Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 


Saɱyutta Nikaya:
Sagathavagga:

Yakkha Saɱyutta

Suttas 1-12

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

Sutta 1

Indaka Suttaɱ

[1.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Indakuṭe pabbate Indakassa yakkhassa bhavane.|| ||

2. Atha kho Indako yakkho yena Bhagavā ten'upasaŋkami.|| ||

Upasaŋkamitvā Bhagavantaɱ gāthāya ajjhabhāsi:|| ||

Rūpaɱ na jīvan ti vadanti buddhā||
kathaɱ nv ayaɱ vindat imaɱ sarīraɱ,||
Kut'assa aṭṭhiyakapiṇḍam eti||
kathaɱ nv ayaɱ sajjati gabbharasmin ti.|| ||

3. [Bhagavā:]

Paṭhamaɱ kalalaɱ hoti kalalā hoti abbudaɱ,||
Abbudā jāyate pesī pesī nibbattati ghano,||
Ghanā pasākhā jāyanti kesā lomā nakhāni ca.||
Yaṇ c'assa bhuñjate mātā annaɱ pānañ ca bhojanaɱ,||
Tena so tattha yāpeti mātukucchigato naro ti.|| ||

 

§

 

Sutta 2

Sakka Suttaɱ

[2.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Gijjhakūṭe pabbate.|| ||

2. Atha kho Sakkanāmako yakkho yena Bhagavā ten'upasaŋkami.|| ||

Upasaŋkamitvā Bhagavantaɱ gāthāya ajjhabhāsi:|| ||

Sabbaganthapahīnassa vippamuttassa te sato||
Samaṇassa na taɱ sādhu yad aññam anusāsatī ti.|| ||

3. [Bhagavā:]

Yena kenaci vaṇṇena saɱvāso Sakka jāyati,||
Na taɱ arahati sappañño manasā anukampituɱ.||
Manasā ce pasannena yad aññam anusāsati,||
Na tena hoti saɱyutto sānukampā anuddayā ti.|| ||

 

§

 

Sutta 3

Sūciloma Suttaɱ

[3.1][pts] Evaɱ me sutaɱ.|| ||

Ekaɱ samayaɱ Bhagavā Gayāyaɱ viharati Ṭaŋkitamañce Sūcilomayakkhassa bhavane.|| ||

2. Tena kho pana samayena Kharo ca yakkho Sūcilomo ca yakkho Bhagavato avidūre atikkamanti,|| ||

3. Atha kho Kharo yakkho Sūcilomaɱ yakkhaɱ etad avoca: eso samaṇo ti.|| ||

4. N'eso samaṇo, samaṇako eso.|| ||

Yāva jānāmi yadi vā so samaṇo yadi vā pana so samaṇako ti.|| ||

5. Atha kho Sūcilomo yakkho yena Bhagavā ten'upasaŋkami.|| ||

Upasaŋkamitvā Bhagavato kāyaɱ upanāmesi.|| ||

6. Atha kho Bhagavā kāyaɱ apanāmesi.

7. Atha kho Sūcilomo yakkho Bhagavantaɱ etad avoca:|| ||

Bhāyasi maɱ samaṇā ti.|| ||

[Bhagavā:]

8. Na khvāhantaɱ āvuso bhāyāmi. Api ca te samphasso pāpakoti.|| ||

9. [Sūcilomo:]|| ||

Pañhaɱ taɱ samaṇa pucchissāmi.|| ||

Sace me samaṇa na vyākarissasi cittaɱ vā te khipissāmi.|| ||

Hadayaɱ vā te phālessāmi.|| ||

Pādesu vā gahetvā pāragaŋgāya khipissāmī ti.|| ||

10. [Bhagavā:]

Na khvāhan taɱ āvuso passāmi sadevake loke samārake sabrahmake sassamaṇabrāhmaṇiyā pajāya sa deva-manussāya,||
yo me cittaɱ vā khipeyya,||
hadayaɱ vā phāleyya,||
pādesu vā gahetvā pāragaŋgāya khipeyya.|| ||

