Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saŋyutta
II. Āhāra Vagga

Sutta 17

Acela-Kassapa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[18]

[1][pts][than][bodh] Evaɱ me sutaɱ||
Ekaɱ samayaɱ Bhagavā Rājagahe viharati Vephavane Kalandakakanivāpe.|| ||

[19] Atha kho Bhagavā pubbaṇhasamayaɱ nivāsetvā pattacīvaramādāya Rājagahaɱ piṇḍāya pāvisi.|| ||

Addasā kho acelo Kassapo Bhagavantaɱ dūratova āgaccantaɱ.|| ||

Disvāna yena Bhagavā ten'upasaŋkami.||
Upasaŋkamitvā Bhagavatā saddhiɱ sammodi.||
Sammodanīyaɱ kathaɱ sārānīyaɱ vītisāretvā eka-m-antaɱ aṭṭhāsi.|| ||

Eka-m-antaɱ ṭhito kho acelo Kassapo Bhagavantaɱ etad avoca:||
puccheyyāma mayaɱ bhavantaɱ Gotamaɱ kañcideva desaɱ||
sace no bhavaɱ Gotamo okāsaɱ karoti pañhassa veyyākaraṇāyā'ti.|| ||

Akālo kho tāva Kassapa, pañhassa.|| ||

Antaragharaɱ paviṭṭhambhāti.|| ||

Dutiyam pi kho acelo Kassapo Bhagavantaɱ etad avoca:||
puccheyyāma mayaɱ bhavantaɱ Gotamaɱ kañcideva desaɱ||
sace no bhavaɱ Gotamo okāsaɱ karoti pañhassa vyekaraṇāyā'ti.|| ||

Akālo kho tāva Kassapa pañhassa||
antaragharaɱ paviṭṭhambhāti.|| ||

Tatiyam pi kho acelo Kassapo Bhagavantaɱ etad avoca:||
puccheyyāma mayaɱ bhavantaɱ Gotamaɱ kañcideva desaɱ||
sace no bhavaɱ Gotamo okāsaɱ karoti pañhassa veyyākaraṇāyā'ti.|| ||

Akālo kho tāva Kassapa pañhassa||
antaragharaɱ paviṭṭhambhāti.|| ||

Evaɱ vutte acelaKassapo Bhagavantaɱ etad avoca:|| ||

"Na kho pana mayaɱ bhavantaɱ Gotamaɱ bahudeva pucchitukāmā' ti.|| ||

"Puccha Kassapa, yadākaŋkhasī" ti.|| ||

"Kin nu kho bho Gotama||
sayaɱ kataɱ dukkhan" ti?|| ||

"Mā hevaɱ Kassapā" ti Bhagavā avoca.|| ||

"Kim pana bho Gotama||
parakataɱ dukkhan" ti?|| ||

"Mā hevaɱ Kassapā" ti Bhagavā avoca.|| ||

"Kin nu kho bho Gotama||
sayaɱ katañ ca parakatañ ca dukkhan" ti?|| ||

"Mā hevaɱ Kassapā" ti Bhagavā avoca.|| ||

[20] Kim pana bho Gotama||
asayaɱkāraɱ aparakāraɱ adhicca-samuppannaɱ dukkhan" ti?|| ||

"Mā hevaɱ Kassapā" ti Bhagavā avoca.|| ||

"Kin nu kho bho Gotama||
n'atthi dukkhan" ti?|| ||

"Na kho Kassapa||
n'atthi dukkhaɱ.|| ||

Atthi kho Kassapa||
dukkhan" ti.|| ||

"Tena hi bhavaɱ Gotamo dukkhaɱ na jānāti na passatī" ti?|| ||

"Na khvāhaɱ Kassapa||
dukkhaɱ na jānāmi||
na passāmi.|| ||

Jānāmi khvāhaɱ Kassapa||
dukkhaɱ||
passāmi khvāhaɱ Kassapa dukkhan" ti.|| ||

"'Kin nu kho bho Gotama||
sayaɱkataɱ dukkhan' ti||
iti puṭṭho samāno||
'mā hevaɱ Kassapā' ti vadesi.|| ||

'Kim pana bho Gotama parakataɱ dukkhan' ti||
iti puṭṭho samāno||
'mā hevaɱ Kassapā' ti vadesi.|| ||

'Kin nu kho bho Gotama||
sayaɱkatañ ca parakatañ ca dukkhan' ti||
iti puṭṭho samāno||
'mā hevaɱ Kassapā' ti vadesi.|| ||

'Kim pana bho Gotama asayaɱkāraɱ aparakāraɱ adhicca-samuppannaɱ dukkhan' ti||
iti puṭṭho samāno||
'mā hevaɱ Kassapā' ti vadesi.|| ||

'Kin nu kho bho Gotama n'atthi dukkhan' ti||
iti puṭṭho samāno||
'na kho Kassapa n'atthi dukkhaɱ||
atthi kho Kassapa dukkhan' ti vadesi.|| ||

