Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VI. Rukkha Vagga

Sutta 57

Taruṇa-rukkha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[89]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

3. Bhagavā etad avoca:|| ||

""Saññojanīyesu bhikkhave,||
dhammesu assādānupassino viharato taṇhā pavaḍḍhati.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-maraṇaɱ||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

Seyyathā pi bhikkhave, taruṇo rukkho,||
tassa puriso kālena kālaɱ mūlāni palisattheyya.|| ||

Kālena kālaɱ paɱsuɱ dadeyya.|| ||

Kālena kālaɱ udakaɱ dadeyya.|| ||

Evaɱ hi so bhikkhave taruṇo rukkho tadāhāro tadupādāno vuddhiɱ virūḷhiɱ vepullaɱ āpajjeyya.|| ||

Evaɱ hi so bhikkhave telappadīpo tadāhāro tadūpādāno ciraɱ dīgham addhānaɱ jaleyya.||

Evam eva kho bhikkhave,||
saññojanīyesu dhammesu assādānupassino viharato taṇhā pavaḍḍhati.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-maraṇaɱ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

 


 

Saññojanīyesu bhikkhave,||
dhammesu ādīnavānupassino viharato taṇhā nirujjhati.|| ||

Taṇhā-nirodhā upādāna-nirodho.|| ||

Upādā-nanirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-maraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

[90] Seyyathā pi bhikkhave, taruṇo rukkho,||
atha puriso āgaccheyya kuddālapiṭakaɱ ādāya.|| ||

So taɱ rukkhaɱ mūle chindeyya.|| ||

Mūle chetvā palikhaṇeyya palikhaṇitvā mūlāni uddhareyya antamaso usīranāḷamattānipi.|| ||

So taɱ rukkhaɱ khaṇḍākhaṇḍikaɱ chindeyya.|| ||

Khaṇḍākhaṇḍikaɱ chinditvā phāleyya.|| ||

Phāletvā sakalikaɱ sakalikaɱ kareyya.|| ||

Sakalikaɱ sakalikaɱ karitvā vātātape visoseyya,||
vātātape visosetvā agginā ḍaheyya.|| ||

Agginā ḍahetvā masiɱ kareyya.|| ||

Masiɱ karitvā mahāvāte vā opuneyya.|| ||

Nadiyā vā sīghasotāya pavāheyya.|| ||

Evaɱ hi so bhikkhave taruṇorukkho ucchinnanamūlo assa tālāvatthukato anabhāvakato āyatiɱ anuppādadhammo.|| ||

Evam eva kho bhikkhave,||
saññojanīyesu dhammesu ādīnavānupassino viharato taṇhā nirujjhati.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-maraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkhakkhandhassa nirodho hotī" ti.|| ||


Contact:
E-mail
Copyright Statement   Webmaster's Page