Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 


Saɱyutta Nikaya:
Sagathavagga:

Vaŋgīsa-Thera-Saɱyutta

Suttas 1-12

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

Sutta 1

Nikkhanta Suttaɱ

[1.1][pts] Evaɱ me sutaɱ.|| ||

Ekaɱ samayaɱ āyasmā Vaŋgīso Āḷaviyaɱ viharati Aggāḷave cetiye āyasmatā Nigrodha-Kappena upajjhāyena saddhiɱ.|| ||

2. Tena kho pana samayena āyasmā Vaŋgīso navako hoti acirapabbajito ohiyyako vihārapālo.|| ||

3. Atha kho sambahulā itthiyo samalaŋkaritvā yen'Aggāḷavako ārāmo ten'upasaŋkamiɱsu vihārapekkhikāyo.|| ||

4. Atha kho āyasmato Vaŋgīsassa tā itthiyo disvā anabhirati uppajjati,||
rāgo cittaɱ anuddhaɱseti.|| ||

5. Atha kho āyasmato Vaŋgīsassa etad ahosi:|| ||

Alābhā vata me,||
na vata me lābhā.|| ||

Dulladdhaɱ vata me,||
na vata me suladdhaɱ.|| ||

Yassa me anabhirati uppannā,||
rāgo cittaɱ anuddhaɱseti.|| ||

Taɱ kut'ettha labbhā yam me paro anabhiratiɱ vinodatvā abhiratiɱ uppādeyya.|| ||

Yaɱ nūnāhaɱ attanā va attano anabhiratiɱ vinodetvā abhiratiɱ uppādeyyan ti.|| ||

6. Atha kho āyasmā Vaŋgīso attanā va attano anabhiratiɱ vinodetvā abhiratiɱ uppādetvā tāyaɱ yelāyaɱ imā gāthāyo abhāsi.|| ||

Nikkhantaɱ vata maɱ santaɱ agārasmā nagāriyaɱ,||
Vitakkā upadhāvanti pagabbhā kaṇhato ime.||
Uggaputtā mahissāsā sikkhitā daḷhadhammino,||
Samantā parikireyyuɱ sahassaɱ apalāyinaɱ.||
Sace pi ettato bhiyyo āgamissanti itthiyo,||
N'eva maɱ vyādhayissanti dhamme s'amhi patiṭṭhito.||
Sakkhī hi me sutaɱ etaɱ Buddhass'ādiccabandhuno,||
Nibbāṇagamanaɱ maggaɱ tattha me nirato mano.||
Evañ ce maɱ viharantaɱ pāpimaɱ upagacchasi,||
Tathā maccu karissāmi na me maggam pi dakkhisī ti.|| ||

 

§

 

Sutta 2

Arati Suttaɱ

[2.1][pts] Evaɱ me sutaɱ.|| ||

2. Ekaɱ samayaɱ āyasmā Vaŋgīso Āḷaviyaɱ viharati Aggāḷave cetiye āyasmatā Nigrodha-Kappena upajjhāyena saddhiɱ.|| ||

3. Tena kho pana samayena āyasmā Nigrodha-Kappo pacchābhattaɱ piṇḍapātapaṭikkanto vihāraɱ pavisati.|| ||

Sāyaɱ vā nikkhamati aparajju vā kāle.|| ||

4. Tena kho pana samayena āyasmato Vaŋgīsassa anabhirati uppannā hoti,||
rāgo cittaɱ anuddhaɱseti.|| ||

5. Atha kho āyasmato Vaŋgīsassa etad ahosi:|| ||

Alābhā vata me,||
na vata me lābhā.|| ||

Dulladdhaɱ vata me,||
na vata me suladdhaɱ.|| ||

Yassa me anabharati uppannā,||
rāgo cittaɱ anuddhaɱseti.|| ||

Taɱ kut'ettha labbhā yaɱ me paro anabhiratiɱ vinodetvā abhiratiɱ uppādeyyan ti.|| ||

Yaɱ nūnāhaɱ attanā va attano anabhiratiɱ vinodetvā abhiratiɱ uppādeyyan ti.|| ||

6. Atha kho āyasmā Vaŋgīso attanā va attano anabhiratiɱ vinodetvā abhiratiɱ uppādetvā tāyaɱ velāyaɱ imā gāthāyo abhāsi:|| ||

