Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VII. Mahā Vagga

Sutta 63

Puttamaɱsa

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][wp][ati][bd] Sāvatthiyaɱ —|| ||

[98] [2] Cattāro me bhikkhave, āhārā bhūtānaɱ vā sattānaɱ ṭhitiyā sambhavesīnaɱ vā anuggahāya.|| ||

[3] Katame cattāro?|| ||

Kabalīɱkāro āhāro o'āriko vā sukhumo vā,||
phasso dutiyo,||
manosañcetanā tatiyā,||
viññāṇaɱ catutthaɱ.|| ||

Ime kho bhikkhave, cattāro āhārā bhūtānaɱ vā sattānaɱ ṭhitiyā sambhavesīnaɱ vā anuggahāya.|| ||

[4] Kathaɱ ca bhikkhave, kabalīɱkāro āhāro daṭṭhabbo?|| ||

[5] Seyyathā pi, bhikkhave,, dve jayampatikā parittaɱ sambalam ādāya kantāramaggaɱ paṭipajjeyyuɱ,||
tesam assa ekaputtako piyo manāpo.|| ||

[6] Atha kho tesaɱ bhikkhave, dvinnaɱ jayampatikānaɱ kantāragatānaɱ yā parittā sambalamattā, sā parikkhayaɱ pariyādānaɱ gaccheyya.||
Siyā ca n'esaɱ kantarāvaseso anittiṇṇo.|| ||

[7] Atha kho tesaɱ bhikkhave, dvinnaɱ jayampatikānaɱ evam assa:|| ||

Amhākaɱ kho yā parittā sambalamattā, sā parikkhīṇā pariyādinnā.||
Atthi cāyaɱ kantārāvaseso an'atthiṇṇo.||
Yannuna mayaɱ imaɱ ekaputtakaɱ piyaɱ manāpaɱ vadhitvā vallūrañca soṇḍikañca karitvā puttamaɱsāni khādantā evantaɱ kantārāvasesaɱ nitthareyyāma,||
mā sabbe va tayo vinassimhā' ti.|| ||

[8] Atha kho te bhikkhave, dve jayampatikā taɱ ekaputtakaɱ piyaɱ manāpaɱ vadhitvā vallūrañca soṇḍikañca karitvā puttamaɱsāni khādantā evaɱtaɱ kantārāvasesaɱ nitthareyyuɱ.||
Te puttamaɱsāni c'eva khādeyyuɱ, ure ca patipiɱseyyuɱ. 'Kahaɱ ekaputtaka, kahaɱ ekaputtakā' ti.|| ||

[9] Taɱ kiɱ maññatha bhikkhave, api nu te davāya vā āhāraɱ āhareyyuɱ,||
madāya vā āhāraɱ āhareyyuɱ,||
[99] Maṇḍanāya vā āhāraɱ āhareyyuɱ,||
vibhūsanāya vā āhāraɱ āhareyyuɱ.|| ||

No h'etaɱ bhante.|| ||

[10] Nanu te bhikkhave, yāvad eva kantārassa nittharaṇatthāya āhāraɱ āhareyyunti?|| ||

Evaɱ bhante.|| ||

[11] Evam eva khvāhaɱ bhikkhave, kabaliɱkāro āhāro daṭṭhabbo ti vadāmi.||
Kabaliɱkāre bhikkhave āhāre pariññāte pañcakāmaguṇiko rāgo pariññato hoti.||
Pañcakāmaguṇike rāge pariññate n'atthi taɱ saññojanaɱ, yena saññojanena saɱyutto ariyasāvako puna imaɱ lokaɱ āgaccheyya.|| ||

[12] Kathañ ca bhikkhave, phassāhāro daṭṭhabbo?|| ||

[13] Seyyathā pi, bhikkhave,, gāvī niccammā kuḍḍañce nissāya tiṭṭheyya, ye kuḍḍanissitā pāṇā te naɱ khādeyyuɱ.||
Rukkhañce nissāya tiṭṭheyya, ye rukkhanissitā pāṇā te naɱ khādeyyuɱ.||
Udakañce nissāya tiṭṭheyya, ye udakanissitā pāṇā te naɱ khādeyyuɱ.||
Ākāsañce nissāya tiṭṭheyya, ye ākāsanissitā pāṇā te naɱ khādeyyuɱ.|| ||

