Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


Saɱyutta Nikāya
I. Sagātha Vagga
1. Devatā-Saɱyutta
V. Āditta Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 


 

Sutta 41

Aditta Suttaɱ

[41.1][rhyc][than][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaɱ Jetavanaɱ obhāsetvā yena Bhagavā ten'upasankami.||
Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho sā devatā Bhagavato santike imā gāthāyo abhāsi:|| ||

"Ādittasmiɱ agārasmiɱ||
yaɱ nīharati bhājanaɱ,||
Taɱ tassa hoti atthāya||
no ca yaɱ tattha ḍayhati" ti.|| ||

"Evam ādipito loko||
jarāya maraṇena ca,||
Nīharetheva dānena||
dinnaɱ hoti sunīhataɱ.|| ||

Dinnaɱ sukhaphalaɱ hoti||
nādinnaɱ hoti taɱ tathā,||
Corā haranti rājāno||
aggi ḍahati nassati.|| ||

Atha antena jahati||
sarīraɱ sapariggahaɱ,||
Etad aññāya medhāvī||
bhuñjetha ca dadetha ca. Datvā ca bhutvā ca yathānubhāvaɱ||
anindito saggamupeti ṭhānan" ti.|| ||

 


 

Sutta 42

Kiɱdada Suttaɱ

[42.1][rhyc][than][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱdado balado hoti||
kiɱdado hoti vaṇṇado.||
Kiɱdado sukhado hoti||
kiɱdado hoti cakkhudo.||
Yo ca sabbadado hoti||
taɱ me akkhāhi pucchito" ti.|| ||

(Bhagavā:)|| ||

"Annado balado hoti||
vatthado hoti vaṇṇado,||
Yānado sukhado hoti||
dīpado hoti cakkhudo||
So ca sabbadado hoti||
yo dadāti upassayaɱ,||
Amataɱdado ca so hoti||
yo dhammamanusāsatī" ti.|| ||

 


 

Sutta 43

Anna Suttaɱ

[43.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Annam evābhinandanti||
ubhaye devamānusā,||
Atha ko nāma so yakkho||
yaɱ annaɱ nābhinandatī" ti.|| ||

(Bhagavā:)|| ||

"Ye naɱ dadanti saddhāya||
vippasannena cetasā,||
Tam eva annaɱ bhajati||
asmiɱ loke parambhi ca,||
Tasmā vineyya maccheraɱ||
dajjā dānaɱ malābhibhū,||
Puññāni paralokasmiɱ||
patiṭṭhā honti pāṇinan" ti.|| ||

 


 

Sutta 44

Ekamūla Suttaɱ

[44.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Ekamūlaɱ dvirāvaṭṭaɱ||
timalaɱ pañcapattharaɱ,||
Samuddaɱ dvādasāvaṭṭaɱ||
pātālaɱ atarī isī" ti.|| ||

 


 

Sutta 45

Anoma Suttaɱ

[45.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Anomanāmaɱ nipuṇatthadassiɱ||
paññādadaɱ kāmālaye asattaɱ||
Taɱ passatha sabbaviduɱ su medhaɱ||
ariye pathe kamamānaɱ mahesin" ti.|| ||

 


 

Sutta 46

Accharā Suttaɱ

[46.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Accharāgaṇasaŋghuṭṭaɱ||
pisācagaṇasevitaɱ||
Vanan taɱ mohanaɱ nāma||
kathaɱ yātrā bhavissatī" ti.|| ||

(Bhagavā:)|| ||

"Ujuko nāma so Maggo||
abhayā nāma sā disā,||
Ratho akūjano nāma||
Dhamma-cakkehi saɱyuto.|| ||

Hiri tassa apālambo||
satassa parivāraṇaɱ,||
Dhammāhaɱ sārathiɱ brūmi||
sammā-diṭṭhi-pure javaɱ|| ||

Yassa etādisaɱ yānaɱ||
itthiyā purisassa vā,||
Sa ve etena yānena||
nibbāṇasseva santike" ti.|| ||

 


 

Sutta 47

Vanaropa Suttaɱ

[47.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kesaɱ divā ca ratto ca||
sadā puññaɱ pavaḍḍhati||
Dhammaṭṭhā sīla-sampannā||
ke janā saggagāmino" ti.|| ||

(Bhagavā:)

"Ārāmaropā vanaropā||
ye janā setukārakā,||
Papañca udapānañca||
ye dadanti upassayaɱ.||
Tesaɱ divā ca ratto ca||
sadā puññaɱ pavaḍḍhati,||
Dhammaṭṭhā sīla-sampannā||
te janā saggagāmino" ti.|| ||

 


 

Sutta 48

Jetavana Suttaɱ

[48.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

"Idañ hi taɱ Jetavanaɱ||
isiSaŋghanisevitaɱ||
Āvutthaɱ dhammarājena||
pītisañjananaɱ mama."|| ||

(Bhagavā:)|| ||

[34] "Kammaɱ vijjā ca dhammo ca||
sīlaɱ jīvitamuttamaɱ,||
Etena maccā sujjhanti||
na gottena dhanena vā.||
Tasmā hi paṇḍito poso||
sampassaɱ atthamattano,||
Yoniso vicine dhammaɱ||
evaɱ tattha visujjhati.||
Sāriputto va paññāya||
sīlenupasamena ca,||
Yo pi pāragato bhikkhu||
etāva paramo siyā" ti.|| ||

