Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
5. Saḷāyatana Vagga

Sutta 150

Nagara-Vindeyya Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:

Ekaɱ samayaɱ Bhagavā Kosalesu cārikaɱ caramāno mahatā bhikkhu-saŋghena saddhiɱ yena nagaravindaɱ nāma kosalānaɱ brāhmaṇagāmo, tadavasari. Assosuɱ kho nagaravindeyyakā brāhmaṇagahapatikā: 'samaṇo khalu bho Gotamo Sakyaputto Sakyakulā pabbajito Kosalesu cārikaɱ caramāno mahatā bhikkhu-saŋghena [291] saddhiɱ nagaravindaɱ anuppatto. Taɱ kho pana Bhagavantaɱ Gotamaɱ evaɱ kalyāṇo kittisaddo abbhuggato: 'Iti pi so Bhagavā arahaɱ Sammā-sambuddo vijjā-caraṇa-sampanno sugato loka-vidū anuttaro purisa-damma-sārathī satthā deva-manussānaɱ buddho Bhagavā' ti. So imaɱ lokaɱ sadevakaɱ samārakaɱ sabrahmakaɱ sassamaṇa-brāhmaṇiɱ pajaɱ sadeva-manussaɱ sayaɱ abhiññā sacchikatvā pavedeti. So dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ sabyañchanaɱ kevalaparipuṇṇaɱ parisuddhaɱ brahmacariyaɱ pakāseti. Sādhu kho pana tathārūpānaɱ arahataɱ dassanaɱ hotī' ti.|| ||

Atha kho nagaravindeyyakā brāhmaṇagahapatikā yena Bhagavā, ten'upasaŋkamiɱsu. Upasaŋkamitvā app'ekacce Bhagavantaɱ abhivādetvā eka-m-antaɱ nisīdiɱsu, app'ekacce Bhagavatā saddhiɱ sammodiɱsu. Sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱsu. App'ekacce yena Bhagavā, ten'añjaliɱ paṇāmetvā eka-m-antaɱ nisīdiɱsu. App'ekacce Bhagavato santike nāmagottaɱ sāvetvā eka-m-antaɱ nisīdiɱsu. App'ekacce tuṇhībhūtā eka-m-antaɱ nisīdiɱsu. Eka-m-antaɱ nisinne kho nagaravindeyyake brāhmaṇagahapatike Bhagavā etad avoca:|| ||

Sace vo gahapatayo, aññatitthiyā paribbājakā evaɱ puccheyyuɱ: kathaɱrūpā gahapatayo, samaṇa-brāhmaṇā na sakkātabbā na garukātabbā na mānetabbā na pūjetabbāti. Evaɱ puṭṭhā tumhe gahapatayo, tesaɱ aññatitthiyānaɱ paribbājakānaɱ evaɱ vyākareyyātha: ye te samaṇa-brāhmaṇā cakkhuviññeyyesu rūpesu avītarāgā avitadosā avitamohā ajjhattaɱ avupasantacittā samavisamaɱ caranti kāyena vācāya manasā, evarūpā samaṇa-brāhmaṇā na sakkātabbā, na garukātabbā, na mānetabbā, na pūjetabbā. Taɱ kissa hetu? mayam pihi cakkhuviññeyyesu rūpesu avītarāgā avitadosā avitamohā ajjhattaɱ avupasantacittā samavisamaɱ carāma kāyena vācāya manasā. Tesaɱ no samacariyampi h'etaɱ uttariɱ apassataɱ. Tasmā te bhonto samaṇa-brāhmaṇā na sakkātabbā na garukātabbā na mānetabbā na pūjetabbā. Ye te samaṇa-brāhmaṇā || ||

Sotaviññeyyesu saddesu, avītarāgā avītadosā avītamohā ajjhattaɱ avupasantacittā samavisamaɱ caranti kāyena vācāya manasā. Ghānaviññeyyesu gandhesu, avītarāgā avītadosā avītamohā ajjhattaɱ avupasantacittā samavisamaɱ caranti kāyena vācāya manasā. Jivhāviññeyyesu rasesu, avītarāgā avītadosā avītamohā ajjhattaɱ

Avupasantacittā samavisamaɱ caranti kāyena vācāya manasā. Kāyaviññeyyesu poṭṭhabbesu, avītarāgā avītadosā avītamohā ajjhattaɱ avupasantacittā samavisamaɱ caranti kāyena vācāya manasā. Manoviññeyyesu dhammesu, avītarāgā avītadosā avītamohā ajjhattaɱ avupasantacittā samavisamaɱ caranti kāyena vācāya manasā. Evarūpā samaṇa-brāhmaṇā na sakkātabbā na garukātabbā na mānetabbā. Na pūjetabbā. Taɱ kissa hetu? mayam pi hi manoviññeyyesu dhammesu avītarāgā avītadosā avītamohā [292] ajjhattaɱ avupasantacittā samavisamaɱ carāma kāyena vācāya manasā. Tesaɱ no samacariyampi h'etaɱ uttariɱ apassataɱ. Tasmā te bhonto samaṇa-brāhmaṇā na sakkātabbā na garukātabbā na manetabbā na pūjetabbāti. Evaɱ puṭṭhā tumhe gahapatayo, tesaɱ aññatitthiyānaɱ paribbājakānaɱ evaɱ vyākareyyātha.|| ||

