Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
IV. Kaḷarakhattiyo Vagga

Sutta 39

Dutiya Cetanā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[66]

[39][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi Bhikkhavo ti||
Bhadante ti te bhikkh Bhagavato paccassosuɱ|| ||

Bhagavā etad avoca|| ||

"Yaṇ ca bhikkhave, ceteti||
yañ ca pakappeti,||
yañ ca anuseti,||
ārammaṇame taɱ hoti viññāṇassa ṭhitiyā.|| ||

Ārammaṇe sati patiṭṭhā viññāṇassa hoti.|| ||

Tasmiɱ patiṭṭhite viññāṇe virūḷhe nāma-rūpassa avakkanti hoti,||
nāma-rūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-māraṇaɱ soka-parideva-dukkha-domanass-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

No ce bhikkhave, ceteti,||
no ce pakappeti,||
atha ce anuseti.|| ||

Ārammaṇe sati patiṭṭhā viññāṇassa hoti.|| ||

Tasmiɱ patiṭṭhite viññāṇe virūḷhe nāma-rūpassa avakkanti hoti,||
nāma-rūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-māraṇaɱ soka-parideva-dukkha-domanass-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

 


 

Yato ca kho bhikkhave, no c'eva ceteti,||
no ca pakappeti,||
no ca anuseti,||
ārammaṇam etaɱ na hoti viññāṇassa ṭhitiyā.|| ||

Ārammaṇe asati patiṭṭhā viññāṇassa na hoti.|| ||

Tad appatiṭṭhite viññāṇe avirūḷhe nāma-rūpassa avakkanti na hoti||
nāma-rūpa-nirodhā saḷāyatana nirodho||
Saḷāyatana-nirodhā phassa-nirodho||
Phassa-nirodhā vedanā-nirodho||
Vedanā-nirodhā taṇhā-nirodho||
Taṇhā-nirodhā upādāna-nirodho||
Upādāna-nirodhā bhava-nirodho||
Bhava-nirodhā jāti-nirodho||
Jāti-nirodhā jarā-māraṇaɱ, soka-parideva-dukkha-domanass-upāyāsā nirujjhanti.

Evam etassa kevalassa dukkha-kkhandhassa nirodho hotī" ti.|| ||


Contact:
E-mail
Copyright Statement   Webmaster's Page