 


 

Sutta 49

Macchari Suttaɱ

[49.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Ye'dha maccharino loke||
kadariyā paribhāsakā,||
Aññesaɱ dadamānānaɱ||
antarāya-karā narā.||
Kīdiso tesaɱ vipāko||
samparāyo ca kīdiso,||
Bhagavantaɱ puṭṭhum āgamma||
kathaɱ jānemu taɱ mayan" ti.|| ||

(Bhagavā)|| ||

"Ye'dha maccharino loke||
kadariyā paribhāsakā,||
Aññesaɱ dadamānānaɱ||
antarāya-karā narā.||
Nirayaɱ tiracchāna-yoniɱ||
yamalokañ upapajjare,||
Sace enti manussattaɱ||
dalidde jāyare kule,||
Co'aɱ piṇḍo ratī khiḍḍā||
yattha kicchena labbhati.||
Parato āsiɱsare bālā||
tam pi tesaɱ nalabbhati,||
Diṭṭh'eva-dhamme sa vipāko||
samparāye ca duggatī" ti.|| ||

(Devatā:)|| ||

"Iti h'etaɱ vijānāma||
aññaɱ pucchāma Gotama,||
Ye'dha laddhā manussattaɱ||
vadaññū vītamaccharā,||
Buddhe pasannā dhamme ca||
saŋghe ca tibba-gāravā.||
Kīdiso tesaɱ vipāko||
samparāyo ca kīdiso,||
Bhagavantaɱ puṭṭhum āgamma||
kataɱ jānemu taɱ mayan" ti.|| ||

(Bhagavā:)|| ||

"Ye'dha laddhā manussattaɱ||
vadaññū vītamaccharā,||
Buddhe pasannā dhamme ca||
saŋghe ca tibba-gāravā,||
Ete sagge pakāsenti||
yattha te upapajjare.|| ||

Sace enti manussattaɱ||
aḍḍhe ājāyare kule,||
Co'aɱ piṇḍo ratī khiḍḍā||
yatthākicchena labbhati.||
Parasambhatesu bhogesu||
vasavattīva modare,||
Diṭṭh'eva-dhamme savipāko||
samparāye va suggatī" ti.|| ||

 


 

Sutta 50

Ghaṭīkāra Suttaɱ

[50.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Ghaṭīkāra devatā:)|| ||

"Avihaɱ upapannāse||
vimuttā satta bhikkhavo,||
Rāgadosa-parikkhīṇā||
tiṇṇā loke visattikan" ti.|| ||

"Ke ca te ataruɱ Saŋghaɱ||
maccudheyyaɱ suduttaraɱ,||
Ke hitvā mānusaɱ dehaɱ||
dibbaɱ yogaɱ upaccaguɱ" ti.|| ||

"Upako palagaṇaḍo ca||
pukkusāti ca te tayo,||
Bhaddiyo bhaddadevo ca||
bāhudanti ca Piŋgiyo.||
Te hitvā mānusaɱ dehaɱ||
dibbaɱ yogaɱ upaccagun" ti.|| ||

(Bhagavā:)|| ||

"Kusalī bhāsasi tesaɱ||
mārapāsappahāyinaɱ,||
Kassa te dhammam aññāya||
acchiduɱ bhavabandhanaɱ" ti.|| ||

(Ghaṭīkāra:)|| ||

"Na aññatra Bhagavatā||
nāññatra tava sāsanā,||
Yassa te dhammam aññāya||
acchiduɱ bhavabandhanaɱ.|| ||

Yattha nāmañ ca rūpañ ca||
asesaɱ uparujjhati,||
Taɱ te dhammaɱ idha ñāya||
acchiduɱ bhavabandhanan" ti.|| ||

(Bhagavā:)|| ||

"Gambhīraɱ bhāsasi vācaɱ||
dubbijānaɱ sudubbudhaɱ,||
Kassa tvaɱ dhammam aññāya||
vācaɱ bhāsasi īdisan" ti.|| ||

(Ghaṭīkāra:)|| ||

"Kumbhakāro pure āsiɱ||
vehaliŋge1 ghaṭīkaro,||
Mātāpettibharo āsiɱ||
Kassapassa upāsako.|| ||

Virato methunā dhammā||
brahma-cārī nirāmiso,||
Ahuvā te sagāmeyyo||
ahuvā te pure sakhā.||
So'haɱ ete pajānāmi||
vimutte satta bhikkhavo,||
Rāgadosa-parikkhīṇe||
tiṇṇe loke visattikan" ti.|| ||

(Bhagavā:)|| ||

"Evam etaɱ tadā āsi||
yathā bhāsasi bhaggava,||
Kumbhakāro pure āsi||
vehaliŋge ghaṭīkaro,||
Mātāpettibharo āsi||
Kassapassa upāsako.||
Virato methunā dhammā||
brahma-cārī nirāmiso,||
Ahuvā me sagāmeyyo||
ahuvā me pure sakhā" ti.|| ||

(Therā:)|| ||

"Evam etaɱ purāṇānaɱ||
sahāyānaɱ ahu saŋgamo,||
Ubhinnaɱ bhāvit'attānaɱ||
sarīrantimadhārinan" ti.|| ||

Āditta Vagga Pañcama

 


Contact:
E-mail
Copyright Statement