Saɱyutta Nikāya
I. Sagātha Vagga
3. Kosala Saɱyutta
1. Bandhana Vagga
Adapted from the 1995 edition of the digital version of the Sri Lanka Buddha Jayanti Tripitaka Series.
Sutta 1
Dahara Suttaɱ
[1.1][pts][than][bodh][olds] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho Rājā Pasenadi Kosalo yena Bhagavā ten'upasankami.|| ||
Upasaŋkamitvā Bhagavatā saddhiɱ sammodi.|| ||
Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Bhavampi no Gotamo anuttaraɱ sammā-sambodhiɱ abhisambuddhoti paṭijānātī" ti?|| ||
"Yaɱ hi taɱ mahārāja sammā vadamāno vadeyya,||
anuttaraɱ sammā-sambodhiɱ abhisambuddhoti,||
mamaɱ taɱ sammā vadamāno vadeyya.|| ||
Ahaɱ hi mahārāja anuttaraɱ sammā-sambodhiɱ abhisambuddho" ti.|| ||
"Ye pi te bho Gotama samaṇabrāhamaṇā saŋghino gaṇino gaṇācariyā ñātā yasassino titthakarā sādhusammatā bahu-janassa.|| ||
Seyyath'īdaɱ:||
Pūraṇo Kassapo,||
Makkhalī Gosālo,||
Nigaṇṭho Nāta-putto,||
Sañjayo Belaṭṭha-putto,||
Pakudho Kaccāyano,||
Ajito Kesakambalo.|| ||
Te pi 'mayā anuttaraɱ sammā-sambodhiɱ abhisamabuddhāti paṭijānāthā' ti.|| ||
Puṭṭhā samānā anuttaraɱ sammā-sambodhiɱ abhisambuddhāti na paṭijānanti.|| ||
Kiɱ pana bhavaɱ Gotamo daharo c'eva jātiyā navo ca pabbajjāyā" ti?|| ||
[69] "Cattāro kho'me mahārāja daharāti na uññātabbā,||
daharāti na paribhotabbā.|| ||
Katame cattāro?.|| ||
Khattiyo kho mahārāja daharoti na uññātabbo,||
daharoti na paribhotabbo.|| ||
Urago kho mahārāja daharoti na uññātabbo||
daharoti na paribhotabbo.|| ||
Aggi kho mahārāja daharoti na uññātabbo,||
daharoti na paribhotabbo.|| ||
Bhikkhu kho mahārāja daharoti na uññātabbo,||
daharoti na paribhotabbā.|| ||
Ime kho mahārāja cattāro daharāti na uññātabbā,||
daharāti na paribhotabbā" ti.|| ||
Idam avoca Bhagavā,||
idaɱ vatvā Sugato athāparaɱ etad avoca Satthā:|| ||
Khattiyaɱ jāti-sampannaɱ abhijātaɱ yasassinaɱ,||
Daharoti nāvajāneyya na naɱ paribhave naro.|| ||
Ṭhānaɱ hi so manussindo rajjaɱ laddhāna khattiyo||
So kuddho rājadaṇḍena tasmiɱ pakkamate bhusaɱ,||
Tasmā taɱ parivajjeyya rakkhaɱ jivitamattano.|| ||
Gāme vā yadi vā,||
raññe yattha passe bhujaŋgamaɱ,||
Daharoti nāvajāneyya na naɱ paribhave naro.|| ||
Uccāvacehi vaṇṇehi urago carati tejasī
So āsajja ḍase bālaɱ naraɱ nāriñca ekadā,||
Tasmā taɱ parivajjeyya rakkhaɱ jivitamattano.|| ||
Pahūtabhakkhaɱ jālinaɱ pāvakaɱ kaṇhavattaniɱ,||
Daharoti nāvamaññeyya na naɱ paribhave naro.|| ||
Laddhā hi so upādānaɱ mahā hutvāna pāvako,||
So āsajja ḍase bālaɱ naraɱ nāriñca ekadā,||
Tasmā taɱ parivajjeyya rakkhaɱ jivitamattano.|| ||
Vanaɱ yadaggi ḍahati pāvako kaṇhavattanī,||
Jāyanti tattha pārohā ahorattāṇamaccaye.|| ||
Yaɱ ca kho sīla-sampanno bhikkhu ḍahati tejasā||
Na tassa puttā pasavo dāyādā vindare dhanaɱ,||
Anapaccā adāyādā tālāvatthu5 bhavanti te.|| ||
