Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
Nidāna Vagga
14. Dhatu Saɱyutta

Sutta 32

Acarim [Assādapariyesana] Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Paṭhavidhātuyāhaɱ bhikkhave,||
assādapariyesanaɱ acariɱ.|| ||

Yo paṭhavidhātuyā assādo,||
tad ajjhagamaɱ,||
yāvatā paṭhavidhātuyā assādo,||
paññāya me so sudiṭṭho.|| ||

3. Paṭhavidhātuyāhaɱ bhikkhave,||
ādīnavapariyesanaɱ acariɱ.|| ||

Yo paṭhavidhātuyā ādīnavo,||
tad ajjhagamaɱ,||
yāvatā paṭhavidhātuyā ādīnavo,||
paññāya me so sudiṭṭho.|| ||

4. Paṭhavidhātuyāhaɱ bhikkhave,||
nissaraṇapariyesanaɱ acariɱ.|| ||

Yaɱ paṭhavidhātuyā nissaraṇaɱ,||
tad ajjhagamaɱ,||
yāvatā paṭhavidhātuyā nissaraṇaɱ,||
paññāya me taɱ sudiṭṭhaɱ.|| ||

5. Āpodhātuyāhaɱ bhikkhave,||
assādapariyesanaɱ acariɱ.|| ||

Yo āpodhātuyā assādo,||
tad ajjhagamaɱ,||
yāvatā āpodhātuyā assādo,||
paññāya me so sudiṭṭho.|| ||

6. Āpodhātuyāhaɱ bhikkhave,||
ādīnavapariyesanaɱ acariɱ.|| ||

Yo āpodhātuyā ādīnavo,||
tad ajjhagamaɱ,||
yāvatā āpodhātuyā ādīnavo,||
paññāya me so sudiṭṭho.|| ||

7. Āpodhātuyāhaɱ bhikkhave,||
nissaraṇapariyesanaɱ acariɱ.|| ||

Yaɱ āpodhātuyā nissaraṇaɱ,||
tad ajjhagamaɱ,||
yāvatā āpodhātuyā nissaraṇaɱ,||
paññāya me taɱ sudiṭṭhaɱ.|| ||

8. Tejodhātuyāhaɱ bhikkhave,||
assādapariyesanaɱ acariɱ.|| ||

Yo tejodhātuyā assādo,||
tad ajjhagamaɱ,||
yāvatā tejodhātuyā assādo,||
paññāya me so sudiṭṭho.|| ||

9. Tejodhātuyāhaɱ bhikkhave,||
ādīnavapariyesanaɱ acariɱ.|| ||

Yo tejodhātuyā ādīnavo,||
tad ajjhagamaɱ,||
yāvatā tejodhātuyā ādīnavo,||
paññāya me so sudiṭṭho.|| ||

10. Tejodhātuyāhaɱ bhikkhave,||
nissaraṇapariyesanaɱ acariɱ.|| ||

Yaɱ tejodhātuyā nissaraṇaɱ,||
tad ajjhagamaɱ,||
yāvatā tejodhātuyā nissaraṇaɱ,||
paññāya me taɱ sudiṭṭhaɱ.|| ||

11. Vāyodhātuyāhaɱ bhikkhave,||
assādapariyesanaɱ acariɱ.|| ||

Yo vāyodhātuyā assādo,||
tad ajjhagamaɱ,||
yāvatā vāyodhātuyā assādo,||
paññāya me so sudiṭṭho.|| ||

12. Vāyodhātuyāhaɱ bhikkhave,||
ādīnavapariyesanaɱ acariɱ.|| ||

Yo vāyodhātuyā ādīnavo,||
tad ajjhagamaɱ,||
yāvatā vāyodhātuyā ādīnavo,||
paññāya me so sudiṭṭho.|| ||

13. Vāyodhātuyāhaɱ bhikkhave,||
nissaraṇapariyesanaɱ acariɱ.|| ||

Yaɱ vāyodhātuyā nissaraṇaɱ,||
tad ajjhagamaɱ,||
yāvatā vāyodhātuyā nissaraṇaɱ,||
paññāya me taɱ sudiṭṭhaɱ.|| ||

14. Yāva kīvāncāhaɱ bhikkhave,||
imāsaɱ catunnaɱ dhātūnaɱ assādañ ca||
assādato ādīnavañ ca||
ādīnavato nissaraṇañ ca||
nissaraṇato yathā-bhūtaɱ na abbhaññāsiɱ,||
[172] n'eva tāvāhaɱ bhikkhave sadevake loke samārake sabrahmake,||
sassamaṇabrāhmaṇiyā pajāya sadeva-manussāya anuttaraɱ sammāsambodhiɱ abhisambuddhoti paccaññāsiɱ.|| ||

15. Yato ca khvāhaɱ bhikkhave,||
imāsaɱ catunnaɱ dhātūnaɱ evaɱ assādañ ca||
assādato ādīnavañ ca||
ādīnavato nissaraṇañ ca||
nissaraṇato yathā-bhūtaɱ abbhaññāsiɱ,||
athāhaɱ bhikkhave,||
sadevake loke samāra ke sabrahmake,||
sassamaṇabrāhmaṇiyā pajāya sadeva manussāya anuttaraɱ sammāsambodhiɱ abhisambuddho paccaññāsiɱ.|| ||

16. Ñāṇañca pana me dassanaɱ udapādi:||
Akuppā me cetovimutti||
ayam antimā jāti||
n'atthidāni punabbhavo ti.|| ||


Contact:
E-mail
Copyright Statement   Webmaster's Page