeva so sikkheyyā'ti iti yaɱ taɱ vuttaɱ,||
idame taɱ paṭicca vuttaɱ.|| ||

Yattha ṭhitaɱ maññussavā nappavattanti.|| ||

Maññussave kho pana appavattamāne muni santoti vuccatī'ti iti kho pan'etaɱ vuttaɱ.|| ||

Kiñc'etaɱ paṭicca vuttaɱ: asmīti bhikkhu maññitame taɱ.|| ||

Ayamahamasmīti.|| ||

Maññitame taɱ.|| ||

Bhavissanti maññitame taɱ.|| ||

Na bhavissanti maññitame taɱ.|| ||

Rūpī bhavissanti maññitame taɱ.|| ||

Arūpī bhavissanti maññitame taɱ.|| ||

Saññī bhavissanti maññitame taɱ.|| ||

Asaññī bhavissanti maññitame taɱ.|| ||

N'evasaññīnāsaññī bhavissanti maññitame taɱ.|| ||

Maññitaɱ bhikkhu rogo,||
maññitaɱ gaṇḍo,||
maññitaɱ sallaɱ.|| ||

Sabbamaññitānaɱ tv'eva bhikkhu,||
samatikkamā muni santoti vuccati.|| ||

Muni kho pana bhikkhu,||
santo na jāyati na jīyati na mīyati na kuppati na vihesati.|| ||

Tampissa bhikkhu n'atthi.|| ||

Yena jāyetha,||
ajāyamāno kiɱ jīyissati,||
ajīyamāno kiɱ mīyissati,||
amīyamāno kiɱ kuppissati.|| ||

Akuppamāno kissa vihessati.|| ||

'Yattha ṭhītaɱ maññussavā nappavattanti.|| ||

Maññussave kho pana nappavattamāne muni santoti vuccatī'ti iti yaɱ taɱ vuttaɱ,||
idame taɱ paṭicca vuttaɱ.|| ||

Imaɱ kho me tvaɱ bhikkhu,||
saŋkhittena cha dhātuvibhaŋgaɱ dhārehīti.|| ||

Atha kho āyasmā pukkusāti 'satthā kira me anuppatto,||
sugato kira me anuppatto,||
Sammā-sambuddho kira me anuppatto'ti uṭṭhāy āsanā ekaɱsā civaraɱ katvā Bhagavato pādesu sirasā nipatitvā Bhagavantaɱ etad avoca: 'accayo maɱ bhante,||
accagamā yathābālaɱ yathāmūḷhaɱ [247] yathāakusalaɱ,||
yohaɱ Bhagavantaɱ āvusovādena samudācaritabbaɱ amaññissaɱ.|| ||

Tassa me bhante,||
Bhagavā accayaɱ accayato patigaṇhātu āyatiɱ saɱvarāyā' ti.|| ||

Taggha tvaɱ bhikkhu,||
accayo accagamā yathābālaɱ yathāmūḷhaɱ yathāakusalaɱ,||
yaɱ maɱ tvaɱ āvusovādena samudācaritabbaɱ amaññittha.|| ||

Yato ca kho tvaɱ bhikkhu,||
accayaɱ accayato disvā yathā dhammaɱ paṭikarosi.|| ||

Taɱ te mayaɱ patigaṇhāma.|| ||

Vuddhi hesā bhikkhu.|| ||

Ariyassa vinaye yo accayaɱ accayato disvā yathā dhammaɱ paṭikaroti,||
āyatiɱ saɱvaraɱ āpajjatī' ti.|| ||

Labheyyāhaɱ bhante,||
Bhagavato santike upasampadanti.|| ||

Paripuṇṇaɱ pana te bhikkhu,||
pattacīvaranti:|| ||

Na kho me bhante,||
paripuṇṇaɱ pattacīvaranti.|| ||

Na kho bhikkhu,||
Tathāgatā aparipuṇṇapattacīvaraɱ upasampādentī ti.|| ||

Atha kho āyasmā pukkusāti Bhagavato bhāsitaɱ abhinanditvā anumoditvā uṭṭhāy āsanā Bhagavantaɱ abhivādetvā padakkhiṇaɱ katvā pattacīvarapariyesanaɱ pakkāmi.|| ||

Atha kho āyasmantaɱ pukkusātiɱ pattacīvarapariyesanaɱ carantaɱ bhantagāvī jīvitā voropesi.|| ||

Atha kho sambahulā bhikkhu yena Bhagavā,||
ten'upasaŋkamiɱsu,||
upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhū Bhagavantaɱ etad avocuɱ: 'yo so bhante,||
pukkusāti nāma kulaputto Bhagavatā saŋkhittena ovādena ovadito,||
so kālaŋkato.|| ||

Tassa kā gati,||
ko abhisamparāyo' ti.|| ||

Paṇḍito bhikkhave,||
pukkusāti kulaputto,paccapādi dhammassānudhammaɱ.|| ||

Na ca maɱ dhammādhikaraṇaɱ viheṭhesi.|| ||

Pukkusāti bhikkhave,||
kulaputto pañcannaɱ orambhāgiyānaɱ saɱyojanānaɱ parikkhayā opapātiko tattha parinibbāyī anāvattidhammo tasmā lokāti.|| ||

Idam avoca Bhagavā,||
attamanā te bhikkhū Bhagavato bhāsitaɱ abhinandunti.|| ||

Dhātuvibhaŋgasuttaɱ dasamaɱ


 

Contact:
E-mail
Copyright Statement   Webmaster's Page