Aratiñ ca ratiñ ca pahāya||
sabbaso gehasitañ ca vitakkaɱ,||
Vanathaɱ na kareyya kuhiñci||
nibbanatho anato sa hi bhikkhu.||
Yam idha puthuviñ ca vehāsaɱ||
rūpagatañ ca jagatogadhaɱ,||
Kiñci parijīyati sabbam aniccaɱ||
evaɱ samecca caranti mutattā.||
Upadhīsu janā gadhitā||
diṭṭhasute paṭighe ca mute ca,||
Ettha vinodaya chandam anejo||
yo tattha na limpati taɱ munim āhu.||
Atha saṭṭhitasitā vitakkā||
puthujanatāya adhammā niviṭṭhā,||
Na ca vaggagat'assa kuhiñci||
no pana duṭṭhullabhāṇī sa bhikkhu.||
Dabbo cirarattasamāhito||
akuhako nipako apihālu,||
Santapadaɱ ajjhagamā muni||
paṭicca parinibbuto kaŋkhati kālan ti.|| ||

 

§

 

Sutta 3

Pesalaatimaññanā Suttaɱ

[3.1][pts] Evaɱ me sutaɱ.|| ||

Ekaɱ samayaɱ āyasmā Vaŋgīso Āḷaviyaɱ viharati Aggāḷave cetiye āyasmatā Nigrodha-Kappena upajjhāyena saddhiɱ.|| ||

2. Tena kho pana samayena āyasmā Vaŋgīso attano paṭibhāṇena aññe pesale bhikkhū atimaññati.|| ||

3. Atha kho āyasmato Vaŋgīsassa etad ahosi:|| ||

Alābhā vata me,||
na vata me lābhā.|| ||

Dulladdhaɱ vata me,||
na vata me suladdhaɱ.|| ||

Yvāhaɱ attano paṭibhāṇena aññe pesale bhikkhū atimaññāmī ti.|| ||

4. Atha kho āyasmā Vaŋgīso attanā va attano vippaṭisāraɱ uppādetvā tāyaɱ velāyaɱ imā gāthāyo abhāsi:|| ||

Mānaɱ pajahassu Gotama,||
mānapathañ ca jahassu asesaɱ||
mānapathasmiɱ samucchito||
vippaṭisār'ahuvā cirarattaɱ.||
Makkhena makkhitā pajā||
mānahatā Nirayaɱ papatanti,||
Socanti janā cirarattaɱ||
mānagatā Nirayaɱ upapannā||
Na hi socati bhikkhu kadāci||
maggajino sammāpaṭipanno,||
Kittiñ ca sukhañ c'anubhoti||
dhammaarato ti tam āhu tathattaɱ.||
Tasmā akhilo'dha padhānavā||
nīvaraṇāni pahāya visuddho,||
Mānañ ca pahāya asesaɱ||
vijjāy'antakaro samitāvī ti.|| ||

 

§

 

Sutta 4

Ānanda Suttaɱ

[4.1][pts][ati] Evaɱ me sutaɱ.|| ||

Ekaɱ samayaɱ āyasmā Ānando Sāvatthīyaɱ viharati Jetavane Anāthapiṇḍikassa ārāme.|| ||

2. Atha kho āyasmā Ānando pubbaṇhasamayaɱ nivāsetvā pattacīvaram ādāya Sāvatthīɱ piṇḍāya pāvisi āyasmatā Vaŋgīsena pacchāsamaṇena.|| ||

3. Tena kho pana samayena āyasmato Vaŋgīsassa anabhirati uppannā hoti,||
rāgo cittaɱ anuddhaɱseti.|| ||

4. Atha kho āyasmā Vaŋgīso āyasmantaɱ Ānandaɱ gāthāya ajjhabhāsi:|| ||

Kāmarāgena ḍayhāmi cittaɱ me pariḍayhati,||
Sādhu nibbāpanaɱ brūhi anukampāya Gotamā ti.|| ||

