Saɱyutta Nikāya
I. Sagātha Vagga
1. Devatā-Saɱyutta
IV. Satullapakāyika Vagga
Adapted from the 1995 edition of the digital version of the
Sri Lanka Buddha Jayanti Tripitaka Series.
Sutta 31
Sabbhi Suttaɱ
[31.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho sambahulā satullapakāyikā devatāyo abhikkantāya rattiyā abhikkantavaṇnā kevalakappaɱ Jetavanaɱ obhāsetvā yena Bhagavā ten'upasaŋkamiɱsu,||
upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||
[17] Eka-m-antaɱ ṭhitā kho ekā devatā Bhagavato santike imaɱ gāthaɱ abhāsi:|| ||
Sabbhireva samāsetha sabbhi kubbetha santhavaɱ,||
Sataɱ saddhammam aññāya seyyo hoti na pāpiyoti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Sabhireva samāsetha sabbhi kubbetha santhavaɱ,||
Sataɱ saddhammam aññāya paññā labbhati1 nāññatoti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Sabbhireva samāsetha sabbhi kubbetha santhavaɱ,||
Sataɱ saddhammam aññāya sokamajjhe na socatī ti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Sabbhireva samāsetha sabbhi kubbetha santhavaɱ,||
Sataɱ saddhammam aññāya ñātimajjhe virocatī ti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Sabbhireva samāsetha sabbhi kubbetha santhavaɱ,||
Sataɱ saddhammam aññāya sattā gacchanti suggatinti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Sabhireva samāsetha sabhi kubbetha santhavaɱ,||
Sataɱ saddhammam aññāya sattā tiṭṭhanti sātatanti.|| ||
Atha kho aparā devatā Bhagavantaɱ etad avoca: kassa nu kho Bhagavā subhāsitanti.|| ||
(Bhagavā:)||
Sabbāsaɱ vo subhāsitaɱ pariyāyena.||
Api ca mamāpi suṇātha:|| ||
[18] Sabhireva samāsetha sabhi kubbetha santhavaɱ,||
Sataɱ saddhammam aññāya sabbadukkhā pamuccatī ti.|| ||
Idam avoca Bhagavā.|| ||
Attamanā tā devatāyo Bhagavantaɱ abhivādetvā padakkhiṇaɱ katvā tatthevantaradhāyiɱsūti.|| ||
Sutta 32
Maccharī Suttaɱ
[32.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamiɱsu.||
Upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imaɱ gāthaɱ abhāsi:|| ||
Maccherā ca pamādā ca evaɱ dānaɱ na diyyati,||
Puññamākaŋkhamānena1 deyyaɱ hoti vijānatāti.|| ||
Atha kho aparā devatā Bhagavato santike imā gāthāyo abhāsi:|| ||
Yasseva bhīto na dadāti maccharī tadevādadato bhayaɱ,||
Jighacchā ca pipāsā ca yassa bhāyati maccharī,||
Tameva bālaɱ phusati asmiɱ loke paramhi ca.|| ||
Tasmā vineyya maccheraɱ dajjā dāna malābhibhu,||
Puññāni paralokasmiɱ patiṭṭhā honti pāṇinanti.|| ||
Atha kho aparā devatā Bhagavato santike imā gāthāyo abhāsi:|| ||
Te matesu na mīyanti addhānaɱ va sahabbajaɱ,||
Appasmiɱ ye pavecchanti esa dhammo sanantano.|| ||
Appasmeke pavecchanti bahuneke nadicchare,||
Appasmā dakkhiṇā dinnā sahassena samaɱ mitā.|| ||
Atha kho aparā devatā Bhagavato santike imā gāthāyo abhāsi:|| ||
Duddadaɱ dadamānānaɱ dukkaraɱ kamma kubbataɱ,||
Asanto nānukubbanti sataɱ dhammo durannayo.|| ||
Tasmā satañ ca asatañ ca nānā hoti ito gati,||
Asanto Nirayaɱ yanti santo saggaparāyaṇāti|| ||
Atha kho aparā devatā Bhagavantaɱ etad avoca: kassa nu kho Bhagavā subhāsitanti?|| ||
(Bhagavā:)||
Sabbāsaɱ vo subhāsitaɱ pariyāyena. Api ca mamāpi suṇātha:|| ||
