Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
5. Saḷāyatana Vagga

Sutta 147

Cūḷa Rāhul'ovāda Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][than][ntbb][upal] Evaɱ me sutaɱ:

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

2. Atha kho Bhagavato rahogatassa paṭisallīnassa evaɱ cetaso parivitakko udapādi. Paripakkā kho rāhulassa vimuttiparipācanīyā dhammā. Yan'nūnāhaɱ rāhulaɱ uttariɱ āsavānaɱ khaye vineyyanti.||
Atha kho Bhagavā pubbaṇha-samayaɱ nivāsetvā pattacīvaraɱ ādāya Sāvatthīɱ piṇḍāya pāvisi. Sāvatthiyaɱ piṇḍāya caritvā pacchābhattaɱ piṇḍapātapaṭikkanto āyasmantaɱ rāhulaɱ āmantesi: gaṇhāhi rāhula nisīdanaɱ, yena andhavanaɱ ten'upasaŋkamissāma divāvihārāyā' ti.||
Evaɱ bhante' ti kho āyasmā rāhulo Bhagavato paṭissutvā nisīdanaɱ ādāya Bhagavantaɱ piṭṭhato anubandhi.||
Tena kho pana samayena anekāni devatāsahassāni Bhagavantaɱ anubandhāni honti. Ajja Bhagavā āyasmantaɱ rāhulaɱ uttariɱ āsavānaɱ khaye vinessatī' ti. Atha kho Bhagavā andhavanaɱ ajjhogahetvā aññatarasmiɱ rukkhamūle paññatte āsane nisīdi. Āyasmāpi kho rāhulo Bhagavantaɱ abhivādetvā eka-m-antaɱ nisīdi. Eka-m-antaɱ nisinnaɱ kho āyasmantaɱ rāhulaɱ Bhagavā etad avoca:|| ||

3. Taɱ kiɱ maññasi rāhula, cakkhuɱ niccaɱ vā aniccaɱ vāti. Aniccaɱ bhante. Yaɱ panāniccaɱ, dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso'ham asmi, eso me attā' ti. No h'etaɱ bhante.||
Taɱ kiɱ maññasi rāhula. Rūpā niccā vā aniccā vāti. Aniccā bhante. Yaɱ panāniccaɱ, dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.||
Taɱ kiɱ maññasi rāhula, cakkhuviññāṇaɱ niccaɱ vā aniccaɱ vāti. Aniccaɱ bhante. Yaɱ panāniccaɱ, dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi. Eso me attā' ti. No etaɱ bhante.||
Taɱ kiɱ maññasi rāhula, cakkhusamphasso nicco vā anicco vāti. Anicco bhante. 'Yaɱ panāniccaɱ, dukkhaɱ vā taɱ sukhaɱ vā' ti. Dukkhaɱ bhante. Yaɱ panāniccaɱ dukkhaɱ, vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.||
Taɱ kiɱ maññasi rāhula, yampidaɱ cakkhusamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ. Tampi niccaɱ vā aniccaɱ vā' ti. Aniccaɱ bhante. Yaɱ panāniccaɱ dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.|| ||

4. Taɱ kiɱ maññasi rāhula, sotaɱ niccaɱ vā aniccaɱ vāti. Aniccaɱ bhante. Yaɱ panāniccaɱ. Dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.|| ||

5. Taɱ kiɱ maññasi rāhula, ghānaɱ niccaɱ vā aniccaɱ vā' ti. Aniccaɱ bhante. Yaɱ panāniccaɱ. Dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.|| ||

6. Taɱ kiɱ maññasi rāhula, jivhā niccā vā aniccā vā' ti. Aniccā bhante. Yaɱ panāniccaɱ. Dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.|| ||

7. Taɱ kiɱ maññasi rāhula, kāyo nicco vā anicco vā' ti. Anicco bhante. Yaɱ panāniccaɱ. Dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.|| ||

