Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
III. Dasabalā Vagga

Sutta 28

Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[43]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

Idha, bhikkhave, bhikkhu jarā-māraṇaɱ pajānāti,||
jarāmāraṇasamudayaɱ pajānāti,||
jarāmāraṇanirodhaɱ pajānāti,||
jarāmāraṇa nirodhagāminiɱ paṭipadaɱ pajānāti.|| ||

Jātiɱ pajānāti,||
jāti samudayaɱ pajānāti,||
jāti-nirodhaɱ pajānāti,||
jāti-nirodhagāminiɱ paṭipadaɱ pajānāti.|| ||

Bhavaɱ pajānāti,||
bhavasamudayaɱ pajānāti,||
bhava-nirodhaɱ pajānāti,||
bhava-nirodhagāminiɱ paṭipadaɱ pajānāti.|| ||

Upādānaɱ pajānāti,||
upādānasamudayaɱ pajānāti,||
upādāna-nirodhaɱ pajānāti,||
upādāna-nirodhagāminiɱ paṭipadaɱ pajānāti.|| ||

[44] Taṇhaɱ pajānāti,||
taṇhāsamudayaɱ pajānāti,||
taṇhā-nirodhaɱ pajānāti,||
taṇhā-nirodhagāminiɱ paṭipadaɱ pajānāti.|| ||

Vedanaɱ pajānāti,||
vedanāsamudayaɱ pajānāti,||
vedanā-nirodhaɱ pajānāti,||
vedanā-nirodhagāminiɱ paṭipadaɱ pajānāti.|| ||

Phassaŋ pajānāti,||
phassasamudayaɱ pajānāti,||
phassa-nirodhaɱ pajānāti,||
phassa-nirodhagāminiɱ paṭipadaɱ pajānāti.|| ||

Saḷāyatanaɱ pajānāti,||
saḷāyatanasamudayaɱ pajānāti,||
saḷāyatana-nirodhaɱ pajānāti,||
saḷāyatana-nirodhagāminiɱ paṭipadaɱ pajānāti.|| ||

Nāmarūpaɱ pajānāti,||
nāmarūpasamudayaɱ pajānāti,||
nāma-rūpa-nirodhaɱ pajānāti,||
nāma-rūpa-nirodhagāminiɱ paṭipadaɱ pajānāti.|| ||

Viññāṇaɱ pajānāti,||
viññāṇasamudayaɱ pajānāti,||
viññāṇa-nirodhaɱ pajānāti,||
viññāṇa-nirodhagāminiɱ paṭipadaɱ pajānāti.|| ||

Sankhāre pajānāti,||
sankhārasamudayaɱ pajānāti,||
sankhāra-nirodhaɱ pajānāti,||
sankhāra-nirodhagāminiɱ paṭipadaɱ pajānāti.|| ||

 


 

Katamañ ca bhikkhave jarā-māraṇaɱ?|| ||

Yā tesaŋ tesaŋ sattānaɱ tamhi tamhi sattanikāye jarā jīraṇatā khaṇḍiccaɱ pāliccaɱ valittacatā āyuno saŋhāni indriyānaɱ paripāko,||
ayaɱ vuccati jarā.|| ||

Yā tesaŋ tesaŋ sattānaɱ tamhā tamhā sattanikāyā cuti cavanatā bhedo antaradhānaɱ maccumāraṇaɱ kālakiriyā khandhānaɱ bhedo kaḷebarassa nikkhepo jīvitindriyassa upacchedo,||
idaɱ vuccati māraṇaɱ.|| ||

Iti ayañ ca jarā idaɱ ca māraṇaɱ idaɱ vuccati bhikkhave jarā-māraṇaɱ.|| ||

Jāti-samudayā jarāmāraṇa-samudayo,||
jāti-nirodhā jarāmāraṇa-nirodho.|| ||

Ayam eva ariyo aṭṭhaŋgiko maggo jarāmāraṇa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamā ca bhikkhave jāti?|| ||

Yā tesaŋ tesaŋ sattānaɱ tamhi tamhi sattanikāye jāti sañjāti okkanti nibbatti abhinibbatti,||
khandhānaɱ pātubhāvo āyatanānaɱ paṭilābho,||
ayaɱ vuccati bhikkhave jāti.|| ||

