Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
Nidāna Vagga
14. Dhatu Saɱyutta

Sutta 16

Sagātha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Dhātusova bhikkhave, sattā saɱsandanti samenti.|| ||

Hīnādhimuttikā hīnādhimuttikehi saddhiɱ saɱsandanti samenti.|| ||

3. Atītam pi bhikkhave, addhānaɱ dhātuso va sattā saɱsandiɱsu samiɱsu.|| ||

Hīnādhimuttikā hīnādhimuttikehi saddhiɱ saɱsandiɱsu samiɱsu.|| ||

4. Anāgatam pi bhikkhave addhānaɱ dhātuso va sattā saɱsandissanti samessanti:|| ||

Hīnādhimuttikā hīnādhimuttikehi saddhiɱ saɱsandissanti samessanti.|| ||

5. Etarahi pi bhikkhave, paccuppannaɱ addhānaɱ dhātuso va sattā saɱsandanti samenti.|| ||

Hīnādhimuttikā hīnādhimuttikehi saddhiɱ saɱsandanti samenti.|| ||

6. Seyyathā pi bhikkhave, pi gūtho gūthena saɱsandati sameti.|| ||

Muttaɱ muttena saɱsandati sameti.|| ||

Khelo khelena saɱsandati sameti.|| ||

Pubbo pubbena saɱsandati sameti.|| ||

Lohitaɱ lohitena saɱsandati sameti.|| ||

Evam eva kho bhikkhave, dhātuso va sattā saɱsandanti samenti:|| ||

Hīnādhimuttikā hīnādhimuttikehi saddhiɱ saɱsandanti samenti.|| ||

7. Atītampi bhikkhave, addhānaɱ dhātuso va sattā saɱsandiɱsu samiɱsu:|| ||

Hīnādhimuttikā hīnādhimuttikehi saddhiɱ saɱsandiɱsu samiɱsu.|| ||

8. Anāgatam pi bhikkhave, addhānaɱ dhātuso va sattā saɱsandissanti samessanti:|| ||

Hīnādhimuttikā hīnādhimuttikehi saddhiɱ saɱsandissanti samessanti.|| ||

9. Etarahi pi bhikkhave, paccuppannaɱ addhānaɱ dhātuso va sattā saɱsandanti samenti:|| ||

Hīnādhimuttikā hīnādhimuttikehi saddhiɱ saɱsandanti samenti.|| ||

 

§

 

[158] 10. Dhātuso va bhikkhave, sattā saɱsandanti samenti:|| ||

Kalyāṇādhimuttikā kalyāṇādhimuttikehi saddhiɱ saɱsandanti samenti.|| ||

11. Atītam pi bhikkhave, addhānaɱ dhātuso va sattā saɱsandiɱsu samiɱsu:|| ||

Kalyāṇādhimuttikā kalyāṇādhimuttikehi saddhiɱ saɱsandiɱsu samiɱsu.|| ||

12. Anāgatam pi bhikkhave, addhānaɱ dhātuso va sattā saɱsandissanti samessanti.|| ||

Kalyāṇādhimuttikā kalyāṇādhimuttikehi saddhiɱ saɱsandissanti samessanti.|| ||

13. Etarahi pi bhikkhave, paccuppannaɱ addhānaɱ dhātuso va sattā saɱsandanti samenti:|| ||

Kalyāṇādhimuttikā kalyāṇādhimuttikehi saddhiɱ saɱsandanti samenti.|| ||

14. Seyyathā pi bhikkhave, khīraɱ khīrena saɱsandati sameti.|| ||

Telaɱ telena saɱsandati sameti.|| ||

Sappi sappinā saɱsandati sameti.|| ||

Madhu madhunā saɱsandati sameti.|| ||

Phāṇitaɱ phāṇitena saɱsandati sameti.|| ||

Evam eva kho bhikkhave, dhātuso va sattā saɱsandanti samenti:|| ||

Kalyāṇādhimuttikā kalyāṇādhimuttikehi saddhiɱ saɱsandanti samenti.|| ||

15. Atītam pi bhikkhave, addhānaɱ dhātuso va sattā saɱsandiɱsu samiɱsu.|| ||

16. Anāgatam pi bhikkhave, addhānaɱ dhātuso va sattā saɱsandissanti samessanti:|| ||

17. Etarahi pi bhikkhave, paccuppannaɱ addhānaɱ dhātuso va sattā saɱsandanti samenti:|| ||

Kalyāṇādhimuttikā kalyāṇādhimuttikehi saddhiɱ saɱsandanti samentī ti.|| ||

18. Idam avoca Bhagavā.|| ||

Idaɱ vatvā Sugato athāparaɱ etad avoca satthā:

Saɱsaggā vanatho jāto||
asaɱsaggena chijjati,||
parittaɱ dārum āruyha||
yathā sīde mahaṇṇave

Evaɱ kusītam āgamma||
sādhujīvī pi sīdati,||
tasmā taɱ parivajjeyya||
kusītaɱ hīnavīriyaɱ,|| ||

Pavivittehi ariyehi||
pahitattehi jhāyihi,||
niccaɱ āraddhaviriyehi||
paṇḍitehi sahāvaseti.|| ||


Contact:
E-mail
Copyright Statement   Webmaster's Page