Api ca tvaɱ āvuso puccha yad ākaŋkhasī ti.|| ||

11. Atha kho Sūcilomo yakkho Bhagavantaɱ gāthāya ajjhabhāsi:|| ||

Rāgo ca doso ca kutonidānā||
aratī ratī lomahaɱso kutojā,||
Kuto samuṭṭhāya manovitakkā||
kumārakā dhaŋkam iv'ossajantī ti.|| ||

12. [Bhagavā:]

Rāgo ca doso ca ito nidānā||
aratī ratī lomahaɱso itojā,||
Ito samuṭṭhāya manovitakkā||
kumārakā dhaŋkam iv'ossajantī ti.||
Snehajā attasambhūtā nigrodhass'eva khandhajā,||
Puthū visattā kāmesu māluvā va vitatā vane.||
Ye naɱ pajānanti yato nidānaɱ||
te taɱ vinodenti suṇohi yakkha,||
Te duttaraɱ ogham imaɱ taranti||
atiṇṇapubbaɱ apunabbhavāyā ti.|| ||

 

§

 

Sutta 4

Maṇibhadda Suttaɱ

[4.1][pts] Evaɱ me sutaɱ.|| ||

Ekaɱ samayaɱ Bhagavā Magadhesu viharati Maṇimāḷake cetiye Naṇibhaddassa yakkhassa bhavane.|| ||

2. Atha kho Maṇibhaddo yakkho yena Bhagavā ten'upasaŋkami.|| ||

Upasaŋkamitvā Bhagavato santike imaɱ gāthaɱ abhāsi:|| ||

[Satīmato sadā bhaddaɱ satimā sukham edhati,||
Satīmato suve seyyā verā na parimuccatīti.]|| ||

3. [Bhagavā:]

Satīmato sadā bhaddaɱ satimā sukham edhati,||
Satīmato suve seyyā verā na parimuccatī.||
Yassa sabbam ahorattaɱ ahiɱsāya rato mano,||
Mett'-aɱso sabbabhūtesu veraɱ tassa na kenacī ti.|| ||

 

§

 

Sutta 5

Sānu Suttaɱ

[5.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tena kho pana samayena aññatarissā upāsikāya Sānu nāma putto yakkhena gahito hoti.|| ||

3. Atha kho sā upāsikā paridevamānā tāyaɱ velāyaɱ imā gāthāyo abhāsi:|| ||

Cātuddasiɱ pañcadasiɱ yā va pakkhassa aṭṭhami,||
Pāṭihāriyapakkhañ ca aṭṭhaŋgasusamāhitaɱ,||
uposathaɱ upavasanti iti me arahataɱ sutaɱ||
sā dāni ajja passāmi yakkhā kīḷanti Sānunā ti.|| ||

[Yakkho:]|| ||

Cātuddasiɱ pañcadasiɱ yā va pakkhassa aṭṭhamī,||
Pāṭihāriyapakkhañ ca aṭṭhaŋgasusamāgataɱ.||
Uposathaɱ upavasanti brahmacariyaɱ caranti ye||
Na tehi yakkhā kī'anti sāhu te arahataɱ1 sutaɱ,||
Sānuɱ pabuddhaɱ vajjāsi yakkhānaɱ vacanaɱ idaɱ:||
"Mā kāsi pāpakaɱ kammaɱ āviɱ vā yadi vā raho.||
sac'eva pāpakaɱ kammaɱ karissasi karosi vā,||
Na te dukkhā pamuty atthi uppaccāpi palāyato" ti.|| ||

4. [Sānu:]|| ||

Mataɱ vā amma rodanti yo vā jivaɱ na dissati,||
Jivantaɱ amma passantī kasmā maɱ amma rodasī ti?|| ||

5. [Upāsikā:]|| ||

Mataɱ vā putta rodanti yo vā jivaɱ na dissati,||
Yo ca kāme ca jitvāna puna-r-āgacchate idha,||
Taɱ vā pi putta rodanti puna jīvaɱ mato hi so.||
Kukkuḷā ubbhato tāta kukkuḷaɱ patitum icchasi,||
Narakā ubbhato tāta narakaɱ patitum icchasi.||
Abhidhāvatha bhaddaɱ te kassa ujjhāpayāmase,||
Ādittā nībhaṭaɱ bhaṇḍaɱ puna ḍayhitum icchasī ti.|| ||

 

§

 

