Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
Nidāna Vagga
14. Dhatu Saɱyutta

Sutta 12

Sanidāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Sanidānaɱ bhikkhave, uppajjati kāmavitakko no anidānaɱ,||
sanidānaɱ uppajjati vyāpādavitakko no anidānaɱ,||
sanidānaɱ uppajjati vihiɱsāvitakko no anidānaɱ.|| ||

3. Kathañ ca bhikkhave, sanidānaɱ uppajjati kāmavitakko no anidānaɱ,||
sanidānaɱ uppajjati vyāpādavitakko no anidānaɱ,||
sanidānaɱ uppajjati vihiɱsāvitakko no anidānaɱ?|| ||

4. Kāmadhātuɱ bhikkhave, paṭicca uppajjati kāmasaññā,||
kāmasaññaɱ paṭicca uppajjati kāmasaɱkappo,||
kāmasaɱkappaɱ paṭicca uppajjati kāmacchando,||
kāmacchandaɱ paṭicca uppajjati kāmapariḷāho,||
kāmapari'āhaɱ paṭicca uppajjati kāmapariyesanā.|| ||

Kāmapariyesanaɱ bhikkhave, pariyesamāno assutavā puphujjano tīhi ṭhānehi micchāpaṭipajjati:||
kāyena, vācāya, manasā.|| ||

5. Vyāpādadhātuɱ bhikkhave, paṭicca uppajjati vyāpādasaññā,||
vyāpādasaññaɱ paṭicca uppajjati vyāpādasaɱkappo,||
vyāpādasaɱkappaɱ paṭicca uppajjati vyāpādacchando,||
vyāpādacchandaɱ paṭicca uppajjati vyāpādapariḷāho,||
vyāpādapari'āhaɱ paṭicca uppajjati vyāpādapariyesanā.|| ||

Vyāpādapariyesanaɱ bhikkhave, pariyesamāno assutavā puthujjano tīhi ṭhānehi micchā paṭipajjati:||
kāyena, vācāya, manasā.|| ||

6. Vihiɱsādhātuɱ bhikkhave, paṭicca uppajjati vihiɱsāsaññā,||
vihiɱsāsaññaɱ paṭicca uppajjati vihiɱsāsaɱkappo,||
vihiɱsāsaɱkappaɱ paṭicca uppajjati vihiɱsāchando,||
vihiɱsāchandaɱ paṭicca uppajjati vihiɱsāpariḷāho,||
vihiɱsāpari'āhaɱ paṭicca uppajjati vihiɱsāpariyesanā.|| ||

Vihiɱsāpariyesanaɱ [152] bhikkhave, pariyesamāno assutavā puthujjano tīhi ṭhānehi micchā paṭipajjati:||
kāyena, vācāya, manasā.|| ||

7. seyyathā pi bhikkhave, puriso ādittaɱ tīṇukkaɱ sukkhe tiṇadāye nikkhipeyya,||
no ce hatthehi ca pādehi ca khippam eva nibbāpeyya,||
evaɱ hi bhikkhave, ye tiṇakaṭṭhanissitā pāṇā,||
te anayavyasanaɱ āpajjeyyuɱ.|| ||

8. Evam eva kho bhikkhave, yo hi koci samaṇo vā brāhmaṇo vā uppannaɱ visamagataɱ saññaɱ na khippam eva pajahati vinodeti vyantīkaroti anabhāvaɱ gameti,||
so diṭṭhe ceva dhamme dukkhaɱ viharati savighātaɱ saupāyāsaɱ sapari'āhaɱ||
kāyassa ca bhedā param maraṇā duggati pāṭikaŋkhā.|| ||

9. Sanidānaɱ bhikkhave, uppajjati nekkhammavitakko no anidānaɱ,||
sanidānaɱ uppajjati avyāpādavitakko no anidānaɱ,||
sanidānaɱ uppajjati avihiɱsāvitakko no anidānaɱ.|| ||

10. Kathañ ca bhikkhave, sanidānaɱ uppajjati kekkhammavitakko no anidānaɱ,||
sanidānaɱ uppajjati avyāpādavitakko no anidānaɱ,||
sanidānaɱ uppajjati avihiɱsāvitakko no anidānaɱ?|| ||

11. Nekkhammadhātuɱ bhikkhave, paṭicca uppajjati nekkhammasaññā,||
nekkhammasaññaɱ paṭicca uppajjati nekkhammasaɱkappo,||
nekkhammasaɱkappaɱ paṭicca uppajjati nekkhammacchando,||
nekkhammacchandaɱ paṭicca uppajjati nekkhakammapariḷāho,||
nekkhammapari'āhaɱ paṭicca uppajjati nekkhammapariyesanā,||
nekkhammapariyesanaɱ bhikkhave, pariyesamāno sutavā ariyasāvako tīhi ṭhānehi sammā paṭipajjati:||
kāyena, vācāya, manasā.|| ||

12. Avyāpādadhātuɱ bhikkhave, paṭicca uppajjati avyāpādasaññā,||
avyāpādasaññaɱ paṭicca uppajjati avyāpādasaɱkappo,||
avyāpādasaɱkappaɱ paṭicca uppajjati avyāpādacchando,||
avyāpādacchandaɱ paṭicca uppajjati avyāpādapariḷāho,||
avyāpādapari'āhaɱ paṭicca uppajjati avyāpādapariyesanā,||
avyāpādapariyesanaɱ bhikkhave, pariyesamāno sutavā ariyasāvako tīhi ṭhānehi sammā paṭipajjati:||
kāyena, vācāya, manasā.|| ||

13. Avihiɱsādhātuɱ bhikkhave, paṭicca uppajjati avihiɱsāsaññā,||
[153] avihiɱsāsaññaɱ paṭicca uppajjati avihiɱsāsaɱkappo,||
avihiɱsāsaɱkappaɱ paṭicca uppajjati avihiɱsācchando,||
avihiɱsāchandaɱ paṭicca uppajjati avihiɱsāpariḷāho,||
avihiɱsāpari'āhaɱ paṭicca uppajjati avihiɱsāpariyesanā,||
avihiɱsāpariyesanaɱ bhikkhave, pariyesamāno sutavā ariyasāvako tīhi ṭhānehi sammā paṭipajjati:||
kāyena, vācāya, manasā.|| ||

14. Seyyathā pi bhikkhave, puriso ādittaɱ tīṇukkaɱ sukkhe tiṇadāye nikkhipeyya,||
tam enaɱ hatthehi ca pādehi ca khippam eva nibbāpeyya,||
evaɱ hi bhikkhave, ye tiṇakaṭṭhanissitā pāṇā,||
te na anayavyasanaɱ āpajjeyyuɱ.|| ||

15. Evam eva kho bhikkhave, yo hi koci samaṇo vā brāhmaṇo vā uppannaɱ visamagataɱ saññaɱ khippam eva pajahati vinodeti vyantīkaroti anabhāvaɱ gameti,||
so diṭṭhe c'eva dhamme sukhaɱ viharati avighātaɱ anupāyāsaɱ apari'āhaɱ,||
kāyassa ca bhedā param maraṇā sugati pāṭikaŋkhāti.|| ||


Contact:
E-mail
Copyright Statement   Webmaster's Page