Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
IV. Kaḷarakhattiyo Vagga

Sutta 33

Paṭhama Ñāṇassa Vatthuatthūṇi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[56]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

2. "Catucattāḷīsaŋ vo bhikkhave, ñāṇavatthūni desissāmi.|| ||

Taɱ suṇātha.|| ||

Sādhukaɱ manasikarotha.|| ||

Bhāsissāmī" ti.|| ||

"Evaɱ bhante" ti kho te bhikkhū Bhagavato paccassosuɱ.|| ||

Bhagavā etad avoca:|| ||

"Katamāni bhikkhave, catucattāḷīsaŋ ñāṇavatthūni?|| ||

[57] Jarāmāraṇe ñāṇaɱ,||
jarā-māraṇa-samudaye ñāṇaɱ,||
jarā-māraṇa-nirodhe ñāṇaɱ,||
jarā-māraṇa-nirodhagāminiyā paṭipadāya ñāṇaɱ.|| ||

Jātiyā ñāṇaɱ,||
jāti-samudaye ñāṇaɱ,||
jāti-nirodhe ñāṇaɱ,||
jāti-nirodhagāminiyā paṭipadāya ñāṇaɱ.|| ||

Bhave ñāṇaɱ,||
bhava-samudaye ñāṇaɱ,||
bhava-nirodhe ñāṇaɱ,||
bhava-nirodhagāminiyā paṭipadāya ñāṇaɱ.|| ||

Upādāne ñāṇaɱ,||
upādāna-samudaye ñāṇaɱ,||
upādāna-nirodhe ñāṇaɱ,||
upādāna-nirodhagāminiyā paṭipadāya ñāṇaɱ.|| ||

Taṇhāya ñāṇaɱ,||
taṇhā-samudaye ñāṇaɱ,||
taṇhā-nirodhe ñāṇaɱ,||
taṇhā-nirodhagāminiyā paṭipadāya ñāṇaɱ.|| ||

Vedanāya ñāṇaɱ,||
vedanā-samudaye ñāṇaɱ,||
vedanā-nirodhe ñāṇaɱ,||
vedanā-nirodhagāminiyā paṭipadāya ñāṇaɱ.|| ||

Phasse ñāṇaɱ,||
phassa-samudaye ñāṇaɱ,||
phassa-nirodhe ñāṇaɱ,||
phassa-nirodhagāminiyā paṭipadāya ñāṇaɱ.|| ||

Saḷāyatane ñāṇaɱ,||
saḷāyatana-samudaye ñāṇaɱ,||
saḷāyatana-nirodhe ñāṇaɱ,||
saḷāyatana-nirodhagāminiyā paṭipadāya ñāṇaɱ.|| ||

Nāmarūpe ñāṇaɱ,||
nāma-rūpa-samudaye ñāṇaɱ,||
nāma-rūpa-nirodhe ñāṇaɱ,||
nāma-rūpa-nirodhagāminiyā paṭipadāya ñāṇaɱ.|| ||

Viññāṇe ñāṇaɱ,||
viññāṇa-samudaye ñāṇaɱ,||
viññāṇa-nirodhe ñāṇaɱ,||
viññāṇa-nirodhagāminiyā paṭipadāya ñāṇaɱ.|| ||

Sankhāresu ñāṇaɱ,||
sankhāra-samudaye ñāṇaɱ,||
sankhāra-nirodhe ñāṇaɱ,||
sankhāra-nirodhagāminiyā paṭipadāya ñāṇaɱ.|| ||

Imāni vuccanti bhikkhave catucattāḷīsaŋ ñāṇavatthūni.|| ||

 


 

Katamañ ca bhikkhave, jarā-māraṇaɱ?|| ||

Yā tesaŋ tesaŋ sattānaɱ tamhi tamhi sattanikāye jarā jīraṇatā khaṇḍiccaɱ pāliccaɱ valittacatā āyuno saŋhāni indriyānaɱ paripāko,||
ayaɱ vuccati jarā.|| ||

Yā tesaŋ tesaŋ sattānaɱ tamhā tamhā sattanikāyā cuti cavanatā bhedo antaradhānaɱ maccumāraṇaɱ kālakiriyā khandhānaɱ bhedo kaḷebarassa nikkhepo jīvitindriyassa upacchedo,||
idaɱ vuccati māraṇaɱ.|| ||

