Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Velthuis (aaiiuu.m'n~n.t.d.n.l) ]

Saɱyutta Nikāya
I. Sagātha Vagga
1. Devatā-Saɱyutta
II. Nandana Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 


 

Sutta 11

Nandana Suttaɱ

[11.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Bhūta-pubbaɱ bhikkhave aññatarā Tāvatiɱsakāyikā devatā Nandanavane accharāsaŋghaparivutā dibbehi pañca-kāma-guṇehi samappitā samaŋgibhūtā paricāriyamānā tāyaɱ velāyaɱ imaɱ gāthaɱ abhāsi:|| ||

Na te sukhaɱ pajānanti ye na passanti Nandanaɱ,||
Āvāsaɱ naradevānaɱ tidasānaɱ yasassinan ti.|| ||

[6] Evaɱ vutte bhikkhave aññatarā devatā taɱ devataɱ gāthāya paccabhāsi:|| ||

Na tvaɱ bāle pajānāsi yathā arahataɱ vaco,||
Aniccā sabbe sankhārā uppāda-vaya-dhammino,||
Uppajjitvā nirujjhanti tesaɱ vūpasamo sukho ti.|| ||

 


 

Sutta 12

Nandati Suttaɱ

[12.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Nandati puttehi puttimā gomiko gohi tath'eva nandati,||
Upadhī hi narassa nandanā na hi so nandati yo nirūpadhī ti.|| ||

(Bhagavā:)|| ||

Socati puttehi puttimā gomiko gohi tath'eva socati,||
Upadhī hi narassa socanā na hi so socati yo nirūpadhī ti.|| ||

 


 

Sutta 13

N'atthiputta Suttaɱ

[13.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

N'atthi puttasamaɱ pemaɱ n'atthi gosamitaɱ dhanaɱ,||
N'atthi suriyasamā ābhā samudda-paramā sarā ti.|| ||

(Bhagavā:)|| ||

N'atthi attasamaɱ pemaɱ n'atthi dhaññasamaɱ dhanaɱ,||
N'atthi paññāsamā ābhā vuṭṭhi ve paramā sarā ti.

 


 

Sutta 14

Khattiya Suttaɱ

[14.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Khattiyo dipadaɱ seṭṭho balivaddo catuppadaɱ,||
Komārī seṭṭhā bhariyānaɱ yo ca puttāna pubbajo ti.|| ||

(Bhagavā:)|| ||

Sambuddho dvipadaɱ seṭṭho ājānīyo catuppadaɱ,||
Sussūsā seṭṭhā bhariyānaɱ yo ca puttānam assavo ti.|| ||

 


 

Sutta 15

Sanamāna (or Santikāya) Suttaɱ

[15.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

[7] Ṭhite majjhantike kāle sannisnnesu pakkhisu,||
Sanat'eva mahāraññaɱ taɱ bhayaɱ paṭihāti man ti.|| ||

(Bhagavā:)|| ||

Ṭhite majjhantike kāle sannisinnesu pakkhisu,||
Sanat'eva mahāraññaɱ sā ratī paṭibhāti man ti.|| ||

 


 

Sutta 16

Niddātandi Suttaɱ

[16.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

Niddā tandi vijambhikā aratī bhattasammado,||
Etena na ppakāsati ariyamaggo idha pāṇinan ti.|| ||

(Bhagavā:)|| ||

Niddaɱ tandiɱ vijambhikaɱ aratiɱ bhattasammadaɱ||
Viriyena naɱ paṇāmetvā ariyamaggo visujjhatī ti.|| ||

 


 

Sutta 17

Dukkara (or Kumma) Suttaɱ

[17.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

Dukkaraɱ duttitikkhañ ca avyattena ca sāmaññaɱ,||
Bahū hi tattha sambādhā yattha bālo visīdatī ti.|| ||

(Bhagavā:)|| ||

Kati'haɱ careyya sāmaññaɱ cittaɱ ce na nivāraye,||
Pade pade visīdeyya saŋkappānaɱ vasānugo.|| ||

Kummo va aŋgāni sake kapāle||
samoda'haɱ bhikkhu manovitakke,||
Anissito aññam aheṭhayāno||
parinibbuto na upavadeyya kañcī ti.|| ||

