Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 


Saɱyutta Nikāya
I. Sagātha Vagga

Sakka Saɱyutta

Suttas 1-25

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

Sutta 1

Suvīra Suttaɱ

[1.1][rhyc][bodh] [216] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi bhikkhavoti. Bhadante ti te bhikkhū Bhagavato paccassosuɱ. Bhagavā etad avoca:|| ||

Bhutapubbaɱ bhikkhave asurā deve abhiyaɱsu. Atha kho bhikkhave Sakko devānaɱ indo suvīraɱ devaputtaɱ āmantesi. Ete tāta suvīra, asurā deve abhiyanti. Gaccha, tāta suvīra, asure paccuyyāhīti. Evaɱ bhaddaɱ tavāti kho bhikkhave suvīro devaputto sakkassa devānamindassa paṭissutvā pamādaɱ āpādesi.|| ||

Dutiyam pi kho bhikkhave Sakko devānaɱ indo suvīraɱ devaputtaɱ āmantesi: ete tāta suvīra, asurā deve abhiyanti. Gaccha tāta suvīra, asure paccuyyāhīti. Evaɱ bhaddaɱ tavāti kho bhikkhave suvīro devaputto sakkassa devānamindassa paṭissutvā dutiyam pi3 pamādaɱ āpādesi.|| ||

Tatiyam pi kho bhikkhave Sakko devānaɱ indo suvīraɱ devaputtaɱ āmantesi: ete tāta suvīra, asurā deve abhiyanti. Gaccha tāta suvīra, asure paccuyyāhīti. Evaɱ bhaddaɱ tavāti kho bhikkhave suvīro devaputto sakkassa devānamindassa paṭissutvā tatiyam pi4 pamādaɱ āpādesi.|| ||

[217] atha kho bhikkhave Sakko devānaɱ indo suvīraɱ devaputtaɱ gāthāya ajjhabhāsi:|| ||

Anuṭṭhahaɱ avāyamaɱ sukhaɱ yatrādhigacchati,||
Suvīra tattha gacchāhi mañca tattheva pāpayāti.|| ||

(Suvīro:)||
Alasassa anuṭṭhātā na ca kiccāni kāraye,||
Sabbakāmasamiddhassa tamme sakka varaɱ disāti|| ||

(Sakko:)||
Yatthālaso anuṭṭhātā accantaɱ sukhamedhati,||
Suvīra tattha gacchāhi mañca tattheva pāpayāti.|| ||

(Suvīro:)||
Akammunā devaseṭṭha sakka vindemu yaɱ sukhaɱ,||
Asokaɱ anupāyāsaɱ tamme sakka varaɱ disāti,|| ||

(Sakko:)||
Sace atthi akammena koci kvaci na jīvati,||
Nibbāṇassa hi so maggo suvīra tattha gacchāhi mañca tattheva pāpayāti.|| ||

So hi nāma bhikkhave, Sakko devānaɱ indo sakaɱ puññaphalaɱ upajīvamāno devānaɱ Tāvatiɱsānaɱ issariyādhipaccaɱ rajjaɱ kārento uṭṭhānaviriyassa vaṇṇavādī bhavissati. Idha kho taɱ bhikkhave sobhetha, yaɱ tumhe evaɱ svākkhāte dhamma-vinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā anadigatassa adhigamāya asacchikatassa sacchikiriyāyāti.|| ||

 

§

 

Sutta 2

Susīma Suttaɱ

[2.1][rhyc][bodh] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā Bhikkhū āmantesi bhikkhavoti, Bhadante ti te bhikkhū Bhagavato paccassosuɱ. Bhagavā etad avoca:|| ||

Bhūtapubbaɱ bhikkhave asurā deve abhiyaɱsu. Atha kho bhikkhave Sakko devānaɱ indo susīmaɱ7 devaputtaɱ āmantesi: ete tāta susīma, asurā deve abhiyanti. Gaccha tāta susīma, asure paccuyyāhīti. Evaɱ bhaddantavāti kho bhikkhave susīmo devaputto sakkassa devānamindassa paṭissutvā pamādaɱ āpādesi.|| ||

[218] dutiyam pi kho bhikkhave Sakko devānaɱ indo susīmaɱ devaputtaɱ āmantesi. Ete tāta susīma, asurā deve abhiyanti. Gaccha tāta susīma, asure paccuyyāhīti. Evaɱ bhaddantavāti kho bhikkhave susīmo devaputto sakkassa devānamindassa paṭissutvā pamādaɱ āpādesi.|| ||

Tatiyam pi kho bhikkhave Sakko devānaɱ indo susīmaɱ devaputtaɱ āmantesi. Ete tāta susīma, asurā deve abhiyanti. Gaccha tāta susīma, asure paccuyyāhīti. Evaɱ bhaddantavāti kho bhikkhave susīmo devaputto sakkassa devānamindassa paṭissutvā pamādaɱ āpādesi. Atha kho bhikkhave Sakko devānaɱ indo susīmaɱ devaputtaɱ gāthāya ajañdhabhāsi.|| ||

Anuṭṭhahaɱ avāyamaɱ sukhaɱ yatrādhigacchati,||
Susīma tattha gacchāhi mañca tattheva pāpayāti.|| ||

(Susīmo:)||
Alasassa anuṭṭhātā na ca kiccāni kāraye,||
Sabbakāmasamiddhassa tamme sakka varaɱ disāti,|| ||

(Sakko:)||
Yatthālaso anuṭṭhātā accantaɱ sukhamedhati,||
Susīma tattha gacchāhi mañca tattheva pāpayāti.|| ||

(Susīmo:)||
Akammunā devaseṭṭha sakka vindemu yaɱ sukhaɱ,||
Asokaɱ anupāyāsaɱ tamme sakka varaɱ disāti.|| ||

(Sakko:)||
Sace atthi akammena koci kvaci na jīvati,||
Nibbāṇassa hi so maggo susīma tattha gacchāhi mañca tattheva pāpayāti.|| ||

So hi nāma bhikkhave Sakko devānaɱ indo sakaɱ puññaphalaɱ upajivamāno devānaɱ Tāvatiɱsānaɱ issariyādhipaccaɱ rajjaɱ kārento uṭṭhānaviriyassa vaṇṇavādī bhavissati. Idha kho taɱ bhikkhave sobhetha, yaɱ tumhe evaɱ svākkhāte dhamma-vinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā anadhigatassa adhigamāya asacchikatassa sacchikiriyāyāti.|| ||

 

§

 

Sutta 3

Dhajagga Suttaɱ

[3.1][rhyc][bodh][than][piya] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi bhikkhavoti, Bhadante ti te bhikkhū Bhagavato paccassosuɱ. Bhagavā etad avoca:|| ||

Bhūtapubbaɱ bhikkhave devāsurasaŋgāmo samupabbūḷho ahosi. Atha kho bhikkhave Sakko devānaɱ indo deve Tāvatiɱse āmantesi: sace mārisā devānaɱ saŋgāmagatānaɱ [219] uppajjeyya bhayaɱ vā chambhitattaɱ vā lomahaɱso vā mameva tasmiɱ samaye dhajggaɱ ullokeyyātha. Mamaɱ hi vo dhajaggaɱ ullokayataɱ yaɱ bhavissati bhayaɱ vā chambhitattaɱ vā lomahaɱso vā, so pahiyyissati.|| ||

No ce me dhajaggaɱ ullokeyyātha, atha pajāpatissa devarājassa dhajaggaɱ ullokeyyātha. Pajāpatissa hi vo devarājassa dhajaggaɱ ullokayataɱ yaɱ bhavissati bhayaɱ vā chambhitattaɱ vā lomahaɱso vā, so pahiyyissati.|| ||

