Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saŋyutta Nikāya
I. Sagātha Vagga
2. Devaputtasaŋyutta
3. Nānātitthiya Vaggo

Adapted from the 1995 edition of the digital version of the Sri Lanka Buddha Jayanti Tripitaka Series.

 


[56]

Sutta 21

Siva Suttaɱ

[21.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho Sivo devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Sivo devaputto Bhagavato santike imā gāthāyo abhāsi:|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya seyyo hoti na pāpiyo.|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya paññā labbhati nāññato.|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya sokamajjhe na socati.|| ||

Sabbhi'r'eva samāsetha sabbhi kubbetha santhavaɱ,||
[57] Sataɱ saddhammam aññāya ñātimajjhe virocati.|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya sattā gacchanti suggatiɱ.|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya sattā tiṭṭhanti sātatan ti.|| ||

3. Atha kho Bhagavā Sivaɱ devaputtaɱ gāthāya paccabhāsi:|| ||

Sabbhi'r'eva samāsetha sabbhi kubbetha santhavaɱ,||
Sataɱ saddhammam aññāya sabbadukkhā pamuccatī ti.|| ||

 


 

Sutta 22

Khema Suttaɱ

[22.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Khemo devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Khemo devaputto Bhagavato santike imā gāthāyo abhāsi:|| ||

Caranti bālā dummedhā amitten'eva attanā,||
Karontā pāpakaɱ kammaɱ yaɱ hoti kaṭukapphalaɱ.|| ||

Na taɱ kammaɱ kataɱ sādhu yaɱ katvā anutappati,||
Yassa assumukho rodaɱ vipākaɱ paṭisevati.|| ||

Tañ ca kammaɱ kataɱ sādhu yaɱ katvā nānutappati,||
Yassa patīto sumano vipākaɱ paṭisevatī ti.|| ||

(Bhagavā:)|| ||

Paṭigacc'eva taɱ kayirā yaɱ jaññā hitam attano,||
Na sākaṭikacintāya mantā dhīro parakkame.|| ||

Yathā sākaṭiko patthaɱ samaɱ hitvā mahāpathaɱ,||
Visamaɱ maggam āruyha akkhacchinno va jhāyati.|| ||

Evaɱ dhammā apakkamma adhammam anuvattiya,||
Mando maccumukhaɱ patto akkhacchinno va jhāyatī ti.|| ||

 


 

Sutta 23

Serī Suttaɱ

[23.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Serī devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Serī devaputto Bhagavantaɱ gāthāya ajjhabhāsi:|| ||

Annam evābhinandanti ubhayo devamānusā,||
Atha ko nāma so yakkho yaɱ annaɱ nābhinandatī ti.|| ||

(Bhagavā:)|| ||

Ye naɱ dadanti saddhāya vippasannena cetasā,||
Tam eva annaɱ bhajati asmiɱ loke paramhi ca.|| ||

Tasmā vineyya maccheraɱ dajjā dānaɱ malābhibhū,||
Puññāni paralokasmiɱ patiṭṭhā honti pāṇinan ti.|| ||

[58] 2. Acchariyaɱ bhante ababhūtaɱ bhante yāva subhāsitam idaɱ bhante Bhagavatā:|| ||

Ye naɱ dadanti saddhāya vippasannena cetasā,||
Tam eva annaɱ bhajati asmiɱ loke paramhi ca.|| ||

Tasmā vineyya maccheraɱ dajjā dānaɱ malābhibhū,||
Puññāni paralokasmiɱ patiṭṭhā honti pāṇinan ti.|| ||

3. Bhūtapubbāhaɱ bhante Serī nāma rājā ahosiɱ dāyako dānapati dānassa vaṇṇavādī.|| ||

Tassa mayhaɱ bhante catusu dvāresu dānaɱ dīyittha samaṇabrāhmaṇakapaṇ'iddhika-vaṇibbaka-yācakānaɱ.|| ||