 


 

Sutta 18

Hiri Suttaɱ

[18.1][rhyc][than][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

Hirīnisedho puriso koci lokasmiɱ vijjati,||
Yo nindaɱ appabodhati asso bhadro kasām ivā ti.|| ||

(Bhagavā:)|| ||

Hirīnisedhā tanuyā ye caranti sadā satā,||
Antaɱ dukkhassa pappuyya caranti visame saman ti.|| ||

 


[8]

Sutta 19

Kuṭikā Suttaɱ

[19.1][rhyc][bodh] Evam me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

Kacci te kuṭikā n'atthi kacci n'atthi kulāvakā,||
Kacci santānakā n'atthi kacci mutto'si bandhanā ti.|| ||

(Bhagavā:)|| ||

Taggha me kuṭikā n'atthi taggha n'atthi kulāvakā,||
Taggha santānakā n'atthi taggha mutto'mhi bandhanā ti.|| ||

(Devatā:)|| ||

Kin tāhaɱ kuṭikaɱ brūmi kin te brūmi kulāvakaɱ,||
Kin te santāna1kaɱ brūmi kin tāhaɱ brūmi bandhanan ti.|| ||

(Bhagavā:)|| ||

Mātaraɱ kuṭikaɱ brūsi bhariyaɱ brūsi kulāvakaɱ,||
Putte santānake brūsi taṇhaɱ me brūsi bandhanan ti.|| ||

(Devatā:)|| ||

Sāhu te kuṭikā n'atthi sāhu n'atthi kulāvakā,||
Sāhu santānakā n'atthi sāhu mutto'si bandhanā ti.|| ||

 


 

Sutta 20

Samiddhi Suttaɱ

[20.1][rhyc][than][bodh] Evam me sutaɱ.|| ||

Ekaɱ samayaɱ Bhagavā Rājagahe viharati Tapodārāme.|| ||

Atha kho āyasmā Samiddhi rattiyā paccūsa-samayaɱ paccuṭṭhāya yena Tapodā ten'upasaŋkami gattāni parisiñcituɱ.|| ||

Tapode gattāni parisiñ-citvā paccuttaritvā ekacīvaro aṭṭhāsi gattāni pubbāpayamāno.|| ||

Atha kho aññatarā devatā abhikkantāya rattiyā abhikkantavaṇṇā kevala-kappaɱ Tapodaɱ obhāsetvā yena āyasmā Samiddhi ten'upasaŋkami.|| ||

Upasaŋkamitvā vehāsaɱ ṭhitā āyasmantaɱ Samiddhiɱ gāthāya ajjhabhāsi:||| ||

Abhutvā bhikkhasi bhikkhu na hi bhutvāna bhikkhasi,||
Bhutvāna bhikkhu bhikkhassu mā taɱ kālo upaccagā ti.|| ||

(Samiddhi:)|| ||

[9] Kālaɱ vo'haɱ na jānāmi channo kālo na dissati,||
Tasmā abhutvā bhikkhāmi mā maɱ kālo upaccagā ti.|| ||

Atha kho sā devatā paṭhaviyaɱ patiṭṭhahitvā āyasmantaɱ Samiddhiɱ etad avoca:|| ||

Daharo tvaɱ bhikkh pabbajito susu kālakeso bhadrena yobbanena samannāgato paṭhamena vayasā anikīḷitāvī kāmesu.|| ||

Bhuñja bhikkhu mānusake kāme.|| ||

Mā sandiṭṭhikaɱ hitvā kālikaɱ anudhāvī ti.|| ||

(Samiddhi:)|| ||

Na khvāhaɱ āvuso sandiṭṭhikaɱ hitvā kālikaɱ anudhāvāmi.|| ||

Kālikañ ca khvāhaɱ āvuso hitvā sandiṭṭhikaɱ anudhāvāmi.|| ||

Kālikāhi āvuso kāmā vuttā Bhagavatā bahudukkhā bahūpāyāsā ādīnavo ettha bhiyyo.|| ||

Sandiṭṭhiko ayaɱ dhammo akāliko ehipassiko opanayiko paccattaɱ veditabbo viññūhī ti.|| ||