Iti ayañ ca jarā idaɱ ca māraṇaɱ idaɱ vuccati bhikkhave jarā-māraṇaɱ.|| ||

Jāti-samudayā jarā-māraṇa-samudayo,||
jāti-nirodhā jarā-māraṇa-nirodho.|| ||

Ayam eva ariyo aṭṭhaŋgiko maggo jarā-māraṇa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ jarā-māraṇaɱ pajānāti,||
evaɱ jarā-māraṇa-samudayaɱ pajānāti,||
[58] evaɱ jarā-māraṇa-nirodhaɱ pajānāti,||
evaɱ jarā-māraṇa nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā jarā-māraṇaɱ abbhaññaɱsu,||
jarā-māraṇa-samudayaɱ abbhaññaɱsu,||
jarā-māraṇa-nirodhaɱ abbhaññaɱsu,||
jarā-māraṇa-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā jarā-māraṇaɱ abhijānissanti,||
jarā-māraṇa-samudayaɱ abhijānissanti||
jarā-māraṇa-nirodhaɱ abhijānissanti,||
jarā-māraṇa-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamā ca bhikkhave jāti?|| ||

Yā tesaŋ tesaŋ sattānaɱ tamhi tamhi sattanikāye jāti sañjāti okkanti nibbatti abhinibbatti,||
khandhānaɱ pātubhāvo āyatanānaɱ paṭilābho,||
ayaɱ vuccati bhikkhave jāti.|| ||

Bhava-samudayā jāti-samudayo.|| ||

Bhava-nirodhā jāti-nirodho.|| ||

Ayam eva ariyo aṭṭhaŋgiko maggo jāti-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ jātiɱ pajānāti,||
evaɱ jāti samudayaɱ pajānāti,||
evaɱ jāti-nirodhaɱ pajānāti,||
evaɱ jāti-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā jāti abbhaññaɱsu,||
jāti-samudayaɱ abbhaññaɱsu,||
jāti-nirodhaɱ abbhaññaɱsu,||
jāti-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā jāti abhijānissanti,||
jāti-samudayaɱ abhijānissanti||
jāti-nirodhaɱ abhijānissanti,||
jāti-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamo ca bhikkhave, bhavo?|| ||

Tayo me bhikkhave, bhavā:|| ||

Kāma-bhavo,||
rūpa-bhavo,||
arūpa-bhavo.|| ||

Ayaɱ vuccati bhikkhave, bhavo.|| ||

Upādāna-samudayā bhava-samudayo.|| ||

Upādāna-nirodhā bhava-nirodho.|| ||

Ayam eva ariyo aṭṭhaŋgiko maggo bhava-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ bhavaɱ pajānāti,||
evaɱ bhavasamudayaɱ pajānāti,||
evaɱ bhava-nirodhaɱ pajānāti,||
evaɱ bhava-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā bhava abbhaññaɱsu,||
bhava-samudayaɱ abbhaññaɱsu,||
bhava-nirodhaɱ abbhaññaɱsu,||
bhava-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā bhava abhijānissanti,||
bhava-samudayaɱ abhijānissanti||
bhava-nirodhaɱ abhijānissanti,||
bhava-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamañ ca bhikkhave upādānaɱ?|| ||

Cattārimāni bhikkhave, upādānāni:|| ||

Kāmūpadānaɱ,||
diṭṭhūpadānaɱ,||
sīlabbatūpadānaɱ,||
attavādūpādānaɱ.|| ||

Idaɱ vuccati bhikkhave upādānaɱ.|| ||

Taṇhā-samudayā upādāna-samudayo.|| ||

Taṇhā-nirodhā upādāna-nirodho.|| ||

Ayam eva ariyo aṭṭhaŋgiko maggo upādāna-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ upādānaɱ pajānāti,||
evaɱ upādāna-samudayaɱ pajānāti,||
evaɱ upādāna-nirodhaɱ pajānāti,||
evaɱ upādāna-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā upādāna abbhaññaɱsu,||
upādāna-samudayaɱ abbhaññaɱsu,||
upādāna-nirodhaɱ abbhaññaɱsu,||
upādāna-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā upādāna abhijānissanti,||
upādāna-samudayaɱ abhijānissanti||
upādāna-nirodhaɱ abhijānissanti,||
upādāna-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamā ca bhikkhave taṇhā?|| ||

Chayime bhikkhave, taṇhā-kāyā:|| ||

Rūpa-taṇhā,||
sadda-taṇhā,||
gandha-taṇhā,||
rasa-taṇhā,||
phoṭṭhabba-taṇhā,||
dhamma-taṇhā.|| ||