No ce pajāpatissa devarājassa dhajaggaɱ ullokeyyātha, atha varuṇassa devarājassa dhajaggaɱ ullokeyyātha. Varuṇassa hi vo devarājassa dhajaggaɱ ullokayataɱ yaɱ bhavissati bhayaɱ vā chambhitattaɱ vā, lomahaɱso vā, so pahiyyissati.|| ||

No ve varuṇassa devarājassa dhajaggaɱ ullokeyyātha, atha īsānassa devarājassa dhajaggaɱ ullokeyyātha. Īsānassa hi vo devarājassa dhajaggaɱ ullokayataɱ yaɱ bhavissati bhayaɱ vā chambhitattaɱ vā lomahaɱso vā, so pahiyyissati.|| ||

Taɱ kho pana bhikkhave sakkassa vā devānamindassa dhajaggaɱ ullokayataɱ, pajāpatissa vā devarājassa dhajaggaɱ ullokayataɱ, varuṇassa vā devarājassa dhajaggaɱ ullokayataɱ, īsānassa vā devarājassa dhajaggaɱ ullokayataɱ, yaɱ bhavissati bhayaɱ vā chambhitattaɱ vā lomahaɱso vā, so pahīyethāpi nopi pahīyetha. Taɱ kissa hetu? Sakko hi bhikkhave devānaɱ indo avītarāgo avītadoso avītamoho bhīrucchamhī utrāsi palāyīti.|| ||

Ahaɱ ca kho bhikkhave evaɱ vadāmi: sace tumhākaɱ bhikkhave araññagatānaɱ vā rukkhamūlagatānaɱ vā suññāgāragatānaɱ vā uppajjeyya bhayaɱ vā chambhitattaɱ vā lomahaɱso vā, mameva tasmiɱ samaye anussareyyātha."|| ||

Iti pi so Bhagavā arahaɱ Sammā-sambuddho vijjā-caraṇa-sampanno sugato loka-vidū anuttaro purisadammasārathi satthā deva-manussānaɱ buddho Bhagavā" ti.mamaɱ hi vo bhikkhave anussarataɱ yaɱ bhavissati bhayaɱ vā chambhitattaɱ vā lomahaɱso vā, so pahiyyissati.|| ||

[220] no ce maɱ anussareyyātha, atha dhammaɱ anussareyyātha: "svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī" ti. Dhammaɱ hi vo bhikkhave anussarataɱ yaɱ bhavissati bhayaɱ vā chambhitattaɱ vā lomahaɱso vā, so pahiyyissati.|| ||

No ce dhammaɱ anussareyyātha, atha saŋghaɱ anussareyyātha: " supaṭipanno Bhagavato sāvakasaŋgho. Ujupaṭipanno Bhagavato sāvakasaŋgho. ñāyapaṭipanno Bhagavato sāvakasaŋgho. Sāmīcipaṭipanno Bhagavato sāvakasaŋgho. Yad idaɱ cattāri purisayugāni, aṭṭha purisapuggalā, esa Bhagavato sāvakasaŋgho āhuneyyo pāhuneyyo dakkhiṇeyyo añjalikaraṇīyo anuttaraɱ puññakkhettaɱ lokassā'ti. Saŋghaɱ hi vo bhikkhave anussarataɱ yaɱ bhavissati bhayaɱ vā chambhitattaɱ vā lomahaɱso vā so pahiyyissati.|| ||

Taɱ kissa hetu?|| ||

Tathāgato hi bhikkhave arahaɱ Sammā-sambuddho vītarāgo vitadoso vītamoho abhīru acchamhī anutrāsī apalāyīti.|| ||

Idam avoca Bhagavā. Idaɱ vatvā sugato athāparaɱ etad avoca satthā:|| ||

Araññe rukkhamūle vā suññāgāreva1 bhikkhavo,||
Anussaretha samBuddhaɱ bhayaɱ tumahāka no siyā.|| ||

No ce Buddhaɱ sareyyātha lokajeṭṭhaɱ narāsabhaɱ,||
Atha dhammaɱ sareyyātha niyyānikaɱ sudesitaɱ.|| ||

No ce dhammaɱ sareyyātha niyyānikaɱ sudesitaɱ,||
Atha saŋghaɱ sareyyātha puññakkhettaɱ anuttaraɱ.|| ||

Evaɱ Buddhaɱ sarantānaɱ dhammaɱ saŋghañca bhikkhavo,||
Bhayaɱ vā chambhitattaɱ vā lomahaɱso na hessatī ti.|| ||

 

§

 

Sutta 4

Vepacitti Suttaɱ

[4.1][rhyc][bodh][than] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi bhikkhavoti. Bhadante ti te bhikkhū Bhagavato paccassosuɱ. Bhagavā etad avoca:|| ||

[221] bhūtapubbaɱ bhikkhave devāsurasaŋgāmo samupabbūḷho ahosi. Atha kho bhikkhave vepacitti asurindo asure āmantesi: sace mārisā devāsurasaŋgāme samūpabbūḷhe asurā jineyyuɱ, devā parājeyyuɱ, yena taɱ sakkaɱ devānamindaɱ kaṇṭhapañcamehi bandhanehi bandhitvā mama santike āneyyātha asurapuranti.|| ||

Sakko pi kho bhikkhave devānaɱ indo deve Tāvatiɱse āmantesi.|| ||

Sace mārisā devāsurasaŋgāme samūpabbūḷhe devā jineyyuɱ, asurā parājeyyuɱ, yena taɱ vepacittiɱ asurindaɱ kaṇṭhapañcamehi bandhanehi bandhitvā mama santike āneyyātha sudhammaɱ sabhanti.|| ||

Tasmiɱ kho pana bhikkhave saŋgāme devā jiniɱsu. Asurā parājiɱsu. Atha kho bhikkhave devā Tāvatiɱsā vepacittiɱ asurindaɱ kaṇṭhapañcamehi bandhanehi bandhitvā sakkassa devānamindassa santike ānesuɱ sudhammaɱ sabhaɱ.|| ||

Tatra sudaɱ bhikkhave vepacitti asurindo kaṇṭhapañcamehi bandhanehi baddho sakkaɱ devānamindaɱ sudhammaɱ sabhaɱ pavisantañ ca nikkhamantañ ca asabbhāhi pharusāhi vācāhi akkosati, paribhāsati.|| ||

Atha kho bhikkhave mātalī saŋgāhako sakkaɱ devānamindaɱ gāthāya2 ajjhabhāsi:|| ||

Bhayā nu mathavā sakka dubbalyā no titikkhasi,||
Suṇanto pharusaɱ vācaɱ sammukhā vepacittinoti.|| ||

(Sakko:)||
Nāhaɱ bhayā na dubbalyā khamāmi vepacittino,||
Kathañhi mādiso viññū bālena paṭisaɱyujeti.|| ||

Bhiyyo bālā pabhijjeyyuɱ no c'assa paṭisedhako Tasmā bhūsena daṇḍena dhīro bālaɱ nisedhayeti.|| ||

Etad eva ahaɱ maññe bālassa paṭisedhanaɱ,||
Paraɱ saŋkupitaɱ ñatvā yo sato upasammatī ti.|| ||

(Mātali:)||
Etad eva titikkhāya vajjaɱ passāmi vāsava,||
Yadā naɱ maññati bālo bhayā myāyaɱ titikkhati,||
Ajjhārūhati dummedho goḷva bhiyyo palāyinanti.|| ||

(Sakko:)||
[222] Kāmaɱ maññatu vā mā vā bhayā myāyaɱ titikkhati,||
Sadatthaparamā atthā khantyā bhiyyo na vijjati.|| ||

