Dutiya Samudda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

[137]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkh Bhagavato paccassosuɱ|| ||

Bhagavā etad avoca:|| ||

"Seyyathā pi bhikkhave,||
mahā-samuddo parikkhayaɱ pariyādānaɱ gaccheyya,||
ṭhapetvā dve vā tīṇi vā udakaphusitāni.|| ||

Taɱ kim maññatha bhikkhave,||
katamaɱ nu kho bahutaraɱ,||
yaɱ vā mahā-samudde udakaɱ parikkhīṇaɱ pariyādinnaɱ,||
yāni vā dve vā tīṇi vā udakaphusitāni avasiṭṭhānī" ti?|| ||

"Etad eva bhante,||
bahutaraɱ mahā-samudde udakaɱ yad idaɱ parikkhīṇaɱ pariyādinnaɱ appamattāni dve vā tiṇi vā udakaphusitāni avasiṭṭhāni.|| ||

N'eva satimaɱ kalaɱ upenti,||
na sahassimaɱ kalaɱ upenti,||
na sata-sahassimaɱ kalaɱ upenti,||
mahā-samudde udakaɱ parikkhīṇaɱ pariyādinnaɱ upanidhāya dve vā tīṇi vā udakaphusitāni avasiṭṭhānī" ti.|| ||

"Evam eva kho bhikkhave,||
ariya-sāvakassa diṭṭhi-sampannassa puggalassa abhisametāvino etad eva bahutaraɱ dukkhaɱ||
yad idaɱ parikkhīṇaɱ pariyādinnaɱ,||
appa-mattakaɱ avasiṭṭhaɱ.|| ||

N'eva satimaɱ kalaɱ upeti,||
na sahassimaɱ kalaɱ upeti,||
na sata-sahassimaɱ kalaɱ upeti,||
purimaɱ dukkha-k-khandhaɱ parikkhīṇaɱ pariyādinnaɱ upanidhāya||
yad idaɱ satta-k-khattūɱ paramatā.|| ||

Evaɱ mahatthiyo kho bhikkhave dhammābhisamayo,||
evaɱ mahatthiyo Dhamma-cakkhu paṭilābho" ti.|| ||