[Ānando:]|| ||

Saññāya vipariyesā cittaɱ te pariḍayhati,||
Nimittaɱ parivajjehi subhaɱ rāgūpasaɱhitaɱ.||
Sankhāre parato passa dukkhato mā ca attato,||
Nibbāpehi mahārāgaɱ mā ḍayhittho punappunaɱ.||
Asubhāya cittaɱ bhāvehi ekaggaɱ susamāhitaɱ,||
Sati kāyagatā ty atthu nibbidābahulo bhava.||
Animittaɱ ca bhāvehi mānānusayam ujjaha,||
Tato mānābhisamayā upasanto carissasī ti.|| ||

 

§

 

Sutta 5

Subhāsita Suttaɱ

[5.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhū āmantesi:|| ||

'Bhikkhavo' ti!|| ||

3. 'Bhadante' ti te bhikkhū Bhagavato paccassosuɱ.|| ||

4. Bhagavā etad avoca:|| ||

Catuhi bhikkhave aŋgehi samannāgatā vācā subhāsitā hoti na dubbhāsitā anavajjā ca,||
ananuvajjā ca viññūnaɱ.|| ||

Katamehi catuhi?|| ||

5. Idha, bhikkhave, bhikkhū subhāsitaɱ yeva bhāsati no dubbhāsitaɱ.|| ||

Dhammaɱ yeva bhāsati no adhammaɱ.|| ||

Piyaɱ yeva bhāsati no appiyaɱ.|| ||

Saccaɱ yeva bhāsati no alikaɱ.|| ||

Imehi kho bhikkhave catūhi aŋgehi samannāgatā vācā subhāsitā hoti no dubbhāsitā anavajjā ca ananuvajjā ca viññūnan ti.|| ||

6. Idam avoca Bhagavā.|| ||

Idaɱ vatvāna Sugato athāparaɱ etad avoca satthā:|| ||

Subhāsitaɱ uttamam āhu santo||
dhammaɱ bhaṇe nādhammaɱ taɱ dutiyaɱ,||
Piyaɱ bhaṇe nāppiyaɱ taɱ tatiyaɱ||
sacchaɱ bhaṇe nālikaɱ taɱ catutthan ti.|| ||

7. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Paṭibhāti maɱ Bhagavā paṭibhāti maɱ Sugatā ti.|| ||

8. Paṭibhātu taɱ Vaŋgīsā ti Bhagavā avoca.|| ||

9. Atha kho āyasmā Vaŋgīso Bhagavantaɱ sammukhā sarūpāhi gāthāhi abhitthavi:|| ||

Tam eva vācaɱ bhāseyya yāy'attānaɱ na tāpaye,||
Pare ca na vihiɱseyya sā ve vācā subhāsitā||
Piyavācaɱ va bhāseyya yā vācā paṭinanditā,||
Yaɱ anādāya pāpāni paresaɱ bhāsate piyaɱ.||
Saccaɱ ve amatā vācā esa dhammo sanantano,||
Sacce atthe ca dhamme ca āhu santo patiṭṭhitā.||
Yaɱ Buddho bhāsate vācaɱ khemaɱ nibbāṇapattiyā,||
Dukkhass'antakiriyāya sā ve vācānam uttamā ti.|| ||

 

§

 

Sutta 6

Sāriputta Suttaɱ

[6.1][pts] Evaɱ me sutaɱ.|| ||

Ekaɱ samayaɱ āyasmā Sāriputto Sāvatthīyaɱ viharati Jetavane Anāthapiṇḍikassa ārāme.|| ||

2. Tena kho pana samayena āyasmā Sāriputto bhikkhū dhammiyā kathāya sandasseti samādapeti samuttejeti sampahaɱseti poriyā vācāya vissaṭṭhāya anelagaḷāya atthassa viññāpaniyā.|| ||

Te ca bhikkhū aṭṭhikatvā manasikatvā sabbacetaso samannāharitvā ohitasotā dhammaɱ suṇanti.|| ||

3. Atha kho ayasmato Vaŋgīsassa etad ahosi:|| ||

Ayaɱ kho āyasmā Sāriputto bhikkhū dhammiyā kathāya sandasseti samādapeti samuttejeti sampahaɱseti poriyā vācāya visaṭṭhāya anelagaḷāya atthassa viññāpaniyā.|| ||

Te ca bhikkhū aṭṭhikatvā manasikatvā sabbacetaso samannāharitvā ohitasotā dhammaɱ suṇanti.|| ||

