Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
V. Gahapati Vagga

Sutta 42

Dutiya Pañca-Vera-Bhagayā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[69]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho sambahulā bhikkhu yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinne kho te bhikkhū Bhagavā etad avoca::|| ||

"Yato kho bhikkhave, ariyasāvakassa pañca bhayāni verāni vūpasantāni honti,||
catūhi ca sotāpattiyaŋgehi samannāgato hoti,||
ariyo c'assa ñāyo paññāya sudiṭṭho hoti suppaṭividdho,||
so ākaŋkhamāno attanāva attānaɱ vyākareyya:|| ||

'Khīṇanirayomhi||
khīṇatiracchānayoniyo||
khīṇapettivisayo||
khīṇāpāyaduggativinipāto,||
sotāpanno ham asmi||
avinipātadhammo niyato sambodhiparāyaṇo' ti.|| ||

 


 

Katamāni pañca bhayāni verāni vūpasantāni honti?|| ||

Yaɱ bhikkhave, pāṇātipātī pāṇātipātapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaŋ paṭisaŋvedayati,||
pāṇātipātā paṭiviratassa evaɱ taɱ bhayaɱ veraɱ vūpasantaɱ hoti.|| ||

Yaɱ bhikkhave, adinnādāyī adinnādānapaccayā diṭṭhadhammikampi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaŋ paṭisaŋvedayati,||
adinnādānā paṭiviratassa evaɱ taɱ bhayaɱ veraɱ vūpasantaɱ hoti.|| ||

Yaɱ bhikkhave, kāmesu micchācārī kāmesu micchācārapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaŋ paṭisaŋvedayati,||
kāmesu micchācārā paṭiviratassa evaɱ taɱ bhayaɱ veraɱ vūpasantaɱ hoti.|| ||

Yaɱ bhikkhave, musāvādī musāvādapaccayā diṭṭhadhammikam pi bhayaɱ veraɱ pasavati,||
samrāyikam pi bhayaɱ veraɱ pasavati,||
cetasikam pi dukkhaɱ domanassaŋ paṭisaŋvedayati,||
musā-vādā paṭiviratassa evaɱ taɱ bhayaɱ veraɱ vūpasantaɱ hoti.|| ||

Yaɱ bhikkhave, surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaŋ paṭisaŋvedayati,||
surāmerayamajjapamādaṭṭhānā paṭiviratassa evaɱ taɱ bhayaɱ veraɱ vūpasantaɱ hoti.|| ||

Imāni pañca bhayāni verāni vūpasantāni honti.|| ||

Katamehi catuhi sotāpattiyaŋgehi samannāgato hoti?|| ||

Idha bhikkhave, ariyasāvako buddhe aveccappasādena samannāgato hoti:|| ||

'Iti pi so Bhagavā arahaɱ,||
sammāsambuddho,||
vijjācaraṇasampanno,||
sugato,||
lokavidū,||
anuttaro purisadammasārathī,||
satthā deva-manussānaɱ,||
buddho,||
Bhagavā' ti.|| ||

Dhamme aveccappasādena samannāgato hoti:|| ||

'Svākkhāto Bhagavatā dhammo,||
sandiṭṭhiko,||
akāliko,||
ehipassiko,||
opanayiko,||
paccattaɱ veditabbo viññūhī' ti.|| ||

Saŋghe aveccappasādena samannāgato hoti:|| ||

'Supaṭipanno Bhagavato sāvakasaŋgho, ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭha purisapuggalā||
esa Bhagavato [70] sāvakasaŋgho, -||
āhuneyyo, pāhuṇeyyo, dakkhiṇeyyo,||
añjalikaraṇīyo,||
anuttaraɱ puññakkhettaɱ lokassā' ti.|| ||

Ariyakantehi sīlehi samannāgato hoti:|| ||

Akhaṇḍehi acchiddehi asabalehi akammāsehi bhūjissehi viññūppasatthehi aparāmaṭṭhehi samādhisaŋvattatikehi.|| ||

Imehi catuhi sotāpattiyaŋgehi samannāgato hoti.|| ||

Katamo c'assa ariyo ñāyo paññāya sudiṭṭho hoti suppaṭividdho?|| ||

Idha bhikkhave, ariyasāvako paṭicca-samuppādaɱ yeva sādhukaɱ yonisomanasikaroti:|| ||

Iti imasmiɱ sati idaɱ hoti,||
imassuppādā idaɱ uppajjati,||
imasmiɱ asati idaɱ na hoti,||
imassa nirodhā idaɱ nirujjhati.|| ||

Yad idaɱ:|| ||

Avijjā-paccayā sankhārā,||
sankhāra-paccayā viññāṇaɱ,||
viññāṇa-paccayā nāma-rūpaɱ,||
nāmarūpa-paccayā saḷāyatanaɱ,||
saḷāyatana-paccayā phasso,||
phassa-paccayā vedanā,||
vedanā-paccayā taṇhā,||
taṇhā-paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ,||
soka-parideva-dukkha-domanassūpāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

Avijjāya tv eva asesavirāga-nirodhā sankhāra-nirodho,||
sankhāra-nirodhā viññāṇa-nirodho,||
viññāṇa-nirodhā nāma-rūpa -nirodho,||
nāma-rūpa -nirodhā saḷāyatana-nirodho,||
saḷāyatana-nirodhā phassa-nirodho,||
phassa-nirodhā vedanā-nirodho,||
vedanā-nirodhā taṇhā-nirodho,||
taṇhā-nirodhā upādāna-nirodho,||
upādāna-nirodhā bhava-nirodho,||
bhava-nirodhā jāti-nirodho,||
jāti-nirodhā jarā-maraṇaɱ soka-parideva-dukkha-domanāssupāyāsā nirujjhanti.|| ||

Evam etassa kevalassa dukkhakkhandhassa nirodho hotī.|| ||

Yato kho bhikkhave, ariyasāvakassa imāni pañca bhayāni verāni vūpasantāni honti,||
imehi catūhi sotāpattiyaŋgehi samannāgato hoti,||
ayamassa1 ariyo ñāyo paññāya sudiṭṭho hoti suppaṭividdho,||
so ākaŋkhamāno attanāva attānaɱ vyākareyya:|| ||

Khīṇanirayomhi||
khīṇatiracchānayoniso||
khīṇapettivisayo||
khīṇāpāyaduggativinipāto,||
sotāpanno ham asmi||
avinipātadhammo niyato sambodhiparāyaṇoti.|| ||


Contact:
E-mail
Copyright Statement   Webmaster's Page