[70] Tasmā hi paṇḍito poso sampassaɱ atthamattano||
Bhujaŋgamaɱ pāvakañca khattiyañ ca yasssinaɱ||
Bhikkhuɱ ca sīla-sampannaɱ samma-d-eva samācareti.|| ||
Evaɱ vutte Rājā Pasenadi Kosalo Bhagavantaɱ etad avoca:|| ||
Abhikkantaɱ bhante,||
abhikkantaɱ bhante,||
seyyathā pi bhante nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
cakkhu-manto rūpāni dakkhintī.|| ||
Evam evaɱ Bhagavatā aneka-pariyāyena Dhammo pakāsito,||
es'āhaɱ bhante Bhagavantaɱ saraṇaɱ gacchāmi Dhammañ ca bhikkhu-saŋghañ ca.|| ||
Upāsakaɱ maɱ bhante Bhagavā dhāretu ajja-t-agge pāṇupetaɱ saraṇaɱ gatan" ti.|| ||
§
Sutta 2
Purisa Suttaɱ
[2.1][pts] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho Rājā Pasenadi Kosalo yena Bhagavā ten'upasankami.|| ||
Upasaŋkamitvā Bhagavantaɱ abhivādetvā eka-m-antaɱ nisīdi.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Kati nu kho bhante purisassa dhammā ajjhattaɱ uppajjamānā uppajjanti ahitāya dukkhāya aphāsu-vihārāyā" ti?|| ||
"Tayo kho mahārāja purisassa dhammā ajjhattaɱ uppajjamānā uppajjanti ahitāya dukkhāya aphāsu-vihārāya.|| ||
Katame tayo?|| ||
Lobho kho mahārāja purisassa dhammo ajjhattaɱ uppajjamāno uppajjati ahitāya dukkhāya aphāsu-vihārāya.|| ||
Doso kho mahārāja purisassa dhammo ajjhattaɱ uppajjamāno uppajjati ahitāya dukkhāya aphāsu-vihārāya.|| ||
Moho kho mahārāja purisssa dhammo ajjhattaɱ uppajjamāno uppajjati ahitāya dukkhāya aphāsu-vihārāya.|| ||
Ime kho mahārāja tayo purisassa dhammā ajjhattaɱ uppajjamānā uppajjanti ahitāya dukkhāya aphāsu-vihārāyā" ti.|| ||
Lobho doso ca moho ca purisaɱ pāpacetasaɱ,||
Hiɱsanti attasambhūtā tavasāraɱva samphalan.|| ||
§
Sutta 3
Rāja Suttaɱ
[3.1][pts] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho Rājā Pasenadi Kosalo yena Bhagavā ten'upasankami.|| ||
Upasaŋkamitvā Bhagavantaɱ abhivādetvā eka-m-antaɱ nisīdi.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Atthi nu kho bhante jātassa aññatra jarāmaraṇā" ti?|| ||
"N'atthi kho mahārāja jātassa aññatra jarāmaraṇā.|| ||
Ye pi te mahārāja khattiya-mahā-sālā aḍḍhā maha-d-dhanā mahā-bhogā pahūta-jāta-rūpa-rajatā pahūta-vitt'upakaraṇā pahūta-dhana-dhaññā.|| ||
Tesam pi jātānaɱ n'atthi aññatra jarāmaraṇā.|| ||
Ye pi te mahārāja brāhmaṇa-mahā-sālā aḍḍhā maha-d-dhanā mahā bhogā pahūta-jāta-rūpa-rajatā pahūta-vitt'upakaraṇā pahūta-dhana-dhaññā.|| ||
Tesam pi jātānaɱ n'atthi aññatra jarāmaraṇā.|| ||
Ye pi te mahārāja gahapati-mahā-sālā aḍḍhā maha-d-dhanā mahā-bhogā pahūta-jāta-rūpa-rajatā pahūtavittūpakaraṇā pahūta-dhana-dhaññā.|| ||
Tesam pi jātānaɱ n'atthi aññatra jarāmaraṇā.|| ||
Ye pi te mahārāja bhikkhū arahanto khīṇ'āsavā vusitavanto kata-karaṇīyā ohita-bhārā anuppatta-sadatthā parikkhīṇa-bhava-saŋyojanā samma-d-aññā-vimuttā.|| ||
