Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
III. Dasabalā Vagga

Sutta 26

Upavāṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[41]

[1][pts][bodh] Evaɱ me sutaɱ|| ||

Ekaɱ samayaɱ Sāvatthiyaɱ-|| ||

2. Atha kho āyasmā Upavāṇo yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Upavāṇo Bhagavantaɱ etad avoca:|| ||

3. Santi hi bhante,||
eke samaṇa-brāhmaṇā kammavādā sayaɱkataɱ sukhadukkhaɱ paññāpenti.|| ||

Santi hi pana bhante,||
eke samaṇa-brāhmaṇā kammavādā paraɱ-kataɱ sukhadukkhaɱ paññāpenti.|| ||

Santi hi pana bhante,||
eke samaṇa-brāhmaṇā kammavādā sayaɱ-katañ ca paraɱ-katañ ca sukhadukkhaɱ paññāpenti.|| ||

Santi hi pana bhante,||
eke samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ sukhadukkhaɱ paññāpenti.|| ||

4. Idha no bhante Bhagavā kiɱ vādī,||
kim akkhāyī?|| ||

Kathaɱ vyākaramānā ca mayaɱ vuttavādino c'eva Bhagavato assāma||
na ca Bhagavato abhūtena abbhācikkheyyāma?|| ||

Dhammassa cānudhammaɱ vyākareyyāma||
na ca koci sahadhammiko vādānupāto gārayhaɱ ṭhānaɱ āgaccheyyā" ti?|| ||

Paṭicca-samuppannaɱ kho upavāṇa dukkhaɱ vuttaɱ mayā.

Kim paṭicca?|| ||

Phassaŋ paṭicca.|| ||

Iti vadaɱ vuttavādī c'eva me assa||
na ca maɱ abhūtena abbhācikkheyya||
Dhammassa cānudhammaɱ vyākareyya||
na ca koci sahadhammiko vādānupāto gārayhaɱ ṭhānaɱ āgaccheyya.|| ||

8. Tatra Upavāṇa ye te samaṇa-brāhmaṇā kammavādā sayaɱ-kataɱ dukkhaɱ paññāpenti,||
tad api phassapacacayā.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti||
tad api phassa-paccayā.|| ||

Ye pi te samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti,||
tad api phassa-paccayā.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti,||
tad api phassa-paccayā.|| ||

9. Tatra Upavāṇa ye te samaṇa-brāhmaṇā kammavādā sayaɱ-kataɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā paraɱ-kataɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā sayaɱ-katañ ca paraɱ-katañ ca dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjati.|| ||

Ye pi te samaṇa-brāhmaṇā kammavādā asayaɱ-kāraɱ aparaɱ-kāraɱ adhicca-samuppannaɱ dukkhaɱ paññāpenti,||
te vata aññatra phassā paṭisaŋvedissantī' ti||
n'etaɱ ṭhānaɱ vijjatī' ti.|| ||


Contact:
E-mail
Copyright Statement   Webmaster's Page