Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
II. Nidāna Vagga
XII. Nidāna Saɱyutta
VII. Mahā Vagga

Sutta 66

Sammasana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[107]

[1][pts][bodh] Evaɱ me sutaɱ|| ||

Ekaɱ samayaɱ Bhagavā Kurūsu viharati||
Kammāsadammaɱ nāma Kurūnaɱ nigamo.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

3. Bhagavā etad avoca:|| ||

"Sammasatha no tumhe bhikkhave,||
antarā sammasananti?"|| ||

4. Evaɱ vutte aññataro bhikkhu Bhagavantaɱ etad avoca:|| ||

"Ahaɱ kho bhante, sammasāmi antarā sammasanan" ti.|| ||

5. "Yathā kathaɱ pana tvaɱ bhikkhu,||
sammasasi antarām sammasanti?"|| ||

6. Atha kho so bhikkhu vyākāsi.|| ||

Yathā so bhikkhu vyākāsi,||
na so bhikkhu Bhagavato cittaɱ ārādhesi.|| ||

7. Evaɱ vutte āyasmā Ānando Bhagavantaɱ etad avoca:|| ||

"Etassa Bhagavā kālo,||
etassa Sugata kālo,||
yaɱ Bhagavā antarā sammasaɱ bhāseyya,||
Bhagavato sutvā bhikkhū dhāressantī" ti.|| ||

8. "Tena h'Ānanda suṇātha,||
sādhukaɱ manasi karotha,||
bhāsissāmī" ti.|| ||

"Evaɱ bhante" ti||
kho te bhikkhū Bhagavato paccassosuɱ.|| ||

9. Bhagavā etad avoca:|| ||

"Idha, bhikkhave, bhikkhu sammasamāno sammasati antarā sammasanaɱ.|| ||

Yaɱ kho idaɱ anekavidhaɱ nānappakārakaɱ dukkhaɱ loke uppajjati jarā-māraṇaɱ.|| ||

Idaɱ kho dukkhaɱ,||
kiɱ nidānaɱ,||
kiɱ samudayaɱ,||
[108] kiɱ jātikaɱ||
kim pabhavaɱ?|| ||

Kismiɱ sati, jarā-māraṇaɱ hoti,||
kismiɱ asati, jarā-māraṇaɱ na hotī' ti?|| ||

So sammasamāno evaɱ pajānāti:|| ||

Yaɱ kho idaɱ anekavidhaɱ nānāppakārakaɱ dukkhaɱ loke uppajjati jarā-māraṇaɱ,||
idaɱ kho dukkhaɱ upadhi-nidānaɱ||
upadhi-samudayaɱ||
upadhi-jātikaɱ||
upadhi-pabhavaɱ.|| ||

Upadhismiɱ sati,||
jarā-māraṇaɱ hoti,||
upadhismiɱ asati,||
jarā-māraṇaɱ na hotī' ti.|| ||

So jarā-māraṇañ ca pajānāti,||
jarā-māraṇa-samudayañ ca pajānāti,||
jarā-māraṇa-nirodhañ ca pajānāti,||
yā ca jarā-māraṇa-nirodhasāruppagāminī paṭipadā,||
tañ ca pajānāti.|| ||

Tathā paṭipanno ca hoti anudhammacārī.|| ||

Ayaɱ vuccati bhikkhave, bhikkhu sabbaso sammā dukkhakkhayāya paṭipanno jarā-māraṇa-nirodhāya.|| ||

10. Athāparaɱ sammasamāno sammasati antarā sammasanaɱ.|| ||

Upadhi panāyaɱ||
kim nidāno||
kiɱ samudayo||
kiɱ jātiko||
kim pabhavo?|| ||

Kismiɱ sati, upadhi hoti,||
kismiɱ asati, upadhi na hotī' ti?|| ||

So sammasamāno evaɱ pajānāti:|| ||

Upadhi taṇhā-nidāno,||
taṇhā-samudayo,||
taṇhā-jātiko,||
taṇhā-pabhavo.|| ||

Taṇhāya sati,||
upadhi hoti,||
taṇhāya asati,||
upadhi na hotī' ti.|| ||

So upadhiñ ca pajānāti,||
upadhi-samudayañ ca pajānāti,||
upadhi-nirodhañ ca pajānāti,||
yā ca upadhi-nirodhasāruppagāminī paṭipadā,||
tañ ca pajānāti.|| ||

Tathā paṭipanno ca hoti anudhammacārī.|| ||

Ayaɱ vuccati bhikkhave, bhikkhu sabbaso sammā dukkhakkhayāya paṭipanno upadhinirodhāya.|| ||