4. Atha kho maɱ bhante itthāgaraɱ upasaŋkamitvā etad avoca:|| ||

Devassa kho dānaɱ dīyati.|| ||

Amhākaɱ dānaɱ na dīyati.|| ||

Sādhu mayam pi devaɱ nissāya dānāni dadeyyāma puññāni kareyyāmā ti.|| ||

5. Tassa mayhaɱ bhante etad ahosi:|| ||

Ahaɱ kho'smi dāyako dānapati dānassa vaṇṇavādī.|| ||

Dānaɱ dassāmā ti vadantānaɱ kin ti vadeyyan ti.|| ||

So khvāhaɱ bhante paṭhamaɱ dvāraɱ itthāgarassa adāsiɱ.|| ||

Tattha itthāgārassa dānaɱ dīyittha.|| ||

Mama dānaɱ paṭikkami.|| ||

6. Atha kho maɱ bhante khattiyā anuyuttā upasaŋkamitvā maɱ etad avocuɱ:|| ||

Devassa kho dānaɱ dīyati.|| ||

Itthāgārassa dānaɱ dīyati.|| ||

Amhākaɱ dānaɱ no dīyati.|| ||

Sādhu mayam pi devaɱ nissāya dānāni dadeyyāma,||
puññāni kareyyāmā ti.|| ||

Tassa mayhaɱ bhante etad ahosi:|| ||

Ahaɱ kho'smi dāyako dānapati dānassa vaṇṇavādī.|| ||

Dānaɱ dassāmā ti vadantānaɱ kin ti vadeyyan ti.|| ||

So khvāhaɱ bhante dutiyaɱ dvāraɱ khattiyānaɱ anuyuttānaɱ adāsiɱ.|| ||

Tattha khattiyānaɱ anuyuttānaɱ dānaɱ diyittha.|| ||

Mama dānaɱ paṭikkami.|| ||

7. Atha kho maɱ bhante balakāyo upasaŋkamitvā maɱ etad avoca:|| ||

Devassa kho dānaɱ dīyati.|| ||

Itthāgārassa dānaɱ dīyati.|| ||

Khattiyānaɱ anuyuttānaɱ dānaɱ dīyati.|| ||

Amhākaɱ dānaɱ na dīyati.|| ||

Sādhu mayam pi devaɱ nissāya dānāni dadeyyāma,||
puññāni kareyyāmāti.|| ||

[59] Tassa mayhaɱ bhante etad ahosi:|| ||

Ahaɱ kho'smi dāyako dānapati dānassa vaṇṇavādī.|| ||

Dānaɱ dassāmā ti vadantānaɱ kin ti vadeyyan ti.|| ||

So khvāhaɱ bhante tatiyaɱ dvāraɱ balakāyassa adāsiɱ.|| ||

Tattha balakāyassa dānaɱ dīyittha.|| ||

Mama dānaɱ paṭikkami.|| ||

8. Atha kho maɱ bhante brāhmaṇagahapatikā upasaŋkamitvā maɱ etad avocuɱ:|| ||

Devassa kho dānaɱ dīyati.|| ||

Itthāgārassa dānaɱ dīyati.|| ||

Khattiyānaɱ anuyuttānaɱ dānaɱ dīyati.|| ||

Balakāyassa dānaɱ dīyati.|| ||

Amhākaɱ dānaɱ na dīyati.|| ||

Sādhu mayam pi devaɱ nissāya dānāni dadeyyāma,||
puññāni kareyyāmā ti.|| ||

Tassa mayhaɱ bhante etad ahosi:|| ||

Ahaɱ kho'smi dāyako dānapati dānassa vaṇṇavādī.|| ||

Dānaɱ dassāmā ti vadantāna kin ti vadeyyan ti.|| ||

So khvāhaɱ bhante catutthaɱ dvāraɱ brāhmaṇagahapatikānaɱ adāsiɱ.|| ||

Tattha brāhmaṇagahapatikānaɱ dānaɱ dīyittha.|| ||

Mama dānaɱ paṭikkami.|| ||

9. Atha kho maɱ bhante purisā upasaŋkamitvā etad avocuɱ:|| ||

Na kho dāni devassa koci dānaɱ diyatī ti.|| ||

Evaɱ vutto'haɱ bhante te purise etad avocuɱ:|| ||

Tena hi bhaṇe yo bāhiresu janapadesu āyo sañjāyati,||
tato upaḍḍhaɱ antepuraɱ pavesetha.|| ||

Upaḍḍhaɱ tatth'eva dānaɱ detha samaṇabrāhmaṇakapaṇ'iddhika-vaṇibbakayācakānan ti.|| ||

10. So khvāhaɱ bhante evaɱ dīgha-rattaɱ katānaɱ puññānaɱ evaɱ dīgha-rattaɱ katānaɱ kusalānaɱ pariyantaɱ nādhigacchāmi,||
ettakaɱ puññan ti vā ettako puññavipāko ti vā ettakaɱ sagge ṭhātabban ti vā ti.|| ||