Tesam-pāyaɱ kāyo bhedana-dhammo nikkhepana-dhammo" ti.|| ||
Jīranti ve rāja rathā sucittā||
atho sarīrampi jaraɱ upeti,||
Satañ ca dhammo na jaraɱ upeti||
santo have sabbhi pavedayanti.|| ||
§
Sutta 4
Piya Suttaɱ
[4.1][bit][pts][bodh][than][olds] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Atha kho Rājā Pasenadi Kosalo yena Bhagavā ten'upasankami.|| ||
Upasaŋkamitvā Bhagavantaɱ abhivādetvā eka-m-antaɱ nisīdi.|| ||
[4.2][bit][pts][bodh][than][olds] Eka-m-antaɱ nisinno kho Rājā Pasenadi-Kosalo Bhagavantam etad avoca:|| ||
"Idha mayham bhante raho-gatassa paṭisallīnassa evaɱ cetaso parivitakko udapādi:|| ||
'Kesaɱ nu kho piyo attā kesaɱ appiyo attā' ti?|| ||
Tassa mayhaɱ bhante etad ahosi:|| ||
[4.3][bit][pts][bodh][than][olds] Ye kho keci kāyena du-c-caritaɱ caranti||
vācāya du-c-caritam caranti||
manasā du-c-caritaɱ caranti||
tesam appiyo attā||
kiñ cā pi te evaɱ vadeyyuɱ||
'piyo no attā' ti||
atha kho tesam appiyo attā.|| ||
Taɱ kissa hetu?|| ||
Yaɱ hi appiyo [72] appiyassa kareyya taɱ te attanā va attano karonti||
tasmā tesam appiyo attā.|| ||
[4.4][bit][pts][bodh][than][olds] Ye ca kho keci kāyena su-caritaɱ karonti||
vācāya su-caritaɱ caraṇti||
manasā su-caritaɱ caranti||
tesaɱ piyo attā||
kiñ cā pi te evaɱ vadeyyuɱ||
'appiyo no attā' ti||
atha kho tesam piyo attā.|| ||
Taɱ kissa hetu?|| ||
Yaɱ hi piyo piyassa kareyya taɱ te attanā va attano karonti||
tasmā tesaɱ piyo attā" ti.|| ||
■
[4.5][bit][pts][bodh][than][olds] "Evam etam mahārāja evam etaɱ mahārāja.|| ||
Ye hi keci mahārāja kāyena du-c-caritaɱ caranti||
vācāya du-c-caritam caranti||
manasā du-c-caritaɱ caranti||
tesam appiyo attā||
kiñ cāpi te evaɱ vadeyyuɱ||
'piyo no attā' ti||
atha kho tesam appiyo attā|| ||
Taɱ kissa hetu?|| ||
Yaɱ hi appiyo appiyassa kareyya taɱ te attanā va attano karonti||
tasmā tesam appiyo attā|| ||
Ye ca kho keci mahārāja kāyena su-caritaɱ caranti||
vācāya su-caritaɱ caraṇti||
manasā su-caritaɱ caranti||
tesaɱ piyo attā||
kiñ cāpi te evaɱ vadeyyuɱ||
'appiyo no attā' ti||
atha kho tesam piyo attā||
Taɱ kissa hetu?|| ||
Yaɱ hi piyo piyassa kareyya taɱ te attanā va attano karonti||
tasmā tesaɱ piyo attā" ti|| ||
[4.6][bit][pts][bodh][than][olds] Attānañ ce piyaɱ jaññā||
na nam pāpena saɱyuje||
na hi taɱ sulabhaɱ hoti||
sukhaɱ dukkatakārinā||
Antakenādhipannassa||
jahato mānusaɱ bhavaɱ||
kiɱ hi tassa sakaɱ hoti||
kiñ ca ādāya gacchati||
kiñc-assa anugaɱ hoti||
chāyā va anapāyinī||
Ubho puññañca pāpañca||
yaɱ macco kurute idha||
taɱ hi tassa sakaɱ hoti||
tañ ca ādāya gacchati||
taɱ c-assa anugaɱ hoti||
chāyā va anapāyinī||
Tasmā kareyya kalyāṇaɱ||
nicayaɱ samparāyikaɱ||
puññāni paralokasmiɱ||
patiṭṭhā honti pāṇinan-ti||
Puññāni paralokasmiɱ patiṭṭhā honti pāṇinan ti.|| ||
§
Sutta 5
Attarakkhita Suttaɱ
