Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saŋyutta Nikāya
I. Sagātha Vagga
2. Devaputtasaŋyutta
2. Anāthapiṇḍika Vaggo

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

Sutta 11

Candimasa Suttaɱ

[11.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Candimaso devaputto abhikkantāya rattiyā abhikkantavaṇṇo kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Candimaso devaputto Bhagavato santike imaɱ gāthaɱ abhāsi:|| ||

Te hi sotthiɱ gamissanti kacche vāmakase magā,||
Jhānāni upasampajja ekodīnipakā satā ti.|| ||

(Bhagavā:)|| ||

Te hi pāraɱ gamissanti chetvā jālaɱ va ambujo,||
Jhānāni upasampajja appamattā raṇañjahā ti.|| ||

 

§

 

Sutta 12

Vendu Suttaɱ

[12.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho veṇhu1 devaputto Bhagavato santike imaɱ gāthaɱ abhāsi:|| ||

Sukhitā vata te manujā sugataɱ payirupāsiya,||
Yuñjaɱ Gotama sāsane appamattānusikkhareti.|| ||

Ye me pavutte satthipade (veṇhoti Bhagavā) anusikkhanti jhāyino,||
Kāle te appamajjantā na maccuvasagā siyunti.|| ||

 

§

 

Sutta 13

Dīghalaṭṭhi Suttaɱ

[13.1][rhyc] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Dīghalaṭṭhi devaputto abhikkantāya rattiyā abhikkantavaṇṇo kevalakappaɱ Veḷuvanaɱ obhāsetvā yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ aṭṭhāsi. Eka-m-antaɱ ṭhito kho Dīghalaṭṭhi devaputto Bhagavato santike imaɱ gāthām abhāsi:|| ||

Bhikkhu siyā jhāyī vimuttacitto||
Ākaŋkhe ce hadayassānupattiɱ,||
Lokassa ñatvā udayabbayañ ca||
Sucetaso asito tadānisaɱso ti.|| ||

 

§

 

Sutta 14

Nandana Suttaɱ

[14.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho Nandano devaputto Bhagavantaɱ gāthāya ajjhabhāsi:|| ||

Pucchāmi taɱ Gotama bhūripaññaɱ||
Anāvaṭaɱ Bhagavato ñāṇadassanaɱ||
Kathaɱvidhaɱ sīlavantaɱ vadanti||
Kathaɱvidhaɱ paññavantaɱ vadanti||
Kathaɱvidho dukkhamaticca irīyati.||
Kathaɱvidhaɱ devatā pūjayantī ti.|| ||

(Bhagavā:)|| ||

Yo sīlavā paññavā bhāvitatto||
Samāhito jhānarato satīmā,||
Sabb'assa sokā vigatā pahīṇā||
Khīṇāsavo antimadehadhārī.|| ||

Tathāvidhaɱ sīlavantaɱ vadanti||
Tathāvidhaɱ paññavantaɱ vadanti.||
Tathāvidho dukkham aticca irīyati||
Tathāvidhaɱ devatā pūjayantī ti.|| ||

 

§

 

Sutta 15

Candana Suttaɱ

[15.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho Candano devaputto Bhagavantaɱ gāthāya ajjhabhāsi:|| ||

Kathaɱ sū taratī oghaɱ rattindivam atandito||
Appatiṭṭhe anālambe ko gambhīre na sīdatī ti.|| ||

(Bhagavā)|| ||

Sabbadā sīlasampanno paññavā susamāhito,||
Āraddhaviriyo pahitatto oghaɱ tarati duttaraɱ|| ||

Virato kāmasaññāya rūpasaññojanātigo,||
Nandibhavāparikkhīṇo so gambhīre na sīdatī ti.|| ||

 

§

 

Sutta 16

Sudatta Suttaɱ

[16.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho Sudatto devaputto Bhagavato santike imaɱ gāthaɱ abhāsi:|| ||

Sattiyā viya omaṭṭho ḍayhamāno va matthake,||
Kāmarāgappahāṇāya sato bhikkhu paribbaje ti.|| ||

(Bhagavā:)|| ||

sattiyā viya omaṭṭho ḍayhamāno va matthake,||
Sakkāyadiṭṭhippahāṇāya sato bhikkhu paribbaje ti.|| ||

 

§

 

Sutta 17

Subrahma Suttaɱ

[17.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho Subrahmā devaputto Bhagavantaɱ gāthāya ajjhabhāsi:|| ||

Niccaɱ utrastam idaɱ cittaɱ niccaɱ ubbiggam idaɱ mano||
Anuppannesu kicchesu atho uppatitesu ca||
Sace atthi anutrastaɱ taɱ me akkhāhi pucchito ti.|| ||

(Bhagavā:)|| ||

Na aññatra bojjhaŋgātapasā nāññatra indriyasaɱvarā,||
Na aññatra sabbanissaggā sotthiɱ passāmi pāṇinan ti.|| ||

Tatth'ev'antaradhāyī ti.|| ||

 

§

 

Sutta 18

Kakudha Suttaɱ

[18.1][rhyc] Evaɱ me sutaɱ ekaɱ samayaɱ Bhagavā Sākete viharati Añjanavane Migadāye.|| ||