(Devatā:)|| ||

Kathañ ca bhikkhu kālikā kāmā vuttā Bhagavatā bahudukkhā bahūpāyāsā ādīnavo ettha bhiyyo?|| ||

Kathaɱ sandiṭṭhiko ayaɱ dhammo akāliko ehi passiko opanayiko paccattaɱ veditabbo viññūhī ti?|| ||

(Samiddhi:)|| ||

Ahaɱ kho āvuso navo acirapabbajito.|| ||

Adhunāgato imaɱ dhamma-vinayaɱ||
na khvāhaɱ sakkomi vitthārena ācikkhituɱ.|| ||

Ayaɱ so Bhagavā arahaɱ Sammā-sambuddho Rājagahe viharati Tapodārāme.|| ||

Taɱ Bhagavantaɱ upasaŋkamitvā etam atthaɱ puccha.|| ||

Yathā te Bhagavā vyākaroti,||
tathā naɱ dhāreyyāsī ti.|| ||

(Devatā:)|| ||

Na kho bhikkhu sukaro so Bhagavā amhehi upasaŋkamituɱ||
aññāhi mahesakkhāhi devatāhi parivuto.|| ||

Sa ce kho tvaɱ bhikkhu taɱ Bhagavantaɱ upasaŋkamitvā etam atthaɱ puccheyyāsi||
mayam pi āgaccheyyāma dhamma-savaṇāyā ti.|| ||

Evam āvuso ti kho āyasmā Samiddhi tassā devatāya paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

[10] Eka-m-antaɱ nisinno kho āyasmā Samiddhi Bhagavantaɱ etad avoca:|| ||

Idāhaɱ bhante rattiyā paccūsa-samayaɱ paccuṭṭhāya yena Tapodā ten'upasaŋkamiɱ gattāni parisiñcituɱ.|| ||

Tapode gattāni parisiñ-citvā paccuttaritvā ekacīvaro aṭṭhāsiɱ gattāni pubbāpayamāno.|| ||

Atha kho bhante aññatarā devatā abhikkantāya rattiyā abhikkantavaṇṇā kevalakappaɱ Tapodaɱ obhāsetvā yenāhaɱ ten'upasaŋkami.|| ||

Upasaŋkamitvā vehāsaɱ ṭhitā imāya gāthāya ajjhabhāsi:|| ||

Abhutvā bhikkhasi bhikkhu na hi bhutvāna bhikkhasi,||
Bhutvāna bhikkhu bhikkhassu mā taɱ kālo upaccagā ti.|| ||

Evaɱ vutte ahaɱ bhante taɱ devataɱ gāthāya paccabhāsiɱ.|| ||

"Kālaɱ vo'haɱ na jānāmi channo kālo na dissati,||
Tasmā abhutvā bhikkhāmi mā maɱ kālo upaccagā" ti.|| ||

Atha kho bhante sā devatā paṭhaviyaɱ patiṭṭhahitvā maɱ etad avoca:|| ||

Daharo tvaɱ bhikkhu pabbajito susu-kālakeso bhadrena yobbanena sammanāgato paṭhamena vayasā,||
anikīḷitāvī kāmesu.|| ||

Bhuñja bhikkhu mānusake kāme.|| ||

Mā sandiṭṭhikaɱ hitvā kālikaɱ anudhāvī ti.|| ||

Evaɱ vutte'haɱ bhante taɱ devataɱ etad avocaɱ:|| ||

"Na khvāhaɱ āvuso sandiṭṭhikaɱ hitvā kālikaɱ anudhāvāmi.|| ||

Kālikaɱ ca khvāhaɱ āvuso hitvā sandiṭṭhikaɱ anudhāvāmi.|| ||

Kālikā hi āvuso kāmā vuttā bahudukkhā bahūpāyāsā ādīnavo ettha bhiyyo.|| ||

Sandiṭṭhiko ayaɱ dhammo akāliko ehipassiko opanayiko paccattaɱ veditabbo viññūhī ti.|| ||

Evaɱ vutte bhante sā devatā maɱ etad avoca:|| ||

Kathañ ca bhikkhu kālikā kāmā vuttā Bhagavatā bahudukkhā bahūpāyāsā ādīnavo ettha bhīyyo?|| ||