11. Athāparaɱ sammasamāno sammasati antarā sammasanaɱ.|| ||

Taṇhā panāyaɱ||
kattha uppajjamānā uppajjati,||
kattha nivisamānā nivisatī' ti?|| ||

So sammasamāno evaɱ pajānāti:|| ||

Yaɱ kho kiñci loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

Kiñ ca loke piyarūpaɱ sātarūpaɱ?|| ||

Cakkhuɱ loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

12. Sotaɱ loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

13. Ghāṇaɱ loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

14. Jivhā loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

15. Kāyo loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

16. Mano loke piyarūpaɱ sātarūpaɱ,||
etthesā taṇhā uppajjamānā uppajjati,||
ettha nivisamānā nivisati.|| ||

 


 

17. Ye hi ke ci bhikkhave, atītam addhānaɱ samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato addakkhuɱ,||
sukhato addakkhuɱ,||
attato addakkhuɱ,||
ārogyato addakkhuɱ,||
khemato addakkhuɱ,||
te taṇhaɱ vaḍḍhesuɱ.|| ||

18. Ye taṇhaɱ vaḍḍhesuɱ,||
te upadhiɱ vaḍḍhesuɱ;||
ye upadhiɱ vaḍḍhesuɱ,||
te dukkhaɱ vaḍḍhesuɱ;||
ye dukkhaɱ vaḍḍhesuɱ,||
te na parimucciɱsu jātiyā jarā māraṇena sokehi paridevehi dukkhehi domanassehi upāyāsehi,||
na parimucciɱsu dukkhasmā ti vadāmi.|| ||

19. Ye pi hi keci bhikkhave, anāgatam addhānaɱ samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato dakkhinti,||
sukhato dakkhinti||
attato dakkhinti,||
ārogyato dakkhinti,||
khemato dakkhinti,||
te taṇhaɱ vaḍḍhessanti.|| ||

20. Ye taṇhaɱ vaḍḍhessanti,||
te upadhiɱ vaḍḍhessanti,||
ye upadhiɱ vaḍḍhessanti,||
te dukkhaɱ vaḍḍhessanti;||
ye dukkhaɱ vaḍḍhessanti;||
te na parimuccissanti jātiyā jarāmāraṇena sokehi paridevehi dukkhehi domanassehi upāyāsehi,||
na parimuccissanti dukkhasmā ti vadāmi.|| ||

21. Ye pi hi keci bhikkhave, etarahi samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato passanti,||
sukhato passanti,||
attato passanti,||
ārogyato passanti,||
khemato passanti,||
te taṇhaɱ vaḍḍhenti.|| ||

22. Ye taṇhaɱ vaḍḍhenti,||
te upadhiɱ vaḍḍhenti;||
ye upadhiɱ vaḍḍhenti,||
te dukkhaɱ vaḍḍhenti;||
ye dukkhaɱ vaḍḍhenti,||
te na parimuccanti jātiyā jarāmāraṇena sokehi paridevehi dukkhehi domanassehi upāyāsehi na parimuccanti dukkhasmā ti vadāmi.|| ||

[110] 23. Seyyathā pi bhikkhave, āpānīyakaɱso vaṇṇasampanno gandhasampanno rasasampanno,||
so ca kho visena saŋsaṭṭho.|| ||

Atha puriso āgaccheyya ghammābhitatto ghammā pareto kilanto tasito pipāsito||
tam enaɱ evaɱ vadeyyuɱ:|| ||

'Ayaɱ te ambho purisa,||
āpānīyakaɱso vaṇṇasampanno gandhasampanno rasasampanno,||
so ca kho visena saŋsaṭṭho,||
sace ākaŋkhasi piva pivato hi kho taɱ chādissati vaṇṇena pi gandhena pi rasena pi,||
pītvā ca pana tato nidānaɱ māraṇaɱ vā nigacchasi,||
māraṇamattaɱ vā dukkhan' ti.|| ||

So taɱ āpānīyakaɱsaŋ sahasā apaṭisaŋkhā piveyya,||
na paṭinissajjeyya||
so tato nidānaɱ māraṇaɱ vā nigaccheyya,||
māraṇamattaɱ vā dukkhaɱ.|| ||

24. Evam eva kho bhikkhave, ye keci atītam addhānaɱ samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato addakkhuɱ,||
sukhato addakkhuɱ,||
attato addakkhuɱ,||
ārogyato addakkhuɱ,||
khemato addakkhuɱ,||
te taṇhaɱ vaḍḍhesuɱ.|| ||