11. Acchariyaɱ bhante,||
abbhūtaɱ bhante yāva subhāsitam idaɱ Bhagavatā.|| ||

Ye naɱ dadanti saddhāya vippasannena cetasā,||
Tam eva annaɱ bhajati asmi loke paramhi ca.|| ||

Tasmā vineyya maccheraɱ dajjā dānaɱ malābhibhū,||
Puññāni paralokasmiɱ patiṭṭhā honti pāṇinan ti.|| ||

 


[60]

Sutta 24

Ghaṭīkāra Suttaɱ

[24.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Ghaṭīkāro devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Ghaṭīkāro devaputto Bhagavato santike imaɱ gāthaɱ abhāsi:|| ||

Avibhaɱ upapannāse vimuttā satta bhikkhavo,||
Rāgadosaparikkhīṇā tiṇṇā loke visattikan ti.|| ||

(Bhagavā:)|| ||

Ke ca te ataruɱ maccudheyyaɱ suduttaraɱ,||
Ke hitvā mānusaɱ dehaɱ dibbayogam upaccagun ti.|| ||

(Devaputto:)|| ||

Upako Palagaṇaḍo ca Pukkusāti ca te tayo,||
Bhaddiyo Khaṇḍadevo ca Bāhuraggi ca Piŋgiyo,||
Te hitvā mānusaɱ dehaɱ dibbayogam upaccagun ti.|| ||

(Bhagavā:)|| ||

Kusalaɱ bhāsasi tesaɱ mārapāsappahāyinaɱ,||
Kassa te dhammam aññāya acchiduɱ bhavabandhanan ti.|| ||

(Devaputto:)|| ||

Na aññatra Bhagavatā nāññatra tava sāsanā,||
Yassa te dhammam aññāya acchiduɱ bhavabandhanaɱ.|| ||

Yattha nāmaɱ ca rūpaɱ ca asesam uparujjhati,||
Taɱ te dhammaɱ idh'aññāya acchiduɱ bhavabandhanan ti.|| ||

(Bhagavā:)|| ||

Gambhīraɱ bhāsasi vācaɱ dubbijānaɱ sudubbudhaɱ,||
Kassa tvaɱ dhammam aññāya vācaɱ bhāsasi īdisan ti.|| ||

(Devaputto:)|| ||

Kumbhakāro pure āsiɱ Vehaliŋge Ghaṭīkaro,||
Mātāpettibharo āsiɱ Kassapassa upāsako.|| ||

Virato methunā dhammā brahmacārī nirāmiso,||
Ahuvā te sagāmeyyo ahuvā te pure sakhā.|| ||

So'haɱ ete pajānāmi vimutte satta bhikkhavo,||
Rāgadosaparikkhiṇe tiṇṇe loke visattikan ti.|| ||

(Bhagavā:)|| ||

Evam etaɱ tadā āsi yathā bhāsasi Bhaggava,||
Kumbhakāro pure āsi Vehaliŋge Ghaṭīkaro,||
Mātāpettibharo āsi Kassapassa upāsako.|| ||

Virato methunā dhammā brahmacārī nirāmiso,||
Ahuvā me sagāmeyyo ahuvā me pure sakhā ti.|| ||

(Therā:)|| ||

Evam evaɱ purāṇānaɱ sahāyānaɱ ahu saŋgamo,||
Ubhinnaɱ bhāvitattānaɱ sarīrantimadhārinan ti.|| ||

 


[61]

Sutta 25

Jantu [Chantu] Suttaɱ

[25.1][rhyc] Evam me sutaɱ ekaɱ samayaɱ sambahulā bhikkhū Kosalesu viharanti Himavannapasse araññakuṭikāyaɱ uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā.|| ||

2. Atha kho Jantu devaputto tadahuposathe paṇṇarase yena te bhikkhū ten'upasaŋkami.|| ||

Upasaŋkamitvā te bhikkhū gāthāhi ajjhabhāsi:|| ||

Sukhajivino pure āsuɱ bhikkhū Gotamasāvakā,||
Anicchā piṇḍam esanā anicchā sayanāsanaɱ,||
Loke aniccataɱ ñatvā dukkhass'antaɱ akaɱsu te.|| ||

Dupposaɱ katvā attānaɱ gāme gāmaṇikā viya,||
Bhūtvā bhutvā nipajjanti parāgāresu mucchitā.|| ||