Sutta 6

Piyaŋkara Suttaɱ

[6.1][pts] Evaɱ me sutaɱ.|| ||

Ekaɱ samayaɱ āyasmā Anuruddho Sāvatthiyaɱ viharati Jetavane Anāthapiṇḍikassa ārāme.|| ||

2. Tena kho pana samayena āyasmā Anuruddho rattiyā paccūsa-samayaɱ paccuṭṭhāya dhammapadānī bhāsati.|| ||

3. Atha kho Piyaŋkaramātā yakkhinī puttakaɱ evaɱ tosesi:|| ||

Mā saddaɱ kari Piyaŋkara||
bhikkhu dhammapadāni bhāsati,||
Api ca dhammapadaɱ vijāniya||
paṭipajjema hitāya no siyā.||
Pāṇesu ca saɱyamāmase||
sampajānamusā na bhaṇāmase,||
Sikkhema susīlam attano||
api muccema pisācayoniyā ti.|| ||

 

§

 

Sutta 7

Punabbasu Suttaɱ

[7.1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tena kho pana samayena Bhagavā bhikkhū nibbāṇa-paṭisaɱyuttāya dhammiyā kathāya sandasseti samādapeti samuttejeti sampahaɱseti.|| ||

Te ca bhikkhū aṭṭhikatvā manasi katvā sabbaɱ cetasā samannāharitvā ohitasotā dhammaɱ suṇanti.|| ||

3. Atha kho Punabbasumātā yakkhinī puttake evaɱ tose ti:|| ||

Tuṇhī Uttarike hohi tuṇhī hohi Punabbasu,||
Yāvāhaɱ Buddhaseṭṭhassa dhammaɱ sossāmi satthuno.||
Nibbāṇaɱ Bhagavā āha sabbagatthappamocanaɱ,||
Ativelā ca me hoti asmiɱ dhamme piyāyanā.||
Piyo loke sako putto piyo loke sako pati,||
Tato piyatarā mayhaɱ assa Dhammassa magganā,||
Na hi putto pati vā pi piyo dukkhā pamocaye,||
Yathā saddhammasavaṇaɱ dukkhā moceti pāṇinaɱ.||
Loke dukkhaparetasmiɱ jarāmaraṇasaɱyute||
Jarāmaraṇamokkhāya yaɱ dhammaɱ abhisamBuddhaɱ,||
Taɱ dhammaɱ sotum icchāmi tuṇhī hoti Punabbasū ti.|| ||

4. [Punabbasu:]|| ||

Amma na byāharissāmi||
tuṇhībhūtāyamuttarā,||
Dhammameva nisāmehi saddhammasavaṇaɱ sukhaɱ.||
Saddhammassa anaññāya amma dukkhaɱ carāmase,||
Esa deva-manussānaɱ sammū'hānaɱ pabhaŋkaro,||
Buddho antimasārīro dhammaɱ deseti cakkhumāti.|| ||

5. [Punabbasumātā:]|| ||

Sādhu kho paṇḍito nāma putto jāto uresayo,||
Putto me Buddhaseṭṭhassa dhammaɱ suddhaɱ piyāyati.||
Punabbasu sukhī hohi ajjāhamhi samuggatā,||
Diṭṭhāni ariyasaccāni uttarā pi suṇātu meti.|| ||

 

§

 

Sutta 8

Sudatta Suttaɱ

[8.1][pts][ati] Evaɱ me sutaɱ.|| ||

Ekaɱ samayaɱ Bhagavā Rājagahe viharati Sītavane.|| ||

2. Tena kho pana samayena Anāthapiṇḍiko gahapati Rājagahaɱ anuppatto hoti kenaci-d-eva karaṇiyena.|| ||

3. Assosi kho Anāthapiṇḍiko gahapati Buddho kira loke uppanno ti.|| ||

Tāva-d-eva ca pana Bhagavantaɱ dassanāya upasaŋkamitukāmo ahosi.|| ||

4. Ath'assa Anāthapiṇḍikassa gahapatissa etad ahosi:|| ||

Akālo kho ajja Bhagavantaɱ dassanāya upasaŋkamituɱ.|| ||

Sve dānāhaɱ kālena Bhagavantaɱ dassanāya upasaŋkamissāmī ti,||
Buddhagatāya satiyā nipajji.|| ||

