Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
12. Nidāna Saɱyutta
7. Mahā Vagga

Sutta 69

Upayanti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[118]

[1][pts][bodh][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti||
te bhikkh Bhagavato paccassosuɱ|| ||

Bhagavā etad avoca:|| ||

"Mahā samuddo bhikkhave, upayanto||
mahā-nadiyo upayāpeti;||
mahā-nadiyo upayantiyo,||
kunnadiyo upayāpenti;||
kunnadiyo upayāpentiyo,||
mahā-sobbhe upayāpenti;||
mahā-sobbhā upayantā,||
kussobbhe upayāpenti.|| ||

Evam eva kho bhikkhave, avijjā upayantī,||
sankhāre upayāpeti.|| ||

Sankhārā upayantā,||
viññāṇaɱ upayāpenti.|| ||

Viññāṇaɱ upayan,||
taɱ nāma-rūpaɱ upayāpeti.|| ||

Nāma-rūpaɱ upayan,||
taɱ saḷāyatanaɱ upayāpeti.|| ||

Saḷāyatanaɱ upayan,||
taɱ phassaŋ upayāpeti.|| ||

Phasso upayanto,||
vedanaɱ upayāpeti.|| ||

Vedanā upayantī,||
taṇhaɱ upayāpeti.|| ||

Taṇhā upayantī,||
upādānaɱ upayāpeti.|| ||

Upādānaɱ upayan,||
taɱ [119] bhavaɱ upayāpeti.|| ||

Bhavo upayanto,||
jātiɱ upayāpeti.|| ||

Jāti upayanti,||
jarā-māraṇaɱ upayāpeti.|| ||

 

§

 

Mahā-samuddo bhikkhave, apayanto,||
mahā-nadiyo apayāpeti.|| ||

Mahānadiyo apayantiyo,||
kunnadiyo apayāpenti.|| ||

Kunnadiyo apayantiyo,||
mahā-sobbhe apayāpenti.|| ||

Mahāsobbhā apayantā,||
kussobbhe apayāpenti.|| ||

Evam eva kho bhikkhave, avijjā apayantī,||
sankhāre apayāpeti|| ||

Sankhārā apayantā,||
viññāṇaɱ apayāpenti.|| ||

Viññāṇaɱ apayan,||
taɱ nāma-rūpaɱ apayāpeti.|| ||

Nāma-rūpaɱ apayan,||
taɱ saḷāyatanaɱ apayāpeti.|| ||

Saḷāyatanaɱ apayan,||
taɱ phassaŋ apayāpeti.|| ||

Phasso apayanto,||
vedanaɱ apayāpeti.|| ||

Vedanā apayantī,||
taṇhaɱ apayāpeti.|| ||

Taṇhā apayantī,||
upādānaɱ apayāpeti.|| ||

Upādānaɱ apayan,||
taɱ bhavaɱ apayāpeti.|| ||

Bhavo apayanto,||
jātiɱ apayāpeti.|| ||

Jāti apayantī,||
jarā-māraṇaɱ apayāpetī" ti.|| ||


Contact:
E-mail
Copyright Statement