Dhammaɱ care yopi samuñchakaɱ caraɱ dārañca posaɱ dadamappakasmiɱ,||
Sataɱ sahassānaɱ sahassayāginaɱ kalampi nāgghanti tathāvidhassa teti.|| ||
Atha kho aparā devatā Bhagavantaɱ gāthāya ajjhabhāsi:|| ||
Kenesa yañño vipulo mahaggato
Samena dinnassa na agghameti,||
Kathaɱ sataɱ sahassānaɱ sahassayāginaɱ||
Kalampi nāgghanti tathāvidhassa teti.|| ||
Atha kho Bhagavā taɱ devataɱ gāthāya ajjhabhāsi:|| ||
Dadanti heke visame niviṭṭhā||
Chetvā vadhitvā atha socayitvā,||
Sā dakkhiṇā assumukhā sadaṇḍā||
Samena dinnassa na agghameti.||
Evaɱ sataɱ sahassānaɱ sahassayāginaɱ||
Kalampi nāgghanti tathāvidhassa teti.|| ||
Sutta 33
Sādhu Suttaɱ
[33.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
[20] Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamiɱsu.||
Upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Maccherā ca pamādā ca evaɱ dānaɱ na diyyati.|| ||
Puññamākaŋkhamānena deyyaɱ hoti vijānatāti.|| ||
Atha kho aparā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Api ca appasmimpi sādhu dānaɱ.|| ||
Appasmeke pavecchanti bahuneke na dicchare,||
Appasmā dakkhiṇā dinnā sahassena samaɱ mitāti.|| ||
Atha kho aparā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Appasmimpi sādhu dānaɱ.|| ||
Api ca saddhāyapi sādhu dānaɱ|| ||
Dānañca yuddhañca samānamāhu appāpi santā bahuke jinanti,||
Appampi ce saddahāno dadāti ten'eva so hoti sukhī paratthāti.|| ||
Atha kho aparā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Appasmimpi sādhu dānaɱ.|| ||
Saddhāyapi sādhu dānaɱ.|| ||
Api ca dhammaladdhassapi sādhu1 dānaɱ.|| ||
Yo dhammaladdhassa dadāti dānaɱ uṭṭhānaviriyādhigatassa jantu,||
Atikkamma so vetaraṇiɱ Yamassa dibbāni ṭhānāni upeti maccoti.|| ||
Atha kho aparā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Appasmimpi sādhu dānaɱ.|| ||
Saddhāyapi sādhu dānaɱ.|| ||
Dhammaladdhassa pi sādhu1 dānaɱ.|| ||
Api ca viceyya dānampi sādhu.|| ||
Viceyya dānaɱ sugatappasatthaɱ||
Ye dakkhiṇeyyā idha jīvaloke,||
Etesu dinnāni mahapphalāni||
Bījāni vuttāni yathā sukhetteti.|| ||
Atha kho aparā devatā Bhagavato santike imaɱ udānaɱ udānesi:|| ||
Sādhu kho mārisa dānaɱ.|| ||
Appasmimpi sādhu dānaɱ.|| ||
Saddhāyapi sādhu dānaɱ.|| ||
Dhammaladdhassapi sādhu dānaɱ.|| ||
Viceyya dānampi sādhu.|| ||
Api ca pāṇesupi sādhu saɱyamo.|| ||
Yo pāṇabhūtesu aheṭhayaɱ caraɱ parūpavādā na karoti pāpaɱ,||
Bhīruɱ pasaɱsanti na hi tattha sūraɱ bhayā hi santo na karonti pāpanti.|| ||
Atha kho aparā devatā Bhagavantaɱ etad avoca:||
Kassa nu kho Bhagavā subhāsitanti?|| ||
(Bhagavā:)||
Sabbāsaɱ vo subhāsitaɱ pariyāyena.||
Api ca mamāpi suṇātha:||
Saddhāhi dānaɱ bahudhā pasatthaɱ||
Dānā ca kho dhammapadaɱva seyyo.||
Pubbe ca hi pubbatare va santo||
Nibbāṇamevajjhagamuɱ sapaññāti.|| ||
Sutta 34
Nasanti Suttaɱ
[34.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamiɱsu.||
Upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imā gāthāyo abhāsi:|| ||
Na santi kāmā manujesu niccā santīdha kamanīyāni yesu baddho,||
Yesu pamatto apunāgamanaɱ anāgantā puriso maccudheyyāti.||