Kathaɱ sandiṭṭhiko [11] ayaɱ dhammo akāliko ehipassiko opanayiko paccattaɱ veditabbo viññūhī ti?|| ||

Evaɱ vutte'haɱ bhante taɱ devataɱ etad avocaɱ:|| ||

Ahaɱ kho āvuso navo acirapabbajito.|| ||

Adhunāgato imaɱ Dhamma-Vinayaɱ||
na khvāhaɱ sakkomi vitthārena ācikkhi-tuɱ.|| ||

Ayaɱ so Bhagavā arahaɱ Sammā-sambuddho Rājagahe viharati Tapodārāme.|| ||

Taɱ Bhagavantaɱ upasaŋkamitvā etam atthaɱ puccha.|| ||

Yathā te Bhagavā vyākaroti tathā naɱ dhāreyyāsī ti.|| ||

Evaɱ vutte bhante sā devatā maɱ etad avoca:|| ||

Na kho bhikkhu sukaro so Bhagavā amhehi upasaŋkamituɱ,||
aññāhi mahesakkhāhi devatāhi parivuto.|| ||

Sace kho tvaɱ bhikkhu taɱ Bhagavantaɱ upasaŋkamitvā etam atthaɱ puccheyyāsi||
mayam pi āgaccheyyāma dhamma-savaṇāyā ti.|| ||

Sace bhante tassā devatāya saccaɱ vacanaɱ,||
idh'eva sā devatā avidūre ti.|| ||

Evaɱ vutte sā devatā āyasmantaɱ Samiddhiɱ etad avoca:|| ||

Puccha bhikkhu,||
puccha bhikkhu,||
ayam ahaɱ anuppattā ti.|| ||

Atha kho Bhagavā taɱ devataɱ gāthāya ajjhabhāsi:|| ||

Akkheyya-saññino sattā akkheyyasmiɱ patiṭṭhitā,||
Akkheyyam apariññāya yogam āyanti maccuno.|| ||

Akkheyyañ ca pariññāya akkhātāraɱ na maññati,||
Taɱ hi tassa na hotī ti yena naɱ vajjā na tassa atthi,||
Sace vijānāsi vadehi yakkhā ti.|| ||

(Devatā:)|| ||

Na khvāhaɱ bhante imassa Bhagavatā saŋkhittena bhāsitassa vitthārena atthaɱ ājānāmi.|| ||

Sādhu me bhante Bhagavā tathā bhāsatu||
yathā'haɱ imassa Bhagavatā saŋkhittena bhāsitassa vitthārena atthaɱ ājāneyyan ti.|| ||

(Bhagavā:)|| ||

[12] Samo visesī athavā nihīno yo maññati so vivadetha tena,||
Tīsu vidhāsu avikampamāno samo visesī ti na tassa hoti,||
Sace vijānāsi vadehi yakkhi ti.|| ||

(Devatā:)|| ||

Imassa pi khvāhaɱ bhante Bhagavatā saŋkhittena bhāsitassa na vitthārena atthaɱ ājānāmi.|| ||

Sādhu me bhante Bhagavā tathā bhāsatu||
yathā'haɱ imassa Bhagavatā saŋkhittena bhāsitassa vitthārena atthaɱ jāneyyan ti.|| ||

(Bhagavā:)|| ||

Pahāsi saŋkhaɱ na vimānam ajjhagā acchecchi taṇhaɱ idha nāma-rūpe,||
Taɱ chinnaganthaɱ anīghaɱ nirāsaɱ||
pariyesamānā nājjhagamuɱ||
Devā manussā idha vā huraɱ vā||
saggesu vā sabba-nivesanesu,||
Sace vijānāsi vadehi yakkhā ti.|| ||

(Devatā:)|| ||

Imassa khvāhaɱ bhante Bhagavatā saŋkhittena bhāsitassa evaɱ vitthārena atthaɱ ājānāmi.|| ||

Pāpaɱ na kayirā vacasā manasā||
kāyena vā kiñcana sabbaloke,||
Kāme pahāya satimā sampajāno||
dukkhaɱ na sevetha anattha-saɱhitan ti.|| ||

Nandana Vaggo dutiyo

 


Contact:
E-mail
Copyright Statement