'Tena hi bhavaɱ Gotamo dukkhaɱ na jānāti||
na passatī' ti||
iti puṭṭho samāno||
'na khvāhaɱ Kassapa||
dukkhaɱ na jānāmi na passāmi.||
Jānāmi khvāhaɱ Kassapa dukkhaɱ||
passāmi khvāhaɱ Kassapa dukkhan' ti vadesi.|| ||

Ācikkhatu me bhante Bhagavā dukkhaɱ||
desetu me bhante Bhagavā dukkhan" ti.|| ||

"'So karoti so paṭisaŋvediyatī' ti kho Kassapa||
ādito sato 'sayaɱ kataɱ dukkhan' ti||
iti vadaɱ sassataɱ etaɱ pareti.|| ||

'Añño karoti añño paṭisaŋvediyatī' ti kho Kassapa||
vedanāhitunnassa sato||
'paraɱkataɱ dukkhan' ti||
iti vadaɱ ucchedaɱ etaɱ pareti.|| ||

Ete te Kassapa||
ubho ante anupagamma majjhena Tathāgato dhammaɱ deseti:|| ||

avijjā-paccayā sankhārā,||
saŋkāra-paccayā viññāṇaɱ,||
viññāṇa-paccayā nāmarūpaɱ,||
nāmarūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanassūpāyāsā sambhavanti.|| ||

Evam etassa kevalassa dukkha-kkhandhassa samudayo hoti.|| ||

Avijjāya tv eva [21] asesa-virāga-nirodhā sankhāra-nirodho,||
sankhāra-nirodhā viññāṇanirodho||
viññāṇa-nirodhā nāmarūpanirodho||
nāmarūpa-nirodhā saḷāyatananirodho||
saḷāyata-nanirodhā phassanirodho||
phassa-nirodhā vedanānirodho||
vedanā-nirodhā taṇhānirodho||
taṇhā-nirodhā upādānanirodho||
upādāna-nirodhā bhavanirodho||
bhava-nirodhā jātinirodho||
jāti-nirodhā jarā-maraṇaɱ||
soka-parideva-dukkha-domanassūpāyāsā nirujjhanti.|| ||

Evam etassa kevalassa dukkha-kkhandhassa nirodho hotī'ti.|| ||

Evaɱ vutte acelo Kassapo Bhagavantaɱ etad avoca:|| ||

"Abhikkantaɱ bhante!|| ||

Abhikkantaɱ bhante!|| ||

Seyyathā pi bhante||
nikkujjitaɱ vā ukkujjeyya||
paṭicchannaɱ vā vivareyya||
mūlhassa vā maggaɱ ācikkheyya||
andhakāre vā telapajjotaɱ dhāreyya||
cakkhumanto rūpāni dakkhintī ti.|| ||

Evam evaɱ Bhagavatā aneka-pariyāyena dhammo pakāsito||
esāhaɱ bhante Bhagavantaɱ saraṇaɱ gacchāmi||
dhammañca bhikkhu-saŋghañ ca.|| ||

Labheyyāhambhante||
Bhagavato santike pabbajjaɱ||
labheyyaɱ upasampadan" ti.|| ||

"Yo kho Kassapa||
aññatitthiyapubbo imasmiɱ dhamma-vinaye ākaŋkhati pabbajjaɱ.|| ||

Ākaŋkhati upasampadaɱ||
so cattāro māse parivasati.|| ||

Catunnaɱ māsānaɱ accayena parivutthaparivāsaɱ āraddhacittā bhikkhū.|| ||

Ākaŋkhamānā pabbājenti upasampādenti bhikkhubhāvāya||
api ca mayā puggalavemattatā viditā" ti.|| ||

"Sace bhante||
aññatitthiyapubbā imasmiɱ dhamma-vinaye ākaŋkhantā pabbajjaɱ||
ākaŋkhantā upasampadaɱ cattāro māse parivasanti.|| ||

Catunnaɱ māsānaɱ accayena parivutthaparivāse āraddhacittā bhikkhu ākaŋkhamānā pabbājenti upasampādenti bhikkhubhāvāya||
ahaɱ cattāri vassāni parivasissāmi||
catunnanañ ca vassānaɱ accayena parivutthaparivāsaɱ āraddhacittā bhikkhū pabbājentu upasampādentu bhikkhubhāvāyā" ti.|| ||

Alattha kho acelo Kassapo Bhagavato santike pabbajjaɱ.|| ||

Alattha upasampadaɱ.|| ||

Acirūpasampanno ca panāyasmā Kassapo eko vūpakaṭṭho appamatto ātāpī pahitatto viharanto na cirass'eva [22] yassatthāya kulaputtā samma-d-eva agārasmā anagāriyaɱ pabbajanti||
tadanuttaraɱ brahmacariyapariyosānaɱ diṭṭhe va dhamme sayaɱ abhiññā sacchikatvā upasampajja vihāsi.|| ||

Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyāti abbhaññāsi.|| ||

Aññataro ca panāyasmā Kassapo arahataɱ ahosī'ti.|| ||


Contact:
E-mail
Copyright Statement   Webmaster's Page