Rattiyā sudaɱ tikkhattuɱ vuṭṭhāsi pabhātan ti maññamāno.|| ||

5. Atha kho Anāthapiṇḍiko gahapati yena Sīvathikadvāraɱ ten'upasaŋkami.|| ||

Amanussā dvāraɱ vivariɱsu.|| ||

6. Atha kho Anāthapiṇḍikassa gahapatissa nagaramhā nikkhamantassa āloko antaradhāyi.|| ||

Andhakāro pātu-r-ahosi.|| ||

Bhayaɱ chambhitattaɱ lomahaɱso udapādi.|| ||

Tato ca puna nivattitukāmo ahosi.|| ||

7. Atha kho Sīvako yakkho antarahito saddam anussāvesi:|| ||

Sataɱ hatthī sataɱ assā sataɱ assatarī rathā,||
Sataɱ kaññāsahassāni āmuttamaṇikuṇḍalā,||
Ekassa padavītihārassa kalaɱ nāgghanti soḷasiɱ.||
Abhikkama gahapati, abhikkama gahapati,||
abhikkamanaɱ te seyyo no paṭikkaman ti.|| ||

8. Atha kho Anāthapiṇḍiksa gahapatissa andhakāro antaradhāyi, āloko pātu-r-ahosi.|| ||

Yaɱ ahosi bhayaɱ chambhitattaɱ lomahaɱso so paṭippassambhi.|| ||

9. Dutiyam pi kho Anāthapiṇḍikassa gahapatissa nagaramhā nikmantassa āloko antaradhāyi.|| ||

Andhakāro pātu-r-ahosi.|| ||

Bhayaɱ chambhitattaɱ lomahaɱso udapādi.|| ||

Tato ca puna nivattitukāmo ahosi.|| ||

Atha kho sīvako yakkho antarahito saddam anussāvesi:|| ||

Sataɱ hatthī sataɱ assā sataɱ assatarī rathā,||
Sataɱ kaññāsahassāni āmuttamaṇikuṇḍalā,||
Ekassa padavītihārassa kalaɱ nāgghanti soḷasiɱ.||
Abhikkama gahapati, abhikkama gahapati,||
abhikkamanaɱ te seyyo no paṭikkaman ti.|| ||

Tatiyam pi kho Anāthapiṇḍiksa gahapatissa āloko antaradhāyi.|| ||

Andhakāro pātu-r-ahosi.|| ||

Bhayaɱ chamhitattaɱ lomahaɱso udapādi.|| ||

Tato ca puna nivattitukāmo ahosi.|| ||

10. Tatiyam pi kho sīvako yakkho antarahito saddam anussāvesi:|| ||

Sataɱ hatthī sataɱ assā sataɱ assatarī rathā,||
Sataɱ kaññāsahassāni āmuttamaṇikuṇḍalā,||
Ekassa padavītihārassa kalaɱ nāgghanti soḷasiɱ.||
Abhikkama gahapati, abhikkama gahapati,||
abhikkamanaɱ te seyyo no paṭikkaman ti.|| ||

11. Atha kho Anāthapiṇḍikassa gahapatissa andhakāro antaradhāyi.|| ||

Āloko pātu-r-ahosi.|| ||

Yaɱ ahosi bhayaɱ chambhitattaɱ lomahaɱso so paṭippassambhi.|| ||

12. Atha kho Anāthapiṇḍiko gahapati yena Sītavanaɱ ten'upasaŋkami.|| ||

13. Tena kho pana samayena Bhagavā rattiyā paccūsa-samayaɱ paccuṭṭhāya ajjhokāse caŋkamati.|| ||

14. Addasā kho Bhagavā Anāthapiṇḍikaɱ gahapatiɱ dūrato va āgacchantaɱ.|| ||

Disvāna caŋkamā orohitvā paññatte āsane nisīdi.|| ||

Nisajja kho Bhagavā Anāthapiṇḍikaɱ gahapatiɱ etad avoca:|| ||

'Ehi Sudattā!' ti.|| ||

15. Atha kho Anāthapiṇḍiko gahapati nāmena maɱ Bhagavā ālapatīti tatth'eva Bhagavato pādesu sirasā nipatitvā Bhagavantaɱ etad avoca:|| ||