[5.1][pts][than] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Idha mayhaɱ bhante,||
raho-gatassa paṭisallīnassa evaɱ cetaso parivitakko udapādi:|| ||
'Kesaɱ nu kho rakkhito attā,||
kesaɱ arakkhito attā' ti?|| ||
Tassa mayhaɱ bhante, etad ahosi:|| ||
Ye kho keci kāyena du-c-caritaɱ caranti,||
vācāya du-c-caritaɱ caranti,||
manasā du-c-caritaɱ caranti,||
tesaɱ arakkhito attā.|| ||
Kiñ cā pi te hatthikāyo vā rakkheyya,||
assakāyo vā rakkheyya,||
rathakāyo vā rakkheyya,||
pattikāyo [73] vā rakkheyya,||
atha kho tesaɱ arakkhito attā.|| ||
Taɱ kissa hetu?|| ||
Bāhirā hesā rakkhā,||
nesā rakkhā ajjhattikā.|| ||
Tasmā tesaɱ arakkhito attā.|| ||
Ye ca kho keci kāyena su-caritaɱ caranti,||
vācāya su-caritaɱ caranti,||
manasā su-caritaɱ caranti,||
tesaɱ rakkhito attā,||
kiñ cāpi te n'eva hatthikāyo rakkheyya,||
na assakāyo rakkheyya,||
na rathakāyo rakkheyya,||
na pattikāyo rakkheyya,||
atha kho tesaɱ rakkhito attā.|| ||
Taɱ kissa hetu?|| ||
Ajjhattikā hesā rakkhā,||
nesā rakkhā bāhirā.|| ||
Tasmā tesaɱ rakkhito attā" ti.|| ||
■
"Evam etaɱ mahārāja,||
evam etaɱ mahārāja.|| ||
Ye hi keci kāyena du-c-caritaɱ caranti,||
vācāya du-c-caritaɱ caranti,||
manasā du-c-caritaɱ caranti,||
tesaɱ arakkhito attā.|| ||
Kiñ cāpi te hatthikāyo vā rakkheyya,||
assakāyo vā rakkheyya,||
rathakāyo vā rakkheyya,||
pattikāyo vā rakkheyya,||
atha kho tesaɱ arakkhito attā.|| ||
Taɱ kissa hetu?|| ||
Bāhirā hesā mahārāja rakkhā,||
nesā rakkhā ajjhattikā.|| ||
Tasmā tesaɱ arakkhito attā.|| ||
Ye ca kho keci mahārāja kāyena su-caritaɱ caranti,||
vācāya su-caritaɱ caranti,||
manasā su-caritaɱ caranti,||
tesaɱ rakkhito attā,||
kiññāpi te n'eva hatthikāyo rakkheyya,||
na assakāyo rakkheyya,||
na rathakāyo rakkheyya,||
na pattikāyo rakkheyya,||
atha kho tesaɱ rakkhito attā.|| ||
Taɱ kissa hetu?|| ||
Ajjhattikā hesā mahārāja, rakkhā,||
nesā rakkhā bāhirā.|| ||
Tasmā tesaɱ rakkhito attā" ti.|| ||
Kāyena saɱvaro sādhu sādhu vācāya saɱvaro,||
Manasā saɱvaro sādhu sādhu sabbattha saɱvaro,||
Sabbattha saɱvuto lajjī rakkhitoti pavuccatī ti.|| ||
§
Sutta 6
Appakā Suttaɱ
[6.1][pts][than] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Idha mayhaɱ bhante raho-gatassa paṭisallītassa evaɱ cetaso parivitakko udapādi:|| ||
'Appakā te sattā lokasmiɱ ye uḷāre uḷāre bhoge labhitvā||
na c'eva majjanti,||
na ca pamajjanti,||
na ca kāmesu gedhaɱ āpajjanti,||
na ca sattesu vippaṭipajjanti.|| ||
Atha kho ete va bahutarā sattā lokasmiɱ ye uḷāre uḷāre bhoge labhitvā majjanti c'eva pamajjanti [74] ca,||
kāmesu ca gedhaɱ āpajjanti,||
sattesu ca vippaṭipajjantī" ti.|| ||
■
Evam etaɱ mahārāja, evam etaɱ mahārāja,||
appakā te mahārāja sattā lokasmiɱ ye uḷāre uḷāre bhoge labhitvā na c'eva majjanti,||
na ca pamajjanti,||
na ca kāmesu gedhaɱ āpajjanti,||
