Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
15. Anamat'agga-Saɱyuttaɱ
I. Paṭhama Vagga

Sutta 3

Assu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[179]

[1][pts][than] Evam me sutaɱ|| ||

Ekaɱ samayaɱ Sāvatthiyaɱ-|| ||

2. Anamat'aggoyaɱ bhikkhave, saɱsāro.|| ||

Pubbākoṭi na paññāyati avijjā-nīvaraṇānaɱ sattānaɱ taṇhā-saŋyojanānaɱ sandhāvataɱ saɱsarataɱ.|| ||

"Dīgha-rattaɱ vo bhikkhave,||
dukkhaɱ paccanubhūtaɱ".|| ||

3. Taɱ kiɱ maññatha bhikkhave,||
katamannu kho bahutaraɱ yaɱ vā kho iminā dīghena addhunā sandhāvataɱ saɱsarataɱ amanāpasampayogā manāpavippayogā kandantānaɱ rudantānaɱ assupassannaɱ paggharitaɱ,||
yaɱ vā catusu mahā-samuddesu udakan" ti?|| ||

4. "Yathā kho mayaɱ bhante,||
Bhagavatā dhammaɱ desitaɱ ājānāma,||
etad eva bhante,||
bahutaraɱ yaɱ no [180] iminā dīghena addhunā sandhāvataɱ saɱsarataɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakan" ti.|| ||

5. "Sādhu sādhu bhikkhave,||
sādhu kho me tumhe bhikkhave,||
evaɱ dhammaɱ desitaɱ ājānātha.|| ||

6. Etad eva bhikkhave,||
bahutaraɱ yaɱ vo iminā dīghena addhunā sandhāvataɱ saɱsarataɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

7. Dīgha-rattaɱ vo bhikkhave,||
mātumaraṇaɱ paccanubhūtaɱ.[ed1]|| ||

Etad eva bhikkhave,||
bahutaraɱ yaɱ tesaɱ vo mātumaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

8. Dīgha-rattaɱ vo bhikkhave,||
pitumaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo pitumaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

9. Dīgha-rattaɱ vo bhikkhave,||
bhātumaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo bhātumaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

10. Dīgha-rattaɱ vo bhikkhave,||
bhaginimaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo bhaginimaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

11. Dīgha-rattaɱ vo bhikkhave,||
puttamaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo puttamaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

12. Dīgha-rattaɱ vo bhikkhave,||
dhītumaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo dhītumaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

Dīgha-rattaɱ vo bhikkhave,||
ñātimaraṇaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo ñātimaraṇaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

Dīgha-rattaɱ vo bhikkhave,||
ñāti-vyasanaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo ñāti-vyasanaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

Dīgha-rattaɱ vo bhikkhave,||
bhoga-vyasanaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo bhoga-vyasanaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

Dīgha-rattaɱ vo bhikkhave,||
roga-vyasanaɱ paccanubhūtaɱ.|| ||

Etad eva bhikkhave,||
bahutaraɱ yaɱ tesaɱ vo roga-vyasanaɱ paccanubhontānaɱ amanāpasampayogā manāpavippayogā kandantānaɱ rodantānaɱ assupassannaɱ paggharitaɱ,||
na tv'eva catusu mahā-samuddesu udakaɱ.|| ||

Taɱ kissa hetu?|| ||

Anamat'aggoyaɱ bhikkhave,||
saɱsāro.|| ||

Pubbākoṭi na paññāyati avijjā-nīvaraṇānaɱ sattānaɱ taṇhā-saŋyojanānaɱ sandhāvataɱ saɱsarataɱ.|| ||

Yāvañ c'idaɱ bhikkhave,||
alam eva sabba-sankhāresu nibbindituɱ,||
alaɱ virajjituɱ,||
alaɱ vimuccitun" ti.|| ||

 


[ed1] This section is expanded according to the CSCD Pali. the PTS has only: Mātu-, Putta-, Dhitu-, Ñativyasanam; Bhogavyasanam; rogavyasanam.


Contact:
E-mail
Copyright Statement