Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
III. Dasabalā Vagga

Sutta 25

Bhumija Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ|| ||

Ekaɱ samayaɱ Sāvatthiyaɱ-|| ||

2. Atha kho āyasmā Bhumijo sāyaṇhasamayaɱ patisallānā vuṭṭhito yenāyasmā Sāriputto ten'upasaŋkami.|| ||

[38] Upasaŋkamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Bhumijo āyasmantaɱ Sāriputtaɱ etad avoca:|| ||

3. Santāvuso Sāriputta,||
eke samaṇa-brāhmaṇā kammavādā sayaɱkataɱ sukhadukkhaɱ paññāpenti.|| ||

Santi pan'āvuso Sāriputta,||
eke samaṇa-brāhmaṇā kammavādā paraɱ-kataɱ sukhadukkhaɱ paññāpenti.|| ||

Santi pan'āvuso Sāriputta,||
eke samaṇa-brāhmaṇā kammavādā sayaɱ-katañ ca paraɱ-katañ ca sukhadukkhaɱ paññāpenti.|| ||

Santi pan'āvuso Sāriputta,||
eke samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ sukhadukkhaɱ paññāpenti.|| ||

4. Idha pan'āvuso Sāriputta, Samaṇo Gotamo kiɱ vādī,||
kim akkhāyī?|| ||

Kathaɱ vyākaramānā ca mayaɱ vuttavādino c'eva Samaṇassa Gotamassa assāma||
na ca Samaṇaɱ Gotamaɱ abhūtena abbhācikkheyyāma?|| ||

Dhammassa cānudhammaɱ vyākareyyāma||
na ca koci sahadhammiko vādānupāto gārayhaɱ ṭhānaɱ āgaccheyyā" ti?|| ||

Paṭicca-samuppannaɱ kho āvuso dukkhaɱ vuttaɱ Bhagavatā.

Kim paṭicca?|| ||

Phassaŋ paṭicca.|| ||

Iti vadaɱ vuttavādī c'eva Bhagavato assa||
na ca Bhagavantaɱ abhūtena abbhācikkheyya||
dhammassa cānudhammaɱ vyākareyya||
na ca koci sahadhammiko vādānupāto gārayhaɱ ṭhānaɱ āgaccheyya.|| ||

8. Tatra āvuso ye te samaṇa-brāhmaṇā kammavādā sayaɱ-kataɱ dukkhaɱ paññāpenti,||
tad api phassapacacayā.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti||
tad api phassa-paccayā.|| ||

Ye pi te samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti,||
tad api phassa-paccayā.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti,||
tad api phassa-paccayā.|| ||

9. Tatra āvuso ye te samaṇa-brāhmaṇā kammavādā sayaɱ-kataɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te [39] samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjatī' ti.|| ||

 


 

Assosi kho āyasmā Ānando āyasmato Sāriputtassa āyasmatā bhūmijena saddhiɱ imaɱ kathāsallāpaɱ.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā emantaɱ nisīdi.|| ||

Eka-m-antaɱ nisinno kho āyasmā Ānando yāvatako āyasmato Sāriputtassa āyasmatā bhūmijena saddhiɱ ahosi kathāsallāpo,||
taɱ sabbaɱ Bhagavato ārocesi.|| ||

 


 

Sādhu sādhu Ānanda,||
yathā taɱ Sāriputto ca sammā vyākaramāno vyākareyya,||
paṭicca-samuppannaɱ kho Ānanda dukkhaɱ vuttaɱ mayā.|| ||

Kiɱ paṭicca?|| ||

Phassaŋ paṭicca.|| ||

Iti vadaɱ vuttavādī c'eva me assa||
na ca maɱ abhūtena abbhācikkheyya,||
dhammassa cānudhammaɱ vyākareyya,||
na ca ko ci sahadhammiko vādānupāto gārayhaɱ ṭhānaɱ āgaccheyya.|| ||

13. Tatr'Ānanda, ye te samaṇa-brāhmaṇā kammavādā sayaɱ-kataɱ dukkhaɱ paññāpenti,||
tad api phassa-paccayā.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti,||
tad api phassa-paccayā.|| ||

Ye pi te samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti,||
tad api phassa-paccayā.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti,||
tad api phassa-paccayā.|| ||

14. Tatr'Ānanda ye pi te samaṇa-brāhmaṇā kammavādā sayaɱ-kataɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti, te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti, te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti, te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

 


 

13. Kāye vā h'Ānanda sati kāya-sañcetanā-hetu uppajjati [40] ajjhattaɱ sukhadukkhaɱ,||
vācāya vā h'Ānanda sati vacī-sañcetanā-hetu uppajjati ajjhattaɱ sukhadukkhaɱ,||
mane vā h'Ānanda sati mano-sañcetanā-hetu uppajjati ajjhattaɱ sukhadukkhaɱ.|| ||

Avijjā-paccayā va sāmaɱ vā taɱ Ānanda kāya-sankhāraɱ abhisaŋkharoti||
yam paccayāssa taɱ uppajjati ajjhattaɱ sukhadukkhaɱ,||
pare vāssa taɱ Ānanda kāya-sankhāraɱ abhisaŋkharonti||
yam paccayāssa taɱ uppajjati ajjhattaɱ sukhadukkhaɱ.|| ||

Sampajāno vā taɱ Ānanda kāya-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ,||
asampajāno vā taɱ Ānanda kāya-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ.|| ||

Avijjā-paccayā va sāmaɱ vā taɱ Ānanda vacī-sankhāraɱ abhisaŋkharoti||
yam paccayāssa taɱ uppajjati ajjhattaɱ sukhadukkhaɱ,||
pare vāssa taɱ Ānanda vacī-sankhāraɱ abhisaŋkharonti||
yam paccayāssa taɱ uppajjati ajjhattaɱ sukhadukkhaɱ.|| ||

Sampajāno vā taɱ Ānanda vacī-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ,||
asampajāno vā taɱ Ānanda vacī-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ.|| ||

Avijjā-paccayā va sāmaɱ vā taɱ Ānanda mano-sankhāraɱ abhisaŋkharoti||
yam paccayāssa taɱ uppajjati ajjhattaɱ sukhadukkhaɱ,||
pare vāssa taɱ Ānanda mano-sankhāraɱ abhisaŋkharonti||
yam paccayāssa taɱ uppajjati ajjhattaɱ sukhadukkhaɱ.|| ||

Sampajāno vā taɱ Ānanda mano-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ,||
asampajāno vā taɱ Ānanda mano-sankhāraɱ abhisaŋkharoti||
yaɱ paccayāssa taɱ uppajjati ajjhattaɱ sukhadukkhaɱ.|| ||

Imesu Ānanda dhammesu avijjā anupatitā.|| ||

Avijjāya tv eva Ānanda asesa-virāga-nirodhā||
so kāyo na hoti||
yaɱ paccayāssa taɱ uppajjati ajjhattaɱ sukhadukkhaɱ.|| ||

Sā vācā na hoti||
yaɱ paccayāssa taɱ uppajjati ajjhattaɱ sukhadukkhaɱ.|| ||

So mano na hoti||
yaɱ paccayāssa taɱ [41] uppajjati ajjhattaɱ sukhadukkhaɱ.|| ||

Khettaɱ taɱ na hoti||
vatthu taɱ na hoti||
āyatanaɱ taɱ na hoti||
adhikaraṇaɱ taɱ na hoti||
yaɱ paccayāssa taɱ uppajjati ajjhattaɱ sukhadukkhan" ti.|| ||


Contact:
E-mail
Copyright Statement   Webmaster's Page