Ayaɱ vuccati bhikkhave taṇhā.|| ||

Vedanā-samudayā taṇhā-samudayo.|| ||

Vedanā-nirodhā taṇhā-nirodho.|| ||

Ayam eva ariyo aṭṭhaŋgiko maggo taṇhā-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ taṇhaɱ pajānāti,||
evaɱ taṇhā-samudayaɱ pajānāti,||
evaɱ taṇhā-nirodhaɱ pajānāti,||
evaɱ taṇhā-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā taṇhā abbhaññaɱsu,||
taṇhā-samudayaɱ abbhaññaɱsu,||
taṇhā-nirodhaɱ abbhaññaɱsu,||
taṇhā-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā taṇhā abhijānissanti,||
taṇhā-samudayaɱ abhijānissanti||
taṇhā-nirodhaɱ abhijānissanti,||
taṇhā-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamā ca bhikkhave vedanā?|| ||

Chayime bhikkhave, vedanākāyā:|| ||

Cakkhu-samphassajā vedanā,||
sota-samphassajā vedanā,||
ghāṇa-samphassajā vedanā,||
jivhā-samphassajā vedanā,||
kāya-samphassajā vedanā,||
mano-samphassajā vedanā.|| ||

Ayaɱ vuccati bhikkhave vedanā.|| ||

Phassa-samudayā vedanā-samudayo.|| ||

Phassa-nirodhā vedanā-nirodho.|| ||

Ayam eva ariyo aṭṭhaŋgiko maggo vedanā-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ vedanaɱ pajānāti,||
evaɱ vedanā-samudayaɱ pajānāti,||
evaɱ vedanā-nirodhaɱ pajānāti,||
evaɱ vedanā-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā vedanā abbhaññaɱsu,||
vedanā-samudayaɱ abbhaññaɱsu,||
vedanā-nirodhaɱ abbhaññaɱsu,||
vedanā-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā vedanā abhijānissanti,||
vedanā-samudayaɱ abhijānissanti||
vedanā-nirodhaɱ abhijānissanti,||
vedanā-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamo ca bhikkhave phasso?|| ||

Chayime bhikkhave, phassakāyā:|| ||

Cakkhu-samphasso,||
sota-samphasso,||
ghāṇa-samphasso,||
jivhā-samphasso,||
kāya-samphasso,||
mano-samphasso.|| ||

Ayaɱ vuccati bhikkhave, phasso.|| ||

Saḷāyatana-samudayā phassa-samudayo.|| ||

Saḷāyatana-nirodhā phassa-nirodho.|| ||

Ayam eva ariyo aṭṭhaŋgiko maggo phassa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ phassaŋ pajānāti,||
evaɱ phassa-samudayaɱ pajānāti,||
evaɱ phassa-nirodhaɱ pajānāti,||
evaɱ phassa-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā phassa abbhaññaɱsu,||
phassa-samudayaɱ abbhaññaɱsu,||
phassa-nirodhaɱ abbhaññaɱsu,||
phassa-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā phassa abhijānissanti,||
phassa-samudayaɱ abhijānissanti||
phassa-nirodhaɱ abhijānissanti,||
phassa-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamaɱ ca bhikkhave saḷāyatanaɱ?|| ||

Cakkhāyatanaɱ,||
sotāyatanaɱ,||
ghāṇāyatanaɱ,||
jivhāyatanaɱ,||
kāyāyatanaɱ,||
manāyatanaɱ.|| ||

Idaɱ vuccati bhikkhave, saḷāyatanaɱ.|| ||

Nāmarūpa-samudayā saḷāyatana-samudayo.|| ||

Nāma-rūpa-nirodhā saḷāyatana-nirodho.|| ||

Ayam eva ariyo aṭṭhaŋgiko maggo saḷāyatana-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ saḷāyatanaɱ pajānāti,||
evaɱ saḷāyatana-samudayaɱ pajānāti,||
evaɱ saḷāyatana-nirodhaɱ pajānāti,||
evaɱ saḷāyatana-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā saḷāyatana abbhaññaɱsu,||
saḷāyatana-samudayaɱ abbhaññaɱsu,||
saḷāyatana-nirodhaɱ abbhaññaɱsu,||
saḷāyatana-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā saḷāyatana abhijānissanti,||
saḷāyatana-samudayaɱ abhijānissanti||
saḷāyatana-nirodhaɱ abhijānissanti,||
saḷāyatana-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamaɱ ca bhikkhave nāma-rūpaɱ?|| ||

Vedanā,||
saññā,||
cetanā,||
phasso,||
manasikāro,||
idaɱ vuccati nāmaɱ.|| ||

Cattāro ca mahābhūtā,||
catunnaɱ ca mahābhūtānaɱ upādāyarūpaɱ,||
idaɱ vuccati rūpaɱ.|| ||