Saŋghassa añjaliɱ katvā idh'ekacce vadām'ahaɱ,||
Apaviddhā anāthā te yathā petā tath'eva te.|| ||

Ye kho pamattā viharanti te me sandhāya bhāsitaɱ,||
Ye appamattā viharanti namo tesaɱ karom'ahan ti.|| ||

 


 

Sutta 26

Rohitassa Suttaɱ

[26.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Rohitasso devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

2. Eka-m-antaɱ ṭhito kho Rohitasso devaputto Bhagavantaɱ etad avoca:|| ||

Yattha nu kho bhante,||
na jāyati||
na jīyati||
na mīyati||
na cavati||
na uppajjati||
sakkā nu kho so bhante gamanena lokassa anto ñātuɱ vā daṭṭhuɱ vā pāpuṇituɱ vā ti.|| ||

3. Yattha kho āvuso||
na jāyati||
na jīyati||
na mīyati||
na cavati||
na uppajjati||
nāhaɱ taɱ gamanena lokassa antaɱ ñāteyyaɱ daṭṭheyyaɱ patteyyan ti vadāmī ti.|| ||

4. Acchariyaɱ bhante,||
abbhutaɱ bhante yāva subhāsitam idaɱ bhante,||
Bhagavatā:|| ||

Yattha kho āvuso||
na jāyati||
na jīyati||
na mīyati||
na cavati||
na uppajjati||
nāhaɱ taɱ gamanena lokassa antaɱ ñāteyyaɱ daṭṭheyyaɱ patteyyan ti vadāmī ti.|| ||

5. Bhūtapubbāhaɱ bhante, Rohitasso nāma isi ahosiɱ Bhojaputto iddhimā vehāsaŋgamo.|| ||

Tassa mayhaɱ bhante.|| ||

[62] Evarūpo javo ahosi:|| ||

Seyyathā pi nāma daḷhadhammo dhanuggaho sikkhito katahattho katayoggo katūpāsano lahukena asanena appakasiren'eva tiriyaɱ tālacchāyaɱ atipāteyya.|| ||

6. Tassa mayhaɱ bhante, evarūpo padavītihāro ahosi:|| ||

Seyyathā pi puratthimasamuddā pacchimo samuddo.|| ||

Tassa mayhaɱ bhante, evarūɱpaɱ icchāgataɱ uppajji:|| ||

"Ahaɱ gamanena lokassa antaɱ pāpuṇissāmi" ti.|| ||

7. So khvāhaɱ bhante evarūpena javena samannāgato evarūpena ca padavītihārena aññatr'eva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatājīvī vassasataɱ gantvā appatvā ca lokassa antaɱ antarā va kālakato.|| ||

8. Acchariyaɱ bhante, abbhutaɱ bhante yāva subhāsitam idaɱ bhante, Bhagavatā:|| ||

"Yattha kho āvuso||
na jāyati,||
na jīyati,||
na mīyati,||
na cavati,||
na uppajjati||
nāhaɱ taɱ gamanena lokassa antaɱ ñāteyyaɱ daṭṭheyyaɱ patteyyan ti vadāmī" ti.|| ||

[26.9][rhyc] Na kho panāhaɱ āvuso,||
appatvā lokassa antaɱ dukkhassa antakiriyaɱ vadāmi.|| ||

Api khvāhaɱ āvuso imasmiñ ñeva vyāmamatte kaḷebare sasaññimhi samanake lokaɱ ca paññāpemi lokasamudayaɱ ca lokanirodhaɱ ca lokanirodhagāminiɱ ca paṭipadan ti.|| ||

Gamanena na pattabbo lokass'anto kudācanaɱ,||
Na ca appatvā lokantaɱ dukkhā atthi pamocanaɱ.|| ||

Tasmā have loka-vidū sumedho||
lokantagū vusitabrahmacariyo,||
Lokassa antaɱ samītāvi ñatvā||
n'āsiɱsati lokam imaɱ parañ cā ti.|| ||

 


 

Sutta 27

Nanda Suttaɱ

[27.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Nando devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Nando devaputto Bhagavato santike imaɱ gāthaɱ abhāsi:|| ||

Accenti kālā tarayanti rattiyo||
vayoguṇā anupubbaɱ jahanti,||
[63] Etaɱ bhayaɱ maraṇe pekkhamāno||
puññāni kayirātha sukhāvahānī ti.|| ||