Atha kho Kakudho devaputto abhikkantāya rattiyā abhikkantavaṇṇo kevalakappaɱ Añjanavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Kakudho devaputto Bhagavantaɱ etad avoca:|| ||

Nandasi samaṇā ti?||
Kiɱ laddhā āvuso ti?||
Tena hi samaṇa socasī ti?||
Kiɱ jīyittha āvuso ti?||
Tena hi samaṇa n'eva nandasi na ca socasī ti?||
Evam āvuso ti.|| ||

Kacci tvaɱ anigho bhikkhu atho nandī na vijjati,||
Kacci taɱ ekam āsīnaɱ arati nābhikīratī ti.|| ||

(Bhagavā:)|| ||

Anīgho ve ahaɱ yakkha atho nandi na vijjati,||
Atho maɱ ekam āsīnaɱ arati nābhikīratī ti.|| ||

(Devaputto:)|| ||

Kathaɱ tvaɱ anigho bhikkhu kathaɱ nandī na vijjati,||
Kathaɱ taɱ ekam āsīnaɱ aratī nābhikīratī ti.|| ||

(Bhagavā:)|| ||

Aghajātassa ve nandī nandījātassa ve aghaɱ,||
Anandī anagho bhikkhu evaɱ jānāhi āvuso ti.|| ||

(Devaputto:)|| ||

Cirassaɱ vata passāmi brāhmaṇaɱ parinibbutaɱ,||
Anandiɱ anaghaɱ bhikkhuɱ tiṇṇaɱ loke visattikan ti.|| ||

 

§

 

Sutta 19

Uttaro Suttaɱ

[19.1][rhyc][ati] Evam me sutaɱ ekaɱ samayaɱ Bhagavā Rājagahe viharati.|| ||

Eka-m-antaɱ ṭhito kho Uttaro devaputto Bhagavato santike imaɱ gāthaɱ abhāsi:|| ||

Upanīyati jīvitam appam āyu||
jarūpanītassa na santi tāṇā,||
Etaɱ bhayaɱ maraṇe pekkhamāno||
puññāni kayirātha sukhāvahānī ti.|| ||

(Bhagavā:)|| ||

Upanīyati jīvitam appam āyu||
jarūpanītassa na santi tāṇā,||
Etaɱ bhayaɱ maraṇe pekkhamāno||
lokāmisaɱ pajahe santipekkho ti.|| ||

 

§

 

Sutta 20

Anāthapiṇḍika Suttaɱ

[20.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhito kho Anāthapiṇḍiko devaputto Bhagavato santike imā gāthāyo abhāsi:|| ||

Idaɱ hi taɱ Jetavanaɱ isisaŋghanisevitaɱ,||
Āvutthaɱ dhammarājena pītisañjananaɱ mama.|| ||

Kammaɱ vijjā ca dhammo ca sīlaɱ jīvitam uttamaɱ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaɱ attham attano,||
Yoniso vicine dhammaɱ evaɱ tattha visujjhati.|| ||

Sāriputto va paññāya sīlen'upasamena ca,||
Yo pi pāragato bhikkhu etāva paramo siyā ti.|| ||

2. Idam avoca Anāthapiṇḍiko devaputto.|| ||

Idaɱ vatvā Bhagavantaɱ abhivādetvā padakkhiṇaɱ katvā tatth'eva antaradhāyī.|| ||

3. Atha kho Bhagavā tassā rattiyā accayena bhikkhū āmantesi.|| ||

4. Imaɱ bhikkhave rattiɱ aññataro devaputto abhikkantāya rattiyā abhikkantavaṇṇo kevalakappaɱ Jetavanaɱ obhāsetvā yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho bhikkhave so devaputto mama santike imā gāthāyo abhāsi:|| ||

5. Idaɱ hi taɱ Jetavanaɱ isisaŋghanisevitaɱ,||
Āvutthaɱ dhammarājena pītisañjananaɱ mama.|| ||

Kammaɱ vijjā ca dhammo ca sīlaɱ jīvitam uttamaɱ,||
Etena maccā sujjhanti na gottena dhanena vā.|| ||

Tasmā hi paṇḍito poso sampassaɱ attham attano,||
Yoniso vicine dhammaɱ evaɱ tattha visujjhati.|| ||

Sāriputto va paññāya sīlen'upasamena ca,||
Yo pi pāragato bhikkhu etāva paramo siyā ti.|| ||

6. Idam avoca bhikkhave so devaputto.|| ||

Idaɱ vatvā maɱ||
abhivādetvā padakkhiṇaɱ katvā tatth'eva antaradhāyī ti.|| ||

7. Evaɱ vutte āyasmā Ānando Bhagavantaɱ etad avoca:|| ||

So hi nūna bhante Anāthapiṇḍiko devaputto bhavissati.|| ||

Anāthapiṇḍiko gahapati āyasmante Sāriputte abhippasanno ahosī ti.|| ||

8. Sādhu sādhu Ānanda.|| ||

Yāvatakaɱ kho Ānanda takkāya pattabbaɱ anuppattaɱ tayā.|| ||

Anāthapiṇḍiko hi so Ānanda devaputto ti.|| ||

Anāthapiṇḍikavaggo dutiyo.

 


Contact:
E-mail
Copyright Statement   Webmaster's Page