Yo have balavā santo dubbalassa titikkhati,||
Tamāhu paramaɱ khantiɱ niccaɱ khamati dubbalo.|| ||

Abalantaɱ balaɱ āhu yassa bālabalaɱ balaɱ,||
Balassa7 dhammaguttassa paṭivattā na vijjati.|| ||

Tass'eva tena pāpiyo yo kuddhaɱ paṭikujjhati,||
Kuddhaɱ appaṭikujjhanto saŋgāmaɱ jeti dujjayaɱ.|| ||

Ubhinnamatthaɱ carati attano ca parassa ca,||
Paraɱ saɱkupitaɱ ñatvā yo sato upasammati.|| ||

Ubhinnaɱ tikicchantānaɱ1 attano ca parassa ca,||
Janā maññanti bāloti ye Dhammassa akovidāti|| ||

So hi nāma bhikkhave Sakko devānaɱ indo sakaɱ puññaphalaɱ upajīvamāno devānaɱ Tāvatiɱsānaɱ issariyādhipaccaɱ rajjaɱ kārento khantisoraccassa vaṇṇavādī bhavissati " idha kho taɱ bhikkhave sobhetha, yaɱ tumhe evaɱ svākkhāte dhamma-vinaye pabbajitā samānā khamā ca bhaveyyātha soratā cā" ti.|| ||

 

§

 

Sutta 5

Subhāsitajaya Suttaɱ

[5.1][rhyc][bodh][than] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi bhikkhavoti. Bhadante ti te bhikkhū Bhagavato paccassosuɱ. Bhagavā etad avoca:|| ||

Bhūtapubbaɱ bhikkhave devāsurasaŋgāmo samupabbūḷho ahosi. Atha kho bhikkhave vepacitti asurindo sakkaɱ devānamindaɱ etad avoca: hotu devānaminda subhāsitena jayoti. Hotu vepacitti subhāsitena jayoti.|| ||

Atha kho bhikkhave devā ca asurā ca pārisajje ṭhapesuɱ: ime no subhāsitaɱ dubbhāsitaɱ ājānissantī ti.|| ||

Atha kho bhikkhave vepacitti asurindo sakkaɱ devānamindaɱ etad avoca: bhaṇa devānaminda gāthanti.|| ||

Evaɱ vutte bhikkhave Sakko devānaɱ indo vepacittiɱ asurindaɱ etad avoca: tumhe khvettha vepacitti, pubbadevā. Bhaṇa vepacitti, gāthanti. [223] evaɱ vutte bhikkhave vepacitti asurindo imaɱ gāthaɱ abhāsi.|| ||

Bhiyyo bālā pabhijjeyyuɱ no c'assa paṭisedhako,||
Tasmā bhūsena daṇḍena dhīro bālaɱ nisedhayeti.|| ||

Bhāsitāya kho pana bhikkhave vepacittinā asurindena gāthāya asurā anumodiɱsu, devā tuṇhī ahesuɱ.|| ||

Atha kho bhikkhave vepacitti asurindo sakkaɱ devānamindaɱ etad avoca: bhaṇa devānaminda gāthanti. Evaɱ vutte bhikkhave Sakko devānaɱ indo imaɱ gāthaɱ abhāsi:|| ||

Etad eva ahaɱ maññe bālassa paṭisedhanaɱ,||
Paraɱ saɱkupitaɱ ñatvā yo sato upasammatī ti.|| ||

Bhāsitāya kho pana bhikkhave Sakkena devānam indena gāthāya devā anumodiɱsu. Asurā tuṇhī ahesuɱ.|| ||

Atha kho bhikkhave Sakko devānaɱ indo vepacittiɱ asurindaɱ etad avoca: bhaṇa vepacitti gāthanti. Evaɱ vutte bhikkhave vepacitti asurindo imaɱ gāthaɱ abhāsi:|| ||

Etad eva titikkhāya vajjaɱ passāmi vāsava,||
Yadā naɱ maññati bālo bhayā myāyaɱ titikkhati,||
Ajjhāruhati dummedho goḷva bhiyyo palāyinanti.|| ||

Bhāsitāya kho pana bhikkhave vepacittinā asurindena gāthāya asurā anumodiɱsu. Devā tuṇhī ahesuɱ.|| ||

Atha kho bhikkhave vepacitti asurindo sakkaɱ devānamindaɱ etad avoca: bhaṇa devānaminda gāthanti.|| ||

Evaɱ vutte bhikkhave Sakko devānaɱ indo imā gāthāyo abhāsi:|| ||

Kāmaɱ maññatu vā mā vā bhayā myāyaɱ titikkhati,||
Sadatthaparamā atthā khantyā bhiyyo na vijjati.|| ||

Yo have balavā santo dubbalassa titikkhati,||
Tamāhu paramaɱ khantiɱ niccaɱ khamati dubbalo.|| ||

Abalantaɱ balaɱ āhu yassa bālabalaɱ balaɱ,||
Balassa dhammaguttassa paṭivattā na vijjati.|| ||

Tass'eva tena pāpiyo yo kuddhaɱ paṭikujjhati,||
Kuddhaɱ appaṭikujjhanto saŋgāmaɱ jeti dujjayaɱ.|| ||

Ubhinnamatthaɱ carati attano ca parassa ca,||
Paraɱ saŋkupitaɱ ñatvā yo sato upasammati.|| ||

[224] Ubhinnaɱ tikicchantānaɱ attano ca parassa ca,||
Janā maññanti bāloti ye Dhammassa akovidāti.|| ||

Bhāsitāsu kho pana bhikkhave Sakkena donamindena gāthāsu devā anumodiɱsu, asurā tuṇhī ahesuɱ|| ||

Atha kho bhikkhave devānañca asurānañca pārisajjā etad avocuɱ: bhāsitā kho vepacittinā asurindena gāthāyo. Tā ca kho sadaṇḍāvacarā sasatthāvacarā iti bhaṇḍanaɱ iti viggahoti iti kalaho. Bhāsitā kho pana Sakkena devānam indena gāthāyo. Tā ca kho adaṇḍāvacarā asatthāvacarā iti abhaṇḍanaɱ iti aviggaho iti akalaho. Sakkassa devānamindassa subhāsitena jayoti.|| ||

Iti kho bhikkhave sakkassa devānamindassa subhāsitena jayo ahosī ti.|| ||

 

§

 

Sutta 6

Kulāvaka Suttaɱ

[6.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Bhūtapubbaɱ bhikkhave devāsurasaŋgāmo samupabbūḷho ahosi. Tasmiɱ kho pana bhikkhave saŋgāme asurā jiniɱsu, devā parājiɱsu.|| ||

Parājitā ca kho bhikkhave devā apāyaɱsveva uttarena mukhā, abhiyaɱsveva ne asurā. Atha kho bhikkhave Sakko devānaɱ indo mātali saŋgāhakaɱ gāthāya ajjhabhāsi:|| ||

Kulāvakā mātali simbalismiɱ īsāmukhena parivajjayassu,||
Kāmaɱ cajāma asuresu pāṇaɱ māyime dijā vikulāvakā2 ahesunti.|| ||

Evaɱ bhaddantavāti kho bhikkhave mātali saŋgāhako sakkassa devānamindassa paṭissutvā sahassayuttaɱ ājaññarathaɱ paccudāvattesi.|| ||

Atha kho bhikkhave asurānaɱ etad ahosi: paccudāvatto kho dāni sakkassa devānamindassa sahassayutto [225] ājaññaratho.|| ||

Dutiyam pi kho devā asurehi saŋgāmessantīti bhītā asurapurameva pāvisiɱsu.|| ||

Iti kho bhikkhave sakkassa devānamindassa dhammen'eva jayo ahosi.|| ||

 

