Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikaya
Nidāna Vagga
14. Dhatu Saɱyutta

Sutta 33

Yo no cedaɱ [No cedaɱ] Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. No cedaɱ bhikkhave,||
paṭhavīdhātuyā assādo abhavissa,||
nayidaɱ sattā paṭhavīdhātuyaɱ sārajjeyyuɱ.|| ||

Yasmā ca kho bhikkhave,||
atthi paṭhavīdhātuyā assādo,||
tasmā sattā paṭhavīdhātuyā sārajjanti.|| ||

3. No cedaɱ bhikkhave,||
paṭhavīdhātuyā ādīnavo abhavissa,||
nayidaɱ sattā paṭhavīdhātuyā nibbindeyyuɱ.|| ||

Yasmā ca kho bhikkhave,||
atthi paṭhavīdhātuyā ādinavo,||
tasmā sattā paṭhavīdhātuyā nibbindanti.|| ||

4. No cedaɱ bhikkhave,||
paṭhavīdhātuyā nissaraṇaɱ abhavissa,||
nayidaɱ sattā paṭhavīdhātuyā nissareyyuɱ.|| ||

Yasmā ca kho bhikkhave,||
atthi paṭhavīdhātuyā nissaraṇaɱ,||
tasmā sattā paṭhavīdhātuyā nissaranti.|| ||

5. No cedaɱ bhikkhave,||
āpodhātuyā assādo abhavissa,||
nayidaɱ sattā āpodhātuyaɱ sārajjeyyuɱ.|| ||

Yasmā ca kho bhikkhave,||
atthi āpodhātuyā assādo,||
tasmā sattā āpodhātuyā sārajjanti.|| ||

6. No cedaɱ bhikkhave,||
āpodhātuyā ādīnavo abhavissa,||
nayidaɱ sattā āpodhātuyā nibbindeyyuɱ.|| ||

Yasmā ca kho bhikkhave,||
atthi āpodhātuyā ādinavo,||
tasmā sattā āpodhātuyā nibbindanti.|| ||

7. No cedaɱ bhikkhave,||
āpodhātuyā nissaraṇaɱ abhavissa,||
nayidaɱ sattā āpodhātuyā nissareyyuɱ.|| ||

Yasmā ca kho bhikkhave,||
atthi āpodhātuyā nissaraṇaɱ,||
tasmā sattā āpodhātuyā nissaranti.|| ||

8. No cedaɱ bhikkhave,||
tejodhātuyā assādo abhavissa,||
nayidaɱ sattā tejodhātuyaɱ sārajjeyyuɱ.|| ||

Yasmā ca kho bhikkhave,||
atthi tejodhātuyā assādo,||
tasmā sattā tejodhātuyā sārajjanti.|| ||

9. No cedaɱ bhikkhave,||
tejodhātuyā ādīnavo abhavissa,||
nayidaɱ sattā tejodhātuyā nibbindeyyuɱ.|| ||

Yasmā ca kho bhikkhave,||
atthi tejodhātuyā ādinavo,||
tasmā sattā tejodhātuyā nibbindanti.|| ||

10. No cedaɱ bhikkhave,||
tejodhātuyā nissaraṇaɱ abhavissa,||
nayidaɱ sattā tejodhātuyā nissareyyuɱ.|| ||

Yasmā ca kho bhikkhave,||
atthi tejodhātuyā nissaraṇaɱ,||
tasmā sattā tejodhātuyā nissaranti.|| ||

11. No cedaɱ bhikkhave,||
vāyodhātuyā assādo abhavissa,||
nayidaɱ sattā vāyodhātuyaɱ sārajjeyyuɱ.|| ||

Yasmā ca kho bhikkhave,||
atthi vāyodhātuyā assādo,||
tasmā sattā vāyodhātuyā sārajjanti.|| ||

12. [173] No cedaɱ bhikkhave,||
vāyodhātuyā ādīnavo abhavissa,||
nayidaɱ sattā vāyodhātuyā nibbindeyyuɱ.|| ||

Yasmā ca kho bhikkhave,||
atthi vāyodhātuyā ādinavo,||
tasmā sattā vāyodhātuyā nibbindanti.|| ||

13. No cedaɱ bhikkhave,||
vāyodhātuyā nissaraṇaɱ abhavissa,||
nayidaɱ sattā vāyodhātuyā nissareyyuɱ.|| ||

Yasmā ca kho bhikkhave,||
atthi vāyodhātuyā nissaraṇaɱ,||
tasmā sattā vāyodhātuyā nissaranti.|| ||

14. Yāva kīvañcime bhikkhave,||
sattā imāsaɱ catunnaɱ dhātūnaɱ assādañ ca assādato ādīnavañ ca ādīnavato nissaraṇañ ca nissaraṇato yathā-bhūtaɱ nābbhaññāsuɱ,||
n'eva tāvime bhikkhave,||
sattā sadevakā lokā samārakā sabrahmakā,||
sassamaṇabrāhmaṇī pajāya sadeva-manussāya nissaṭṭhā visaɱuttā vippayuttā vimariyādikatena cetasā vihariɱsu.|| ||

15. Yato ca kho bhikkhave,||
sattā imāsaɱ catunnaɱ dhātūnaɱ assādañ ca assādato ādīnavañ ca ādinavato nissaraṇañ ca nissaraṇato yathā-bhūtaɱ abbhaññāsuɱ,||
atha bhikkhave,||
sattā sadevakā lokā samārakā sabrahmakā,||
sassamaṇabrāhmaṇī pajāya sadeva-manussāya nissaṭṭhā visaññuttā vippayuttā vimariyādikatena cetasā viharantī ti.|| ||


Contact:
E-mail
Copyright Statement   Webmaster's Page