Chandajaɱ aghaɱ chandajaɱ dukkhaɱ chandavinayā aghavinayo aghavinayā dukkha vinayoti.|| ||
Na te kāmā yāni citrāni loke saŋkapparāgo purisassa kāmo,||
Tiṭṭhanti citrāni tath'eva loke athettha1 dhīrā vinayanti chandaɱ.|| ||
Kodhaɱ jahe vippajaheyya mānaɱ saɱyojanaɱ sabbamatikkameyya,||
Taɱ nāmarūpasmimasajjamānaɱ akiñcanaɱ nānupatanti dukkhā.|| ||
Pahāsi saŋkhaɱ na ca mānamajjhagā acchecchi taṇhaɱ idha nāmarūpe,||
Taɱ chinnaganthaɱ anīghaɱ nirāsaɱ pariyesamānā nājjhagamuɱ||
Devā manussā idha vā huraɱ vā saggesu vā sabbanivesanesūti.|| ||
Tañ ce hi nāddakkhuɱ tathā vimuttaɱ ( iccāyasmā mogharājā:)||
Devā manussā idha vā huraɱ vā.||
Naruttamaɱ atthavaraɱ narānaɱ ye taɱ namassanti pasaɱsiyā teti?|| ||
Pasaɱsiyā te pi bhavanti bhikkhū ( mogharājā'ti Bhagavā:)||
Ye taɱ namassanti tathā vimuttaɱ,||
Aññāya dhammaɱ vicikicchaɱ pahāya saŋgātigā te pi bhavanti bhikkhūti.|| ||
Sutta 35
Ujjhānasaññi Suttaɱ
[35.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho sambahulā ujjhānasaññikā devatāyo abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamiɱsu.||
Upasaŋkamitvā vehāsaɱ aṭṭhaɱsu.|| ||
Vehāsaɱ ṭhitā kho ekā devatā Bhagavato santike imaɱ gāthaɱ abhāsi:|| ||
Aññathā santamattānaɱ aññathā yo pavedaye,||
Nikacca kitavasse'va bhūttaɱ theyyena tassa taɱ.|| ||
(Bhagavā:)||
Yaɱ hi kayirā taɱ hi vade yaɱ na kayirā na taɱ vade,||
Akarontaɱ bhāsamānānaɱ paṭijānanti paṇḍitāti.|| ||
Nayidaɱ bhāsitamattena ekantasavaṇena vā,||
Anukkamitave sakkā yāyaɱ paṭipadā da'hā,||
Yāya dhīrā pamuccanti jhāyino mārabandhanā.|| ||
Na ve dhīrā pakubbanti viditvā lokapariyāyaɱ,||
Aññāya nibbutā dhīrā tiṇṇā loke visattikanti.|| ||
Atha kho tā devatāyo paṭhaviyaɱ patiṭṭhahitvā Bhagavato pādesu sirasā nipatitvā Bhagavantaɱ etad avocuɱ.|| ||
Accayo no bhante accagamā yathābālaɱ yathāmūḷhaɱ yathāakusalaɱ,||
yā mayaɱ Bhagavantaɱ āsādetabbaɱ amaññimhā.|| ||
Tāsaɱ no bhante Bhagavā accayaɱ accayato patigaṇhātu āyatiɱ saɱvarāyā'ti.|| ||
Atha kho Bhagavā sitaɱ pātvākāsi.|| ||
Atha kho tā devatāyo bhīyosomattāya ujjhāyantiyo vehāsaɱ abbhuggañchuɱ.|| ||
Ekā devatā Bhagavato santike imaɱ gāthaɱ abhāsi:|| ||
Accayaɱ desayantīnaɱ yo ce7na paṭigaṇhati,||
Kopantaro dosagaru sa veraɱ paṭimuccati.|| ||
(Bhagavā:)||
Accayo ce na vijjetha no cidhāpagataɱ siyā,||
Verāni ca sammeyyuɱ tenīdha kusalo siyā.|| ||
(Devatā:)||
Kassaccayā na vijjanti kassa n'atthi apāgataɱ||
Ko sammohamāpādi ko vā dhīro sadā satoti.|| ||
(Bhagavā:)||
Tathāgatassa Buddhassa sabbabhūtānukampino,||
Tassaccayā na vijjanti tassa n'atthi apāgataɱ,||
So na sammohamāpādi sova1 dhīro sadā sato.|| ||
Accayaɱ desayantīnaɱ yo ce na paṭigaṇhati,||
Kopantaro dosagaru sa veraɱ paṭimuccati,||
Taɱ veraɱ nābhinandāmi patigaṇhāmi voccayanti.|| ||
Sutta 36
Saddhā Suttaɱ
[36.1][rhyc][bodh] Evam me sutaɱ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamiɱsu.||
Upasaŋkamitvā vehāsaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imaɱ gāthaɱ abhāsi:|| ||
Saddhā dutiyā purisassa hoti no ce assaddhiyaɱ avatiṭṭhati||
Yaso ca kittī ca tatvassa hoti||
