Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


Saɱyutta Nikāya
I. Sagātha Vagga
1. Devatā-Saɱyutta
VI. Jarā Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 


 

Sutta 51

Jarā Suttaɱ

[51.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su yāva jarā sādhu?||
Kiɱ su sādhu pati-ṭ-ṭhitaɱ?,||
Kiɱ su narānaɱ ratanaɱ?||
Kiɱ su corehi dūharan" ti?|| ||

(Bhagavā:)|| ||

"Sīlaɱ yāva jarā sādhu saddhā sādhu pati-ṭ-ṭhitā.||
Paññā narānaɱ ratanaɱ puññaɱ corehi dūharan" ti?|| ||

 


 

Sutta 52

Ajarasā Suttaɱ

[52.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su ajarasā sādhu?||
Kiɱ su sādhu adhiṭṭhitaɱ?||
Kiɱ su narānaɱ ratanaɱ?||
Kiɱ su corehi'hāriyan" ti?|| ||

(Bhagavā:)|| ||

"Sīlaɱ ajarasā sādhu saddhā sādhu adhiṭṭhitā,||
Paññā narānaɱ ratanaɱ puññaɱ corehi'hāriyan" ti.|| ||

 


 

Sutta 53

Mitta Suttaɱ

[53.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su pavasato mittaɱ?||
Kiɱ su mittaɱ sake ghare?||
Kiɱ mittaɱ atthajātassa?||
Kiɱ mittaɱ samparāyikan" ti?|| ||

(Bhagavā:)|| ||

"Sattho pavasato mittaɱ mātā mittaɱ sake ghare,||
Sahāyo atthajātassa hoti mittaɱ puna-p-punaɱ,||
Sayaɱ katāni puññāni taɱ mittaɱ samparāyikan" ti.|| ||

 


 

Sutta 54

Vatthu Suttaɱ

[54.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su vatthu manussānaɱ?||
Kiɱ sū'dha paramā sakhā?||
Kiɱ su bhūtā ūpajīvanti ye pāṇā paṭhaviɱ sitā" ti?|| ||

(Bhagavā:)|| ||

"Puttā vatthu manussānaɱ bhariyā ca paramā sakhā,||
Vuṭṭhiɱ bhūtā ūpajīvanti ye pāṇā paṭhaviɱ sitā" ti.|| ||

 


 

Sutta 55

Paṭhama Janeti Suttaɱ

[55.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su janeti purisaɱ?||
Kiɱ su tassa vidhāvati?||
Kiɱ su saɱsāram āpādi?||
Kiɱ su tassa mahabbhayan" ti?|| ||

(Bhagavā:)|| ||

"Taṇhā janeti purisaɱ cittam assa vidhāvati,||
Satto saɱsāram āpādi dukkham assa mahabbhayan" ti.|| ||

 


 

Sutta 56

Dutiya Janeti Suttaɱ

[56.1][rhyc][bodh][than] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su janeti purisaɱ?||
Kiɱ su tassa vidhāvati?||
Kiɱ su saɱsāram āpādi?||
Kismā na parimuccatī" ti?|| ||

(Bhagavā:)|| ||

"Taṇhā janeti purisaɱ cittam assa vidhāvati,||
Satto saɱsāram āpādi dukkhā na parimuccatī" ti.|| ||

 


 

Sutta 57

Tatiya Janeti Suttaɱ

[57.1][rhyc][bodh][than] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su janeti purisaɱ?||
Kiɱ su tassa vidhāvati?||
Kiɱ su saɱsāram āpādi?||
Kiɱ su tassa parāyaṇan" ti?|| ||

(Bhagavā:)|| ||

"Taṇhā janeti purisaɱ cittam assa vidhāvati,||
Satto saɱsāram āpādi kammaɱ tassa parāyaṇan" ti.|| ||

 


 

Sutta 58

Uppatha Suttaɱ

[58.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su uppatho akkhāto?||
Kiɱ su rattin-divakkhayo?||
Kiɱ malaɱ Brahma-cariyassa?||
Kiɱ sinānam anodakan" ti?|| ||

(Bhagavā:)|| ||

"Rāgo uppatho akkhāti vayo rattin-divakkhayo,||
Itthi malaɱ Brahma-cariyassa etthāyaɱ sajjate pajā,||
Tapo ca Brahma-cariyañ ca taɱ sinānam anodakan" ti.|| ||

 


 

Sutta 59

Dutiyā Suttaɱ

[59.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su dutiyā purisassa hoti?||
Kiɱ su c'enaɱ pasāsati?||
Kissa cābhirato macco sabba-dukkhā pamuccatī" ti?|| ||

(Bhagavā:)|| ||

"Saddhā dutiyā purisassa hoti paññā c'enaɱ pasāsati,||
Nibbāṇābhirato macco sabba-dukkhā pamuccatī" ti.|| ||

 


 

Sutta 60

Kavi Suttaɱ

[60.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)|| ||

"Kiɱ su nidānaɱ gāthānaɱ?||
Kiɱ su tāsaɱ viyañjanaɱ?||
Kiɱ su sannissitā gāthā?||
Kiɱ su gāthānam āsayo" ti?|| ||

(Bhagavā:)|| ||

"Chando nidānaɱ gāthānaɱ akkharā tāsaɱ viyañjanaɱ,||
Nāmasannissitā gāthā kavi gāthānam āsayo" ti.|| ||

 


Contact:
E-mail
Copyright Statement