Yaɱ nūnāhaɱ āyasmantaɱ Sāriputtaɱ sammukhā sarūpāhi gāthāhi abhitthaveyyan ti.|| ||

4. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yen'āyasmā Sāriputto tenañjaliɱ paṇāmetvā āyasmantaɱ Sāriputtaɱ etad avoca:|| ||

Paṭibhāti maɱ āvuso Sāriputta,||
paṭibhāti maɱ āvuso Sāriputtā ti.|| ||

5. Paṭibhātu taɱ āvuso Vaŋgīsā ti.|| ||

6. Atha kho āyasmā Vaŋgīso āyasmantaɱ Sāriputtaɱ sammukhā sarūpāhi gāthāhi abhitthavi:|| ||

Gambhirapañño medhāvī maggāmaggassa kovido,||
Sāriputto mahāpañño dhammaɱ deseti bhikkhunaɱ.||
Saŋkhittena pi deseti vitthārena pi bhāsati,||
Sālikāy'iva nigghoso paṭibhānaɱ udīrayi.||
Tassa taɱ desayantassa suṇanti madhuraɱ giraɱ,||
Sarena rajanīyena savaṇīyena vaggunā,||
Udaggacittā muditā sotaɱ odhenti Bhikkhavo ti.|| ||

 

§

 

Sutta 7

Pavāraṇa Suttaɱ

[7.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthīyaɱ viharati Pubbārāme Migāramātupāsāde mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi.|| ||

2. Tena kho pana samayena Bhagavā tadahuposathe paṇṇarase pavāraṇāya bhikkhu-saŋgharivuto ajjhokāse nisinno hoti.|| ||

3. Atha kho Bhagavā tuṇhībhūtaɱ bhikkhu-saŋghaɱ anuviloketvā bhikkhū āmantesi:|| ||

4. Handa dāni bhikkhave, pavārayāmi vo na ca me kiñci garahatha kāyikaɱ vā vācasikaɱ vā ti.|| ||

5. Evaɱ vutte āyasmā Sāriputto uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Na kho mayaɱ bhante,||
Bhagavato kiñci garahāma kāyikaɱ vā vācasikaɱ vā.|| ||

Bhagavā hi bhante,||
anuppannassa maggassa uppādetā||
asañjātassa maggassa sañjanetā,||
anakkhātassa maggassa akkhātā||
maggaññū||
maggavidū||
maggakovido||
maggānugā ca bhante,||
etarahi sāvakā viharanti pacchā samannāgatā.|| ||

Ahaɱ ca kho bhante,||
Bhagavantaɱ pavāremi||
na ca me Bhagavā kiñci garahati kāyikaɱ vā vācasikaɱ vā ti.|| ||

6. Na khvāhaɱ te Sāriputta kiñci garahāmi kāyikaɱ vā vācasikaɱ vā.|| ||

Paṇḍito tvaɱ Sāriputta,||
mahāpañño tvaɱ Sāriputta,||
puthupañño tvaɱ Sāriputta,||
hāsapañño tvaɱ Sāriputta,||
javanapañño tvaɱ Sāriputta,||
tikkhapañño tvaɱ Sāriputta,||
nibbedhikapañño tvaɱ Sāriputta.|| ||

Seyyathā pi Sāriputta,||
rañño cakkavattissa jeṭṭhaputto pitarā pavattitaɱ cakkaɱ samma-d-eva anuppavatteti.|| ||

Evam eva kho tvaɱ Sāriputta mayā anuttaraɱ dhammacakkaɱ pavattitaɱ samma-d-eva anuppavattesī ti.|| ||

7. No ce kira me bhante Bhagavā kiñci garahati kāyikaɱ vā vācasikaɱ vā.|| ||

Imesam pana bhante Bhagavā pañcannaɱ bhikkhusatānaɱ na kiñci garahati kāyikaɱ vā vācasikaɱ vā ti.|| ||

8.Imesam pi khvāhaɱ Sāriputta pañcannaɱ bhikkhusatānaɱ na kiñci garahāmi kāyikaɱ vā vācasikaɱ vā.|| ||