§

 

Sutta 7

Nadubbhiya Suttaɱ

[7.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ -||
Bhūtapubbaɱ bhikkhave sakkassa devānamindassa rahogatassa paṭisallīnassa evaɱ cetaso parivitakko udapādi: yopi me assa paccatthiko tassa pāhaɱ na dubbheyyanti.|| ||

Atha kho bhikkhave vepacitti asurindo sakkassa devānamindassa cetasā cetoparivitakka maññāya yena Sakko devānaɱ indo ten'upasaŋkami.|| ||

Addasā kho bhikkhave Sakko devānaɱ indo vepacittiɱ asurindaɱ dūratova āgacchantaɱ. Disvāna vepacittiɱ asurindaɱ etad avoca: tiṭṭha vepacitti gahitosīti.|| ||

Yad eva te mārisa pubbe cittaɱ tad eva tvaɱ mārisa pahāsīti. Sapassu ca me vepacitti adubbhāyāti.|| ||

Yaɱ musābhaṇato pāpaɱ yaɱ pāpaɱ1 ariyūpavādino,||
Mittadduno ca yaɱ pāpaɱ yaɱ pāpaɱ akataññuno,||
Tameva pāpaɱ phusati yo te dubbhe sujampatī ti.|| ||

 

§

 

Sutta 8

Verocanaasurinda Suttaɱ

[8.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Tena kho pana samayena Bhagavā divāvihāragato hoti paṭisallīno. Atha kho Sakko ca devānaɱ indo verocano ca asurindo yena Bhagavā ten'upasaŋkamiɱsu. Upasaŋkamitvā paccekaɱ dvārabāhaɱ aṭṭhaɱsu. Atha kho verocano asurindo Bhagavato santike imaɱ gāthaɱ abhāsi:|| ||

Vāyametheva puriso yāva atthassa nipphadā,||
Nipphannasobhino atthā verocanavaco idanti.|| ||

(Sakko:)||
[226] Vāyametheva puriso yāva atthassa nipphadā,||
Nipphannasobhino atthā3 khantyā bhiyyo na vijjatī ti.|| ||

(Verovano:)||
Sabbe sattā atthajātā tattha tattha yathārahaɱ,||
Saɱyogaparamātv eva sambhogā sabbapāṇinaɱ,||
Nipphannasobhino atthā verocanavaco idanti.|| ||

(Sakko:)||
Sabbe sattā atthajātā tattha tattha yathārahaɱ,||
Saɱyogaparamātv eva sambhogā sabbapāṇinaɱ,||
Nipphannasobhino atthā khantyā bhiyo na vijjatī ti.|| ||

 

§

 

Sutta 9

Araññāyatanaisi Suttaɱ

[9.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Bhūtapubbaɱ bhikkhave sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho bhikkhave Sakko ca devānaɱ indo vepacitti ca asurindo yena te isayo sīlavanto kalyāṇadhammā ten'upasaŋkamiɱsu.|| ||

Atha kho bhikkhave vepacitti asurindo aṭaliyo upāhanā ārohitvā khaggaɱ olaggetvā chattena dāriyamānena aggadvārena assamaɱ pavisitvā te isayo sīlavante kalyāṇadhamme apabyāmato karitvā atikkami.|| ||

Atha kho bhikkhave Sakko devānaɱ indo aṭaliyo upāhanā orohitvā khaggaɱ aññesaɱ datvā chattaɱ apanāmetvā dvāren'eva assamaɱ pavisitvā te isayo sīlavante kalyāṇadhamme anuvātaɱ pañjaliko namassamāno aṭṭhāsi. Atha kho bhikkhave te isayo sīlavanto kalyāṇadhammā sakkaɱ devānamindaɱ gāthāya ajjhabhāsiɱsu:|| ||

Gandho isīnaɱ ciradikkhitānaɱ1 kāyā cuto gacchati mālutena,||
Ito paṭikkama sahassanetta gandho isīnaɱ asuci devarājāti.|| ||

Gandho isīnaɱ ciradikkhitānaɱ kāyā cuto gacchatu mālutena,||
Sucitrapupphaɱ sirasmiɱ va mālaɱ [227] gandhaɱ etaɱ paṭikaŋkhāma bhante, na hettha devā paṭikkūlasaññinoti.|| ||

 

§

 

Sutta 10

Isayosamuddaka Suttaɱ

[10.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ - Bhūtapubbaɱ bhikkhave sambahulā isayo sīlavanto kalyāṇadhammā samuddatīre paṇṇakuṭīsu sammanti.|| ||

Tena kho pana samayena bhikkhave devāsurasaŋgāmo samupabbūḷho ahosi, atha kho bhikkhave tesaɱ isīnaɱ sīlavantānaɱ kalyāṇadhammānaɱ etad ahosi. Dhammikā kho devā, adhammikā asurā. Siyā pi no asurato bhayaɱ. Yannūna mayaɱ sambaraɱ asurindaɱ upasaŋkamitvā abhayadakkhiṇaɱ yāceyyāmāti.|| ||

Atha kho bhikkhave te isayo sīlavanto kalyāṇadhammā seyyāthāpi nāma balavā puriso sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya, evam eva samuddatīre paṇṇakuṭīsu antarahitā sambarssa asurindassa pamukhe pātu-r-ahesuɱ. Atha kho bhikkhave te isayo sīlavanto kalyāṇadhammā sambaraɱ asurindaɱ gāthāya ajjhabhāsiɱsu:|| ||

Isayo sambaraɱ pattā yācanti abhayadakkhiṇaɱ,||
Kāmaɱ karohi te dātuɱ bhayassa abhayassa vāti,|| ||

Isīnaɱ abhayaɱ n'atthi duṭṭhānaɱ sakkasevinaɱ,||
Abhayaɱ yācamānānaɱ bhayameva dadāmi voti,|| ||

Abhayaɱ yācamānānaɱ bhayameva dadāsi no. Paṭiggaṇhāma te etaɱ akkhayaɱ hotu te bhayaɱ.|| ||

Yādisaɱ vapate bījaɱ tādisaɱ harate phalaɱ,||
Kalyāṇakārī kalyāṇaɱ pāpakārī ca pāpakaɱ,||
Pavuttaɱ tāta te bījaɱ phalaɱ paccanubhossasīti,|| ||

Atha kho bhikkhave te isayo sīlavanto kalyāṇadhammā sambaraɱ asurindaɱ abhisapitvā1 seyyathā pi nāma balavā puriso sammiñjitaɱ vā bāhaɱ pasāreyya, pasāritaɱ vā bāhaɱ sammiñjeyya, evam eva sambarassa asurindassa pamukhe antarahitā samuddatīre paṇṇakuṭīsu pātu-r-ahesuɱ.|| ||

[228] atha kho bhikkhave sambaro asurindo tehi isīhi sīlavantehi kalyāṇadhammehi abhisapito rattiyā sudaɱ tikkhattuɱ ubbijjatī ti.|| ||

 


Suvīravaggo paṭhamo


 

Sutta 11

Devā (sattavatapada) Suttaɱ

[11.1][rhyc][bodh] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi bhikkhavoti. Bhadante ti te bhikkhū Bhagavato paccassosuɱ. Bhagavā etad avoca: sakkassa bhikkhave devānamindassa pubbe manussabhūtassa satta vatapadāni samattāni samādinnāni ahesuɱ, yesaɱ samādinnattā Sakko sakkattaɱ ajjhagā.|| ||

