Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saɱyutta Nikāya
I. Sagātha Vagga
1. Devatā-Saɱyutta
VIII. Chetvā Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 


 

Sutta 71

Chetvā [Jhatvā] Suttaɱ

[71.1][rhyc][than][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavantaɱ gāthāya ajjhabhāsi.|| ||

Kiɱ su jhatvā sukhaɱ seti||
kiɱ su jhatvā na socati,||
Kissassa ekadhammassa||
vadhaɱ rocesi gotamāti.|| ||

(Bhagavā:)||
Kodhaɱ jhatvā sukhaɱ seti||
kodhaɱ jhatvā1 na socati,||
Kodhassa visamūlassa||
madhuraggassa devate,||
Vadhaɱ ariyā pasaɱsanti||
taɱ hi jhatvā na socatī ti.|| ||

 


 

Sutta 72

Ratha Suttaɱ

[72.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ su rathassa paññāṇaɱ||
kiɱ su paññāṇamaggino,||
Kiɱ su raṭṭhassa paññāṇaɱ||
kiɱ su paññāṇamitthiyāti.|| ||

(Bhagavā:)||
Dhajo rathassa paññāṇaɱ||
dhūmo paññāṇamaggino,||
Rājā raṭṭhassa paññāṇaɱ||
bhattā paññāṇamitthiyāti.|| ||

 


 

Sutta 73

Vitta Suttaɱ

[73.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱsūdha vittaɱ purisassa seṭṭhaɱ||
kiɱ su suciṇṇo sukham āvahāti,||
kiɱ su have sādutaraɱ rasānaɱ||
kathaɱ jīvitam āhu seṭṭhan ti|| ||

Saddhīdha vittaɱ purisassa seṭṭham||
Dhammo suciṇṇo sukham āvahāti||
Saccaɱ have sādutaraɱ rasānaɱ||
paññājīviɱ jīvitam āhu seṭṭhan ti.|| ||

 


 

Sutta 74

Vuṭṭhi Suttaɱ

[74.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ su uppatataɱ seṭṭhaɱ||
kiɱ su nipatataɱ varaɱ,||
Kiɱ su pavajamānānaɱ||
kiɱ su pavadataɱ varan ti.|| ||

(Aparā devatā:)||
Bījaɱ uppatataɱ seṭṭhaɱ||
vuṭṭhi nipatataɱ varā,||
Gāvo pavajamānānaɱ||
putto pavadataɱ varoti.|| ||

(Bhagavā:)||
Vijjā uppatataɱ seṭṭhā||
avijjā nipatataɱ varā,||
Saŋgho pavajamānānaɱ||
buddho pavadataɱ varo ti.|| ||

 


 

Sutta 75

Bhīta Suttaɱ

[75.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ sūdha bhītā janatā anekā||
maggo ca nekāyatanaɱ pavutto,||
Pucchāmi taɱ Gotama bhūripañña||
kismiɱ ṭhito paralokaɱ na bhāye ti.|| ||

(Bhagavā:)||
Vācaɱ manañca paṇidhāya sammā||
kāyena pāpāni akubbamāno,||
Bavhannapānaɱ gharamāvasanto||
[43] Saddho mudū saɱvibhāgī vadaññū,||
Etesu dhammesu ṭhito catūsu||
dhamme ṭhito paralokaɱ na bhāye ti.|| ||

 


 

Sutta 76

Na Jīrati Suttaɱ

[76.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ jīrati kiɱ na jīrati||
kiɱ su uppathoti vuccati,||
Kiɱ su dhammānaɱ paripantho||
kiɱ su rattindivakkhayo,||
Kiɱ malaɱ brahmacariyassa||
kiɱ sinānamanodakaɱ.||
Kati lokasmiɱ chiddāni||
yattha cittaɱ na tiṭṭhati,||
Bhagavantaɱ puṭṭhum āgamma||
kathaɱ jānemu taɱ mayanti.|| ||

(Bhagavā:)||
Rūpaɱ jīrati maccānaɱ||
nāmagottaɱ na jīrati,||
Rāgo uppathoti vuccati||
lobho dhammānaɱ paripantho,||
Vayo rattindivakkhayo||
itthi malaɱ brahmacariyassa||
etthāyaɱ sajjate pajā||
Tapo ca brahmacariyañ ca||
taɱ sinānam anodakaɱ.|| ||

