Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VII. Mahā Vagga

Sutta 62

Dutiya Assutavantu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][wrrn][pts][bodh] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

3. Bhagavā etad avoca:|| ||

"Assutavā bhikkhave,||
puthujjano imasmiɱ cātummahābhūtikasmiɱ kāyasmiɱ nibbindeyyapi virajjeyyapi vimucceyyapi.|| ||

Taɱ kissa hetu?|| ||

Dissati bhikkhave,||
imassa cātummahābhūtikassa kāyassa ācayo pi apacayo pi ādānampi [96] nikkhepanampi.|| ||

Tasmā tatrās sutavā puthujjano nibbindeyya'pi virajjeyya'pi vimucceyya'pi.|| ||

Yaṇ ca kho etaɱ bhikkhave vuccati cittaɱ iti pi mano iti pi viññāṇaɱ iti pi.|| ||

Tatrās sutavā puthujjano nālaɱ nibbindituɱ,||
nālaɱ virajjituɱ,||
nālaɱ vimuccituɱ.|| ||

Taɱ kissa hetu?|| ||

Dīgha-rattaɱ h'etaɱ bhikkhave,||
assutavato puthujjanassa ajjhositaɱ mamāyitaɱ parāmaṭṭhaɱ||
'etaɱ mama esohamasmi eso me attā' ti.|| ||

Tasmā tatrāssutavā puthujjano nālaɱ nibbindituɱ,||
nālaɱ virajjituɱ,||
nālaɱ vimuccituɱ.|| ||

Varaɱ bhikkhave,||
assutavā puthujjano imaɱ cātummahābhūtikaɱ kāyaɱ attato upagaccheyya.|| ||

Na tv eva cittaɱ.|| ||

Taɱ kissa hetu?|| ||

Dissatāyaɱ bhikkhave,||
cātum-mahā-bhūtiko kāyo ekam pi vassaɱ tiṭṭhamāno,||
dve pi vassāni tiṭṭhamāno,||
tīṇi pi vassāni tiṭṭhamāno,||
cattārī'pi vassāni tiṭṭhamāno,||
pañca pi vassāni tiṭṭhamāno,||
dasa pi vassāni tiṭṭhamāno,||
vīsa' ti pi vassāni tiṭṭhamāno,||
tiɱsam pi vassāni tiṭṭhamāno,||
cattārīsam pi vassāni tiṭṭhamāno,||
paññāsam pi vassāni tiṭṭhamāno,||
vassasatam pi tiṭṭhamāno||
bhīyyo pi tiṭṭhamāno|| ||

Yaṇ ca kho etaɱ bhikkhave vuccati cittaɱ iti pi mano iti pi viññāṇaɱ iti pi.|| ||

Taɱ rattiyā ca divasassa ca aññadeva uppajjati aññaɱ nirujjhati.|| ||

Tatra bhikkhave, sutavā ariyasāvako paṭiccasamuppādaɱ yeva sādhukaɱ yoniso manasikaroti:|| ||

Iti imasmiɱ sati idaɱ hoti:||
imassuppādā idaɱ uppajjati,||
imasmiɱ asati idaɱ na hoti,||
imassa nirodhā idaɱ nirujjhati.|| ||

Sukhavedanīyaɱ bhikkhave,||
phassaɱ paṭicca uppajjati sukhā vedanā.|| ||

Tass eva sukha-vedanīyassa phassassa nirodhā yaɱ tajjaɱ vedayitaɱ sukhavedanīyaɱ phassaɱ paṭicca uppannā sukhā vedanā||
sā nirujjhati||
sā vūpasammati.|| ||

Dukkhavedanīyaɱ bhikkhave,||
phassaɱ paṭicca uppajjati dukkhā vedanā.|| ||

Tass eva dukkha-vedanīyassa phassassa nirodhā yaɱ tajjaɱ vedayitaɱ dukkhavedanī- [97] yaɱ phassaɱ paṭicca uppannā dukkhā vedanā||
sā nirujjhati||
sā vūpasammati.|| ||

Adukkhamasukha-vedanīyaɱ bhikkhave,||
phassaɱ paṭicca uppajjati adukkhamasukhā vedanā.|| ||

Tass eva adukkhamasukha-vedanīyassa phassassa nirodhā yaɱ tajjaɱ vedayitaɱ adukkhamasukha-vedanīyaɱ phassaɱ paṭicca uppannā adukkhamasukhā vedanā||
sā nirujjhati||
sā vūpasammati.|| ||

Seyyathā pi, bhikkhave, dvinnaɱ kaṭṭhānaɱ saŋghaṭṭasamodhānā usmā jāyati,||
tejo abhinibbattati||
tesaɱ yeva dvinnaɱ kaṭṭhānaɱ nānābhāvā vinikkhepā yā tajjā usmā||
sā nirujjhati||
sā vūpasammati.|| ||

Evam eva kho bhikkhave, sukhavedanīyaɱ phassaɱ paṭicca uppajjati sukhā vedanā,||
tass eva sukha-vedanīyassa phassassa nirodhā yaɱ tajjaɱ vedayitaɱ sukhavedanīyaɱ phassaɱ paṭicca uppannā sukhā vedanā||
sā nirujjhati||
sā vūpasammati;||
dukkhavedanīyaɱ, phassaɱ paṭicca uppajjati dukkhā vedanā,||
tass eva dukkha-vedanīyassa phassassa nirodhā yaɱ tajjaɱ vedayitaɱ dukkhavedanīyaɱ phassaɱ paṭicca uppannā dukkhā vedanā||
sā nirujjhati||
sā vūpasammati;||
adukkhamasukha-vedanīyaɱ bhikkhave,||
phassaɱ paṭicca uppajjati adukkhamasukhā vedanā,||
tass eva adukkhamasukha-vedanīyassa phassassa nirodhā yaɱ tajjaɱ vedayitaɱ adukkhamasukha-vedanīyaɱ phassaɱ paṭicca uppannā adukkhamasukhā vedanā||
sā nirujjhati||
sā vūpasammati.|| ||

Evaɱ passaɱ bhikkhave, sutavā ariyasāvako||
phasse pi nibbindati,||
vedanāya pi nibbindati||
saññāya pi nibbindati||
viññāṇasmim pi nibbindati.|| ||

Nibbindaɱ virajjati,||
virāgā vimuccati,||
vimuttasmiɱ vimuttamiti||
ñāṇaɱ hoti:|| ||

'Khīṇā jāti,||
vusitaɱ brahmacariyaɱ,||
kataɱ karaṇīyaɱ,||
nāparaɱ itthattāyā' ti pajānāti.|| ||


Contact:
E-mail
Copyright Statement   Webmaster's Page