Katamāni satta vatapadāni?|| ||

Yāvajīvaɱ mātāpettibharo assaɱ. Yāvajīvaɱ kule jeṭṭhāpacāyī assaɱ. Yāvajīvaɱ saṇhavāco assaɱ, yāvajīvaɱ apisuṇavāco assaɱ. Yāvajīvaɱ vigatamalamaccherena cetasā agāraɱ ajjhāvaseyyaɱ, muttacāgo payatapāṇi vossaggarato yācayogo dānasaɱvibhāgarato. Yāvajīvaɱ saccavāco assaɱ. Yāvajīvaɱ akkodhano assaɱ. Sacepi me kodho uppajjeyya khippameva naɱ paṭivineyyanti. Sakkassa bhikkhave devānamindassa pubbe manusabhūtassa imāni satta vatapadāni samattāni samādinnāni ahesuɱ. Yesaɱ samādinnattā Sakko sakkattaɱ ajjhagāti.|| ||

Mātāpettibharaɱ jantuɱ kulejeṭṭhāpacāyinaɱ,||
Saṇhaɱ sakhilasambhāsaɱ pesuṇeyyappahāyinaɱ,||
Maccheravinaye yuttaɱ saccaɱ kodhābhibhūɱ naraɱ,||
Taɱ ve devā Tāvatiɱsā āhu sappuriso itī ti.|| ||

 

§

 

Sutta 12

Dutiya Devā (sattavatapada) Suttaɱ

[12.1][rhyc][bodh] Evaɱ me sutaɱ||
Ekaɱ samayaɱ Bhagavā [229] Sāvatthiyaɱ viharati Jetavane Anāthapiṇḍikassa ārāme tatra kho Bhagavā bhikkhū āmantesi bhikkhavoti. Bhadante ti te bhikkhū Bhagavato paccassosuɱ, Bhagavā etad avoca:|| ||

Sakko bhikkhave devānaɱ indo pubbe manussabhūto samāno magho nāma māṇavo ahosi. Tasmā maghavāti vuccati. Sakko bhikkhave devānaɱ indo pubbe manussabhūto samāno pure pure4 dānaɱ adāsi. Tasmā purindadoti vuccati. Sakko bhikkhave devānaɱ indo pubbe manussabhūto samāno sakkaccaɱ dānaɱ adāsi, tasmā Sakkoti vuccati. Sakko bhikkhave devānaɱ indo pubbe manussabhūto samāno āvasathaɱ adāsi. Tasmā vāsavoti vuccati. Sakko bhikkhave devānaɱ indo sahassampi atthānaɱ muhuttena cinteti. Tasmā sahassakkhoti vuccati. Sakkassa bhikkhave devānamindassa sujā nāma asurakaññā pajāpatī. Tasmā sujampatīti vuccati. Sakko bhikkhave devānaɱ indo devānaɱ Tāvatiɱsānaɱ issariyādhipaccaɱ rajjaɱ kāreti. 5 Tasmā devānaɱ indoti vuccati.|| ||

Sakkassa bhikkhave devānamindassa pubbe manussabhūtassa sattavatapadāni samattāni samādinnāni ahesuɱ. Yesaɱ samādinnattā Sakko sakkattaɱ ajjhagā.|| ||

Katamāni satta vatapadāni: yāvajīvaɱ mātāpettibharo assaɱ. Yāvajīvaɱ kule jeṭṭhāpacāyī assaɱ. Yāvajīvaɱ saṇhavāco assaɱ. Yāvajīvaɱ apisuṇāvāco assaɱ. Yāvajīvaɱ vigatamalamaccherena cetasā agāraɱ ajjhāvaseyyaɱ, muttacāgo payatapāṇī vossaggarato yācayogo dānasaɱvibhāgarato. Yāvajīvaɱ saccavāco assaɱ. Yāvajīvaɱ akkodhano assaɱ. Sacepi me kodho uppajjeyya khippameva naɱ paṭivineyyanti. Sakkassa bhikkhave devānamindassa pubbe manussabhūtassa imāni satta vatapadāni samattāni samādinnāni ahesuɱ, yesaɱ samādinnattā Sakko sakkattaɱ ajjhagāti.|| ||

[230] mātāpettibharaɱ jantuɱ kulejeṭṭhāpacāyinaɱ Saṇhaɱ sakhilasambhāsaɱ pesuṇeyyappahāyinaɱ Maccheravinaye yuttaɱ saccaɱ kodhābhibhuɱ naraɱ Taɱ ve devā Tāvatiɱsā āhu sappuriso itī ti.|| ||

 

§

 

Sutta 13

Mahāli (sattavatapada) Suttaɱ

[13.1][rhyc][bodh] Evaɱ me sutaɱ||
Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ. Atha kho mahāli licchavi yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho mahāli licchavi Bhagavantaɱ etad avoca: diṭṭho vo1 bhante Sakko devānaɱ indoti. Diṭṭho me mahāli Sakko devānaɱ indoti.|| ||

So hi nūna bhante sakkapaṭirūpako bhavissati. Duddaso hi bhante Sakko devānaɱ indoti.|| ||

Sakkañcāhaɱ mahāli pajānāmi, sakkakaraṇe ca dhamme. Yesaɱ dhammānaɱ samādinnattā Sakko sakkattaɱ ajjhagā, tañ ca pajānāmi.|| ||

Sakko mahāli devānaɱ indo pubbe manussabhūto samāno magho nāma māṇavo ahosi. Tasmā " maghavāti" vuccati. Sakko mahāli devānaɱ indo pubbe manussabhūto samāno pure pure dānaɱ adāsi. Tasmā purindadoti vuccati. Sakko mahāli devānaɱ indo pubbe manussabhūto samāno sakkaccaɱ dānaɱ adāsi. Tasmā Sakkoti vuccati. Sakko mahāli devānaɱ indo pubbe manussabhūto samāno āvasathaɱ adāsi, tasmā vāsavoti vuccati. Sakko mahāli devānaɱ indo sahassampi atthānaɱ muhuttena cinteti. Tasmā sahassakkhoti vuccati. Sakkassa mahāli devānamindassa sujā nāma asurakaññā pajāpatī. Tasmā sujampatīti vuccati. Sakko mahāli devānaɱ indo devānaɱ Tāvatiɱsānaɱ [231] issariyādhipaccaɱ rajjaɱ kāreti. Tasmā devānaɱ indoti vuccati.|| ||

Sakkassa mahāli devānamindassa pubbe manussabhūtassa satta vatapadāni samattāni samādinnāni ahesuɱ, yesaɱ samādinnattā Sakko sakkattaɱ ajjhagā.|| ||

Katamāni satta vatapadāni: yāvajīvaɱ mātāpettibharo assaɱ. Yāvajīvaɱ kule jeṭṭhāpacāyī assaɱ. Yāvajīvaɱ saṇhavāco assaɱ. Yāvajīvaɱ apisuṇāvāco assaɱ. Yāvajīvaɱ vigatamalamaccherena cetasā agāraɱ ajjhāvaseyyaɱ, muttacāgo payatapāṇī vossaggarato yācayogo dānasaɱvibhāgarato. Yāvajīvaɱ saccavāco assaɱ. Yāvajīvaɱ akkodhano assaɱ. Sacepi me kodho uppajjeyya, khippameva naɱ paṭivineyyanti.|| ||

Sakkassa mahāli devānamindassa pubbe manussabhūtassa imāni satta vatapadāni samattāni samādinnāni ahesuɱ, yesaɱ samādinnattā Sakko sakkattaɱ ajjhagāti. Mātāpettibharaɱ jantuɱ kulejeṭṭhāpacāyinaɱ Saṇahaɱ sakhilasambhāsaɱ pesuṇeyyappahāyinaɱ Maccheravinaye yuttaɱ saccaɱ kodhābhibhūɱ naraɱ Taɱ ve devā Tāvatiɱsā āhu sappuriso itī ti.|| ||

 

§

 