Cha lokasmiɱ chiddāni||
yattha cittaɱ na tiṭṭhati,||
Ālassaɱ ca pamādo ca||
anuṭṭhānaɱ asaɱyamo,||
Niddā tandi ca te chidde||
sabbaso taɱ vivajjayeti.|| ||

 


 

Sutta 77

Issara Suttaɱ

[77.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ su issariyaɱ loke||
kiɱ su bhaṇḍānamuttamaɱ,||
Kiɱ su satthamalaɱ loke||
kiɱ su lokasmiɱ abbudaɱ.||
Kiɱ su harantaɱ vārenti||
haranto pana ko piyo,||
Kiɱ su punappunāyan taɱ||
abhinandanti paṇḍitāti.|| ||

(Bhagavā:)||
Vaso issariyaɱ loke||
itthi bhaṇḍānam uttamaɱ,||
Kodho satthamalaɱ loke||
corā lokasmiɱ abbudaɱ||
Coraɱ harantaɱ vārenti||
haranto samaṇo piyo,||
Samaṇaɱ punappunāyan taɱ||
abhinandanti paṇḍitāti.|| ||

 


 

Sutta 78

Kāma Suttaɱ

[44]

[78.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kimatthakāmo na dade||
kiɱ macco na pariccaje,||
Kiɱ su muñceyya kalyāṇaɱ||
pāpika3ñca na mocayeti|| ||

(Bhagavā:)||
Attānaɱ na dado poso||
attānaɱ na pariccaje,||
Vācaɱ muñceyya kalyāṇaɱ||
pāpikañ ca na mocayeti.|| ||

 


 

Sutta 79

Pātheyya Suttaɱ

[79.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ su bandhati pātheyyaɱ||
kiɱ su bhogānamāsayo,||
Kiɱ su naraɱ parikassati||
kiɱ su lokasmiɱ dujjahaɱ,||
Kismiɱ baddhā puthusattā||
pāsena sakuṇī yathāti.|| ||

(Bhagavā:)||
Saddhā bandhati pātheyyaɱ||
siri bhogānam āsayo,||
Icchā naraɱ parikassati||
icchā lokasmiɱ dujjahā,||
Icchābaddhā puthusattā||
pāsena sakuṇī yathāti.|| ||

 


 

Sutta 80

Pajjota Suttaɱ

[80.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Kiɱ su lokasmiɱ pajjoto||
kiɱ su lokasmiɱ jāgaro,||
Kiɱ su kamme sajīvānaɱ||
kimassa iriyāpatho.||
Kiɱ su alasaɱ analasañ ca||
mātā puttaɱva posati,||
Kiɱ su bhūtūpajīvanti||
ye pāṇā paṭhaviɱsitāti.|| ||

(Bhagavā:)||
Paññā lokasmiɱ pajjoto||
sati lokasmiɱ1 jāgaro,||
Gāvo kamme sajīvānaɱ||
sītassa iriyāpatho.||
Vuṭṭhi alasaɱ analasañ ca||
mātā puttaɱva posati,||
Vuṭṭhiɱ bhūtūpajīvanti||
ye pāṇā paṭhaviɱsitāti.|| ||

 


 

Sutta 81

Araṇa Suttaɱ

[81.1][rhyc][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
Ke sūdha araṇā loke||
kesaɱ vusitaɱ na nassati,||
Kedha icchaɱ parijānanti||
kesaɱ bhojissiyaɱ sadā||
[45] Kiɱ su mātā pitā bhātā||
vandantī naɱ patiṭṭhitaɱ,||
Kiɱ su idha jātihīnaɱ||
abhivādenti khattiyāti.|| ||

(Bhagavā:)||
Samaṇīdha araṇā loke||
samaṇānaɱ vusitaɱ na nassati.||
Samaṇā icchaɱ parijānanti||
samaṇānaɱ bhojissiyaɱ sadā.|| ||

Samaṇaɱ mātā pitā bhātā||
vandanti naɱ patiṭṭhitaɱ,||
Samaṇīdha jātihīnaɱ||
abhivādenti khattiyā ti.|| ||

 

Jhatvāvaggo aṭṭhamo

 


Contact:
E-mail
Copyright Statement   Webmaster's Page