Sace pana vo gahapatayo aññatitthiyā paribbājakā evaɱ puccheyyuɱ: kathaɱrūpā1 gahapatayo samaṇa-brāhmaṇā sakkātabbā, garukātabbā, mānetabbā, pūjetabbā' ti. Evaɱ puṭṭhā tumhe gahapatayo tesaɱ aññatitthiyānaɱ paribbājakānaɱ evaɱ vyākareyayātha: ye te samaṇa-brāhmaṇā cakkhuviññeyyesu rūpesu vītarāgā vītadosā vītamohā ajjhattaɱ vūpasantacittā samacariyaɱ caranti kāyena vācāya manasā. Evarūpā samaṇa-brāhmaṇā sakkātabbā garukātabbā mānetabbā pūjetabbā. Taɱ kissa hetu? mayam pi hi cakkhuviññeyyesu rūpesu avītarāgā avītadosā avītamohā ajjhattaɱ avupasantacittā samavisamaɱ carāma kāyena vācāya manasā. Tesaɱ no samacariyampi h'etaɱ uttariɱ passataɱ. Tasmā te bhonto samaṇa-brāhmaṇā sakkātabbā garukātabbā mānetabbā pūjetabbā. Ye te samaṇa-brāhmaṇā sotaviññeyyesu saddesu vītarāgā vītadosā vītamohā ajjhattaɱ vupasantacittā samacariyaɱ caranti kāyena vācāya manasā. Ghānaviññeyyesu gandhesu vītarāgā vītadosā vītamohā ajjhattaɱ vupasantacittā samacariyaɱ caranti kāyena vācāya manasā. Jivhāviññeyyesu rasesu vītarāgā vītadosā vītamohā ajjhattaɱ vupasantacittā samacariyaɱ caranti kāyena vācāya manasā. Kāyaviññeyyesu poṭṭhabbesu vītarāgā vītadosā vītamohā ajjhattaɱ vupasantacittā samacariyaɱ caranti kāyena vācāya manasā. Manoviññeyyesu dhammesu vītarāgā vītadosā vītamohā ajjhattaɱ vupasantacittā samacariyaɱ caranti kāyena vācāya manasā. Evarūpā samaṇa-brāhmaṇā sakkātabbā garukātabbā mānetabbā pūjetabbā. Taɱ kissa hetu? mayam pi hi mano viññeyyesu dhammesu avītarāgā avītadosā avītamohā ajjhattaɱ avupasantacittā samavisamaɱ carāma kāyena vācāya manasā. Tesaɱ no samacariyampi h'etaɱ uttariɱ passataɱ. Tasmā te bhonto samaṇa-brāhmaṇā sakkātabbā garukātabbā mānetabbā pūjetabbā' ti. Evaɱ puṭṭhā tumhe gahapatayo, tesaɱ aññatitthiyānaɱ paribbājakānaɱ evaɱ vyākareyyātha.|| ||

Sace pana vo gahapatayo, aññatitthiyā paribbājakā evaɱ puccheyyuɱ: ke panāyasmantānaɱ ākārā ke anvayā, yena tumhe āyasmanto evaɱ vadetha: addhā te āyasmanto [293] vītarāgā rāgavinayāya vā paṭipannā, vītadosā vā dosavinayāya vā paṭipannā vītamohā vā mohavinayāya vā paṭipannā' ti. Evaɱ puṭṭhā tumhe gahapatayo, tesaɱ aññatitthiyānaɱ paribbājakānaɱ evaɱ vyākareyyātha: tathā hi te āyasmanto araññe vanapatthāni1 pantāni senāsanāni paṭisevanti. N'atthi kho pana tattha tathā rūpā cakkhuviññeyyā rūpā, ye disvā disvā abhirameyyuɱ. N'atthi kho pana tattha tathārūpā sotaviññeyyā saddā, ye sutvā sutvā abhirameyyuɱ. N'atthi kho pana tattha tathārūpā ghānaviññeyyā gandhā, ye ghāyitvā ghāyitvā abhirameyyuɱ. N'atthi kho pana tattha tathā rūpā jivhāviññeyyā rasā, ye sāyitvā sāyitvā abhirameyyuɱ. N'atthi kho pana tattha tathārūpā kāyaviññeyyā poṭṭhabbā, ye phusitvā phusitvā abhirameyyuɱ. Ime kho no āvuso, ākārā ime anvayā, yena mayaɱ āyasmanto evaɱ vadema. Addhā te āyasmanto vītarāgā vā rāgavinayāya vā paṭipannā, vītadosā vā dosavinayāya vā paṭipannā, vītamohā vā mohavinayāya vā paṭipannāti. Evaɱ puṭṭhā tumhe gahapatayo, tesaɱ aññatitthiyānaɱ paribbājakānaɱ evaɱ vyākareyyāthā' ti.|| ||

Evaɱ vutte nagaravindeyyakā brāhmaṇagahapatikā Bhagavantaɱ etad avocuɱ: 'abhikkantaɱ bho Gotama, abhikkantaɱ bho Gotama, seyyathā pi bho Gotama, nikkujjitaɱ vā ukkujjeyya, paṭicchannaɱ vā vivareyya, mūḷhassa vā maggaɱ ācikkheyya, andhakāre vā telapajjotaɱ dhāreyya cakkhumanto rūpāni dakkhintī' ti. Evam evaɱ bhotā Gotamena aneka-pariyāyena dhammo pakāsito. Ete mayaɱ Bhagavantaɱ Gotamaɱ saraṇaɱ gacchāma dhammañca bhikkhu-saŋghañ ca. Upāsake no bhavaɱ Gotamo dhāretu ajjatagge pāṇupete saraṇaɱ gate' ti.|| ||

Nagaravindeyya suttaɱ aṭṭhamaɱ.


 

Contact:
E-mail
Copyright Statement   Webmaster's Page