Bhava-samudayā jāti-samudayo.|| ||

Bhava-nirodhā jāti-nirodho.|| ||

Ayam eva ariyo aṭṭhaŋgiko maggo jāti-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamo ca bhikkhave, bhavo?|| ||

Tayo me bhikkhave, bhavā:|| ||

Kāma-bhavo,||
rūpa-bhavo,||
arūpa-bhavo.|| ||

Ayaɱ vuccati bhikkhave, bhavo.|| ||

Upādāna-samudayā bhava-samudayo.|| ||

Upādāna-nirodhā bhava-nirodho.|| ||

Ayam eva ariyo aṭṭhaŋgiko maggo bhava-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamañ ca bhikkhave upādānaɱ?|| ||

Cattārimāni bhikkhave, upādānāni:|| ||

Kāmūpadānaɱ,||
diṭṭhūpadānaɱ,||
sīlabbatūpadānaɱ,||
attavādūpādānaɱ.|| ||

Idaɱ vuccati bhikkhave upādānaɱ.|| ||

Taṇhā-samudayā upādāna-samudayo.|| ||

Taṇhā-nirodhā upādāna-nirodho.|| ||

Ayam eva ariyo aṭṭhaŋgiko maggo upādāna-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamā ca bhikkhave taṇhā?|| ||

Chayime bhikkhave, taṇhā-kāyā:|| ||

Rūpa-taṇhā,||
sadda-taṇhā,||
gandha-taṇhā,||
rasa-taṇhā,||
phoṭṭhabba-taṇhā,||
dhamma-taṇhā.|| ||

Ayaɱ vuccati bhikkhave taṇhā.|| ||

Vedanā-samudayā taṇhā-samudayo.|| ||

Vedanā-nirodhā taṇhā-nirodho.|| ||

Ayam eva ariyo aṭṭhaŋgiko maggo taṇhā-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamā ca bhikkhave vedanā?|| ||

Chayime bhikkhave, vedanākāyā:|| ||

Cakkhu-samphassajā vedanā,||
sota-samphassajā vedanā,||
ghāṇa-samphassajā vedanā,||
jivhā-samphassajā vedanā,||
kāya-samphassajā vedanā,||
mano-samphassajā vedanā.|| ||

Ayaɱ vuccati bhikkhave vedanā.|| ||

Phassa-samudayā vedanā-samudayo.|| ||

Phassa-nirodhā vedanā-nirodho.|| ||

Ayam eva ariyo aṭṭhaŋgiko maggo vedanā-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamo ca bhikkhave phasso?|| ||

Chayime bhikkhave, phassakāyā:|| ||

Cakkhu-samphasso,||
sota-samphasso,||
ghāṇa-samphasso,||
jivhā-samphasso,||
kāya-samphasso,||
mano-samphasso.|| ||

Ayaɱ vuccati bhikkhave, phasso.|| ||

Saḷāyatana-samudayā phassa-samudayo.|| ||

Saḷāyatana-nirodhā phassa-nirodho.|| ||

Ayam eva ariyo aṭṭhaŋgiko maggo phassa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamaɱ ca bhikkhave saḷāyatanaɱ?|| ||

Cakkhāyatanaɱ,||
sotāyatanaɱ,||
ghāṇāyatanaɱ,||
jivhāyatanaɱ,||
kāyāyatanaɱ,||
manāyatanaɱ.|| ||

Idaɱ vuccati bhikkhave, saḷāyatanaɱ.|| ||

Nāmarūpa-samudayā saḷāyatana-samudayo.|| ||

Nāma-rūpa-nirodhā saḷāyatana-nirodho.|| ||

Ayam eva ariyo aṭṭhaŋgiko maggo saḷāyatana-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamaɱ ca bhikkhave nāmarūpaɱ?|| ||

Vedanā,||
saññā,||
cetanā,||
phasso,||
manasikāro,||
idaɱ vuccati nāmaɱ.|| ||

Cattāro ca mahābhūtā,||
catunnaɱ ca mahābhūtānaɱ upādāyarūpaɱ,||
idaɱ vuccati rūpaɱ.|| ||

Iti idañ ca nāmaɱ,||
idañ ca rūpaɱ,||
idaɱ vuccati bhikkhave, nāmarūpaɱ.|| ||

Viññāṇa-samudayā nāmarūpa-samudayo.|| ||

Viññāṇa-nirodhā nāma-rūpa-nirodho.|| ||

Ayam eva ariyo aṭṭhaŋgiko maggo nāma-rūpa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katamaɱ ca bhikkhave viññāṇaɱ?|| ||