8. Taɱ kiɱ maññasi rāhula, mano nicco vā anicco vāti. Anicco bhante. Yaɱ panāniccaɱ. Dukkhaɱ vā taɱ sukhaɱvāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso hamasmi, eso me attā' ti.No h'etaɱ bhante.||
Taɱ kiɱ maññasi rāhula, dhammā niccā vā aniccā vāti. Aniccā bhante. Yaɱ panāniccaɱ. Dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso'ham asmi, eso me attā' ti. No h'etaɱ bhante.||
Taɱ kiɱ maññasi rāhula, manoviññāṇaɱ niccaɱ vā aniccaɱ vāti. Aniccaɱ bhante. Yaɱ panāniccaɱ, dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ kallaɱ nu taɱ samanupassituɱ: 'etaɱ mama, eso hamasmi, eso me attā' ti. No h'etaɱ bhante.||
Taɱ kiɱ maññasi rāhula, manosamphasso nicco vā anicco vāti. Anicco bhante. Yaɱ panāniccaɱ, dukkhaɱ vā taɱ sukhaɱ vāti. Dukkhaɱ bhante. Yaɱ panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso'ham asmi, eso me attā' ti. No h'etaɱ bhante.||
Taɱ kiɱ maññasi rāhula, yampidaɱ manosamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ. Tampi niccaɱ vā aniccaɱ vāti. Aniccaɱ bhante. Yam panāniccaɱ, dukkhaɱ vā taɱ sukhaɱ vāti. Dukkhaɱ bhante. Yam panāniccaɱ dukkhaɱ vipariṇāma-dhammaɱ, kallaɱ nu taɱ samanupassituɱ: 'etaɱ mama, eso'ham asmi, eso me attā' ti. No h'etaɱ bhante.|| ||

9. Evaɱ passaɱ rāhula, Sutavā ariyasāvako cakkhusmiɱ nibbindati, rūpesu nibbindati, cakkhuviññāṇe nibbindati. Cakkhusamphasse nibbindati, yampidaɱ cakkhusamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.||
Sotasmiɱ nibbindati, saddesu nibbindati, sotaviññāṇe nibbindati. Sotasamphasse nibbindati, yampidaɱ sotasamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.||
Ghānasmiɱ nibbindati, gandhesu nibbindati, ghānaviññāṇe nibbindati. Ghānasamphasse nibbindati, yampidaɱ ghānasamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.||
Jivhāya nibbindati, rasesu nibbindati, rasaviññāṇe nibbindati. Rasasamphasse nibbindati, yampidaɱ rasasamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.||
Kāyasmīɱ nibbindati, poṭṭhabbesu nibbindati, poṭṭhabbaviññāṇe nibbindati. Phoṭṭhabbasamphasse nibbindati, yampidaɱ phoṭṭhabbasamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.||
Manasmiɱ nibbindati, dhammesu nibbindati, manoviññāṇe nibbindati. Manosamphasse nibbindati, yampidaɱ manosamphassa-paccayā uppajjati vedanāgataɱ saññāgataɱ sankhāragataɱ viññāṇagataɱ, tasmimpi nibbindati.Nibbindaɱ virajjati, virāgā vimuccati. Vimuttasmiɱ vimuttamiti ñāṇaɱ hoti: khīṇā jāti. Vusitaɱ brahmacariyaɱ, kataɱ karaṇīyaɱ, nāparaɱ itthattāyāti pajānātīti.||
Idam avoca Bhagavā, attamano āyasmā rāhulo Bhagavato bhāsitaɱ abhinandīti. Imasmiɱ ca pana veyyākara-ṇasmiɱ bhaññamāne āyasmato rāhulassa anupādāya āsavehi cittaɱ vimucci.||
Tāsañca anekānaɱ devatāsahassānaɱ virajaɱ vītamalaɱ dhammacakkhuɱ udapādi: 'yaɱ kiñci samudayadhammaɱ, sabbaɱ taɱ nirodhadhamman' ti.|| ||

Cūḷarāhul'ovāda suttaɱ pañcamaɱ


 

Contact:
E-mail
Copyright Statement   Webmaster's Page