Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VI. Rukkha Vagga

Sutta 58

Nāma-rūpa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[63]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

3. Bhagavā etad avoca:|| ||

"Upādānīyesu bhikkhave,||
dhammesu assādānupassino viharato nāma-rūpassa avakkanti hoti.|| ||

Nāma-rūpa-paccayā saḷāyatanaɱ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaɱ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-kkhandhassa samudayo hoti.|| ||

Seyyathā pi bhikkhave, mahārukkho,||
tassa yāni c'eva mūlāni adhogamāni yāni ca tiriyaɱgamāni,||
sabbāni tāni uddhaɱ ojaɱ abhiharanti.|| ||

Evaɱ hi so bhikkhave mahārukkho tadāhāro tadūpādāno ciraɱ dīgham addhānaɱ tiṭṭheyya.|| ||

Evam eva kho bhikkhave,||
upādānīyesu dhammesu assādānupassino viharato nāma-rūpassa avakkanti hoti.|| ||

Nāma-rūpa-paccayā saḷāyatanaɱ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaɱ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-kkhandhassa samudayo hoti.|| ||

 


 

Upādānīyesu bhikkhave,||
dhammesu ādīnavānupassino viharato nāma-rūpassa avakkanti na hoti.|| ||

Nāma-rūpa-nirodhā [91] saḷāyatana-nirodho.|| ||

Saḷāyatana-nirodhā phassa-nirodho.|| ||

Phassa-nirodhā vedanā-nirodho.|| ||

Vedanā-nirodhā taṇhā-nirodho.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-māraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkha-kkhandhassa nirodho hotī.|| ||

Seyyathā pi bhikkhave, mahārukkho,||
atha puriso āgaccheyya kuddālapiṭakaɱ ādāya||
so taɱ rukkhaɱ mūle chindeyya||
mūle chetvā paliɱ khaṇeyya||
paliɱ khaṇitvā mūlāni uddhareyya antamaso usīranāḷamattānipi,||
so taɱ rukkhaɱ khaṇḍākhaṇḍikaɱ chindeyya||
khaṇḍākhaṇḍikaɱ chetvā phāleyya||
phāletvā sakalikaɱ sakalikaɱ kareyya||
sakalikaɱ sakalikaɱ karitvā vātātape visoseyya,||
vātātape visosetvā agginā ḍaheyya||
agginā ḍahetvā masiɱ kareyya||
masiɱ karitvā mahāvāte vā opuneyya||
nadiyā vā sīghasotāya pavāheyya.|| ||

Evaɱ hi so bhikkhave mahārukkho ucchinnanamūlo assa||
tālāvatthukato anabhāvakato āyatiɱ anuppādadhammo.|| ||

Evam eva kho bhikkhave,||
upādānīyesu dhammesu ādīnavānupassino viharato nāma-rūpassa avakkanti na hoti.|| ||

Nāma-rūpa-nirodhā saḷāyatana-nirodho.|| ||

Saḷāyatana-nirodhā phassa-nirodho.|| ||

Phassa-nirodhā vedanā-nirodho.|| ||

Vedanā-nirodhā taṇhā-nirodho.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-māraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkha-kkhandhassa nirodho hotī" ti.|| ||


Contact:
E-mail
Copyright Statement   Webmaster's Page