(Bhagavā:)|| ||

Accenti kālā tarayanti rattiyo||
vayoguṇā anupubbaɱ jahanti,||
Etaɱ bhayaɱ maraṇe pekkhamāno||
lokāmisaɱ pajahe santipekkho ti.|| ||

 


 

Sutta 28

Nandivisāla Suttaɱ

[28.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Nandivisālo devaputto abhikkantāya rattiyā abhikkantavaṇṇo kelakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Nandivisālo devaputto Bhagavantaɱ gāthāya ajjhabhāsī:-|| ||

Catucakkaɱ navadvāraɱ puṇṇaɱ lobhena saŋyutaɱ,||
Paŋkajātaɱ mahāvīra kataɱ yātrā bhavissatī ti.|| ||

(Bhagavā:)|| ||

Chetvā naddhiɱ varattañ ca icchālobhañ ca pāpakaɱ,||
Samūlaɱ taṇhaɱ abbuyha evaɱ yātrā bhavissatī ti.|| ||

 


 

Sutta 29

Susīma Suttaɱ

[29.1][rhyc] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Ānandaɱ Bhagavā etad avoca:|| ||

Tuyham pi no Ānanda Sāriputto ruccatī ti.|| ||

3. Kassa hi nāma bhante, abālassa aduṭṭhassa amūḷhassa avipallatthacittassa āyasmā Sāriputto na rucceyya.|| ||

Paṇḍito bhante, āyasmā Sāriputto.|| ||

Mahāpañño bhante, āyasmā Sāriputto.|| ||

Puthupañño bhante, āyasmā Sāriputto.|| ||

Hāsupañño bhante, āyasmā Sāriputto.|| ||

Javanapañño bhante, āyasmā Sāriputto.|| ||

Tikkhapañño bhante, āyasmā Sāriputto.|| ||

Nibbedhikapañño bhante, āyasmā Sāriputto.|| ||

Appiccho bhante, āyasmā Sāriputto.|| ||

Santuṭṭho bhante, āyasmā Sāriputto.|| ||

Pavivitto bhante, āyasmā Sāriputto.|| ||

Asaŋsaṭṭho bhante, āyasmā Sāriputto.|| ||

Āraddhaviriyo bhante, āyasmā Sāriputto.|| ||

Vattā bhante, āyasmā Sāriputto.|| ||

Vacanakkhamo bhante, āyasmā Sāriputto.|| ||

Codako bhante, āyasmā Sāriputto.|| ||

Pāpagarahī bhante, āyasmā Sāriputto.|| ||

Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyyā ti.|| ||

[64] Evam etaɱ Ānanda,||
evam etaɱ Ānanda.|| ||

4. Kassa hi nāma Ānanda,||
abālassa aduṭṭhassa amūḷhassa avipallatthacittassa Sāriputto na rucceyya.|| ||

Paṇḍito Ānanda Sāriputto,||
mahāpañño Ānanda Sāriputto,||
puthupañño Ānanda Sāriputto,||
hāsupañño Ānanda Sāriputto,||
javanapañño Ānanda Sāriputto,||
tikkhapañño Ānanda Sāriputto,||
nibbedhikapañño Ānanda Sāriputto,||
appiccho Ānanda Sāriputto,||
santuṭṭho Ānanda Sāriputto,||
pavivitto Ānanda Sāriputto,||
asaŋsaṭṭho Ānanda Sāriputto,||
āraddhaviriyo Ānanda Sāriputto,||
vattā Ānanda Sāriputto,||
vacanakkhamo Ānanda Sāriputto,||
codako Ānanda Sāriputto,||
pāpagarahī Ānanda Sāriputto.|| ||

Kassa hi nāma Ānanda,||
ābalassa aduṭṭhassa amūḷhassa avipallatthacittassa Sāriputto na rucceyyāti.|| ||

5. Atha kho Susīmo devaputto āyasmato Sāriputtassa vaṇṇe bhaññamāne mahatiyā devaputtaparisāya parivuto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