Kacci bhante Bhagavā sukham asayitthā ti?|| ||

[Bhagavā:]

Sabbadā ve sukhaɱ seti brāhmaṇo parinibbuto,||
Yo na limpati kāmesu sītibhuto nirūpadhi.||
Sabbā āsattiyo chetvā vineyya hadaye daraɱ,||
Upasanto sukhaɱ seti santiɱ pappuyya cetasā ti.|| ||

 

§

 

Sutta 9

Paṭhama Sukkā Suttaɱ

[9.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane kalandaka nivāpe.|| ||

2. Tena kho pana samayena Sukkā bhikkhunī mahatiyā parisāya parivutā dhammaɱ deseti.|| ||

3. Atha kho Sukkāya bhikkhuniyā abhippasanno yakkho Rājagahe rathikāya rathikaɱ siŋghāṭakena siŋghāṭakaɱ upasaŋkamitvā tāyaɱ velāyaɱ imā gāthāyo abhāsi:|| ||

Kim me katā Rājagahe manussā||
madhupītā va acchare||
Ye Sukkaɱ na payirupāsanti desentiɱ amataɱ padaɱ.||
Tañ ca pana appaṭivānīyaɱ asecanakam ojavaɱ,||
Pivanti maññe sappaññā valāhakam iva panthagū ti.|| ||

 

§

 

Sutta 10

Dutiya Sukkā Suttaɱ

[10.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane kalandaka nivāpe.|| ||

2. Tena kho pana samayena aññataro upāsako Sukkāya bhikkhuniyā bhojanaɱ adāsi.|| ||

3. Atha kho Sukkāya bhikkhuniyā abhippasanno yakkho Rājagahe rathikāya rathikaɱ siŋghāṭakena siŋghāṭakaɱ upasaŋkamitvā tāyaɱ velāyaɱ imaɱ gāthaɱ abhāsi:|| ||

Puññaɱ vata pasavi bahuɱ||
sappañño vatāyam upāsako,||
Yo Sukkāya adāsi bhojanaɱ||
sabbaganthehi vippamuttāyā ti.|| ||

 

§

 

Sutta 11

Cīrā or Vīrā Suttaɱ

[11.1][pts] Evaɱ me sutaɱ.|| ||

Ekaɱ samayaɱ Bhagavā Rājagahe viharati Veḷuvane kalandaka nivāpe.|| ||

2. Tena kho pana samayena aññataro upāsako Cīrāya bhikkhuniyā cīvaraɱ adāsi.|| ||

3. Atha kho Cīrāya bhikkhuniyā abhippasanno yakkho Rājagahe rathikāya rathikaɱ siŋghāṭakena siŋghāṭakaɱ upasaŋkamitvā tāyaɱ velāyaɱ imaɱ gāthaɱ abhāsi:|| ||

Puññaɱ vata pasavi bahuɱ||
sappañño vatāyam upāsako,||
Yo Cīrāya adāsi cīvaraɱ||
sabbayogehi vippamuttāyā ti.|| ||

 

§

 

Sutta 12

Āḷavaka Suttaɱ

[12.1][pts][ati][ati-piya] Evaɱ me sutaɱ.|| ||

Ekaɱ samayaɱ Bhagavā Āḷaviyaɱ viharati Āḷavakassa yakkhassa bhavane.|| ||

2. Atha kho Āḷavako yakkho yena Bhagavā ten'upasaŋkami.|| ||

Upasaŋkamitvā Bhagavantaɱ etad avoca:|| ||

Nikkhama samaṇā ti.|| ||

Sādh'āvuso ti Bhagavā nikkhami.|| ||

Pavisa samaṇā ti.|| ||

Sadh'āvuso ti Bhagavā pāvisi.|| ||

3. Dutiyam pi kho Āḷavako yakkho Bhagavantaɱ etad avoca:|| ||

Nikkhama samaṇā ti.|| ||

Sadh'āvuso ti Bhagavā nikkhami.|| ||

Pavisa samaṇā ti.|| ||

Sadh'āvuso ti Bhagavā pāvisi.|| ||

4. Tatiyam pi kho Āḷavako yakkho Bhagavantaɱ etad avoca:|| ||

Nikkhama samaṇā ti.|| ||

Sadh'āvuso ti Bhagavā nikkhami.|| ||

Pavisa samaṇā ti.|| ||

Sadh'āvuso ti Bhagavā pāvisi.|| ||

5. Catuttham pi kho Āḷavako yakkho Bhagavantaɱ etad avoca:|| ||

Nikkhama samaṇāti.|| ||

6. Na ko panāham āvuso nikkhamissāmi.|| ||

Yaɱ te karaṇīyaɱ taɱ karohī ti.|| ||

7. [Āḷavako:]