na ca sattesu vippaṭipajjanti.|| ||
Atha kho ete va bahutarā sattā lokasmiɱ ye uḷāre uḷāre bhoge labhitvā majjanti c'eva pamajjanti ca, kāmesu ca gedhaɱ āpajjanti,||
sattesu ca vippaṭipajjantī" ti.|| ||
Sārattā kāma-bhogesu giddhā kāmesu mucchitā,||
Atisāraɱ na bujjhanti migā kūṭaɱva oḍḍitaɱ,||
Pacchāsaɱ kaṭukaɱ hoti vipāko hi'ssa pāpakoti.|| ||
§
Sutta 7
Atthakaraṇa Suttaɱ
[7.1][pts][than] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Idh'āhaɱ bhante atthakaraṇe nisinno passāmi khattiya-mahāsāle pi brāhmaṇa-mahāsāle pi gahapati-mahāsāle pi aḍḍhe mah-addhane mahā bhoge pahūta-jāta-rūpa-rajate pahūtavittūpakaraṇe pahūtadhana-dhaññe kāmahetu kāma-nidānaɱ kāmādhikaraṇaɱ sampajānamusā bhāsante.|| ||
Tassa mayhaɱ bhante etad ahosi:|| ||
'Alan-dāni me atthakaraṇena,||
bhadramukhodāni atthakaraṇe na paññāyissatī'" ti.|| ||
■
"Ye pi te mahārāja khattiya-mahā-sālā brāhmaṇa-mahā-sālā gahapati mahā-sālā aḍḍhā maha-d-dhanā mahā-bhogā pahūta-jāta-rūpa-rajatā pahūtavittūpakaraṇā pahūta-dhana-dhaññā kāmahetu kāma-nidānaɱ kāmādhikaraṇaɱ sampajānamusā bhāsanti,||
tesaɱ taɱ bhavissati dīgha-rattaɱ ahitāya dukkhāyā" ti.|| ||
Sārattā kāma-bhogesu giddhā kāmesu mucchitā,||
Atisāraɱ na bujjhanti macchā khipaɱ va oḍḍhitaɱ,||
Pacchāsaɱ kaṭukaɱ hoti vipāko hi'ssa pāpako.|| ||
§
Sutta 8
Mallikā Suttaɱ
[8.1][pts] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Tena kho pana samayena Rājā Pasenadi Kosalo Mallikāya deviyā saddhiɱ uparipāsādavaragato hoti.|| ||
Atha kho Rājā Pasenadi Kosalo Mallikaɱ deviɱ etad avoca:|| ||
"Atthi nu kho te Mallike ko cañño attanā piyataro" ti?|| ||
"N'atthi kho me mahārāja ko cañño attanā piyataro.|| ||
Tuyhaɱ pana mahārāja atthañño koci attanā piyataro" ti?|| ||
"Mayham pi kho Mallike n'atthi añño koci attanā piyataro" ti.|| ||
Atha kho Rājā Pasenadi Kosalo pāsādā orohitvā1 yena Bhagavā ten'upasankami.|| ||
Upasaŋkamitvā Bhagavantaɱ abhivādetvā eka-m-antaɱ nisīdi.|| ||
Eka-m-antaɱ nisinno kho Rājā Pasenadi Kosalo Bhagavantaɱ etad avoca:|| ||
"Idh'āhaɱ bhante Mallikāya deviyā saddhiɱ uparipāsādavaragato Mallikaɱ deviɱ etad avocaɱ:|| ||
'Atthi nu kho te Mallike ko cañño attanā piyataro' ti?|| ||
Evaɱ vutte bhante Mallikādevī maɱ etad avoca:|| ||
'N'atthi kho me mahārāja ko cañño attanā piyataro.|| ||
Tuyhaɱ pana mahārāja atthañño koci attanā piyataro' ti?|| ||
Evaɱ vuttāhaɱ bhante Mallikaɱ deviɱ etad avocaɱ:|| ||
'Mayham pi kho Mallike n'atthi añño koci attanā piyataro'" ti.|| ||
Atha kho Bhagavā etam atthaɱ viditvā tāyaɱ velāyaɱ imaɱ gāthaɱ abhāsi:|| ||
Sabbā disā anuparigamma cetasā||
N'evajjhagā piyataramattanā kvaci,||
Evaɱ piyo puthu attā paresaɱ||
Tasmā na hiɱse paraɱ attakāmoti.|| ||
§
Sutta 9
Yañña Suttaɱ
