Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
Nidāna Vagga
14. Dhatu Saɱyutta

Sutta 11

Sattimā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][ati] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. [150] Sattimā bhikkhave, dhātuyo.|| ||

Katamā satta?|| ||

Ābhādhātu,||
subhadhātu,||
ākāsānaññāyatanadhātu,||
viññāṇañcāyatanadhātu,||
ākiñcaññāyatanadhātu,||
n'eva-saññā-nāsaññāyatanadhātu,||
saññāvedayitanirodhadhātu.|| ||

Imā kho bhikkhave, satta dhātuyoti.|| ||

3. Evaɱ vutte aññataro bhikkhu Bhagavantaɱ etad avoca:|| ||

Yā cāyaɱ bhante, ābhādhātu,||
yā ca subhadhātu,||
yā ca ākāsānañcāyatanadhātu,||
yā ca viññāṇañcāyatanadhātu,||
yā ca ākiñcaññāyatanadhātu,||
yā ca n'eva-saññā-nāsaññāyatanadhātu,||
yā ca saññāvedayitanirodhadhātu.|| ||

Imā nu kho bhante, dhātuyo kiɱ paṭicca paññāyantī ti?|| ||

4. Yāyaɱ bhikkhu, ābhādhātu,||
ayaɱ dhātu andhakāraɱ paṭicca paññāyati|| ||

5. Yāyaɱ bhikkhu, subhadhātu,||
ayaɱ dhātu asubhaɱ paṭicca paññāyati.|| ||

6. Yāyaɱ bhikkhu, ākāsānañcāyatanadhātu,||
ayaɱ dhātu rūpaɱ paṭicca paññāyati.|| ||

7. Yāyaɱ bhikkhu, viññāṇañcāyatanadhātu,||
ayaɱ dhātu ākāsānañcāyatanaɱ paṭicca paññāyati.|| ||

8. Yāyaɱ bhikkhu, ākiñcaññāyatanadhātu,||
ayaɱ dhātuɱ viññāṇañcāyatanaɱ paṭicca paññāyati.|| ||

9. Yāyaɱ bhikkhu, n'eva-saññā-nāsaññāyatanadhātu,||
ayaɱ dhātu ākiñcaññāyatanaɱ paṭicca paññāyati.|| ||

10. Yāyaɱ bhikkhu, saññāvedayitanirodhadhātu,||
ayaɱ dhātu nirodhaɱ paṭicca paññāyatī ti.|| ||

11. Yā cāyaɱ bhante, ābhādhātu||
yā ca subhadhātu,||
yā ca ākāsānañcāyatanadhātu,||
yā ca viññāṇañcāyatanadhātu,||
yā ca ākiñcaññāyatanadhātu,||
yā ca n'eva-saññā-nāsaññāyatanadhātu,||
yā ca saññāvedayitanirodhadhātu.|| ||

Imā nu kho bhante, dhātuyo kathaɱ samāpatti pattabbā ti?|| ||

Ya cāyaɱ bhikkhu, ābhādhātu,||
yā ca subhadhātu,||
yā ca ākāsānañcāyatanadhātu,||
yā ca viññāṇañcāyatanadhātu,||
[151] ca ākiñcaññāyatanadhātu.|| ||

Imā dhātuyo saññāsamāpatti pattabbā.|| ||

Yāyaɱ bhikkhu, n'eva-saññā-nāsaññāyatanadhātu,||
ayaɱ dhātu saɱkhārāvasesā samāpatti pattabbā.|| ||

Yāyaɱ bhikkhu, saññāvedayitanirodhadhātu,||
ayaɱ dhātu nirodhasamāpatti pattabbā ti.|| ||


Contact:
E-mail
Copyright Statement   Webmaster's Page