Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VI. Rukkha Vagga

Sutta 60

Nidāna (Paṭicca-Samuppāda) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[92]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Kurūsu viharati Kammāssadammaɱ nāma Kurūnaɱ nigamo.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Acchariyaɱ bhante, abbhūtaɱ bhante.|| ||

Yā ca gambhīro cāyaɱ bhante,||
paṭicca-samuppādo gambhīrāvabhāso ca,||
atha ca pana me uttānakuttānako viya khāyatī" ti.|| ||

"Mā hevaɱ Ānanda, mā hevaɱ Ānanda!|| ||

Gambhīro cāyaɱ Ānanda.|| ||

Paṭicca-samuppādo||
gambhirāvabhāso||
ca etassa Ānanda.|| ||

Dhammassa aññāṇā||
ananubodhā||
appaṭivedhā||
evam ayaɱ pajā||
tantākulakajātā guḷāguṇṭhika||
jātā muñjababbajabhūtā||
apāyaɱ||
duggatiɱ||
vinipātaɱ||
saŋsāraɱ||
nātivattati.|| ||

Upādānīyesu Ānanda, dhammesu assādānupassino viharato viññāṇassa avakkanti hoti.|| ||

Viññāṇa-paccayā nāma-rūpaɱ.|| ||

Nāma-rūpa-paccayā saḷāyatanaɱ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaɱ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-kkhandhassa samudayo hoti.|| ||

Seyyathā pi Ānanda, mahārukkho,||
tassa yāni c'eva mūlāni adhogamāni yāni ca tiriyaɱgamāni,||
sabbāni tāni uddhaɱ ojaɱ abhiharanti.|| ||

Evaɱ hi so Ānanda mahārukkho tadāhāro tadūpādāno ciraɱ dīgham addhānaɱ tiṭṭheyya.|| ||

Evam eva kho Ānanda,||
upādānīyesu dhammesu assādānupassino viharato viññāṇassa avakkanti hoti.|| ||

Viññāṇa-paccayā nāma-rūpaɱ.|| ||

Nāma-rūpa-paccayā saḷāyatanaɱ.|| ||

Saḷāyatana-paccayā phasso.|| ||

Phassa-paccayā vedanā.|| ||

Vedanā-paccayā taṇhā.|| ||

Taṇhā-paccayā upādānaɱ.|| ||

Upādāna-paccayā bhavo.|| ||

Bhava-paccayā jāti.|| ||

Jāti-paccayā jarā-māraṇaɱ,||
soka-parideva-dukkha-domanass-upāyāsā sambhavanti.|| ||

Evam etassa kevalassa dukkha-kkhandhassa samudayo hoti.|| ||

 


 

Upādānīyesu Ānanda,||
dhammesu ādīnavānupassino viharato viññāṇassa avakkanti na hoti.|| ||

Viññāṇa-nirodhā nāma-rūpa-nirodho.|| ||

Nāma-rūpa-nirodhā saḷāyatana-nirodho.|| ||

Saḷāyatana-nirodhā phassa-nirodho.|| ||

Phassa-nirodhā vedanā-nirodho.|| ||

Vedanā-nirodhā taṇhā-nirodho.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-māraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkha-kkhandhassa nirodho hotī.|| ||

Seyyathā pi Ānanda, mahārukkho,||
atha puriso āgaccheyya kuddālapiṭakaɱ ādāya||
so taɱ rukkhaɱ mūle chindeyya||
mūle chetvā paliɱ khaṇeyya||
paliɱ khaṇitvā mūlāni uddhareyya antamaso usīranāḷamattānipi,||
so taɱ rukkhaɱ khaṇḍākhaṇḍikaɱ chindeyya||
khaṇḍākhaṇḍikaɱ chetvā phāleyya||
phāletvā sakalikaɱ sakalikaɱ kareyya||
sakalikaɱ sakalikaɱ karitvā vātātape visoseyya,||
vātātape visosetvā agginā ḍaheyya||
agginā ḍahetvā masiɱ kareyya||
masiɱ karitvā mahāvāte vā opuneyya||
nadiyā vā sīghasotāya pavāheyya.|| ||

Evaɱ hi so Ānanda mahārukkho ucchinnanamūlo assa||
tālāvatthukato anabhāvakato āyatiɱ anuppādadhammo.|| ||

Evam eva kho Ānanda,||
upādānīyesu dhammesu ādīnavānupassino viharato viññāṇassa avakkanti na hoti.|| ||

Viññāṇa-nirodhā nāma-rūpa-nirodho.|| ||

Nāma-rūpa-nirodhā saḷāyatana-nirodho.|| ||

Saḷāyatana-nirodhā phassa-nirodho.|| ||

Phassa-nirodhā vedanā-nirodho.|| ||

Vedanā-nirodhā taṇhā-nirodho.|| ||

Taṇhā-nirodhā upādāna-nirodho.|| ||

Upādāna-nirodhā bhava-nirodho.|| ||

Bhava-nirodhā jāti-nirodho.|| ||

Jāti-nirodhā jarā-māraṇaɱ,||
soka-parideva-dukkha-domanass-upāyāsā nirujjhanti.|| ||

Evam etassa kevalassa dukkha-kkhandhassa nirodho hotī" ti.|| ||


Contact:
E-mail
Copyright Statement   Webmaster's Page