6. Eka-m-antaɱ ṭhito kho Susīmo devaputto Bhagavantaɱ etad avoca:|| ||

Evam etaɱ Bhagavā||
evam etaɱ Sugata.|| ||

Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyya?|| ||

Paṇḍito bhante, āyasmā Sāriputto.|| ||

Mahāpañño bhante, āyasmā Sāriputto.|| ||

Puthupañño bhante, āyasmā Sāriputto.|| ||

Hāsupañño bhante, āyasmā Sāriputto.|| ||

Javanapañño bhante, āyasmā Sāriputto.|| ||

Tikkhapañño bhante, āyasmā Sāriputto.|| ||

Nibbedhikapañño bhante, āyasmā Sāriputto.|| ||

Appiccho bhante āyasmā Sāriputto.|| ||

Santuṭṭho bhante, āyasmā Sāriputto.|| ||

Pavivitto bhante, āyasmā Sāriputto.|| ||

Asaŋsaṭṭho bhante, āyasmā Sāriputto.|| ||

Āraddhaviriyo bhante, āyasmā Sāriputto.|| ||

Vattā bhante, āyasmā sāri putto.|| ||

Vacanakkhamo bhante, āyasmā Sāriputto.|| ||

Codako bhante, āyasmā Sāriputto.|| ||

Pāpagarahī bhante, āyasmā Sāriputto.|| ||

Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyyā ti.|| ||

Aham pi hi bhante, yañ ñad'eva devaputtaparisaŋ upasaŋkamiɱ etad eva bahulaɱ saddaɱ suṇāmi:|| ||

Paṇḍito bhante āyasmā Sāriputto.|| ||

Mahāpañño bhante, āyasmā Sāriputto.|| ||

Puthupañño bhante, āyasmā Sāriputto.|| ||

Hāsupañño bhante, āyasmā Sāriputto.|| ||

Javanapañño bhante, āyasmā Sāriputto.|| ||

Tikkhapañño bhante, āyasmā Sāriputto.|| ||

Nibbedhikapañño bhante, āyasmā Sāriputto.|| ||

Appiccho bhante, āyasmā Sāriputto.|| ||

Santuṭṭho bhante, āyasmā Sāriputto.|| ||

Pavivitto bhante, āyasmā Sāriputto.|| ||

Asaŋsaṭṭho bhante, āyasmā Sāriputto.|| ||

Āraddhaviriyo bhante, āyasmā Sāriputto.|| ||

Vattā bhante, āyasmā Sāriputto.|| ||

Vacanakkhamo bhante, āyasmā Sāriputto.|| ||

Codako bhante, āyasmā Sāriputto.|| ||

Pāpagarahī bhante, āyasmā Sāriputto.|| ||

Kassa hi nāma bhante,||
abālassa aduṭṭhassa amūḷhassa avipallatthacittassa āyasmā Sāriputto na rucceyyā ti.|| ||

7. Atha kho Susīmassa devaputtassa devaputtaparisā āyasmato Sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaɱseti.|| ||

8. Seyyathā pi nāma maṇiveḷuriyo subho jātimā aṭṭhaɱso suparikammakato paṇḍukambale nikkhitto bhāsate ca tapate ca virocati ca.|| ||

Evam evaɱ Susīmassa devaputtassa devaputtaparisā āyasmato Sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaɱseti.|| ||

9. Seyyathā pi nāma nekkhaɱ jambonadaɱ dakkhakammāraputtena ukkāmukhe sukusala sampahaṭṭhaɱ paṇḍukambale nikkhitto bhāsate ca tapate ca virocati ca.|| ||

Evam evaɱ Susīmassa devaputtassa devaputtaparisā [65] āyasmato Sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaɱseti.|| ||

10. Seyyathā pi nāma rattiyā paccūsa-samayaɱ osadhītārakā bhāsate ca tapate ca virocati ca.|| ||

Evam evaɱ Susīmassa devaputtassa devaputtaparisā āyasmato Sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaɱseti.|| ||

11. Seyyathā pi nāma saradasamaye viddhe vigatavalāhake deve ādicco nabhaɱ abbhussukkamāno sabbaɱ akāsagataɱ tamaɱ abhivihacca bhāsate ca tapate ca virocati ca.|| ||

Evam evaɱ Susīmassa devaputtassa devaputtaparisā āyasmato Sāriputtassa vaṇṇe bhaññamāne attamanā pamuditā pītisomanassajātā uccāvacā vaṇṇanibhā upadaɱseti.|| ||

12. Atha kho Susimo devaputto āyasmantaɱ Sāriputtaɱ ārabbha Bhagavato santike imaɱ gāthaɱ abhāsi:|| ||

Paṇḍito ti samaññāto Sāriputto akodhano,||
Appiccho sorato danto satthuvaṇṇābhato isī ti.|| ||