Yaññad'eva hi sā bhikkhave, gāvī niccammā nissāya tiṭṭheyya, ye tannissitā tannissitā pāṇā te naɱ khādeyyuɱ.||
Evam eva khvāhaɱ bhikkhave phassāhāro daṭṭhabbo ti vadāmi.|| ||

[14] Phasse bhikkhave, āhāre pariññāte tisso vedanā pariññātā honti.||
Tīsu vedanāsu pariññātāsu ariyasāvakassa n'atthi kiñci uttariɱ karaṇīyanti vadāmi.|| ||

[15] Kathañ ca bhikkhave, manosaññetanāhāro daṭṭhabbo?|| ||

[16] Seyyathā pi, bhikkhave,, aŋgārakāsu sādhikaporisā puṇṇā aŋgārānaɱ vītaccikānaɱ vītadhūmānaɱ.||
Atha puriso āgaccheyya jīvitukāmo amaritukāmo sukhakāmo dukkhapaṭikkulo.||
Tam enaɱ dve balavanto purisā nānā bāhāsu gahetvā taɱ aŋgārakāsuɱ upakaḍḍheyyuɱ.||
Atha kho bhikkhave, tassa purisassa ārakāvassa cetanā ārakā patthanā ārakā paṇidhi.|| ||

[100] [17] Taɱ kissa hetu||
Evaɱ hi bhikkhave, tassa purisassa hoti:|| ||

Imañ cāhaɱ aŋgārakāsuɱ papatissāmi, tato nidānaɱ maraṇaɱ vā nigacchāmi, maraṇamattaɱ vā dukkhan ti.|| ||

Evam eva khvāhaɱ bhikkhave, manosañcetanāhāro daṭṭhabbo ti vadāmi.|| ||

[18] Manosañcetanāya bhikkhave, āhāre pariññāte tisso taṇhā pariññātā honti.||
Tīsu taṇhāsu pariññātāsu ariyasāvakassa n'atthi uttariɱ karaṇīyanti vadāmi.|| ||

[19] Katañ ca bhikkhave, viññāṇāhāro daṭṭhabbo?|| ||

[20] Seyyathā pi, bhikkhave,, coraɱ āgucāriɱ gahetvā rañño dasseyyuɱ,||
Ayante deva, coro āgucārī,||
imassa yaɱ icchtaɱ taɱ daṇḍaɱ paṇehī'ti.||
Tam enaɱ rājā evaɱ vadeyya:||
Gacchatha, bho, imaɱ purisaɱ pubbaṇhasamayaɱ sattisatena hanathāti.||
Tam enaɱ pubbaṇhasamayaɱ sattisatena haneyyuɱ.|| ||

[21] Atha rājā majjhantikaɱ samayaɱ evaɱ vadeyya:|| ||

Ambho, kathaɱ so purisoti.|| ||

Tatheva deva jīvatī ti.||
Tam enaɱ rājā evaɱ vadeyya:|| ||

Gacchatha bho, taɱ purisaɱ majjhantikasamayaɱ sattisatena hanathāti.||
Tam enaɱ majjhantikasamayaɱ sattisatena haneyyuɱ.|| ||

[22] Atha rājā sāyaŋhasamayaɱ evaɱ vadeyya:|| ||

Ambho, kathaɱ so puriso ti.|| ||

Tatheva deva jīvatīti.||
Tam enaɱ rājā evaɱ vadeyya:|| ||

Gacchatha bho, taɱ purisaɱ sāyaŋhasamayaɱ sattisatena hanathā'ti.||
Tam enaɱ sāyaṇhasamayaɱ sattisatena haneyyuɱ.|| ||

[23] Taɱ kiɱ maññatha bhikkhave,||
Api nu so puriso divasaɱ tīhi sattisatehi haññamāno tato nidānaɱ dukkhaɱ domanassaɱ paṭisaŋvedayethā'ti.|| ||

Ekissā pi bhikkhave, sattiyā haññamāno tato nidānaɱ dukkhaɱ domanassaɱ paṭisaŋvedayetha.||
Ko pana vādo tīhi sattisatehi haññamāno'ti.|| ||

[24] Evam eva khvāhaɱ bhikkhave, viññāṇāhāro daṭṭhabbo'ti vadāmi.|| ||

[25] Viññāṇe bhikkhave, āhāre pariññāte nāmarūpaɱ pariññātaɱ hoti.||
Nāmarūpe pariññāte ariyasāvakassa n'atthi kiñci uttariɱ karaṇīyanti vadāmī" ti.|| ||


Contact:
E-mail
Copyright Statement   Webmaster's Page