Chayime bhikkhave, viññāṇakāyā:|| ||

Cakkhu-viññāṇaɱ,||
sota-viññāṇaɱ,||
ghāṇa-viññāṇaɱ,||
jivhā-viññāṇaɱ,||
kāya-viññāṇaɱ,||
mano-viññāṇaɱ.|| ||

Idaɱ vuccati bhikkhave, viññāṇaɱ.|| ||

Sankhāra-samudayā viññāṇa-samudayo.|| ||

Sankhāra-nirodhā viññāṇa-nirodho.|| ||

Ayam eva ariyo aṭṭhaŋgiko maggo viññāṇa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Katame ca bhikkhave sankhārā?|| ||

Tayo me bhikkhave, sankhārā:|| ||

Kāya-sankhāro,||
vacī-sankhāro,||
citta-sankhāro,||
ime vuccanti bhikkhave, sankhārā.|| ||

Avijjā-samudayā sankhāra-samudayo.|| ||

Avijjānirodhā sankhāra-nirodho.|| ||

Ayam eva ariyo aṭṭhaŋgiko maggo sankhāra-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

 


 

Yato kho bhikkhave, bhikkhu jarā-māraṇaɱ pajānāti,||
jarāmāraṇasamudayaɱ pajānāti,||
jarāmāraṇanirodhaɱ pajānāti,||
jarāmāraṇa nirodhagāminiɱ paṭipadaɱ pajānāti;|| ||

jātiɱ pajānāti,||
jāti samudayaɱ pajānāti,||
jāti-nirodhaɱ pajānāti,||
jāti-nirodhagāminiɱ paṭipadaɱ pajānāti;|| ||

bhavaɱ pajānāti,||
bhavasamudayaɱ pajānāti,||
bhava-nirodhaɱ pajānāti,||
bhava-nirodhagāminiɱ paṭipadaɱ pajānāti;|| ||

upādānaɱ pajānāti,||
upādānasamudayaɱ pajānāti,||
upādāna-nirodhaɱ pajānāti,||
upādāna-nirodhagāminiɱ paṭipadaɱ pajānāti;|| ||

taṇhaɱ pajānāti,||
taṇhāsamudayaɱ pajānāti,||
taṇhā-nirodhaɱ pajānāti,||
taṇhā-nirodhagāminiɱ paṭipadaɱ pajānāti;|| ||

vedanaɱ pajānāti,||
vedanāsamudayaɱ pajānāti,||
vedanā-nirodhaɱ pajānāti,||
vedanā-nirodhagāminiɱ paṭipadaɱ pajānāti;|| ||

phassaŋ pajānāti,||
phassasamudayaɱ pajānāti,||
phassa-nirodhaɱ pajānāti,||
phassa-nirodhagāminiɱ paṭipadaɱ pajānāti;|| ||

saḷāyatanaɱ pajānāti,||
saḷāyatanasamudayaɱ pajānāti,||
saḷāyatana-nirodhaɱ pajānāti,||
saḷāyatana-nirodhagāminiɱ paṭipadaɱ pajānāti;|| ||

nāmarūpaɱ pajānāti,||
nāmarūpasamudayaɱ pajānāti,||
nāma-rūpa-nirodhaɱ pajānāti,||
nāma-rūpa-nirodhagāminiɱ paṭipadaɱ pajānāti;|| ||

viññāṇaɱ pajānāti,||
viññāṇasamudayaɱ pajānāti,||
viññāṇa-nirodhaɱ pajānāti,||
viññāṇa-nirodhagāminiɱ paṭipadaɱ pajānāti;|| ||

sankhāre pajānāti,||
sankhārasamudayaɱ pajānāti,||
sankhāra-nirodhaɱ pajānāti,||
sankhāra-nirodhagāminiɱ paṭipadaɱ pajānāti;|| ||

ayaɱ vuccati bhikkhave,||
ariyasāvako diṭṭhi-sampanno iti pi,||
dassana-sampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhayā vijjāya samannāgato iti pi,||
dhamma-sotaɱ samāpanto iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī" ti.|| ||


Contact:
E-mail
Copyright Statement   Webmaster's Page