Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
2. Nidāna Vagga
12. Nidāna-Saɱyutta
1. Buddha Vagga

Sutta 2

Vibhaŋga

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][rhyc][than] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

[2][rhyc][than] Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Paṭiccasamuppādaɱ vo bhikkhave, desissāmi vibhajissāmi||
taɱ suṇātha sādhukaɱ manasikarotha bhāsissāmī' ti.|| ||

Evaɱ bhante' ti kho te bhikkhū Bhagavato paccassosuɱ.|| ||

[3][rhyc][than] Bhagavā etad avoca:|| ||

Katamo ca bhikkhave, paṭiccasamuppādo?|| ||

Avijjā-paccayā bhikkhave sankhārā||
sankhāra-paccayā viññānaɱ||
viññāṇa-paccayā nāma-rūpaɱ ||
nāma-rūpa -paccayā saḷāyatanaɱ||
saḷāyatana-paccayā phasso||
phassa-paccayā vedanā||
vedanā-paccayā taṇhā||
taṇhā-paccayā upādānaɱ||
upādāna-paccayā bhavo||
bhava-paccayā jāti||
jāti-paccayā jarā-maraṇaɱ soka-parideva-dukkha-domanassupāyasā sambhavanti.|| ||

Evam etassa kevalassa dukkhakkhandhassa samudayo hoti.|| ||

Ayaɱ vuccati bhikkhave samuppādo.|| ||

[4][rhyc][than] Katamañ ca bhikkhave, jarā-maraṇaɱ?|| ||

Yā tesaɱ tesaɱ sattānaɱ tamhi tamhi sattanikāye jarā jīraṇatā khaṇḍiccaɱ pāliccaɱ valittacatā āyuno saɱhāni indriyānaɱ paripāko.|| ||

Ayaɱ vuccati jarā.|| ||

Katamañ ca bhikkhave, maraṇaɱ?|| ||

Yā tesaɱ tesaɱ sattānaɱ tamhā tamhā sattanikāyā cuticavanatā bhedo antaradhānaɱ maccumaraṇaɱ kālakiriyā khandhānaɱ bhedo kalebarassa nikkhepo||
jīvitindriyassa upacchedo.|| ||

Idaɱ vuccati maraṇaɱ.|| ||

Iti ayañ ca jarā idañ ca maraṇaɱ.|| ||

Idaɱ vuccati bhikkhave, jarā-maraṇaɱ.|| ||

[5][rhyc][than] Katamā ca bhikkhave, jāti?|| ||

Yā tesaɱ tesaɱ sattānaɱ tamhi tamhi sattanikāye jāti sañjāti okkanti nibbatti abhinibbatti,||
khandhānaɱ pātubhāvo āyatanānaɱ paṭilābho.|| ||

Ayaɱ vuccati bhikkhave, jāti.|| ||

[6][rhyc][than] Katamo ca bhikkhave, bhavo?|| ||

Tayo'me bhikkhave, bhavā:||
kāma-bhavo,||
rūpa-bhavo,||
arūpa-bhavo.|| ||

Ayaɱ vuccati bhikkhave, bhavo.|| ||

[7][rhyc][than] Katamañ ca bhikkhave upādānaɱ?|| ||

Cattārimāni bhikkhave, upādānāni:||
kāmūpadānaɱ,||
diṭṭhūpādānaɱ,||
sīlabbatūpādānaɱ,||
attavādūpādānaɱ.|| ||

Idaɱ vuccati bhikkhave upādānaɱ.|| ||

[8][rhyc][than] Katamā ca bhikkhave taṇhā?|| ||

Chayime bhikkhave, taṇhā-kāyā:||
rūpa-taṇhā||
sadda-taṇhā||
gandha-taṇhā||
rasa-taṇhā||
phoṭṭhabba-taṇhā||
dhamma-taṇhā.|| ||

Ayaɱ vuccati bhikkhave taṇhā.|| ||

[9][rhyc][than] Katamā ca bhikkhave vedanā?|| ||

Chayime bhikkhave, vedanā-kāyā:||
cakkhu-samphassajā vedanā,||
sota-samphassajā vedanā,||
ghāṇa-samphassajā vedanā,||
jivhā-samphassajā vedanā,||
kāya-samphassajā vedanā,||
mano-samphassajā vedanā.|| ||