Sutta 14

Daḷidda Suttaɱ

[14.1][rhyc][bodh] Evaɱ me sutaɱ||
Ekaɱ samayaɱ Bhagavā Rājagahe viharati Veḷuvane Kalandakanivāpe. Tatra kho Bhagavā bhikkhū āmantesi bhikkhavoti, Bhadante ti te bhikkhū Bhagavato paccassosuɱ Bhagavā etad avoca: bhūtapubbaɱ bhikkhave aññataro puriso imasmiɱ yeva Rājagahe manussadaḷiddo ahosi, manussakapaṇo, manussavarāko. So Tathāgatappavedite dhamma-vinaye saddhaɱ samādiyi. Sīlaɱ samādiyi. Sutaɱ samādiyi. Cāgaɱ samādiyi. Paññaɱ samādiyi.|| ||

So Tathāgatappavedite dhamma-vinaye saddhaɱ samādiyitvā sīlaɱ samādiyitvā sutaɱ samādiyitvā cāgaɱ samādiyitvā paññaɱ samādiyitvā kāyassa bhedā param maraṇā [232] sugatiɱ saggaɱ lokaɱ upapajji devānaɱ Tāvatiɱsānaɱ sahavyataɱ. So aññe deve atirocati vaṇṇena c'eva yasasā ca.|| ||

Tatra sudaɱ bhikkhapava devā tāvatisaɱsā ujjhāyanti khīyanti vipācenti: acchariyaɱ vata bho abbhūtaɱ vata bho ayaɱ hi devaputto pubbe manussa bhūto samāno manussadaḷiddo ahosi, manussakapaṇo manussavarāko. So kāyassa bhedā param maraṇā sugatiɱ saggaɱ lokaɱ upapanno devānaɱ Tāvatiɱsānaɱ sahavyataɱ. So aññe deve atirocati vaṇṇena c'eva yasasā cā ti.|| ||

Atha kho bhikkhave Sakko devānaɱ indo deve Tāvatiɱse āmantesi: mā kho tumhe mārisā etassa devaputtassa ujjhāyittha. Eso kho mārisā devaputto pubbe manussabhūto samāno Tathāgatappavedite dhamma-vinaye saddhaɱ samādiyi. Sīlaɱ samādiyi. Sutaɱ samādiyi. Cāgaɱ samādiyi. Paññaɱ samādiyi. So Tathāgatappavedite dhamma-vinaye saddhaɱ samādiyitvā sīlaɱ samādiyitvā sutaɱ samādiyitvā cāgaɱ samādiyitvā paññaɱ samādiyitvā kāyassa bhedā param maraṇā sugatiɱ saggaɱ lokaɱ upapanno devānaɱ Tāvatiɱsānaɱ sahavyataɱ. So aññe deve atirocati vaṇṇena c'eva yasasā cā ti.|| ||

Atha kho bhikkhave Sakko devānaɱ indo deve Tāvatiɱse anunayamāno tāyaɱ velāyaɱ imā gāthāyo abhāsi:|| ||

Yassa saddhā tathāgate acalā suppatiṭṭhitā||
Sīlañca yassa kalyāṇaɱ ariyakantaɱ pasaɱsitaɱ,|| ||

Saŋghe pasādo yassatthi ujubhūtañ ca dassanaɱ,||
Adaḷiddoti taɱ āhu amoghaɱ tassa jīvitaɱ.|| ||

Tasmā saddhañca sīlañca pasādaɱ dhammadassanaɱ,||
Anuyuñjetha medhāvī saraɱ buddhāna sāsananti.|| ||

 

§

 

Sutta 15

Rāmaṇeyyaka Suttaɱ

[15.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Atha kho Sakko devānaɱ indo yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ aṭṭhāsi. Eka-m-antaɱ ṭhito kho Sakko devānaɱ indo Bhagavantaɱ etad avoca: kin nu kho bhante bhūmirāmaṇeyyakanti?|| ||

(Bhagavā:)||
[233] ārāmacetyā vanacetyā pokkharaññā sunimmitā,||
Manussarāmaṇeyyassa kalaɱ nāgghanti soḷasiɱ.|| ||

Gāme vā yadi vā raññe ninne vā yadi vā thale,||
Yattha arahanto viharanti taɱ bhūmiɱ rāmaṇeyyakanti.|| ||

 

§

 

Sutta 16

Yajamāna Suttaɱ

[16.1][rhyc][bodh] Evaɱ me sutaɱ||
Ekaɱ samayaɱ Bhagavā Rājagahe viharati Gijjhakūṭe pabbate. Atha kho Sakko devānaɱ indo yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ aṭṭhāsi. Eka-m-antaɱ ṭhito kho Sakko devānaɱ indo Bhagavantaɱ gāthāya ajjhabhāsi:|| ||

Yajamānānaɱ manussānaɱ puññapekkhāna pāṇinaɱ,||
Karotaɱ opadhikaɱ puññaɱ kattha dinnaɱ mahapphalanti.|| ||

(Bhagavā:)||
Cattāro ca paṭipannā cattāro ca phale ṭhitā,||
Esa saŋgho ujubhūto paññāsīlasamāhito.|| ||

Yajamānānaɱ manussānaɱ puññapekkhāna pāṇinaɱ,||
Karotaɱ opadhikaɱ puññaɱ saŋghe dinnaɱ mahapphalanti.|| ||

 

§

 

Sutta 17

Vandanā Suttaɱ

[17.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ -||
Tena kho pana samayena Bhagavā divāvihāragato hoti, paṭisallīno. Atha kho Sakko ca devānaɱ indo Brahmā ca sahampatī yena Bhagavā ten'upasaŋkamiɱsu, upasaŋkamitvā paccekaɱ dvārabāhaɱ nissāya aṭṭhaɱsu. Atha kho Sakko devānaɱ indo Bhagavato santike imaɱ gāthaɱ abhāsi:|| ||

Uṭṭhehi vīra vijitasaŋgāma pannabhāra anaṇa vicara loke,||
Cittañ ca te suvimutataɱ cando yathā paṇṇarasāya rattinti.|| ||

(Bhagavā:)||
[234] na kho devānaminda tathāgatā evaɱ vanditabbā. Evañ ca kho devānaminda tathāgatā vanditabbā:|| ||

Uṭṭhehi vīra vijitasaŋgāma satthavāha anaṇa vicara loke,||
Desassu Bhagavā dhammaɱ aññātāro bhavisntī ti.|| ||

 

§

 

Sutta 18

Sakkanamassana Suttaɱ

[18.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Bhūtapubbaɱ bhikkhave Sakko devānaɱ indo mātalī saŋgāhakaɱ āmantesi: yojehi samma mātali sahassayuttaɱ ājañññarathaɱ. Uyyānabhūmiɱ gacchāma subhūmiɱ dassanāyāti.|| ||

Evaɱ bhaddantavāti kho bhikkhave mātali saŋgāhako sakkassa devānamindassa paṭissutvā sahassayuttaɱ ājañññarathaɱ yochetvā sakkassa devānamindassa paṭivedesi: yutto kho te mārisa sahassayutto ājañññaratho yassadāni kālaɱ maññasīti,|| ||

Atha kho bhikkhave Sakko devānaɱ indo vejayantapāsādā orohanto pañjaliko4 sudaɱ puthuddisā namassati. Atha kho bhikkhave mātalisaŋgāhako sakkaɱ devānamindaɱ gāthāya ajjhabhāsi:|| ||

Taɱ namassanti tevijjā sabbe bhūmmā ca khattiyā,||
Cattāro ca Mahārājā tidasā ca yasassino,||
Atha kho nāma so yakkho yaɱ tvaɱ sakka namassasīti,|| ||