[9.1][pts] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Tena kho pana samayena rañño Pasenadissa Kosalassa mahāyañño pacc'upaṭṭhito hoti.|| ||
Pañca ca usabha-satāni pañca ca vacchatara-satāni pañca ca vacchatarī-satāni pañca [76] ca aja-satāni pañca ca urabbha-satāni thūṇupanītāni honti yaññ'atthāya.|| ||
Ye pissa te honti dāsāti vā pessāti vā kamma-karāti vā te pi daṇḍatajjitā bhayatajjitā assumukhā rudamānā parikammāni karontī ti.|| ||
Atha kho sambahulā bhikkhū pubbaṇha-samayaɱ nivāsetvā patta-cīvaraɱ ādāya Sāvatthiyaɱ piṇḍāya pavisiɱsu.|| ||
Sāvatthiyaɱ piṇḍāya caritvā pacchā-bhattaɱ piṇḍa-pāta-paṭikkantā yena Bhagavā ten'upasankamiɱsu.|| ||
Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||
Eka-m-antaɱ nisinnā kho te bhikkhū Bhagavantaɱ etad avocuɱ:|| ||
"Idha bhante, rañño Pasenadissa Kosalassa mahāyañño pacc'upaṭṭhito hoti, pañca ca usabha-satāni pañca ca vacchatara-satāni pañca ca vacchatarī-satāni pañca ca aja-satāni pañca ca urabbha-satāni thūṇūpanītāni honti yaññ'atthāya.|| ||
Yepissa bhante te honti dāsāti vā pessāti vā kamma-karāti vā te pi daṇḍatajjitā bhayatajjitā assumukhā rudamānā parikammāni karontī" ti.|| ||
Atha kho Bhagavā etam atthaɱ viditvā tāyaɱ velāyaɱ imā gāthāyo abhāsi:|| ||
Assamedhaɱ purisamedhaɱ sammāpāsaɱ vājapeyyaɱ niraggalaɱ,||
Mahāyaññā mahārambhā na te honti maha-p-phalā.|| ||
Ajeḷakā ca gāvo ca vividhā yattha haññare,||
Na taɱ samm'aggatā yaññaɱ upayanti mahesino.|| ||
Ye ca yaññā nirārambhā yajanti anukulaɱ sadā,||
ajeḷakā ca gāvo ca vividhā nettha haññare|| ||
Etaɱ samm'aggatā yaññaɱ upayanti mahesino,||
Etaɱ yajetha medhāvī eso yañño maha-p-phalo.|| ||
Etaɱ hi yajamānassa seyyo hoti na pāpiyo,||
Yañño ca vipulo hoti pasīdanti ca devatāti.|| ||
§
Sutta 10
Bandhana Suttaɱ
[10.1][pts] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||
Tena kho pana samayena raññā Pasenadi kosalena mahā-jana-kāyo bandhāpito hoti,||
appekacce rajjuhi appekacce andūhi appekacce saŋkhalikāhi.|| ||
[77] Atha ko sambahulā bhikkhū pubbaṇha-samayaɱ nivāsetvā patta-cīvaraɱ ādāya Sāvatthiɱ piṇḍāya pavisiɱsu.|| ||
Sāvatthiyaɱ piṇḍāya caritvā pacchā-bhattaɱ piṇḍa-pāta-paṭikkantā yena Bhagavā ten'upasankamiɱsu.|| ||
Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||
Eka-m-antaɱ nisinnā kho te bhikkhū Bhagavantaɱ etad avocuɱ:|| ||
"Idha bhante raññā Pasenadikosalena mahā-jana-kāyo bandhāpito appekacce rajjuhi appekacce andūhi appekacce saŋkhalīkāhī" ti.|| ||
Atha kho Bhagavā etam atthaɱ viditvā tāyaɱ velāyaɱ imā gāthāyo abhāsi:|| ||
Na taɱ daḷhaɱ bandhanamāhu dhīrā||
Yadāyasaɱ dārujaɱ babbajañca,||
Sārattarattā maṇikuṇḍalesu||
Puttesu dāresu ca yā apekkhā.|| ||
Etaɱ daḷhaɱ bandhanamāhu dhīrā||
Ohārinaɱ sithilaɱ duppamuñcaɱ,||
Etam pi chetvāna paribbajanti||
Anapekkhino kāma sukhaɱ pahāyāti.|| ||
Bandhana Vagga Paṭhama