Imesaɱ pi Sāriputta pañcannaɱ bhikkhusatānaɱ saṭṭhi bhikkhū tevijjā,||
saṭṭhi bhikkhū chaḷabhiññā,||
saṭṭhi bhikkhū ubhato bhāgavimuttā||
atha itare paññāvimuttā ti.|| ||

9. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

10. Paṭibhāti maɱ Bhagavā
paṭibhāti maɱ Sugatā ti.|| ||

11. Paṭibhātu taɱ Vaŋgīsā ti Bhagavā avoca.|| ||

12. Atha kho āyasmā Vaŋgīso Bhagavantaɱ sammukhā sarūpāhi gāthāhi abhitthavi:|| ||

Ajja paṇṇarase visuddhiyā||
bhikkhū-pañca-satā samāgatā,||
Saɱyojanabandhanacchidā||
anīghā khīṇapunabbhavā isī.||
Cakkavattī yathā rājā amaccaparivārito,||
Samantā anupariyeti sāgarantaɱ mahiɱ imaɱ.||
Evaɱ vijitasaŋgāmaɱ satthavāhaɱ anuttaraɱ,||
Sāvakā payirupāsanti tevijjā maccubhāyino.||
Sabbe Bhagavato puttā palāp'ettha na vijjati,||
Taṇhāsallassa hantāraɱ vande ādiccabandhunan ti.|| ||

 

§

 

Sutta 8

Parosahassa Suttaɱ

[8.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme mahatā bhikkhu-saŋghena saddhiɱ aḍḍhatelasehi bhikkhu-satehi.|| ||

2. Tena kho pana samayena Bhagavā bhikkhū nibbāṇa-paṭisaŋyuttāya dhammiyā kathāya sandasseti samādapeti samuttejeti sampahaɱseti.|| ||

Te ca bhikkhū aṭṭhikatvā manasikatvā sabbacetaso samannāharitvā ohitasotā dhammaɱ suṇanti.|| ||

3. Atha kho āyasmato Vaŋgīsassa etad ahosi:

Ayaɱ kho Bhagavā bhikkhū nibbāṇa-paṭisaŋyuttāya dhammiyā kathāya sandasseti samādapeti samuttejeti sampahaɱseti.|| ||

Te ca bhikkhū aṭṭhikatvā manasikatvā sabbacetaso samannāharitvā ohitasotā dhammaɱ suṇanti.|| ||

Yaɱ nūnāhaɱ Bhagavantaɱ sammukhā sarūpāhi gāthāhi abhitthaveyyan ti.|| ||

4. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjalim paṇāmetvā Bhagavantaɱ etad avoca:|| ||

Paṭibhāti maɱ Bhagavā,||
paṭibhāti maɱ Sugatā ti.|| ||

5. Paṭibhātu taɱ Vaŋgīsā ti Bhagavā avoca.|| ||

6. Atha kho āyasmā Vaŋgīso Bhagavantaɱ sammukhā sarūpāhi gāthāhi abhitthavi:|| ||

Parosahassaɱ bhikkhūnaɱ Sugataɱ payirupāsati,||
Desentaɱ virajaɱ dhammaɱ nibbāṇaɱ akutobhayaɱ.||
Suṇanti dhammaɱ vimalaɱ sammā-sambuddhadesitaɱ,||
Sobhati vata sambuddho bhikkhu-saŋghapurakkhato.||
Nāganāmo'si Bhagavā isīnaɱ isisattamo,||
Mahāmegho va hutvāna sāvake abhivassati,||
Divāvihārā nikkhamma satthudassanakamyatā,||
Sāvako te mahāvīra pāde vandati Vaŋgīso ti.|| ||

7. Kin nu te Vaŋgīsa imā gāthāyo pubbe parivitakkitā udāhu ṭhānaso va taɱ paṭibhantī ti?|| ||

8. Na kho me bhante imā gāthāyo pubbe parivitakkitā atha kho ṭhānaso va maɱ paṭibhantī ti.|| ||

9. Tena hi taɱ Vaŋgīsa bhīyosomattāya pubbe aparivitakkitā gāthāyo paṭibhantū ti.|| ||

10. Evaɱ bhante ti kho āyasmā Vaŋgīso Bhagavato paṭissutvā bhīyosomattāya Bhagavantaɱ pubbe aparivitakkāhi gāthāhi abhitthavi:|| ||

