Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saŋyutta
II. Āhāra Vagga

Sutta 19

Bāla-Paṇḍita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[23]

[1][pts][than][olds][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

2. "Avijjā-nīvaraṇassa bhikkhave,||
bālassa taṇhāya sampa- [24] yuttassa||
evam ayaɱ kāyo samudāgato.|| ||

Iti ayaɱ c'eva kāyo bahiddhā ca nāmarūpaɱ||
itth'etaɱ dvayaɱ dvayaɱ paṭicca phasso saḷevāyatanāni||
yehi puṭṭho bālo sukha-dukkhaɱ paṭisaŋvediyati||
etesaɱ vā aññatarena.|| ||

3. Avijjā-nīvaraṇassa bhikkhave,||
paṇḍitassa taṇhāya sampayuttassa||
evam ayaɱ kāyo samudāgato.|| ||

Iti ayaɱ c'eva kāyo bahiddhā ca nāmarūpaɱ||
itth'etaɱ dvayaɱ dvayaɱ paṭicca phasso saḷevāyatanāni||
yehi puṭṭho paṇḍito sukhadukkhaɱ paṭisaŋvediyati||
etesaɱ vā aññatarena.|| ||

4. Tatra bhikkhave, ko viseso||
ko adhippāyo||
kiɱ nānākaraṇaɱ paṇḍitassa bālenāti?"|| ||

5. "Bhagavaɱ-mūlakā no bhante, dhammā,||
Bhagavaɱ-nettikā||
Bhagavaɱ-paṭisaraṇā.|| ||

Sādhu vata bhante,||
Bhagavantaɱ yeva paṭibhātu etassa bhāsitassa attho.|| ||

Bhagavato sutvā bhikkhū dhāressantī" ti.|| ||

6. "Tena hi bhikkhave,||
suṇātha||
sādhukaɱ manasikarotha||
bhāsissāmī" ti.|| ||

"Evaɱ bhante"||
ti kho te bhikkhū Bhagavato paccassosuɱ.|| ||

Bhagavā etad avoca:|| ||

7. "Yāya ca bhikkhave, avijjāya nivutassa bālassa||
yāya ca taṇhāya sampayuttassa||
ayaɱ kāyo samudāgato,||
sā c'eva avijjā bālassa appahīnā||
sā ca taṇhā aparikkhīṇā.|| ||

Taɱ kissa hetu?|| ||

Na bhikkhave, bālo acari brahmacariyaɱ,||
sammā-dukkha-kkhayāya.|| ||

Tasmā bālo kāyassa bhedā kāyūpago hoti.|| ||

So kāyūpago samāno na parimuccati jātiyā||
jarāya maraṇena||
sokehi||
paridevehi||
dukkhehi||
domanassehi||
upāyāsehi.|| ||

Na parimuccati dukkhasmā ti vadāmi.|| ||

8. Yāya ca bhikkhave, avijjāya nivutassa paṇḍitassa||
yāya ca taṇhāya sampayuttassa||
ayaɱ kāyo samudāgato,||
sā c'eva avijjā paṇḍitassa pahīnā||
sā ca taṇhā parikkhīṇā.|| ||

Taɱ kissa hetu?|| ||

Acari bhikkhave, paṇḍito brahmacariyaɱ||
[25] sammā-dukkha-kkhayāya.|| ||

Tasmā paṇḍito kāyassa bhedā na kāyūpago hoti.|| ||

So akāyūpago samāno parimuccati jātiyā||
jarāya maraṇena||
sokehi||
paridevehi||
dukkhehi||
domanassehi||
upāyāsehi.|| ||

Parimuccati dukkhasmā ti vadāmi.|| ||

Ayaɱ kho bhikkhave,||
viseso ayaɱ adhippāyo,||
idaɱ nānākaraṇaɱ paṇḍitassa bālena,||
yad idaɱ brahmacariyavāso" ti.|| ||


Contact:
E-mail
Copyright Statement   Webmaster's Page