Pañhaɱ taɱ samaṇa pucchissāmi.|| ||

Sace me na vyākarissasi,||
cittaɱ vā te khipissāmi.|| ||

Hadayaɱ vā te phālessāmi.|| ||

Pādesu vā gahetvā pāragaŋgāya khipissāmī ti.|| ||

8. [Bhagavā:]

Na khvāhaɱ taɱ āvuso passāmi sadevake loke samārake sabrahmake sassamaṇabrāhmaṇiyā pajāya sadeva-manussāya,||
yo me cittaɱ vā khipeyya hadayaɱ vā phāleyya pādesu vā gahetvā pāragaŋgāya khipeyya.|| ||

Api ca tvaɱ āvuso puccha yad ākaŋkhasī ti.|| ||

9. Atha kho Āḷavako yakkho Bhagavantaɱ gāthāya ajjhabhāsi:|| ||

Kiɱ sūdha vittaɱ purisassa seṭṭhaɱ||
kiɱ su suciṇṇaɱ sukham āvahāti,||
Kiɱ su have sādutaraɱ rasānaɱ||
kathaɱ jivī jīvitam āhu seṭṭhan ti?|| ||

10.[Bhagavā:]

Saddhīdha vittaɱ purisassa seṭṭhaɱ||
dhammo suciṇṇo sukham āvahāti,||
Saccaɱ have sādutaraɱ rasānaɱ||
paññājīviɱ1 jīvitam āhu seṭṭhan ti.|| ||

11. [Āḷavako:]

Kathaɱ su tarati oghaɱ kathaɱ su tarati aṇṇavaɱ,||
Kathaɱ su dukkhaɱ acceti kathaɱ su parisujjhatī ti?|| ||

12. [Bhagavā:]

Saddhāya tarati oghaɱ appamādena aṇṇavaɱ,||
Viriyena dukkhaɱ acceti paññāya parisujjhatī ti.|| ||

13. [Āḷavako:]

Kathaɱ su labhate paññaɱ kathaɱ su vindate dhanaɱ,||
Kathaɱ su kittiɱ pappoti kathaɱ mittāni ganthati,||
Asmā lokā paraɱ lokaɱ kathaɱ pecca na socatī ti?|| ||

14. [Bhagavā:]

Saddahāno arahataɱ dhammaɱ nibbāṇapattiyā,||
Sussūsā labhate paññaɱ appamatto vicakkhaṇo,||
Patirūpakārī dhuravā uṭṭhātā vindate dhanaɱ,||
saccena kittiɱ pappoti dadaɱ mittāni ganthati.||
Asmā lokā paraɱ lokaɱ evaɱ pecca na socatī.||
Yass'ete caturo dhammā saddhassa gharam esino,||
Saccaɱ dhammo dhiti cāgo sa ve pecca na socati,||
Asmā lokā paraɱ lokaɱ evaɱ pecca na socatī.||
Iŋgha aññe pi pucchasu puthūsamaṇabrāhmaṇe,||
Yadi saccā damā cāgā khantyā bhiyyo'dha vijjatī ti.|| ||

15. [Āḷavako:]

Kathaɱ nu dāni puccheyyaɱ puthu samaṇabrāhmaṇe,||
yo'haɱ ajja pajānāmi yo attho samparāyiko.||
Atthāya vata me Buddho vāsāyā'Āḷavim āgato,||
yo'haɱ ajja pajānāmi yattha dinnaɱ mahapphalaɱ.||
So ahaɱ vicarissāmi gāmā gāmaɱ purā puraɱ,||
Namassamāno sambuddhaɱ Dhammassa ca sudhammatan ti.|| ||

Yakkhasaɱyuttaɱ samattaɱ.

 


Contact:
E-mail
Copyright Statement   Webmaster's Page