Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
14. Dhātu-Saɱyuttaɱ
I. Nānatta Vagga Paṭhama
1. Bāhira-Pañcakaɱ

Sutta 7

Saññā [Pariyesanā-Nānatta] Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[143]

[pts][bodh][olds] Evaɱ me sutaɱ:|| ||

Ekaɱ samayaɱ Sāvatthiyaɱ viharati Jetavane Anāthapiṇḍikassa ārāme.|| ||

2. "Dhātu-nānattaɱ bhikkhave, paṭicca uppajjati saññā-nānattaɱ,||
saññā-nānattaɱ paṭicca uppajjati saŋkappa-nānattaɱ,||
saŋkappa-nānattaɱ paṭicca uppajjati chanda-nānattaɱ,||
chanda-nānattaɱ paṭicca uppajjati pariḷāha-nānattaɱ,||
pariḷāha-nānattaɱ paṭicca uppajjati pariyesanā-nānattaɱ.|| ||

3. Katamañ ca bhikkhave, dhātu-nānattaɱ?|| ||

Rūpa-dhātu,||
sadda-dhātu,||
gandha-dhātu,||
rasa-dhātu,||
phoṭṭhabba-dhātu,||
dhamma-dhātu.|| ||

Idaɱ vuccati bhikkhave dhātu-nānattaɱ.|| ||

[144] 4. Kathañ ca bhikkhave, dhātu-nānattaɱ paṭicca uppajjati saññā-nānattaɱ,||
saññā-nānattaɱ paṭicca uppajjati saŋkappa-nānāttaɱ,||
saŋkappa-nānattaɱ paṭicca uppajjati chanda-nānattaɱ,||
chanda-nānattaɱ paṭicca uppajjati pariḷāha-nānattaɱ,||
pariḷāha-nānattaɱ paṭicca uppajjati pariyesanā-nānattaɱ?|| ||

5. Rūpa-dhātuɱ bhikkhave, paṭicca uppajjati rūpa-saññā,||
rūpa-saññaɱ paṭicca uppajjati rūpa-saɱkappo,||
rūpa-saɱkappaɱ paṭicca uppajjati rūpa-c-chando,||
rūpa-c-chandaɱ paṭicca uppajjati rūpa-pariḷāho,||
rūpa-pariḷāhaɱ paṭicca uppajjati rūpa-pariyesanā.|| ||

6. Sadda-dhātuɱ bhikkhave, paṭicca uppajjati sadda-saññā,||
sadda-saññaɱ paṭicca uppajjati sadda-saɱkappo,||
sadda-saɱkappaɱ paṭicca uppajjati sadda-c-chando,||
sadda-c-chandaɱ paṭicca uppajjati sadda-pariḷāho,||
sadda-pariḷāhaɱ paṭicca uppajjati sadda-pariyesanā.|| ||

7. Gandha-dhātuɱ bhikkhave, paṭicca uppajjati gandha-saññā,||
gandha-saññaɱ paṭicca uppajjati gandha-saɱkappo,||
gandha-saɱkappaɱ paṭicca uppajjati gandha-c-chando,||
gandha-c-chandaɱ paṭicca uppajjati gandha-pariḷāho,||
gandha-pariḷāhaɱ paṭicca uppajjati gandha-pariyesanā.|| ||

8. Rasa-dhātuɱ bhikkhave, paṭicca uppajjati rasa-saññā,||
rasa-saññaɱ paṭicca uppajjati rasa-saɱkappo,||
rasa-saɱkappaɱ paṭicca uppajjati rasa-c-chando,||
rasa-c-chandaɱ paṭicca uppajjati rasa-pariḷāho,||
rasa-pariḷāhaɱ paṭicca uppajjati rasa-pariyesanā.|| ||

9. Phoṭṭhabba-dhātuɱ bhikkhave, paṭicca uppajjati phoṭṭhabba-saññā,||
phoṭṭhabba-saññaɱ paṭicca uppajjati phoṭṭhabba-saɱkappo,||
phoṭṭhabba-saɱkappaɱ paṭicca uppajjati phoṭṭhabba-c-chando,||
phoṭṭhabba-c-chandaɱ paṭicca uppajjati phoṭṭhabba-pariḷāho,||
phoṭṭhabba-pariḷāhaɱ paṭicca uppajjati phoṭṭhabba-pariyesanā.|| ||

10. Dhamma-dhātuɱ bhikkhave, paṭicca uppajjati dhamma-saññā,||
dhamma-saññaɱ paṭicca uppajjati dhamma-saɱkappo,||
dhamma-saɱkappaɱ paṭicca uppajjati dhamma-c-chando,||
dhamma-c-chandaɱ paṭicca uppajjati dhamma-pariḷāho,||
dhamma-pariḷāhaɱ paṭicca uppajjati dhamma-pariyesanā.|| ||

11. Evaɱ kho bhikkhave, dhātu-nānattaɱ paṭicca uppajjati saññā-nānattaɱ,||
saññā-nānattaɱ paṭicca uppajjati saŋkappa-nānāttaɱ,||
saŋkappa-nānattaɱ paṭicca uppajjati chanda-nānattaɱ,||
chanda-nānattaɱ paṭicca uppajjati pariḷāha-nānattaɱ,||
pariḷāha-nānattaɱ paṭicca uppajjati pariyesanā-nānattan" ti.|| ||


Contact:
E-mail
Copyright Statement