Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
V. Gahapati Vagga

Sutta 50

Dutiya Ariyasāvaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[55]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

[78] 2. "Na bhikkhave sutavato ariyasāvakassa evaɱ hoti:|| ||

'Kiɱ nu kho kismiɱ sati kiɱ hoti,||
kissuppādā kiɱ uppajjati,||
kismiɱ sati sankhārā honti,||
kismiɱ sati viññāṇaɱ hoti,||
kismiɱ sati nāma-rūpaɱ hoti,||
kismiɱ sati saḷāyatanaɱ hoti,)||
kismiɱ sati phasso hoti,||
kismiɱ sati vedanā hoti,||
kismiɱ sati taṇhā hoti,||
kismiɱ sati upādānaɱ hoti,||
kismiɱ sati bhavo hoti,||
kismiɱ sati jāti hoti,||
kismiɱ sati jarā-māraṇaɱ hotī' ti.|| ||

3. Atha kho bhikkhave sutavato ariyasāvakassa aparappaccayā ñāṇam evettha hoti:|| ||

'Imasmiɱ sati idaɱ hoti,||
imassuppādā idaɱ uppajjati,||
avijjāya sati sankhārā honti,||
sankhāresu sati viññāṇaɱ hoti.,||
viññāṇe sati nāma-rūpaɱ hoti,||
nāmarūpe sati saḷāyatanaɱ hoti,||
saḷāyatane sati phasso hoti,||
phasse sati vedanā hoti,||
vedanāya sati taṇhā hoti,||
taṇhāya sati upādānaɱ hoti,||
upādāne sati bhavo hoti,||
bhave sati jāti hoti,||
jātiyā sati jarā-māraṇaɱ hotī' ti|| ||

So evaɱ jānāti 'evaɱ ayaɱ loko samudayatī' ti.|| ||

 


 

4. Na bhikkhave, sutavato ariyasāvakassa evaɱ hoti:|| ||

'Kiɱ nu kho kismiɱ asati kiɱ na hoti,||
kissa nirodhā kiɱ nirujjhati,||
kismiɱ asati sankhārā na honti,||
kismiɱ asati viññāṇaɱ na hoti,||
kismiɱ asati nāma-rūpaɱ na hoti,||
kismiɱ asati saḷāyatanaɱ na hoti,||
kismiɱ asati phasso na hoti,||
kismiɱ asati vedanā na hoti,||
kismiɱ asati taṇhā na hoti,||
kismiɱ asati upādānaɱ na hoti,||
kismiɱ asati bhavo na hoti,||
kismiɱ asati jāti na hoti,||
kismiɱ asati jarā-māraṇaɱ na hotī' ti.|| ||

5. Atha kho bhikkhave, sutavato ariyasāvakassa aparappaccayā ñāṇam evettha hoti:|| ||

"Imasmiɱ asati idaɱ na hoti,||
imassa nirodhā idaɱ nirujjhati,||
avijjāya asati [79] sankhārā na honti,||
sankhāresu asati viññāṇaɱ na hoti,||
viññāṇe asati nāma-rūpaɱ na hoti,||
nāmarūpe asati saḷāyatanaɱ na hoti,||
saḷāyatane asati phasso na hoti,||
phasse asati vedanā na hoti,||
vedanāya asati taṇhā na hoti,||
taṇhāya asati upādānaɱ na hoti,||
upādāne asati bhavo na hoti,||
bhave asati jāti na hoti,||
jātiyā asati jarā-māraṇaɱ na hotī' ti.|| ||

So evaɱ pajānāti 'evaɱ ayaɱ loko nirujjhatī' ti.|| ||

6. Yato kho bhikkhave, ariyasāvako evaɱ lokassa samudayaɱ ca atthaŋgamaɱ ca yathā-bhūtaɱ pajānāti.|| ||

Ayaɱ vuccati bhikkhave,||
ariyasāvako diṭṭhisampanno iti pi,||
dassanasampanno iti pi,||
āgato imaɱ saddhammaɱ iti pi,||
passati imaɱ saddhammaɱ iti pi,||
sekhena ñāṇena samannāgato iti pi,||
sekhāya vijjāya samannāgato iti pi,||
dhammasotaɱ samāpanno iti pi,||
ariyo nibbedhikapañño iti pi,||
amatadvāraɱ āhacca tiṭṭhati iti pī" ti.|| ||


Contact:
E-mail
Copyright Statement   Webmaster's Page