(Sakko:)||
Maɱ namassanti tevijjā sabbe bhummā ca khattiyā,||
Cattāro ca Mahārājā tidasā ca yassasino.|| ||

Ahañ ca sīlasampanne cirarattasamāhite,||
Sammā pabbajite vande brahmacariyaparāyane.|| ||

Ye gahaṭṭhā puññakarā sīlavanto upāsakā,||
Dhammena dāraɱ posenti te namassāmi mātalīti.|| ||

(Mātali:)||
Seṭṭhā hi kira lokasmiɱ ye tvaɱ sakka namassasi,||
Ahampi te namassāmi ye namassasi vāsavāti.|| ||

(Therā:)||
Idaɱ vatvāna maghavā devarājā sujampati,||
Puthuddisā namassitvā pamukho rathamāruhīti.|| ||

 

§

 

Sutta 19

Dutiya Sakkanamassana Suttaɱ

[19.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Bhūtapubbaɱ bhikkhave Sakko devānaɱ indo mātalisaŋgāhakaɱ āmantesi: yojehi samma mātali, sahassayuttaɱ ājañññarathaɱ. Uyyānabhūmiɱ gacchāma subhūmiɱ dassanāyāti.|| ||

Evaɱ bhaddantavāti kho bhikkhave mātalisaŋgāhako sakkassa devānamindassa paṭissutvā sahassayuttaɱ ājañññarathaɱ yochetvā sakkassa devānamindassa paṭivedesi: yutto kho te mārisa sahassayutto ājañññaratho yassadāni kālaɱ maññasīti,|| ||

Atha kho bhikkhave Sakko devānaɱ indo vejayantapāsādā orohanto pañjaliko sudaɱ Bhagavantaɱ namassati.|| ||

Atha kho bhikkhave mātalisaŋgāhako sakkaɱ devānamindaɱ gāthāya ajjhabhāsi:|| ||

Yaɱ hi devā manussā ca taɱ namassanti vāsava,||
Atha ko nāma so yakkho yaɱ tvaɱ sakka namassasīti?|| ||

(Sakko:)||
Yo idha Sammā-sambuddho asmiɱ loke sadevake,||
Anomanāmaɱ satthāraɱ taɱ namassāmi mātali.|| ||

Yesaɱ rāgo ca doso ca avijjā ca virājitā,||
Khīṇāsavā arahanto te namassāmi mātali.|| ||

Ye rāgadosavinayā avijjāsamatikkamā,||
Sekhā6 apacayārāmā appamattānusikkhare,||
Te namassāmi mātalīti.|| ||

(Mātali:)||
Seṭṭhā hi kira lokasmiɱ ye tvaɱ sakka namassasi,||
Ahampi te namassāmi ye namassasi vāsavāti.|| ||

(Therā:)||
Idaɱ vatvāna maghavā devarājā sujampati,||
Bhagavantaɱ namassitvā pamukho rathamāruhīti.|| ||

 

§

 

Sutta 20

Tatiya Sakkanamassana Suttaɱ

[20.1][rhyc][bodh] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane ānāthapiṇḍikassa ārāme. Tatra kho Bhagavā bhikkhū āmantesi bhikkhavoti, Bhadante ti te bhikkhū Bhagavato paccassosuɱ. Bhagavā etad avoca:|| ||

Bhūtapubbaɱ bhikkhave Sakko devānaɱ indo mātalisaŋgāhakaɱ āmantesi: yojehi samma mātali, sahassayuttaɱ ājaññarathaɱ uyyānabhūmiɱ gacchāma subhūmiɱ dassanāyāti.|| ||

[236] evaɱ bhaddantavāti kho bhikkhave, mātali saŋgāhako sakkassa devānamindassa paṭissutvā sahassayuttaɱ ājañññarathaɱ yochetvā sakkassa devānamindassa paṭivedesi: yutto kho te mārisa, sahassayutto ājañññaratho, yassaḷdāni kālaɱ maññasīti. Atha kho bhikkhave Sakko devānaɱ indo vejayantapāsādā orohanto pañjaliko sudaɱ bhikkhu-saŋghaɱ namassati. Atha kho bhikkhave, mātali saŋgāhako sakkaɱ devānamindaɱ gāthāhi1 ajjhabhāsi:|| ||

Taɱ hi ete namasseyyuɱ pūtidehasayā narā,||
Nimuggā kuṇapasmete khuppipāsā samappitā.|| ||

Kin nu tesaɱ pihayasi anāgārāna vāsava,||
Ācāraɱ isinaɱ brūhi taɱ suṇoma vaco tavāti.|| ||

(Sakko:)||
Etaɱ tesaɱ pihayāmi anāgārāna mātali,||
Yamhā gāmā pakkamanti anapekkhā vajanti te.|| ||

Na tesaɱ koṭṭhe openti na kumbhe na khalopiyaɱ,||
Paraniṭṭhitamesānā tena yāpenti subbatā,||
Sumantamantino dhīrā tuṇhībhūtā samañcarā,|| ||

Devā viruddhā asurehi puthu maccā ca Mātali,||
Aviruddhā viruddhesu attadaṇḍesu nibbutā,||
Sādānesu anādānā te namassāmi mātalīti,|| ||

(Mātali:)||
Seṭṭhā hi kira lokasmiɱ ye tvaɱ sakka namassasi,||
Ahampi te namassāmi ye namassasi vāsavāti|| ||

(Therā:)||
Idaɱ sutvāna maghavā devarājā sujampati,||
Bhikkhusaŋghaɱ namassitvā pamukho rathamāruhīti.|| ||

 


3. Sakkapañcakaɱ


 

Sutta 21

Jhatvā Suttaɱ

[21.1][rhyc][bodh] Evaɱ me sutaɱ||
Ekaɱ samayaɱ Bhagavā [237] Sāvatthiyaɱ viharati Jetavane Anāthapiṇḍikassa ārāme. Atha kho Sakko devānaɱ indo yena Bhagavā ten'upasaŋkami. Upasaŋkamitvā Bhagavantaɱ abhivādetvā eka-m-antaɱ aṭṭhāsi. Eka-m-antaɱ ṭhito kho Sakko devānaɱ indo Bhagavantaɱ gāthāya ajjhabhāsi:|| ||

Kiɱ su jhatvā sukhaɱ seti kiɱ su jhatvā na socati,||
Kissassa ekaDhammassa vadhaɱ rocesi gotamāti.|| ||

(Bhagavā:)||
Kodhaɱ jhatvā sukhaɱ seti kodhaɱ jhatvā na socati,||
Kodhassa visamūlassa madhuraggassa vāsava,||
Vadhaɱ ariyā pasaɱsanti taɱ hi jhatvā na socatī ti.|| ||

 

§

 

Sutta 22

Dubbaṇṇiya Suttaɱ

[22.1][bit][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ-||
Bhūtapubbaɱ bhikkhave, aññataro yakkho dubbaṇṇo okoṭimako sakkassa devānamindassa āsane nisinno ahosi. Tatra sudaɱ bhikkhave devā Tāvatiɱsā ujjhāyanti khīyanti vipācenti: acchariyaɱ vata bho, abbhūtaɱ vata bho, ayaɱ yakkho dubbaṇṇo okoṭimako sakkassa devānamindassa āsane nisinnoti. Yathā yathā kho bhikkhave, devā Tāvatiɱsā ujjhāyanti khīyanti vipācenti, tathā tathā so yakkho abhirūpataro c'eva hoti dassanīyataro ca pāsādikataro ca.|| ||