Iti idañ ca nāmaɱ,||
idañ ca rūpaɱ,||
idaɱ vuccati bhikkhave, nāma-rūpaɱ.|| ||

Viññāṇa-samudayā nāma-rūpa-samudayo.|| ||

Viññāṇa-nirodhā nāma-rūpa-nirodho.|| ||

Ayam eva ariyo aṭṭhaŋgiko maggo nāma-rūpa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ nāma-rūpaɱ pajānāti,||
evaɱ nāma-rūpa-samudayaɱ pajānāti,||
evaɱ nāma-rūpa-nirodhaɱ pajānāti,||
evaɱ nāma-rūpa-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā nāma-rūpa abbhaññaɱsu,||
nāma-rūpa-samudayaɱ abbhaññaɱsu,||
nāma-rūpa-nirodhaɱ abbhaññaɱsu,||
nāma-rūpa-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā nāma-rūpa abhijānissanti,||
nāma-rūpa-samudayaɱ abhijānissanti||
nāma-rūpa-nirodhaɱ abhijānissanti,||
nāma-rūpa-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katamaɱ ca bhikkhave viññāṇaɱ?|| ||

Chayime bhikkhave, viññāṇakāyā:|| ||

Cakkhu-viññāṇaɱ,||
sota-viññāṇaɱ,||
ghāṇa-viññāṇaɱ,||
jivhā-viññāṇaɱ,||
kāya-viññāṇaɱ,||
mano-viññāṇaɱ.|| ||

Idaɱ vuccati bhikkhave, viññāṇaɱ.|| ||

Sankhāra-samudayā viññāṇa-samudayo.|| ||

Sankhāra-nirodhā viññāṇa-nirodho.|| ||

Ayam eva ariyo aṭṭhaŋgiko maggo viññāṇa-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ viññāṇaɱ pajānāti,||
evaɱ viññāṇa-samudayaɱ pajānāti,||
evaɱ viññāṇa-nirodhaɱ pajānāti,||
evaɱ viññāṇa-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā viññāṇa abbhaññaɱsu,||
viññāṇa-samudayaɱ abbhaññaɱsu,||
viññāṇa-nirodhaɱ abbhaññaɱsu,||
viññāṇa-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā viññāṇa abhijānissanti,||
viññāṇa-samudayaɱ abhijānissanti||
viññāṇa-nirodhaɱ abhijānissanti,||
viññāṇa-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī.

Katame ca bhikkhave sankhārā?|| ||

Tayo me bhikkhave, sankhārā:|| ||

[59] Kāya-sankhāro,||
vacī-sankhāro,||
citta-sankhāro,||
ime vuccanti bhikkhave, sankhārā.|| ||

Avijjā-samudayā sankhāra-samudayo.|| ||

Avijjānirodhā sankhāra-nirodho.|| ||

Ayam eva ariyo aṭṭhaŋgiko maggo sankhāra-nirodhagāminī paṭipadā.|| ||

Seyyathīdaɱ:|| ||

Sammādiṭṭhi,||
sammā-saŋkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi.|| ||

Yato kho bhikkhave, ariyasāvako evaɱ sankhāre pajānāti,||
evaɱ sankhāra-samudayaɱ pajānāti,||
evaɱ sankhāra-nirodhaɱ pajānāti,||
evaɱ sankhāra-nirodhagāminiɱ paṭipadaɱ pajānāti,||
idam assa dhamme ñāṇaɱ.|| ||

So iminā dhammena diṭṭhena viditena akālikena pattena pariyogāḷhena atītānāgate nayaɱ neti.|| ||

Ye kho keci atītam addhānaɱ samaṇā vā brāhmaṇā vā sankhāra abbhaññaɱsu,||
sankhāra-samudayaɱ abbhaññaɱsu,||
sankhāra-nirodhaɱ abbhaññaɱsu,||
sankhāra-nirodhagāminiɱ paṭipadaɱ abbhaññaɱsu,||
sabbe te evam evam abbhaññaɱsu.|| ||

Seyyathāpahaɱ etarahi.|| ||

Ye pi hi keci anāgatam addhānaɱ samaṇā vā brāhmaṇā vā sankhāra abhijānissanti,||
sankhāra-samudayaɱ abhijānissanti||
sankhāra-nirodhaɱ abhijānissanti,||
sankhāra-nirodhagāminiɱ paṭipadaɱ abhijānissanti,||
sabbe te evam evam abhijānissanti|| ||

Seyyathāpahaɱ etarahi.|| ||

Idam assa anvaye ñāṇaɱ.|| ||

Yato kho bhikkhave ariyasāvakassa imāni dve ñāṇāni parisuddhāni honti pariyodātāni dhamme ñāṇañ ca anvaye ñāṇañ ca,||
ayaɱ vuccati bhikkhave ariyasāvako||
diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī" ti.|| ||


Contact:
E-mail
Copyright Statement   Webmaster's Page