Ye taṇhaɱ vaḍḍhesuɱ,||
te upadhiɱ vaḍḍhesuɱ;||
ye upadhiɱ vaḍḍhesuɱ,||
te dukkhaɱ vaḍḍhesuɱ;||
ye dukkhaɱ vaḍḍhesuɱ,||
te na parimucciɱsu jātiyā jarā māraṇena sokehi paridevehi dukkhehi domanassehi upāyāsehi,||
na parimucciɱsu dukkhasmā ti vadāmi.|| ||

25. Ye pi hi keci bhikkhave, anāgatam addhānaɱ samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato dakkhinti,||
sukhato dakkhinti||
attato dakkhinti,||
ārogyato dakkhinti,||
khemato dakkhinti,||
te taṇhaɱ vaḍḍhessanti.|| ||

Ye taṇhaɱ vaḍḍhessanti,||
te upadhiɱ vaḍḍhessanti,||
ye upadhiɱ vaḍḍhessanti,||
te dukkhaɱ vaḍḍhessanti;||
ye dukkhaɱ vaḍḍhessanti;||
te na parimuccissanti jātiyā jarāmāraṇena sokehi paridevehi dukkhehi domanassehi upāyāsehi,||
na parimuccissanti dukkhasmā ti vadāmi.|| ||

26. Ye pi hi keci bhikkhave, etarahi samaṇā vā brāhmaṇā vā yaɱ loke piyarūpaɱ sātarūpaɱ,||
taɱ niccato passanti,||
sukhato passanti,||
attato passanti,||
ārogyato passanti,||
khemato passanti,||
te taṇhaɱ vaḍḍhenti.|| ||

27. Ye taṇhaɱ vaḍḍhenti,||
te upadhiɱ vaḍḍhenti;||
ye upadhiɱ vaḍḍhenti,||
te dukkhaɱ vaḍḍhenti;||
ye dukkhaɱ vaḍḍhenti,||
te na parimuccanti jātiyā jarāmāraṇena sokehi paridevehi dukkhehi domanassehi upāyāsehi na parimuccanti dukkhasmā ti vadāmi.|| ||

 


 

28. Ye ca kho keci bhikkhave,||
atītam addhānaɱ samaṇā vā brāhmbaṇā vā yaɱ loke piyarūpaɱ sātarūpaɱ,||
taɱ aniccato addakkhuɱ,||
dukkhato addakkhuɱ,||
anattato addakkhuɱ,||
rogato addakkhuɱ,||
bhayato addakkhuɱ||
te taṇhaɱ pajahiɱsu.|| ||

Ye taṇhaɱ pajahiɱsu,||
te upadhiɱ pajahiɱsu;||
ye upadhiɱ pajahiɱsu,||
te dukkhaɱ pajahiɱsu;||
ye dukkhaɱ pajahiɱsu,||
te parimucciɱsu jātiyā jarāya māraṇena sokehi paridevehi dukkhehi domanassehi upāyāsehi||
parimucciɱsu dukkhasmā ti vadāmi.|| ||

29. Ye pi hi keci bhikkhave,||
anāgatam addhānaɱ samaṇā [111] vā brāhmaṇā vā yaɱ loke piyarūpaɱ sātarūpaɱ,||
taɱ aniccato dakkhinti,||
dukkhato dakkhinti,||
anattato dakkhinti,||
rogato dakkhinti,||
bhayato dakkhinti||
te taṇhaɱ pajahissanti.|| ||

30. Ye taṇhaɱ pajahissanti,||
te dukkhaɱ pajahissanti;||
ye dukkhaɱ pajahissanti,||
te dukkhaɱ pajahissanti;||
ye dukkhaɱ pajahissanti,||
te parimuccissanti jātiyā jarā māraṇena sokehi paridevehi dukkhehi domanassehi upāyāsehi||
parimuccissanti dukkhasmā ti vadāmi.|| ||

31. Ye pi hi keci bhikkhave,||
etarahi samaṇā vā brāhmaṇā vā yaɱ loko piyarūpaɱ sātarūpaɱ,||
taɱ aniccato passanti,||
dukkhato passanti,||
anattato passanti,||
rogato passanti,||
bhayato passanti,||
te taṇhaɱ pajahanti.|| ||