Atha kho bhikkhave devā Tāvatiɱsā yena Sakko devānaɱ indo ten'upasaŋkamiɱsu. Upasaŋkamitvā sakkaɱ devānamindaɱ etad avocuɱ: idha te mārisa aññataro yakkho dubbaṇṇo okoṭimako tumhākaɱ āsane nisinno. Tatra sudaɱ mārisa devā Tāvatiɱsā ujjhāyanti khīyanti vipācenti: acchariyaɱ vata bho abbhūtaɱ vata bho ayaɱ yakkho dubbaṇṇo okoṭimako [238] sakkassa devānamindassa āsane nisinnoti. Yathā yathā kho mārisa devā Tāvatiɱsā ujjhāyanti khīyanti vipācenti, tathā tathā so yakkho abhirūpataro c'eva hoti dassanīyataro ca pāsādikataro cāti. So hi nūna mārisā kodhabhakkho yakkho bhavissatī ti.|| ||

Atha kho bhikkhave, Sakko devānaɱ indo yena so kodhabhakkho yakkho ten'upasaŋkami. Upasaŋkamitvā ekaɱsaɱ uttarāsaŋgaɱ karitvā dakkhiṇajāṇumaṇḍalaɱ paṭhaviyaɱ nihantvā yena so kodhabhakkho yakkho tenañjaliɱ paṇāmetvā tikkhattuɱ nāmaɱ sāvesi Sakko'haɱ1 mārisa devānaɱ indo, Sakko'haɱ mārisa devānaɱ indoti. Yathā yathā kho bhikkhave, Sakko devānaɱ indo nāmaɱ sāveti, tathā tathā so yakkho dubbaṇṇataro c'eva ahosi okoṭimakataro ca. Dubbaṇṇataro c'eva hutvā okoṭimakataro ca tatthevantaradhāyīti.|| ||

Atha kho bhikkhave Sakko devānaɱ indo sake āsane nisīditvā deve Tāvatiɱse anunayamāno tāyaɱ velāyaɱ imā gāthāyo abhāsi.|| ||

Na sūpahatacitto'mhi nāvattena suvānayo,||
Na vo cirāhaɱ kujhāmi kodho mayi nāvatiṭṭhati.|| ||

Kuddho'haɱ pharusaɱ brūmi na ca dhammāni kittaye,||
Sanniggaṇhāmi attānaɱ sampassaɱ atthamattanoti.|| ||

 

§

 

Sutta 23

Māyā Suttaɱ

[23.1][rhyc][bodh] Evaɱ me sutaɱ||
Ekaɱ samayaɱ Sāvatthiyaɱ -||
Bhūtapubbaɱ bhikkhave, vepacitti asurindo ābādhiko ahosi, dukkhito bāḷhagilāno. Atha kho bhikkhavo, Sakko devānaɱ indo yena vepacitti asurindo ten'upasaŋkami gilānapucchako.|| ||

Addasā kho bhikkhave, vepacitti asurindo sakkaɱ devānamindaɱ dūrato'va āgacchantaɱ. Disvāna sakkaɱ devānamindaɱ etad avoca: tikiccha maɱ devānamindāti.|| ||

[239] Vācehi maɱ vepacitti sambarīmāyanti. Na tāvāhaɱ vācemi yāvāhaɱ mārisa asure paṭipucchāmīti.|| ||

Atha kho bhikkhave vepacitti asurindo asure paṭipucchi: vācemahaɱ mārisā sakkaɱ devānamindaɱ sambarīmāyanti. Mā kho tvaɱ mārisa vācesi sakkaɱ devānamindaɱ sambarīmāyanti.|| ||

Atha kho bhikkhave vepacitti asurindo sakkaɱ devānamindaɱ gāthāya ajjhabhāsi:||
Māyāvī maghavā sakka devarājā sujampati,||
Upeti Nirayaɱ ghoraɱ sambaro'va sataɱ samanti.|| ||

 

§

 

Sutta 24

Accaya Suttaɱ

[24.1][rhyc][bodh] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tena kho pana samayena dve bhikkhū sampayojesuɱ. Tatreko bhikkhu accasarā. Atha kho so bhikkhu tassa bhikkhuno santike accayaɱ accayato deseti. So bhikkhu na paṭigaṇhāti.|| ||

Atha kho sambahulā bhikkhū yena Bhagavā ten'upasaŋkamiɱsu. Upasaŋkamitvā Bhagavantaɱ abhivādetvā eka-m-antaɱ nisīdiɱsu. Eka-m-antaɱ nisinnā kho te bhikkhū Bhagavantaɱ etad avocuɱ: idha bhante dve bhikkhū sampayojesuɱ. Tatreko bhikkhu accasarā. Atha kho so bhante bhikkhu tassa bhikkhuno santike accayaɱ accayato deseti. So bhikkhu na paṭigaṇhātī ti.|| ||

Dve me bhikkhave bālā: yo ca accayaɱ accayato na passati, yo ca accayaɱ desentassa yathādhammaɱ na paṭigaṇhāti. Ime kho bhikkhave, dve bālā. Dve me bhikkhave paṇḍitā: yo ca accayaɱ accayato passati, yo ca accayaɱ desentassa yathādhammaɱ paṭigaṇhāti. Ime kho bhikkhave dve paṇḍitā,|| ||

Bhūtapubbaɱ bhikkhave Sakko devānaɱ indo sudhammāyaɱ sabhāyaɱ deve Tāvatiɱse anunayamāno tāyaɱ velāyaɱ imaɱ gāthā abhāsi.|| ||

[240] Kodho vo vasamāyātu mā ca mitte hi vo jarā,||
Agarahiyaɱ mā garahittha mā ca bhāsittha pesuṇaɱ,||
Atha pāpajanaɱ kodho pabbato cābhimaddatī ti.|| ||

 

§

 

Sutta 25

Akkodha Suttaɱ

[25.1][rhyc][bodh] Evaɱ me sutaɱ||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme. Tena kho pana samayena dve bhikkhū sampayojesuɱ. Tatreko bhikkhu accasarā. Atha kho so bhikkhu tassa bhikkhuno santike accayaɱ accayato deseti. So bhikkhu na paṭigaṇhāti.|| ||

Atha kho sambahulā bhikkhū yena Bhagavā ten'upasaŋkamiɱsu. Upasaŋkamitvā Bhagavantaɱ abhivādetvā eka-m-antaɱ nisīdiɱsu. Eka-m-antaɱ nisinnā kho te bhikkhū Bhagavantaɱ etad avocuɱ: idha bhante dve bhikkhū sampayojesuɱ. Tatreko bhikkhu accasarā. Atha kho so bhante bhikkhu tassa bhikkhuno santike accayaɱ accayato deseti. So bhikkhu na paṭigaṇhātī ti.|| ||

Dve me bhikkhave bālā: yo ca accayaɱ accayato na passati, yo ca accayaɱ desentassa yathādhammaɱ na paṭigaṇhāti. Ime kho bhikkhave, dve bālā. Dve me bhikkhave paṇḍitā: yo ca accayaɱ accayato passati, yo ca accayaɱ desentassa yathādhammaɱ paṭigaṇhāti. Ime kho bhikkhave dve paṇḍitā.|| ||

Bhūtapubbaɱ bhikkhave Sakko devānaɱ indo sudhammāyaɱ sabhāyaɱ deve Tāvatiɱse anunayamāno tāyaɱ loyaɱ imaɱ gāthaɱ abhāsi.|| ||

Mā vo kodho ajjhabhavi mā ca kujjhittha kujjhanaɱ,||
Akkodho avihiɱsā ca ariyesu vasati sadā Atha pāpajanaɱ kodho pabbato vābhimaddatī ti.|| ||

Sakkasaɱyuttaɱ samattaɱ.|| ||

Sagāthavaggo niṭṭhito.

 


Contact:
E-mail
Copyright Statement   Webmaster's Page