Saggañca so gacchati sarīraɱ pahāyāti.|| ||
Atha kho aparā devatā Bhagavato santike imā gāthāyo abhāsi:|| ||
Kodhaɱ jahe vippajaheyya mānaɱ saɱyojanaɱ sabbamatikkameyya,||
Taɱ nāmarūpasmimasajjamānaɱ akiñcanaɱ nānupatanti saŋgāti.|| ||
Pamādamanuyuñjanti bālā dummedhino janā Appamādañca medhāvī dhanaɱ seṭṭhaɱ'va4 rakkhati.|| ||
Mā pamādamanuyuñjetha mā kāmaratisanthavaɱ||
Appamatto hi jhāyanto pappoti paramaɱ sukhanti.|| ||
Sutta 37
Samaya Suttaɱ
[37.1][rhyc][bodh] Evaɱ me sutaɱ.||
Ekaɱ samayaɱ Bhagavā Sakkesu viharati Kapilavatthusmiɱ Mahāvane mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi.|| ||
Dasahi ca lokadhātūhi devatā yebhuyyena sannipatitā honti Bhagavantaɱ dassanāya bhikkhu-saŋghañ ca.|| ||
Atha kho catunnaɱ: Suddhāvāsakāyikānaɱ devānaɱ etad ahosi.|| ||
Ayaɱ kho Bhagavā Sakkesu viharati Kapilavatthusmiɱ Mahāvane mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi.|| ||
Dasahi ca loka dhātūhi devatā yebhuyyena sannipatitā honti Bhagavantaɱ dassanāya bhikkhu-saŋghañ ca.|| ||
Yannūna mayam pi yena Bhagavā ten'upasaŋkameyyāma.|| ||
Upasaŋkamitvā Bhagavato santike paccekagāthaɱ4 bhāseyyāmāti.|| ||
Atha kho tā devatā seyyathā pi nāma balavā puriso sammiñjitaɱ vā bāhaɱ pasāreyya,||
pasāritaɱ vā bāhaɱ sammiñjeyya,||
evam evaɱ Suddhāvāsesu devesu antarahitā Bhagavato purato pāturahaɱsu.|| ||
Atha kho tā devatā Bhagavantaɱ abhivādetvā eka-m-antaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imaɱ gāthaɱ abhāsi:|| ||
Mahā-samayo pavanasmiɱ deva-kāyā samāgatā,||
Āgat'amha imaɱ dhamma-samayaɱ dakkhitāye aparājita-saŋghanti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Tatra bhikkhavo samādahaɱsu cittaɱ attano8 ujukam akaɱsuɱsu,||
Sārathīva nettāni gahetvā indriyāni rakkhanti paṇḍitāti.|| ||
[27] Atha kho aparā devatā Bhagavato santike imaɱ gāthaɱ abhāsi:|| ||
Chetvā khilaɱ chetvā palighaɱ inda-khīlaɱ ūhacca-m-anejā,||
Te caranti suddhā vimalā cakkhumatā sudantā susunāgāti.|| ||
Atha kho aparā devatā Bhagavato santike imaɱ gāthaɱ abhāsi:|| ||
Ye keci Buddhaɱ saraṇaɱ gatāse na te gamissanti apāyaɱ,||
Pahāya mānusaɱ dehaɱ deva-kāyaɱ paripūressantī ti.|| ||
Sutta 38
Sakalika Suttaɱ
[38.1][rhyc][than][bodh] Evam me sutaɱ.||
Ekaɱ samayaɱ Bhagavā Rājagahe viharati maddakucchismiɱ Migadāye.|| ||
Tena kho pana samayena Bhagavato pādo sakalikāya khato hoti,||
bhusā sudaɱ Bhagavato vedanā vattanti sārīrikā vedanā dukkhā tibbā kharā kaṭukā asātā amanāpā.|| ||
Tā sudaɱ Bhagavā sato sampajāno adhivāseti avihaññamāno.|| ||
Atha kho Bhagavā catugguṇaɱ sanghāṭiɱ paññāpetvā dakkhiṇena passena sīhaseyyaɱ kappeti pāde pādaɱ accādhāya sato sampajāno.|| ||
Atha kho sattasatā satullapakāyikā devatāyo abhikkantāya rattiyā abhikkantavaṇṇā kevalakappaɱ maddakucchiɱ obhāsetvā yena Bhagavā ten'upasaŋkamiɱsu.||
Upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||
Eka-m-antaɱ ṭhitā kho ekā devatā Bhagavato santike imaɱ udānaɱ udānesi:|| ||
Nāgo vata bho Samaṇo Gotamo.|| ||
Nāgavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Sīho vata bho Samaṇo Gotamo.|| ||
Sīhavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Ājānīyo vata bho Samaṇo Gotamo.|| ||
Ājānīyavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Nisabho vata bho Samaṇo Gotamo. Nisabhavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Dhorayho vata bho Samaṇo Gotamo. Dhorayhavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Danto vata bho Samaṇo Gotamo.|| ||
Dantavatā ca panuppannā sārīrikā vedanā dukkhā tibbā kharā kaṭukā asātā amanāpā sato sampajāno adhivāseti avihaññamānoti.|| ||
Atha kho aparā devatā Bhagavato santike imaɱ udānaɱ udānesi:|| ||
Passa samādhiɱ subhāvitaɱ cittañ ca suvimuttaɱ1 nacābhinataɱ nacāpanataɱ na ca sasaɱkhāraniggayhavāritavataɱ.|| ||
Yo evarūpaɱ purisanāgaɱ purisasīhaɱ purisājānīyaɱ Purisanisabhaɱ purisadhorayhaɱ purisadantaɱ atikkamitabbaɱ maññeyya,||
kimaññatra adassanāti.|| ||
Pañcavedā sataɱ samaɱ||
Tapassī brāhmaṇā caraɱ,||
Cittañ ca n'esaɱ na sammā vimuttaɱ||
Hīnattarūpā na pāraŋgamā te.|| ||
Taṇhādhipannā vata sīlabaddhā||
Lūkhaɱ tapaɱ vassasataɱ carantā,||
Cittañ ca n'esaɱ na sammā vimuttaɱ||
Hīnattarūpā na pāraŋgamā te.|| ||
Na mānakāmassa damo idhatthi||
Na monamatthi asamāhitassa,||
Eko araññe viharaɱ pamatto||
Na maccudheyyassa tareyya pāranti.|| ||
(Bhagavā:)||
Mānaɱ pahāya susamāhitatto||
Sucetaso sabbadhi vippamutto,||
Eko araññe viharaɱ appamatto||
Sa maccudheyyassa tareyya pāranti.|| ||
Sutta 39
Pajjunna Dhītu Suttaɱ
[39.1][rhyc][bodh] Evam me sutaɱ.||
Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||
Atha kho kokanadā pajjunnassa dhītā abhikkantāya rattiyā abhikkantavaṇṇā kevalakappaɱ Mahāvanaɱ obhāsetvā yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||
Eka-m-antaɱ ṭhitā kho kokanadā pajjunnassa dhītā Bhagavato santike imā gāthāyo abhāsi.|| ||
Vesāliyaɱ vane viharantaɱ||
Aggaɱ sattassa samBuddhaɱ,||
Kokanadāhamasmi abhivande||
Kokanadā pajjunnassa dhītā.|| ||
Sutameva me pure āsi||
Dhammo cakkhumatānubuddho,||
Sāhaɱdāni sakkhī jānāmi||
Munino desayato sugatassa.|| ||
Ye keci ariyadhammaɱ||
Vigarahantā caranti dummedhā,||
Upenti roruvaɱ ghoraɱ||
Cirarattaɱ dukkhamanubhavanti|| ||
Ye ca kho ariya-Dhamme||
Khantiyā upasamena upetā,||
Pahāya mānusaɱ dehaɱ||
Devakāyaɱ paripūressantī'ti.|| ||
Sutta 40
Cullapajjunnadhītu Suttaɱ
[40.1][rhyc][bodh] Evam me sutaɱ.||
Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||
Atha kho cullakokanadā pajjunnassa dhītā abhikkantāya rattiyā abhikkantavaṇṇā kevalakappaɱ Mahāvanaɱ obhāsetvā yena Bhagavā ten'upasaɱkami.||
Upasaɱkamitvā Bhagavantaɱ abhivādetvā eka-m-antaɱ aṭṭhāsi.|| ||
Eka-m-antaɱ ṭhitā kho cullakokanadā pajjunnassa dhītā Bhagavato santike imā gāthāyo abhāsi:|| ||
Idh'āgamā vijjupabhāsavaṇṇā||
Kokanadā pajjunnassa dhītā,||
Buddhañca dhammañca namassamānā||
Gāthā cimā atthavatī abhāsi.|| ||
[31] Bahunāpi kho naɱ vibhajeyyaɱ||
Pariyāyena tādiso dhammo,||
Saɱkhittamattaɱ lapayissāmi||
Yāvatā me manasā pariyattaɱ.|| ||
Pāpaɱ na kayirā vacasā manasā||
Kāyena vā kiñcana sabbaloke,||
Kāme pahāya satimā sampajāno||
Dukkhaɱ na sevetha anattha-saɱhitan ti.|| ||
Satullapakāyikavaggo catuttho.