13. Atha kho Bhagavā āyasmantaɱ Sāriputtaɱ ārabbha Susimaɱ devaputtaɱ gāthāya paccabhāsi:|| ||

Paṇḍito ti samaññāto Sāriputto akodhano,||
Appiccho sorato danto kālaɱ kaŋkhati bhatiko sudanto ti.|| ||

 


 

Sutta 30

Nānā-Titthiyasāvaka Suttaɱ

[30.1][rhyc] Evam me sutaɱ ekaɱ samayaɱ Bhagavā Rājagahe viharati veḷuvane kalandakanivāpe.|| ||

2. Atha kho sambahulā Nānā-Titthiyasāvakā devaputtā Asamo ca Sahalī ca Niɱko ca Ākoṭako ca Veṭambarī ca Māṇavagāmiyo ca abhikkantāya rattiyā abhikkantavaṇṇā.|| ||

[66] Kevalakappaɱ Veḷuvanaɱ obhāsetvā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhaɱsu.|| ||

3. Eka-m-antaɱ ṭhito kho Asamo devaputto Pūraṇaɱ Kassapaɱ ārabbha Bhagavato santike imaɱ gāthaɱ abhāsi:|| ||

Idha chinditamārite hatajānīsu Kassapo||
Pāpaɱ na pan'upassati puññaɱ vā pana attano,||
Sa ce vissāsam ācikkhi satthā arahati mānanan ti.|| ||

4. Atha kho Sahalī devaputto Makkhaliɱ-Gosālaɱ ārabbha Bhagavato santike imaɱ gāthaɱ abhāsi:|| ||

Tapojigucchāya susaŋvutatto||
vācaɱ pahāya kalahaɱ janena,||
Sa mosavajjā virato saccavādī||
na hi nūna tādīsaɱ karoti pāpan ti.|| ||

5. Atha kho Niŋko devaputto Nigaṇṭhaɱ Nātaputtaɱ ārabbha Bhagavato santike imaɱ gāthaɱ abhāsi:|| ||

Jegucchi nipako bhikkhu cātuyāmasusaŋvuto,||
Diṭṭhaɱ sutañ ca ācikkhaɱ na hi nūna kibbisī siyā ti.|| ||

6. Atha kho Ākoṭako devaputto nānātitthiye ārabbha Bhagavato santike imaɱ gāthaɱ abhāsi:|| ||

Pakudhako Kātiyāno Nigaṇṭhā||
ye cā p'ime Makkhalī Puraṇāse,||
Gaṇassa satthāro sāmaññappattā||
na hi nūna te sappurisehi dūre ti.|| ||

7. Atha kho Veṭambarī devaputto Ākoṭakaɱ devaputtaɱ gāthāya paccabhāsi:|| ||

Sagāravenāpi chavo sigālo||
Na kotthako sīhasamo kadāci,||
Naggo musāvādī gaṇassa satthā||
Saŋkassarācāro na sataɱ sarikkho ti.|| ||

[67] 8. Atha kho Māro pāpimā Veṭambariɱ devaputtaɱ anvāvisitvā Bhagavato santike imaɱ gāthaɱ abhāsi:|| ||

Tapo jigucchāya āyuttā pālayaɱ pavivekiyaɱ,||
Rūpe ca ye niviṭṭhāse devalokābhinandino,||
Te ve sammā'nusāsanti paralokāya mātiyā ti.|| ||

9. Atha kho Bhagavā Māro ayaɱ pāpimā iti viditvā Māraɱ pāpimantaɱ gāthāya paccabhāsi:|| ||

Ye keci rūpā idha vā huraɱ vā||
Ye antalikkhasmiɱ pabhāsavaṇṇā,||
Sabbe va'ete Namucippasatthā||
Āmisaɱ va macchānaɱ vadhāya khittā ti.|| ||

10. Atha kho Māṇavagāmiyo devaputto Bhagavantaɱ ārabbha Bhagavato santike imā gāthāyo abhāsi:|| ||

Vipulo Rājagahīyānaɱ giri seṭṭho pavuccati,||
Seto Himavataɱ seṭṭho ādicco aghagāminaɱ.|| ||

Samuddo udadhinaɱ seṭṭho nakkhattānaɱ va candimā,||
Sadevakassa lokassa Buddho aggo pavuccatī ti.|| ||

Nānātitthiyavaggo tatiyo.

 


Contact:
E-mail
Copyright Statement   Webmaster's Page