Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
IV. Kaḷarakhattiyo Vagga

Sutta 37

Na Tumha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[64]

[35.1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi Bhikkhavo ti||
Bhadante ti te bhikkh Bhagavato paccassosuɱ|| ||

Bhagavā etad avoca|| ||

Nāyaɱ bhikkhave, kāyo tumhākaɱ,||
nā pi aññesaɱ.|| ||

[65] Purāṇam idaɱ bhikkhave kammaɱ abhisaŋkhataɱ abhisañcetayitaɱ vedayitaɱ daṭṭhabbaɱ.|| ||

Tatra kho bhikkhave Sutavā ariyasāvako paṭicca-samuppādaɱ yeva sādhukaɱ yoniso manasikaroti:|| ||

"Iti imasmiɱ sati idaɱ hoti,||
imass'uppādā idaɱ uppajjati,||
imasmiɱ asati idaɱ na hoti,||
imassa-nirodhā idaɱ nirujjhati.|| ||

Yad idaɱ avijjā-paccayā sankhārā,||
sankhāra-paccayā viññāṇaɱ,||
viññāṇa-paccayā nāmarūpaɱ,||
nāmarūpa-paccayā saḷāyatanaɱ,||
saḷāyatana-paccayā phasso,||
Phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ,||
sokaparidevadukkhadomanassūpāyāsā sambhavanti.|| ||

Evam etassa kevalassa dukkhakkhandhassa samudayo hotī'ti.|| ||

Avijjāya tv eva asesavirāga-nirodhā sankhāra-nirodho||
sankhāra-nirodhā viññāṇa-nirodho||
viññāṇa-nirodhā nāma-rūpa -nirodho||
nāma-rūpa -nirodhā saḷāyatana-nirodho||
saḷāyatana-nirodhā phassa-nirodho||
phassa-nirodhā vedanā-nirodho||
vedanā-nirodhā taṇhā-nirodho||
taṇhā-nirodhā upādāna-nirodho||
upādāna-nirodhā bhava-nirodho||
bhava-nirodhā jāti-nirodho||
jāti-nirodhā jarā-maraṇaɱ soka-parideva-dukkha-domanāssupāyāsā nirujjhanti.|| ||

Evam etassa kevalassa dukkhakkhandhassa nirodho hotī ti|| ||

|| ||


Contact:
E-mail
Copyright Statement   Webmaster's Page