32. Ye taṇhaɱ pajahanti,||
te upadhiɱ pajahanti;||
ye upadhiɱ pajahanti,||
te dukkhaɱ pajahanti;||
ye dukkhaɱ pajahanti,||
te parimuccanti jātiyā jarāya māraṇena sokehi paridevehi dukkhehi domanassehi upāyāsehi,||
parimuccanti dukkhasmā ti vadāmi.|| ||

33. Seyyathā pi bhikkhave, āpānīyakaɱso vaṇṇasampanno gandhasampanno rasasampanno,||
so ca kho visena saŋsaṭṭho.|| ||

Atha puriso āgaccheyya ghammābhitatto ghamma pareto kilanto tasito pipāsito||
tam enaɱ evaɱ vadeyyuɱ:|| ||

'Ayaɱ te ambho purisa,||
āpānīyakaɱso vaṇṇasampanno gandhasampanno rasasampanno,||
so ca kho visena saŋsaṭṭho||
sace ākaŋkhasi piva,||
pivato hi kho taɱ chādissati vaṇṇena pi gandhena pi rasena pi||
pitvitvā ca pana tato nidānaɱ māraṇaɱ vā nigacchasi,||
māraṇamattaɱ vā dukkhan ti.|| ||

34. Atha kho bhikkhave, tassa purisassa evam assa:|| ||

'Sakkā kho me ayaɱ surāpipāsitā pānīyena vā vinetuɱ,||
dadhimaṇḍakena vā vinetuɱ,||
matthaloṇikāya vā vinetuɱ,||
loṇasovīrakena vā vinetuɱ||
na tvevāhaɱ taɱ piveyyaɱ,||
yaɱ mama assa dīgha-rattaɱ ahitāya dukkhāyā' ti.|| ||

So taɱ āpānīyakaɱsaɱ paṭisaŋkhā na piveyya,||
paṭi- [112] nissajjeyya.|| ||

So tato nidānaɱ na māraṇaɱ vā nigaccheyya,||
māraṇamattaɱ vā dukkhaɱ.|| ||

35. Evam eva kho bhikkhave,||
ye hi ke ci atītam addhānaɱ samaṇā vā brāhmbaṇā vā yaɱ loke piyarūpaɱ sātarūpaɱ,||
taɱ aniccato addakkhuɱ,||
dukkhato addakkhuɱ,||
anattato addakkhuɱ,||
rogato addakkhuɱ,||
bhayato addakkhuɱ||
te taṇhaɱ pajahiɱsu.|| ||

36. Ye taṇhaɱ pajahiɱsu,||
te upadhiɱ pajahiɱsu;||
ye upadhiɱ pajahiɱsu,||
te dukkhaɱ pajahiɱsu;||
ye dukkhaɱ pajahiɱsu,||
te parimucciɱsu jātiyā jarāya māraṇena sokehi paridevehi dukkhehi domanassehi upāyāsehi||
parimucciɱsu dukkhasmā ti vadāmi.|| ||

37. Ye pi hi keci bhikkhave,||
anāgatam addhānaɱ samaṇā vā brāhmaṇā vā yaɱ loke piyarūpaɱ sātarūpaɱ,||
taɱ aniccato dakkhinti,||
dukkhato dakkhinti,||
anattato dakkhinti,||
rogato dakkhinti,||
bhayato dakkhinti||
te taṇhaɱ pajahissanti.|| ||

38. Ye taṇhaɱ pajahissanti,||
te dukkhaɱ pajahissanti;||
ye dukkhaɱ pajahissanti,||
te dukkhaɱ pajahissanti;||
ye dukkhaɱ pajahissanti,||
te parimuccissanti jātiyā jarā māraṇena sokehi paridevehi dukkhehi domanassehi upāyāsehi||
parimuccissanti dukkhasmā ti vadāmi.|| ||

39. Ye pi hi keci bhikkhave,||
etarahi samaṇā vā brāhmaṇā vā yaɱ loko piyarūpaɱ sātarūpaɱ,||
taɱ aniccato passanti,||
dukkhato passanti,||
anattato passanti,||
rogato passanti,||
bhayato passanti,||
te taṇhaɱ pajahanti.|| ||

40. Ye taṇhaɱ pajahanti,||
te upadhiɱ pajahanti;||
ye upadhiɱ pajahanti,||
te dukkhaɱ pajahanti;||
ye dukkhaɱ pajahanti,||
te parimuccanti jātiyā jarāya māraṇena sokehi paridevehi dukkhehi domanassehi upāyāsehi,||
parimuccanti dukkhasmā ti vadāmi.|| ||


Contact:
E-mail
Copyright Statement   Webmaster's Page