Ayaɱ vuccati bhikkhave vedanā.|| ||

[10][rhyc][than] Katamo ca bhikkhave phasso?|| ||

Chayime bhikkhave, phassa-kāyā:||
cakkhu-samphasso,||
sota-samphasso,||
ghāṇa-samphasso,||
jivhā-samphasso,||
kāya-samphasso,||
mano-samphasso.|| ||

Ayaɱ vuccati bhikkhave, phasso.|| ||

[11][rhyc][than] Katamañ ca bhikkhave saḷāyatanaɱ?|| ||

Cakkhāyatanaɱ,||
sotāyatanaɱ,||
ghāṇāyatanaɱ,||
jivhāyatanaɱ,||
kāyāyatanaɱ,||
manāyatanaɱ.|| ||

Idaɱ vuccati bhikkhave, saḷāyatanaɱ.|| ||

[12][rhyc][than] Katamañ ca bhikkhave nāma-rūpaɱ?|| ||

Vedanā,||
saññā,||
cetanā,||
phasso,||
mana-sikāro.|| ||

Idaɱ vuccati nāmaɱ.|| ||

Cattāro ca mahābhūtā,||
catunnaɱ ca mahābhūtānaɱ upādāya-rūpaɱ.|| ||

Idaɱ vuccati rūpaɱ.|| ||

Iti idañ ca nāmaɱ,||
idañ ca rūpaɱ.|| ||

Idaɱ vuccati bhikkhave, nāmarūpaɱ.|| ||

[13][rhyc][than] Katamañ ca bhikkhave viññāṇaɱ?|| ||

Chayime bhikkhave, viññāṇa-kāyā:||
cakkhu-viññāṇaɱ||
sota-viññāṇaɱ||
ghāṇa-viññāṇaɱ||
jivhā-viññāṇaɱ||
kāya-viññāṇaɱ||
mano-viññāṇaɱ.|| ||

Idaɱ vuccati bhikkhave, viññāṇaɱ.|| ||

[14][rhyc][than] Katame ca bhikkhave sankhārā?|| ||

Tayo'me bhikkhave, sankhārā:||
kāya-sankhāro||
vacī-sankhāro||
citta-sankhāro.|| ||

Ime vuccanti bhikkhave, sankhārā.|| ||

[15][rhyc][than] Katamā ca bhikkhave avijjā?|| ||

Yaɱ kho bhikkhave dukkhe aññāṇaɱ,||
dukkha-samudaye aññāṇaɱ,||
dukkha-nirodhe aññāṇaɱ,||
dukkha-nirodha-gāminiyā paṭipadāya aññāṇaɱ.|| ||

Ayaɱ vuccati bhikkhave, avijjā.|| ||

[16][rhyc][than] Iti kho bhikkhave avijjā-paccayā sankhārā,||
sankhāra-paccayā viññāṇaɱ,||
viññāṇa-paccayā nāma-rūpaɱ,||
nāmarūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ,||
soka-parideva-dukkha-domanassūpāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

[17][rhyc][than] Avijjāya tv eva asesavirāga-nirodhā sankhāra-nirodho||
sankhāra-nirodhā viññāṇa-nirodho||
viññāṇa-nirodhā nāma-rūpa -nirodho||
nāma-rūpa -nirodhā saḷāyatana-nirodho||
saḷāyatana-nirodhā phassa-nirodho||
phassa-nirodhā vedanā-nirodho||
vedanā-nirodhā taṇhā-nirodho||
taṇhā-nirodhā upādāna-nirodho||
upādāna-nirodhā bhava-nirodho||
bhava-nirodhā jāti-nirodho||
jāti-nirodhā jarā-maraṇaɱ soka-parideva-dukkha-domanāssupāyāsā nirujjhanti.|| ||

Evam etassa kevalassa dukkhakkhandhassa nirodho hotī ti|| ||


Contact:
E-mail
Copyright Statement   Webmaster's Page