Ummaggapathaɱ Mārassa abhibhuyya||
carasi pabhijja khilāni,||
Taɱ passatha bandhapamuñcakaraɱ||
asitaɱ bhāgaso pavibhajjaɱ.||
Oghassa hi nittharaṇ'-atthaɱ||
aneka-vihitaɱ maggaɱ akkhāsi,||
Tasmiɱ te amate akkhāte||
dhammaddasā ṭhitā asaɱhīrā.||
Pajjotakaro ativijjha||
sabbaṭṭhitīnaɱ atikkamam addasa,||
ñatvā ca sacchikatvā ca||
aggaɱ so desayi dasaṭṭhānaɱ||
Evaɱ sudesite dhamme||
ko pamādo vijānataɱ dhammaɱ,||
Tasmā hi tassa Bhagavato sāsane||
appamatto sadā namassam anusikkhe ti.|| ||

 

§

 

Sutta 9

Koṇḍañña Suttaɱ

[9.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane kalaṇḍaka nivāpe.|| ||

2. Atha kho āyasmā Aññāsi-Koṇḍañño sucirass'eva yena Bhagavā ten'upasaŋkami.|| ||

Upasaŋkamitvā Bhagavato pādesu sirasā nipatitvā Bhagavato pādāni mukhena ca paricumbati.|| ||

Pāṇīhi ca parisambāhati.|| ||

Nāmañ ca sāveti:|| ||

"Koṇḍañño'haɱ Bhagavā||
koṇḍañño'haɱ Sugatā" ti.|| ||

3. Atha kho āyasmato Vaŋgīsassa etad ahosi:|| ||

Ayaɱ kho āyasmā Aññāsi-Koṇḍañño sucirass'eva yena Bhagavā ten'upasaŋkami.|| ||

Upasaŋkamitvā Bhagavato pādesu sirasā nipatitvā Bhagavato pādāni mukhena ca paricumbati.|| ||

Pāṇīhi ca parisambāhati.|| ||

Nāmañ ca sāveti:|| ||

"Koṇḍañño'haɱ Bhagavā||
koṇḍañño'haɱ sugatā" ti.|| ||

Yaɱ nūnāhaɱ āyasmantaɱ Aññāsi-Koṇḍaññaɱ Bhagavato sammukhā sarūpāhi gāthāhi abhitthaveyyan ti.|| ||

4. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Paṭibhāti maɱ Bhagavā
paṭibhāti maɱ Sugatā ti.|| ||

5. Paṭibhātu taɱ Vaŋgīsā ti Bhagavā āvoca.|| ||

6. Atha kho āyasmā Vaŋgīso āyasmantaɱ Aññāsi-Koṇḍaññaɱ Bhagavato sammukhā sarūpāhi gāthāhi abhitthavi:|| ||

Buddhānubuddho so thero Koṇḍaññā tibbanikkamo,||
Lābhī sukhavihārānaɱ vivekānaɱ abhiṇhaso.||
Yaɱ sāvakena pattabbaɱ satthusāsanakārinā,||
Sabb'assa taɱ anuppattaɱ appamattassa sikkhato.||
Mahānubhāvo tevijjo cetopariyāyakovido,||
Koṇḍañño Buddhadāsāvako pāde vandati satthuno ti.|| ||

 

§

 

Sutta 10

Moggallāna Suttaɱ

[10.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Isigilipasse Kāḷasilāyaɱ mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi.|| ||

Tesaɱ sudaɱ āyasmā Mahā-Moggallāno cetasā cittaɱ samannesati vippamuttaɱ nirupadhiɱ.|| ||

2. Atha kho āyasmato Vaŋgīsassa etad ahosi:|| ||

Ayaɱ kho Bhagavā Rājagahe viharati Isigilipasse Kāḷasilāyaɱ mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi.|| ||

Tesaɱ sudaɱ āyasmā Mahā-Moggallāno cetasā cittaɱ samannesati vippamuttaɱ nirupadhiɱ.|| ||

Yaɱ nūnāhaɱ āyasmantaɱ Mahā-Moggallānaɱ Bhagavato sammukhā sarūpāhi gāthāhi abhitthaveyyan ti.|| ||

