Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
V. Gahapati Vagga

Sutta 48

Lokāyatika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho lokāyatiko brāhmaṇo yena Bhagavā ten'upasaŋkami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho lokāyatiko brāhmaṇo Bhagavantaɱ etad avoca:|| ||

Kin nu kho bho Gotama,||
sabbamatthī' ti?|| ||

'Sabbamatthī"ti kho brāhmaṇa jeṭṭhame taɱ lokāyataɱ.|| ||

Kiɱ pana bho Gotama,||
sabbaɱ n'atthiti?|| ||

Sabbaɱ n'atthi'ti kho brāhmaṇa dutiyame taɱ lokāyataɱ.|| ||

Kin nu kho bho Gotama,||
sabbamekattanti?|| ||

'Sabbamekattan' ti.kho brāhmaṇa tatiyame taɱ lokāyataɱ.|| ||

Kiɱ pana bho Gotama,||
sabbaɱ puthuttanti?|| ||

'Sabbaɱ puthuttan' ti.kho brāhmaṇa catutthame taɱ lokāyataɱ.|| ||

Ete te brāhmaṇa ubho ante anupagamma majjhena Tathāgato dhammaɱ deseti: "avijjāpaccayā sankhārā,||
sankhārapaccayā viññāṇaɱ,||
viññāṇapaccayā nāmarūpaɱ,||
nāmarūpapaccayā saḷāyatanaɱ,||
saḷāyatanapaccayā phasso.|| ||

Phassapaccayā vedanā.|| ||

Vedanāpaccayā taṇhā.|| ||

Taṇhāpaccayā upādānaɱ.|| ||

Upādānapaccayā bhavo.|| ||

Bhavapaccayā jāti.|| ||

Jātipaccayā jarā-maraṇaɱ,||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti. Avijjāyatv eva asesavirāganirodhā sankhāranirodho.|| ||

Sankhāranirodhā viññāṇanirodho.|| ||

Viññāṇanirodhā nāmarūpanirodho.|| ||

Nāmarūpanirodhā saḷāyatananirodho.|| ||

saḷāyatananirodhā phassanirodho.|| ||

Phassanirodhā vedanānirodho.|| ||

Vedanānirodhā taṇhānirodho.|| ||

Taṇhānirodhā upādānanirodho.|| ||

Upādānanirodhā bhavanirodho.|| ||

Bhavanirodhā jātinirodho.|| ||

Jātinirodhā jarā-maraṇaɱ,||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hotī"ti.|| ||

Evaɱ vutte lokāyatiko brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama,||
seyyathā pi bho Gotama,||
nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya cakkhumanto rūpāni dakkhintī ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Esāhaɱ bhavantaɱ Gotamaɱ saraṇaɱ gacchāmi dhammañca bhikkhu saŋghañca.|| ||

Upāsakaɱ maɱ bhavaɱ Gotamo dhāretu ajjatagge pāṇupetaɱ saraṇaɱ gatan" ti.|| ||


Contact:
E-mail
Copyright Statement   Webmaster's Page