3. Atha kho āyasmā Vaŋgīso uṭṭhāy'āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Paṭibhāti maɱ Bhagavā
paṭibhāti maɱ Sugatā ti.|| ||

4. Paṭibhātu taɱ Vaŋgīsā ti Bhagavā avoca.|| ||

5. Atha kho āyasmā Vaŋgīso āyasmantaɱ Mahā-Moggallānaɱ Bhagavato sammukhā sarūpāhi gāthāhi abhitthavi:|| ||

Nagassa passe āsīnaɱ muniɱ dukkhassa pāraguɱ,||
Sāvakā payirupāsanti tevijjā maccuhāyino.||
Te cetasā anupariyeti Moggallāno mahiddhiko,||
Cittaɱ n'esaɱ samann'esaɱ vippamuttaɱ nirūpadhiɱ.||
Evaɱ sabbaŋgasamnnaɱ muniɱ dukkhassa pāraguɱ,||
Anekākārasampannaɱ payirupāsanti Gotaman ti.|| ||

 

§

 

Sutta 11

Gaggarā Suttaɱ

[11.1][pts] Evaɱ me sutaɱ.|| ||

Ekaɱ samayaɱ Bhagavā Campāyaɱ viharati Gaggarāya pokkharaṇiyā tīre mahatā bhikkhu-saŋghena saddhiɱ pañca-mattehi bhikkhu-satehi sattahi ca upāsakasatehi sattahi ca upāsikāsatehi anekehi ca devatāsahassehi.|| ||

Tyāssudaɱ Bhagavā atirocati vaṇṇena c'eva yasasā ca.|| ||

2. Atha kho āyasmato Vaŋgīsassa etad ahosi:|| ||

Ayaɱ kho Bhagavā Campāyaɱ viharati Gaggarāya pokkharaṇiyā tīre mahatā bhikkhu-saŋghena saddhiɱ pañca-mattehi bhikkhu-satehi sattahi ca upāsakasatehi sattahi ca upāsikāsatehi anekehi devatāsahassehi.|| ||

Tyāssudaɱ Bhagavā atirocati vaṇṇena c'eva yasasā ca.|| ||

Yaɱ nūnāhaɱ Bhagavantaɱ sammukhā sarūpāya gāthāya abhitthaveyyan ti.|| ||

3. Atha kho āyasmā Vaŋgīso uṭṭhāy āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Paṭibhāti maɱ Bhagavā||
paṭibhāti maɱ sugatāti.|| ||

4. Paṭibhātu taɱ Vaŋgīsā ti Bhagavā avoca.|| ||

5. Atha kho āyasmā Vaŋgīso Bhagavato sammukhā sarūpāya gāthāya abhitthavi:|| ||

Cando yathā vigatavalāhake nabhe||
Virocati vītamalo va bhāṇumā,||
Evam pi Aŋgīrasa tvaɱ mahāmuni||
Atirocasi yasasā sabbalokan ti.|| ||

 

§

 

Sutta 12

Vaŋgīsa Suttaɱ

[12.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

2. Tena kho pana samayena āyasmā Vaŋgīso acira-arahattappatto hoti vimuttisukha-paṭisaŋvedī.|| ||

Tāyaɱ velāyaɱ imā gāthāyo abhāsi:|| ||

Kāveyyamattā vicarimha pubbe gāmā gāmaɱ purā puraɱ,||
Ath'addasāma sambuddhaɱ saddhā no udapajjatha||
So me dhammam adesesi khandhe āyatāni dhātuyo ca,||
Tassāhaɱ dhamamaɱ sutvāna pabbajiɱ anagāriyaɱ.||
Bahunnaɱ vata atthāya bodhiɱ ajjhagamā muni,||
Bhikkhūnaɱ bhikkhunīnañ ca ye niyāmagataddasā.||
Svāgataɱ vata me āsi mama Buddhassa santike,||
Tisso vijjā anuppattā kataɱ Buddhassa sāsanan ti.||
Pubbenivāsaɱ jānāmi dibbacakkhuɱ visodhitaɱ||
Tevijjo iddhippatto'mhi cetopariyāya kovido ti.|| ||

Vaŋgīsavaggo paṭhamo

 


Contact:
E-mail
Copyright Statement   Webmaster's Page